 |
| لاقيس |
أكرم وصل بيت أهله، مرعوب .. بيترعش .. أخوه عمر فتح له الباب..أمه كانت نايمة، متعرفش إنه جاي .. بس عمر مستغرب .. هو أكرم ماله؟ إيه اللي خلاه ياخد قرار إنه ينام عندهم النهاردة .. ويقطع مسافة سبعين كيلو بالعربية.._ أنا هنام معاك في أوضتك يا عمر.._ يا ابني سلم الأول .. خد نفسك .. اسأل عن أمك .. اسألني عامل ايه.._ معلش يا عمر سامحني .. أنا مش عارف أتلم على أعصابي..دخلوا أوضة عمر .. وبدأ أكرم يحكي له عن اللي حصل .. وأكرم بيضحك عليه بصوت عالي.._ هاهاهاهاهاهاها .. لاقيس مين وإبليس مين يا أكرم .. انت راجل متعلم عيب عليك .. وتظهر في شكل ديمة ليه؟_ مش هستحمل أي تريقة يا عمر .. أنا فيا اللي مكفيني .._ معلش يا أكرم بس انت بتقول كلام غريب.. _ هو أنا هكدب عليك يا عمر؟ متعصبنيش.._ مش بتكدب .. بس ممكن تكون حاسس بالذنب ناحية ديمة .. أو هي صعبانة عليك .. أو بتفكر فيها.._ أنا فعلا زعلان علشانها .. دي كانت هتبقى مراتي.._ يا آخي بطل الجحود اللي فيك ده .. دي بقت مراتك فعلا يا أكرم.._ مش عايز فلسفة يا عمر .. أنا فاصل ومش شايف قدامي .. أنا هنام جنبك هنا ع السرير..أكرم نام بهدومه على السرير من شدة التعب .. وعمر كان طالع برة .. أكرم اتخض لما شافه طالع.._ انت رايح فين يا عمر .._ رايح الحمام.._ لا يا عمر .. متسيبنيش لوحدي.._ ماشي يا أكرم .. بس أنا شربت ستين كوباية عصير النهاردة .. هروح الحمام وارجع لك.._ معلش يا عمر .. خلي الحمام الصبح .. أرجوك متخرجش دلوقتي وتسيبني لوحدي..عمر على أعصابه .. مش مستحمل .. ومع ذلك رجع .. وحاول ينام..أكرم غمض عينيه ونام في دقايق .. وعمر مش قادر يقاوم الشعور إنه يروح الحمام.. وفاتح عينه باصص للسقف..فجأة..ظهرت لاقيس في الأوضة تبص لعمر بعيون مفتوحة .. وهي بتقطع في لحم وشها..عمر بيدعك عينه بصوابعه .. مش مستوعب اللي شايفه..لاقيس بتنهش وشها بصوابعها .. ولحم وشها بينزل .. والدم بيغرق هدومها ..عمر بدأ يتأكد إن فعلا في حد قدامه وبيعمل كده .. شبه ديمة بالظبط..عمر بيترعش .. أسنانه بدأت تخبط في بعض .. طك طك طك طك._ ديمة .. ازيك؟ بتعملي في نفسك كده ليه؟ وكنتي فين كل ده؟_ أنا مش ديمة .. أنا لاقيس.._ راقيص .. راقيص ازاي؟_ أنا لاقيس يا حمار .. لاقيس بنت إبليس.._ لاقيس بنت أونكل إبليس حبيبي .. أهلا بيكي.._ انت بتحب أونكل إبليس بجد؟عمر بيترعش زي اللي واقف عريان فوق جليد القطب الشمالي.._ ءأ ءأنا .. بحبه أوي .. ءأنا بحب أونكل إبليس أوي ورحمة بابا..عمر بدأ يبكي زي الأطفال.._ يا ماما .. يا ماااااااماااااا .._ انت خايف؟
