جوهره الجزء الثالث والاخير
(3) والأخير
حاجه جوايا سيطرت عليا .. لقيتني بمسك الخنجر وبدبح الكبش الأسود من رقابته !!
كأنه مستسلم تماماً .. قمت وعورت نفسي .. خلطت دمي بدم الكبش .. جيت الكتاب وبدأت أقول كلام غريب .. كلام اول مره تشوفه .. لكن كأني بقالي مية سنه بقراه .. طلسم .. انا بقرأ طلسم .. بمسح الدم المخلوط بإيدي وبطبعه على الجثه .. حاسه ان المكان بيضيق بيا .. ضوء الشمع بيتحرك .. بدأت أسمع صوت صرخات مفزعه .. الجثه بتتحرك !!
دخان الشمع بيشكل اجسام هلاميه بتدخل جوه الجثه .. بدأ صوتي يعلي بالطلسم أكتر .. بطني علي وشك انها تنفجر .. وجع رهيب .. جلد وشي كأنه بيسيح .. نفسي بيقل .. بخلط الدم بصفحات الكتاب .. بقرب الورق عند لهب الشمعه .. النار مسكت ف الكتاب .. سامعه اصوات من بره الباب .. صوت قرءان .. لكن مش عايزه اسمعه .. بقول ف نفسي كفايا مش عايزه اسمعه ..
الكتاب اتحول لرماد .. بدأت امسك الرماد بقبضة ايدي وانفخ ف الجثه وأقول بصوت عالي " الوحي .. الوحي ، العجل .. العجل ، الساعه .. الساعه " !!!!
بعدها أسودت الدنيا ف وشي .. اخر منظر شوفته صوابع الجثه وهي بتتحرك وصوت جهوري بيضحك !!! .
قالولي اني كنت بحلم .. قالولي اني كنت بخطرف .. وانهم سمعو صوتي بتكلم .. بقول كلام غريب .. قالولي كمان ان في دم غزير كان بينزل مني .. بالتحديد عند بطني .. كانو خايفين مني .. كانو خايفين مني لدرجة انهم كتفوني !!
مستحيل اللي حصل دا يكون مجرد حلم او كابوس لا .. انا واثقه انه حقيقه .. زاي ما انا واثقه مليون ف الميه ان الجثه اللي اتحركت دي هي جثة جدي حمدان !!!
انا رجعت اتكلم تاني واسمع كمان .. قالولي اني قضيت على اللعنه !
لعنه .. لعنة ايه !!
انا رجعت القاهره انا واكرم .. ماقولتش لحد اللي شوفته واللي عملته .. أكرم رجع أكرم تاني .. بعد ما كان ساكت طول الوقت .. كنت متأكده ان ورا سكوته دا لغز كبير فهمته لما رجعت بيت العيله . اللي ما قولتهوش ف اول كلامي ان المشهد الخامس اللي كنت بشوفه هو بيت العيله .. بس هو ليه اكرم فرحان كدا .. فاكر ان الوضع خلاص اتحسن هو قالي كدا .. مايعرفش اني بقيت الوسيطه اللي من خلالها حييت روح جدي من جديد !!!
و اكيد ان مهمتي أنتهت لحد كدا .
مش هكدب وأقول إنى ماكنتش عارف الحكايه من أولها .. يوم سبت بالتحديد 7/2/2015 جالى تليفون وأنا ف الشغل .. تليفون من حمايا .. بدأ الكلام معايا بإنه بيقولى " أكرم , جوهره ف مشكله كبيره .. لما سألته وأنا مستغرب ( يعنى إيه جوهره ف مشكله ) .. لقيته بيحكيلى حكايه غريبه جدا .. مُقبضه أكتر .. بيقولى :
_ الموضوع طويل أوى .. حمدان باشا الأسيوطي .. إسم كان يهابه الناس كلها .. راجل والعياذ بالله غاوي سحر أسود والإستعانه بالجن ف كل حاجه .. كان رهيب .. شيطان متجسد ف صورة إنسان ماشي على الأرض .. كان عايش هو ومراته وبنته ف فيلا كبيره .. مراته وبنته شافو الويل من أفعاله .. فى يوم من الأيام شافته ( نجاة ) بنته وهو بيدخل من باب الفيلا الفجر .. وشايل على كتفه جُثه متكفنه !! .
