 |
رواية يلا بينا نعرف نبينا الفصل الثاني والعشرون بقلم اسماءآ22 يلا صلو على النبي حادثة شق صدر النبي ﷺ (ج1) وقفنا المرة اللي فاتت على صرخة أخو النبي وبسرعة جرى على أمه وقال لها : محمد أتقتل .. طب ليه ؟ إيه اللي حصل ؟ "حادثة شق الصدر" أصل سيدنا محمد لما خرج مع أخوه من الرضاعة عشان يلعبوا ، فجأه وهما بيلعبوا النبى بيحكى ويقول : لاقيت رجلين لابسين أبيض في أبيض كأنهم نسرين ، قربوا مني ومسكونى من لبسي ونيموني على الأرض وقال واحد منهم : أهو هو ؟؟ ( يعنى هو ده ؟ ) ، فرد التانى وقاله نعم ،، هو .. طب مين الأتنين دول ؟ .. دول ملايكة .. وبعدين راح واحد منهم قايل للتانى : هات سكينة .. فبيحكى النبي وبيقول : ففتحوا صدري بالسكينة لحد السرة و طلعوا قلبي وغسلوه فى طبق كبير من ذهب بماء ثلج و برد .. وبعدين طلعوا حاجتين صغيرين من قلبى لونهم أسود ورموها وقالوا : ذلك نصيب الشيطان منك .. وبعدين رجعوا قلبي مكانه .. وواحد منهم راح قايل للتاني : أبدأ خيط الجرح .. على فكرة النبي لحد ما مات فضلت الخياطة معلمة في جسده الشريف .. كأنها عملية قلب مفتوح عملتها الملايكة .. طيب ليه حصلت حادثة شق الصدر؟ الله عز وجل قال : " إنَّا سَنُلْقِي عَلَيْكَ قَوْلًا ثَقِيلًا " .. والنبي بشر .. وأي قلب بشري طبيعى مش ممكن يقدر يتحمل ان كلام الله "القرآن " ينزل عليه .. قال تعالى : " لَوْ أَنزَلْنَا هَٰذَا الْقُرْآنَ عَلَىٰ جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ وَتِلْكَ الْأَمْثَالُ نَضْرِبُهَا لِلنَّاسِ لَعَلَّهُمْ يَتَفَكَّرُونَ " .. عشان كده كان لازم القلب ده يتعالج معالجة إلهية وعشان يقدر يتحمل نزول الوحي .. طب إزاي النبي مامتش ؟ .. لأن دي كانت معجزة .. والله على كل شئ قدير ( وفى العمليات دلوقتى بيفتحوا بطن الناس ويعالجوهم ومش بيموتوا ) .. وبعد ما الملايكة خيطت صدر النبي ختمت على كتفه بخاتم النبوة ( يعنى ختم النبوة ، خاتم النبوة ده موجود عند كل الأنبياء .. الخاتم ده بيبقى فى ظهر النبى ومكانه بيبقى قريب من الكتف .. وهو عبارة عن لحمة "ناتئة" يعني دايرة لحم بارز شويه عن الجسم حواليها دايرة من شعرات قصيرة وطولهم واحد .. والدايرة مظبوطة جداً كأن حد ناحتها .. وكان الختم ده عند كل الأنبياء ) .. طيب إيه اللى حصل بعد ما الملايكة عملت كل ده ؟ .. 23 يلا صلو على النبي .. حادثة شق صدر النبي ﷺ (ج2) ونكمل كلامنا بعد ما خلصت حادثة شق صدر النبي والملايكة خيطت صدره ﷺ .. كل ده حصل وكان مين واقف يتفرج ؟ أخوه .. فأول ما مشيوا صرخ جامد وقال يا أمي إلحقي ، قُتِل أخي ، قُتِل أخي القرشي .. بتقول حليمة فبسرعة جريت وأنا عمالة أصرخ وورايا زوجي .. فلما وصلنا لاقناه ﷺ واقف ووجهه أصفر ، فأول ما شافني جرى عليا وحط وشه فى عبايتى وفضل يعيط جامد قوى .. فنزلت على ركبتي وقلت له مابك ؟؟ فداك أبي يا محمد ( وكانت حليمة أول إنسانة تقول للنبي ﷺ " بأبي أنت وأمي " يعني بتفديه بأقرب وأحب ناس ليها ) .. فبدأ النبى يحكي لها اللي حصل ، فقالت لزوجها أنا حسة إن مسه جن .. فجوزها راح قايل لها : يا حليمة خديه ورجعيه لأهله قبل ما يحصله حاجة وحشة أكبر من كده .. بتقول حليمه : أخذت محمد ورجعت لأمه ورجع لقلبى الزعل والحزن تاني ، علشان كانت بتحبه قوى ومش عايزة تسيبه .. فلما وصلت حليمه لمكة دخلت على آمنه أم النبي فقالت آمنه : في أيه ؟ أنتي رجعتي بسرعة لمكة ليه ؟ فردت حليمه وقالت : خلاص محمد أتفطم ومبقاش محتاج يقعد عندى .. فقالت آمنه : لا والله انتى مخبيه حاجه ، قوليلى حصل ايه ؟ أنتي كنتي لسه عندي من شهرين بتتحايلي عليا يقعد عندك وقت أطول .. فضغطت آمنة على حليمة فبدأت حليمة تحكي وتقول أن محمد مسه جن .. قامت أم النبي عليه الصلاة والسلام بعد ما سمعت اللى حصل ردت علي حليمة رد شديد أوي أوي .. |
بدل ماتدور وتبحث علي الروايات خليها علي تليفونك وحمل تطبيقنا
