القصر الجزء الثاني والاخير
دا .. دا .. دا صوت بابا .. أيوة .. دا صوت باابا .. جريت وأنا بنادى عليه .. كان في باب خشب بيفصل بينى وبين صوت بابا .. فتحت الباب وأنا بنادى عليه .. حسيت بحراره شديده خرجت من جوه لما فتحت الباب .. لاحظت إن المكان جوه مافيهوش نور .. مسكت شمعه .. وأول حاجه عينى وقعت عليها .. هو تابوت !! .
تابوت خشب كبير مقفول .. بعدت نظرى عنه وأنا بلوح بالشمعه قدامى وبنادى على بابا .. لكن ماكنش بيرُد عليا .. المكان ضيق جدا ماكنش فيه أصلا غير التابوت دا .. جيت علشان أخرج سمعت من ورايا صوت خربشه جوه التابوت !! .. رجعت علشان أبص .. أكتشفت إن فى فتحه ف التابوت من تحت !! .
وفى حاجه بتحاول تخرج من الفتحه !! .. وجهت الشمعه للفتحه وأنا بقرب ببطء .. ثوانى ولقيت فار كبير بيخرج من الفتحه !! .. ووراه فار تانى .. وتالت .. أكتر من 10 فيران بيخرجو ورا بعض من التابوت .. بعد ما خرجو رجعت أبص تانى جوه الفتحه .. شوفت حاجه خليتنى أقول لنفسي مستحيل .. شوفت إيد مفروده جوه التابوت و أأأ .. والساعة إللى بابا دايما كان بيلبسها ملفوفه حوالين الإيد دى !!!!!!!!!!!!! .
قُمت وقفت .. حاولت أشيل الجزء العلوى من التابوت علشان أتأكد .. حاولت لكن ماقدرتش .. فجأه المكان اللى أنا فيه بدأ يتهز .. رجعت للمركبه بسرعه .. قبل ما أركب .. بصيت على البحر .. لقيت مجموعه كبيره جدا من الجثث قابيين على وش المايا !!! .. وشوشهم سوده جدا .. أجسامهم منفوخه .. عيونهم مبرئه و .... وباصيين علياااا !!!!! .
لحد ما اتأكد إن عيونهم مش باصه عليا لأ .. دول باصيين على حاجه ورايا .. حسيت بخطوات بتقرب عليا من ورايا .. حرارة جسم شديده لمست ضهرى .. الإيد اللى لابسا الساعه لقيتها على كتفي لكن كانت سوووده جدااا .. متفحمه !!!! .
وصوت غليظ جدا بيقول : سامحيينى يا زاجوااا !! .
ماقدرتش أبُص .. ماكنتش قادره أشوفه .. ماكنتش عايزه أسيب صوره ليه ف خيالى زى ماكنت واقفه ومتوقعه شكله .. وبدون أى مقدمات .. غرز سكينه ف ضهرى !!! .. وكل الجثث اللى ف البحر بدأو يصرخو .. غربان سوده بيخرجو من ورا الشجر وبيقربو منى !! .
فوقت لقيت نفسي نايمه على السرير .. لما بصيت حواليا وأكتشفت إنه كان كابوس لقيت عم مُراد صاحب جدو وهو اللي جابني هنا واقف قصاد السرير وبيبُصلى .. قبل ما أتكلم لقيته بيقولى :
_ ياسميين .. أهربى فورا .
قولتله وأنا مستغربه :
_ أهرب من إيه .. من مين ؟ .
قالى :
_ أسمعى اللى بقولك عليه من غير نقاش .. لو ماهربتيش النهارده هتقتلك !! .. مش مهم تعرفى .. يلا بسرعه تعالى ورايا .
قلقت من كلامه .. صدمة موت بابا مع الكابوس اللى شوفته خلانى مش مركزه فى اللى بيحصل حواليا .. ركبت معاه العربيه وبدأنا نبعد عن القصر .. لقيته بيقولى :
_ لازم تتأكدى يا ياسميين إن عمتك دى شيطانه .. هى السبب ف موت أبوكى ومن قبله جدك !!.
قولتله :
* إييييه .. أنت بتقول إييه .. قصدك إن هى اللى قتلت بابا .