صرخت بأعلى صوتها .. لكن اللى أستغربت هى منه إن أبوها ماسمعهاش .. وكمل طريقه للبدروم .. فضلت تسمع أصوات غليظه بتتكلم .. وخيالات طويله بتحوم حواليها .. تخيل عيشتهم مع الراجل دا كانت عامله إزاى .
عدت السنين .. كبر حمدان وعجز .. كان بيحبس نفسه بالأيام من غير أكل ولا شُرب جوه البدروم .. وياويلها اللى تقرب من البدروم .. لحد ما ف يوم أختفي فيه حمدان الأسيوطي تماما !!
كأن الأرض أنشقت وبلعته .. فضل على أختفاؤه أكتر من 3 شهور ! .. وقتها الناس بدأو يشمو ريحه بشعه جدا .. ريحه بشعه ظهرت فجأه فى البدروم .. لما أتجرؤو وفتحو البدروم ماحدش قدر يقعد ف الفيلا من بشاعة الريحه .. بعد ساعات نزلو البدروم .. لقيو أشلاء لجثث كتيره جدا ف كُل مكان !! .
جُثث لبنى أدميين وحيوانات كمان .. منهم اللي متحلل ومنهم اللى الدود بياكُل ف جسمه ومنهم اللي كأنه ميت من ساعات بس !! .. مدبحه بشريه رهيبه .. مُعظم الجثث دي مقطوع منهم عضو من أعضائهُم .. إشي عين .. إشي رجل .. إشى إيد .. إشي لسان !!!! .
والأفظع من كدا إنهم لقيو جُثث مش كامله .. بمعنى أدق متاكل منهم أجزاء .. بمعنى تانى أوضح إن في حد كان بياكُل لحم الجُثث دي .. من غير ماتخمن كتير مافيش غيره !!! .
بس لاحظو كُلهم وجود كلمه على كل جُثه وهى " سأعود " ! .. بالإضافه إنهم لقيو صور شخصيه كتيره مرميه ف كُل مكان .. صور لأشخاص ماحدش قدر يتعرف عليهم .. مكتوب على كل صوره طلاسم ورسومات غريبه وجمب الرسومات دي كلام بشع زاي ( سرطان , عُقم , أنتحار , حرق وهكذا !! ) .
حاجات تقشعر الجسم .. بلاوي زرقا , بلاوي بتخليك تتخيل منظر الراجل دا وأد إيه هو ملعون .. شيطان رجيم .
بعد اللى حصل قررو يقفلو البدروم نهائي .. ومن ساعتها الوضع أستقر تماما .
كبرت نجاة بنته وأتجوزتها .. كانت بتحكيلى كل يوم عن اللى كانت بتشوفه من تحت راس أبوها الملعون ..
المهم إن بعد 9 شهور بفضل الله جبنا " جوهره " مراتك .
بس حصل حاجه مريعه .. بعد ما أتولدت جوهره بيوم .. ف اليوم دا شوفت كابوس رهيب " شوفت نفسي واقف ف قبر .. و شخص ضخم .. لابس عبايه سوده مغطيه وشه بالكامل .. بيلف حوالين جُثه لحد ما وقف عند رجل الجُثه دي .. خرج من جيبه خنجر ضخم وبدأ يقطع رجل الجُثه بتلذذ مرعب .. والشيء الأفظع إنه رفع الرجل بإيده الإتنين ف الهوا .. وبدأت تظهر بنت ف العشرينات من عمرها ماسكه كتاب أسود كبير جدا .. بتقرأ فيه كلام مُقبض .. طلاسم أيوه مايتقالش عليها غير طلاسم !! .
وقفت ورا الشخص اللى واقف وماسك رجل الجُثه وهى بتقري بصوت عالى .. سامع تردد لصوتها كأنه صدي .. وف لحظه أتحرقت رجل الجُثه ف إيد الشخص دا !!!! .
كُنت حاسس إن المشهد اللى قُدامي دا حقيقي مش مجرد كابوس .. حاولت أهرب ماقدرتش .. أكتشفت متأخر إني مربوط بسلاسل من إيدي .. وتحت مني حُفره غويييطه .. ف أخرها شايف إيادي كتيره وكأنهم مستنينى أقع .
