 |
رواية يلا بينا نعرف نبينا الفصل الخامس بقلم اسماء الحلقه 5 5 #يللا_بينا_نعرف_نبينا يلا صلوا على النبي نكمل حكايات الصحابة وحبهم للنبى صلى الله عليه و سلم .. •• كان في واحدة ست أسمها أُم سُليم .. دي تبقى أم أنس بن مالك الصحابي الشهير .. أم سُليم لما النبي دخل المدينة كان عندها أبن صغير عنده ٨ سنين أسمه أنس .. فراحت للنبي عليه الصلاة والسلام - وكانت كل ست من الأنصار تروح تدي للنبي هدية - فأم سُليم معهاش فلوس .. طيب تعمل إيه !! تروح للنبي وتديله أغلى حاجة عندها .. تديله ابنها أنس هدية .. وتقول له أتخذه خادماً يا رسول الله .. وتصر أنه ياخده ﷺ فيقبل النبى عليه الصلاة والسلام .. فبيقول أنس : عشت مع النبي ووالله لم يقل لي يوماً قط لِمَ فعلت هذا.. ولم يقل لي لِمَ لم تفعل هذا !! وفى مرة النبي قال لأنس ممكن تروح تنادي أبوبكر .. ف أنس بيحكى ويقول : أنا وقتها كنت صغير فخرجت لقيت صحابي بيلعبوا في الشارع فقعدت ألعب معاهم كتير وفات وقت طويل ونسيت اللى النبي طلبه منى .. والنبي كل ده مستني .. فالنبي عليه الصلاة و السلام خرج يشوف فين أنس فلقاه عمَّال يلعب .. فأنس بيقول : " والله جاءني من ظهري واحتضنني وخبأ عينيَّ وقال : من أنا ؟ فقال أنس : رسول الله .. فأنس دوَّر وشه ولسه حيتأسف .. فالنبي قال له : يا أُنيس لا عليك .. يا أٌنيس (بيدلعه) هلا تفعل ما طلبته منك ؟ فقال له : نعم يا رسول الله .. و طلع يجرى .. •• كان فيه صحابي أسمه زاهر .. زاهر ده من الصحابة المعدودين أوي اللي شكلهم مش جميل .. زاهر ماكانش إجتماعي أوي .. كان منطوي ودايماً يقعد لوحده .. وكان بيحس إنه مش محبوب .. ف مرة زاهر كان في السوق بيشتري حاجات .. فالنبي شافه وكان ﷺ عايز يضحك معاه .. ف يعمل إيه ﷺ !! يجي لزاهر من ظهره .. ويحضنه ويغمي عينيه الأتنين .. ويقول : من يشتري العبد ؟؟ من يبتاع مني هذا العبد ؟؟ .. فزاهر أتخض وقعد يحاول يفك نفسه ويقول : أرسلني أرسلني !! .. زاهر بيقول كنت كلما أحاول أن أفك نفسي منه كان يشتد أكثر .. لأن النبي ﷺ قوي جداً .. كان في قوة ٤٠ واحد زي عمر بن الخطاب .. ( وعمر كان قوى وضخم جداً لدرجة إنه كان عند الحلاق فأتنحنح فالحلاق أُغمي عليه من الهيبه .. وكمان الشيطان كان بيخاف من سيدنا عمر .. النبي قال : يا ابن الخطاب ما لقيك الشيطان سالكاً فجّا قط إلا سلك فجّاً غير فجك ) .. فالنبى كان قوى جداً وعمره ما أستغل قوته أبداً .. السيدة عائشة رضي الله عنها قالت : أنَّ النَّبي ﷺ ما ضرب أحدًا -لا خادمًا ولا غيره- بيده .. إلَّا أن يجاهد في سبيل الله .. المهم فقال زاهر : فشممت كفه فعرفت أنه رسول الله .. عارفين عرفه منين ؟! أصل النبي مش زينَّا ..النبي مسام إيديه مش بتفرز عرق زى العرق بتاعنا .. دى بتفرز مسك .. وكان كف أيده ﷺ ألين من الحرير كأنما أخرجه من علبة عطر .. فقال زاهر : فلما عرفت أنه رسول الله جعلت أدخل في حضنه ( يزق ضهره فى حضن النبي ) فالنبي فهم وضحك ووسع إيديه .. فقال زاهر : تبيعني يا رسول الله ؟! فضحك النبى ﷺ .. وقال زاهر : يا رسول الله لئن بعتني لوجدتني كاسداً يا رسول الله (علشان هو مش جميل شكلاً ).. فقال النبي : لا يا زاهر ولكنك عند الله غال .. |
بدل ماتدور وتبحث علي الروايات خليها علي تليفونك وحمل تطبيقنا
