 |
رواية يلا بينا نعرف نبينا الفصل الثالث بقلم اسماء3 يلا صلوا على النبى .. أنا مينفعش أطلب منك تحب حد أنت متعرفهوش ، صح ؟ أصل لازم تعرف الحد ده عشان تحبه .. طيب عارف لو حبيت النبى عليه الصلاة والسلام أيه هى الثمرة اللى هتاخدها ؟! هتاخد حاجتين .. أولاً : قال رسول الله صلى الله عليه وسلم : " من صلى على صلاة واحدة صلى الله عليه عشر صلوات ، وحط عنه عشر خطيئات ، ورفعت له عشر درجات " .. لو بتحبه هتصلى عليه كتير ، فهتتغفرلك ذنوب كتير .. وتانى حاجة : قال النبى صلى الله عليه وسلم : " من أحبنى كان معى فى الجنة " .. فلو أحببت النبى أبشر أبشر بكل خير . طيب ندخل على السيرة أكتر .. نبدأ بإسم النبي ﷺ .. هو محمد بن عبد الله بن عبد المطلب بن قصى بن كلاب بن مرة بن كعب بن لؤى بن غالب بن فهر ، والفهر هو قريش ، يعنى لقبه قريش ، فالنبى قرشى .. طيب نقرب أكتر .. هنتكلم شويه قبل ما ندخل فى تفاصيل حياته ﷺ عن حب ربنا والصحابة وزوجات النبى للنبى صلى الله عليه و سلم .. وهنعرف أنه كان أحب الخلق لقلوبهم .. نبدأ بنبذه عن حب ربنا عز وجل للنبى محمد عليه الصلاة والسلام .. مره النبى صلى الله عليه وسلم كان بيدعى لنا ويقول : اللهم أمتى ، أمتى .. وبكى .. فتخيلوا يحصل ايه ؟ من فوق سبع سموات يقول الله عز وجل : " يا جبريل أذهب إلى محمد فقل له : إنا سنرضيك فى أمتك ولا نسوؤك " .. فالعلماء علقوا على الكلام ده وقالوا : ولن يرضى النبى صلى الله عليه وسلم أن يكون واحد من أمته فى النار .. وربنا بيحب النبى ولا يمكن ميراضيش النبى ﷺ .. تعرفوا أن ربنا سبحانه وتعالى أقسم بحياة النبى عليه الصلاة والسلام الشريفة .. فقال عز وجل : {لَعَمْرُكَ إِنَّهُمْ لَفِي سَكْرَتِهِمْ يَعْمَهُونَ} [سورةالحجر : 72]. كإن ربنا بيقول وحياتك يا محمد #يللا_بينا_نعرف_نبينا يلا صلوا على النبي •حب الصحابة للنبى سيدنا أبو بكر كان حبيب النبي .. كان أكتر واحد بيحبه ﷺ .. وكان له موقف وكلمه مشهورة قوي : بيقول سيدنا أبو بكر : كنا في الهجرة وأنا عطشان جداََ.. فجئت بمذقة لبن فناولتها للرسول ﷺ وقلت له : أشرب يا رسول الله ، يقول أبو بكر : " فشرب النبي حتى رضيت " .. أبو بكر كان بيحب النبي لدرجة أنه كان بيتعب لما النبي يتعب .. وكان بيخف لما النبي يخف .. ويضحك لما النبي يضحك .. كان بيحبه حب عجيب .. واحنا كمان عايزين ثمرة السيرة تكون إنك تحب النبي أكتر من نفسك .. وكان النبي ﷺ مش بيحب إن حد يخدمه .. لكن من حُب الناس له ، كان نفسهم يكونوا معاه في كل لحظة ، فكانوا بيصمموا يخدموه صَلَّى اللَّهُ عَلَيْهِ وَسَلَّمَ .. في قصتين لخادمين للرسول ، هنشوف منهم قد أيه الصحابة كانوا بيحبوا ﷺ .. كان فيه صحابي أسمه ثوبان .. ده خادم النبى ﷺ .. فمرة النبي خرج الصبح بدري ورجع متأخر جداً .. فلقى ثوبان بيبكي فقال له : يا ثوبان ما يُبكيك ؟ فقال ثوبان : أشتقت إليك يا رسول الله .. فقال النبي: أوغير ذلك ؟ فقال : تذكرت يوم القيامة وجعلت أتفكر في الآخرة وفي الجنة والنار وعلمت أنى إن دخلت الجنة فلن أكون معك في المنزلة يا رسول الله .. فأنت مع النبيين و الصديقين .. فأبتسم النبي وقال له : يا ثوبان أما علمت أن المرء يحشر مع من أحَب ؟! ( يعني احنا ممكن مانقدرش نبقى زى أبو بكر وعمر لكن ممكن نحب النبي قوى ، فبحبنا له نكون يوم القيامة مع ثوبان وأبو بكر وعمر وعلي ..) المهم رد ثوبان على النبي و قال : أوَحقاً يا رسول الله ؟! فقال النبي : أجل .. فيقول ثوبان : فخرجت في طرقات المدينة أصرخ بها بين الناس .. فما كان الصحابة أشد فرحةً بشئ أكثر من فرحتهم بهذا الحديث بعد الإسلام .. قال الله تبارك وتعالى : " وَمَنْ يُطِعِ اللَّهَ وَالرَّسُولَ فَأُولئِكَ مَعَ الَّذِينَ أَنْعَمَ اللَّهُ عَلَيْهِمْ مِنَ النَّبِيِّينَ وَالصِّدِّيقِينَ وَالشُّهَداءِ وَالصَّالِحِينَ وَحَسُنَ أُولئِكَ رَفِيقاً .. " [سورة النساء ٦٩] .. أما الصحابى التانى خادم الرسول فأسمه ربيعة بن كعب الأسلمى .. وهنحكى قصته الحلقة الجاية ان شاء الله .. نكمل بكرة ان شاء الله #السيرة_النبوية_بالعامية_لنورهان_الشيخ |
بدل ماتدور وتبحث علي الروايات خليها علي تليفونك وحمل تطبيقنا