قالى :
_ عمتك بتعمل سحر غجرى .. السحر دا من أقدم وأقوى أنواع السحر ف العالم .. ماحدش يسمع عنه .. بتحط السحر دا جوه مشروب ف يوم معين من الشهر .. واللى يشربه بيتلعن وبينتهى بيه المطاف بإنه بينتحر بإرادته وسط مجموعه كبيره من السحره والطقوس الغجريه !!! .. المركبه اللى بتشوفيها بتتحرك لواحديها .. ليلة موت أبوكى .. كان راكب فيها .. بعد ما شرب قهوه جواها سحر الزاجواا !! .
قولتله بإستغراب :
* الزاجوا .. دا الإسم اللي كان بابا بيدلعني بيه.. وبيقولهولي دايماً قبل مايموت!!!!!
سكت لثوانى .. فرمل .. بصلى وقالى :
_ اللى ماكنتش عايزك تعرفيه إن جدك هو اللى كان عارف أصل وفصل النوع دا من السحر الغجرى .. ف مره شوفته واقف وماسك ف إيده حتة قُماشه فيها دم ناشف .. خرج من جيبه شوية بُن ف كيس صغير وفرك الدم دا جوه البُن وهو بيتمتم بكلام مش مفهوم .. ماكُنتش أعرف هو بيعمل إيه وليه متدارى بالشكل دا .. بعدها بكام يوم لقينا جثة مراته مرميه على الجزيره .. قاطعه شراينها !!! .
وبعد كام يوم لقينا جثة جدك ف أوضته .. شانق نفسه .. واللى حتطله السحر كانت بنته كارلا .. بعد ما أبوها علّمها .. وبدأت الجثث تتوالى ورا بعضيهم كل شهر 3 جثث بنلاقيهم قابيين على وش المايا .. لأ نعرف هما مين ولا جم منين .. يعنى جثه كل أول عشر أيام من الشهر .. والسبب ف كل دا عمتك كارلا .. والنهارده نهاية اليوم العاشر ف أول الشهر .. ياسميين أنا دلوقتى هوصلك لواحده عزيزه عليا .. هتفضلى عندها بعد ما الليله دى بالذات تعدى .. هحجزلك أول طياره رايحه على مصر .
قولتله بعد ما لقيته سكت :
* أنت ليه بتعمل معايا كدا .. ليه ماكنتش بتتكلم معايا .. وف كل مكان بتروح معاها .. ليه بتحاول تنقذنى قبل الساعات الأخيره ؟
قالى بأسي :
_ ماكنتش أتخيل يوم من الأيام إن بنتى ومراتى يروحو منى بسبب الزاجوا .. كارلا قضت عليهم .. اللى خلانى أعمل كدا إنك شبه بنتى تغريد الله يرحمها .. وكان لازم ييجى الوقت المناسب اللى أخد طارهم .. وأظن الوقت دا جيه خلاص .
وصلنى لواحده ست عجوزه وسابنى عندها ورجع للقصر تانى .. ماكنش عارف إنها شربتنى عصير ومن بعدها شوفت الكابوس المرعب اللى شوفته .. حاسه بحاجه بتجرى جوه دمى .. الدم بيغلى ف عروقى .. كان لازم أرجع وأخد حق أبويا .. فعلا رجعت .. بصتلى بخبث .. عينى كانت بتزغلل لما كنت ببصلها .. اتفاجئ عم مُراد لما شافنى .. لقيته بيجرى عليها وبيكتّفها .
وقبل ما أى حاجه تحصل قتلتها .. أيوه غزيتها بسكينه ف قلبها .. رميناها ف البحر .. اما أنا فرجعت مصر تانى .. رجعت بعد الأيام اللى عشتها هناك ف القصر .. بعد ما أخد طار أبويا منها .. ودلوقتى قبل ما أكتب كل الكلام دا .. وبعد ما فات 3 شهور .. وأنا بقلب بالصدفه ف شنطتى .. لقيت ورقه .. أفتكرت الورقه اللى أدتهالى بعد ما شرّبتنى العصير .. فتحتها وقريتها .. كانت رساله من بابا .. بيحذرنى من صاحب جدى .. بيقولى فيها إنه قتل مرات صاحبه .. ومن بعدها قتل جدى .. وإن بابا أكتشف كل دا متأخر .. وإن الوقت اللي بيكتبلي فيه الحواب حس إن سحر الزاجوا بيجرى ف دمه ف الوقت اللى بيشرب فيه قهوته وهو بيكتب كلامه دا ليا !!!!! .
تمت..