أنتهي الكابوس بإني وقعت فعلا .. بس فُقت قبل ما إيديهم تلمسنى .. واللى أكتشفته بعد ما حكيت الكابوس دا لنجاة .. لقيتها بتحكيلى نفس التفاصيل !! .. بل هى كانت زاي الل بتفكرنى لو نسيت حاجه .. ومش أنا ونجاة بس لأ وحماتي كمان !! .
واللى كُلنا أجمعنا عليه وإحنا صامتين إن البنت دي هى جوهره !! .. شيء يقينى جوانا بيجبرنا على إن دي هى جوهره .
بعد سنين بدأنا ننسي بفعل الزمن .. وكبرت جوهره وجيت أنت وأتجوزتو .. وأأأأأأأأأ .
قاطعته بعد صمت طال : أنت قلقتنى يا عمي .. و إيييه ..
رد بنبرة حُزن وقال :
_ من يومين شوفنا إحنا ال 3 نفس الكابوس مره تانيه .. صحي جوانا أيام التُراب كان مغطيها .. حمدان الأسيوطي ناوي على كارثه .. ناوي يرجع مره تانيه لأعماله البشعه .. أختار حفيدته علشان تساعده على إيييه .. مش قادر أفهم .. بس كُل اللي حاصل بيبين إنه ناوي على شر عُمرنا ما هنقدر نتوقعه ابداً .
ماكُنتش مصدق كلامه أو كُنت بقول لنفسي كدا عشان أطمن نفسي .. لكن اللى حصل إني شوفت نفس الكابوس اللى حمايا حكاهولى بالتفصيل الممل !!!! .
قررت أخد أجازه أسبوع وأقعد جمب جوهره .. كُنت بتعمد أسكت قُدامها علشان تفهم هى إن في حاجه مش طبيعيه .. وف نفس الوقت رجحت إنى ما حكيلهاش حاجه خالص .. وأنا عارف ومُتأكد إنها بتشوف حاجات مرعبه .. بستناها لما تنام وأصحي أنا أبص عليها ألاقيها بتضحك وبتتكلم بصوت غريب ومرعب !! .
لما عرفت إنها فقدت السمع والنطق .. كلمت حمايا وقولتلهم إننا لازم ننهى المهزله دي تماماً .. فكرت ففكره دعيت أكتر من مره إنها تنجح .. هناك بدأت اللعنه وهناك لازم تنتهى .. ورجعنا للبيت .. زادت جوهره ف أفعالها الغريبه .. اتأكدنا إن الحكايه قربت تخلص .
ف يوم سمعت وهى نايمه إنها بتئن .. بتزوووم .. عرق غزير مغرقها .. دم أسود بيظهر ف إيديها فجأه !! .
ناديت عليهم وربطناها بالعافيه .. بدأت أقولهم :
- لازم نقرأ القرءان دلوقتى .
وفعلا بدأنا نقرأ كُلنا قرءان ف نفس واحد وبصوت عالى .. كنت فاكر إنى بكدا هقدر أحرقه .. كنت متأكد إنها شايفاه وإحنا بنقرأ القرءان .. ما إحنا مافيش حاجه بإيدينا غير كدا .
لقينا جوهره بتفتح عنيها .. سمعها ونطقها رجعو .. حمدت ربنا .. الفكره اللى فكرت فيها نجحت الحمدلله .. ورجعنا بيتنا ف القاهره .. وعدت الأيام بهدوء ورجعنا زاي الأول وأحسن .
لكن اللى ماعملتش حسابه مذكرات جوهره اللى لقيتها على السرير ف يوم جيت فيه من الشغل .. فضلت أقري وأقري لحد ما أتصدمت من أخر كلام ليها ف المذكرات !! .
مابقتش فاهم يعنى إيه .. يعنى هى بكدا رجعت روحه مره تانيه .. يعنى هى كدا أدت مهمتها زاي ماهى قالت .. يعنى كانت وسيطه لجدها .. إيه دا ثوانى كدا .. يعنى السبب الحقيقي فى أختفاء جوهره 5 شهور هو جدها !!!!!!! .
تمت..
