الحلقة الأخيرة
هيثم نازل ورا راجح وهو متعصب عليه، علشان يعرف أمانة ايه اللي عايزها من مراته..
_ ما تتكلم ياض انت .. أمانة ايه اللي عايزها من نسرين مراتي؟
_ انت تروح لها بيت أهلها دلوقتي، وتسألها بنفسك .. ده لو كان عندك دم ونخوة..
(هيثم بيخبط راجح على كتفه، ويخرج جري، رايح بيت مراته)
ــــــــــــــــــــــــــــــــــــــــــــــــ
هناء في المطبخ بتجهز أكل لأبوها، وبتحضر له أدوية الميعاد، ومنهم علبة الدوا اللي راجح حط فيها الدم الفاسد..
هناء بتجمع حبوب العلاج والأشربة اللي ده ميعادهم، وبتحطهم على جنب الأكل على ترابيزة صغيرة في أوضة نوم أبوها..
(الأب بدأ ياكل، وهناء راحت تعمل له مشروب أعشاب، يشربه بعد الأكل حسب توصية الطبيب المعالج)
بعد ما خلص الأكل، بدأ يفتح علب الدواء ويشرب منها..
لحد ما وصل لعلبة الدوا اللي فيها الدم الفاسد..
بيفتحها، اتفاجيء بريحة معفنة طالعة منها، بيتقرف منها ويقفل العلبة بسرعة ويرميها من يده ... وينادي على هناء بصوت عالي مع نرفذة..
_ يا هناء .. هناء .. يا هنااااء
(هناء جات بسرعة وفي ايدها المشروب السخن)
_ نعم يا بابا ..
_ ايه القرف اللي انتي جايباه لي في العلاج ده..
(بيشاور لها ع العلبة ... وهي بتفتحها، بتبص عليها، بتفتحها وتفاجئت بالريحة اللي في العلبة)
_ ايه القرف ده؟
_ انتي بتسأليني أنا؟
(هناء بتبص في العلبة بتتأكد من صلاحية العلاج)
_ دي حتى صلاحيته سارية لبعد سنتين، هي باظت بسرعة ازاي؟
_ دي مش باظت يا هناء.. اللي في العلبة ده مش دوا يا بنتي.
_ مش دوا ازاي يا بابا؟
_ مش عارف، اتصلي بآدم خطيبك ييجي حالا..
_ آدم! ليه كده؟
_ هتعرفي كل حاجة لما ييجي..
_ حاضر يا بابا .. اللي تشوفه.
(خرجت هناء من أوضة أبوها واتصلت بآدم وطلبت منه يحضر حالا علشان أبوها عايزه)
ــــــــــــــــــــــــــــــــــــــــــــ
هيثم عند مراته في بيت أهلها، وبيتخانق معاها بصوت عالي..
_ اتكلمي يا نسرين، الولد راجح طلب منك ايه؟
_ مش هقولك يا هيثم بجد .. لأن دي أمانة ومحلفني مقولش عليها لحد..
_ أنا آخر حاجة ممكن أتصورها انك تشتركي مع المجرم ده في مؤامرة على بابا يا نسرين ..
(نسرين مستغربة)
_ مؤامرة؟ على باباك انت؟ ايه الكلام اللي بتقوله ده؟
_ أيوة مؤامرة يا نسرين .. مؤامرة حقيرة بتدبريها انت والحيوان اللي اسمه راجح .. عايزين تقتلوا بابا .. مستعجلين ع الورث..
(نسرين بتثور عليه)
_ ايه الكلام اللي بتقوله ده .. أنا أول مرة أعرف اللي بتحكي عنه ده
_ أنا خلاص اتأكدت يا نسرين ... والباشا طلب منك تجيبي له عبوة دم فاسد يحطها ل بابا في الشاي، وأكد لي انك هترفضي تقولي لي السر .. انتي طالق يا نسرين .. طالق.
(هيثم بيسيب نسرين ويخرج وهو في قمة الغضب)
ـــــــــــــــــــــــــــــــــــــــــــ
راجح قاعد ع القهوة سرحان، وبيتكلم في الفون ...
_ أيوة يا مرات بابا .. ما انا عملت كده بالظبط لكن مفيش فايدة كل حاجة باظت .. حاضر هكلم هناء دلوقتي أشوفها..
حاضر يا مرات بابا ...أنا مش هجيب لك حاجة معايا يا مرات بابا ... لو عايزة أي حاجة من برة اطلبيها من ابنك هيثم .
(راجح بيقفل الفون مع مرات أبوه وبيضحك ضحكة ساخرة)
_ هاهاهاهاها الست دي واخدها العشم أوي .. عايزاني أروح أجيب لها علاج العظام بتاعها من الصيدلية ... فاكراني بحبها .. ده أنا الود ودي أحط لك برميل دم فاسد في الشاي بتاعك ..
(تليفون راجح بيرن، بيبص بيلاقي أمه بتتصل بيه عايزاه ييجي البيت حالا، علشان آدم قاعد مع أبوه في الأوضة ومعاهم هناء، وقافلين على نفسهم)
ــــــــــــــــــــــــــــــــــــــــــــــــ
في أوضة الأب في البيت، كانت هناء وخطيبها واقفين حواليه..
_ عايزك يا آدم يا ابني تروح للطبيب الشرعي صاحب أبوك اللي حضر خطوبتك انت وهناء .. وتخليه يشوف العبوة دي فيها ايه؟ وتستفسر منه على كل حاجة، وتيجي تبلغني بيها..
_ حاضر يا عمي اللي تشوفه..
_ متتأخرش عليا يا آدم ..
_ مسافة السكة يا عمي .. أنا هكلمه واشوف هو فين، ومش هسيبه غير اما اعرف منه كل حاجة..
(آدم بياخد عبوة الدوا ويخرج بيها بسرعة)
ـــــــــــــــــــــــــــــــــــــــ
راجح بيقابل آدم في مدخل البيت...
_ انت ايه اللي جابك بيتنا يا بني ادم انت ... هو انت مش بتفهم ولا ايه؟ مش هيثم اخويا قال لك خلي عندك دم وفارقنا، ومعندناش بنات للجواز؟
_ أنا ادخل واخرج براحتي، لأن صاحب البيت، اللي هو حمايا العزيز عايزني أدخل أزوره .. وموافق على جوازي من بنته .. ثم إن هناء موافقة، يبقى كلامك وكلام أخوك هيثم لا هيقدم ولا هيأخر.
(راجح بيطلع مطواة من جيبه، وبيهدد بيها آدم)
_ لو شفتك داخل البيت ده تاني، هخلي المطوة دي تسكن في قلبك المرهف ده، اللي بيحب اختي هناء ده..
(ادم بيبص له من فوق لتحت، وبيدفعه من قدامه، ويسيبه ويمشي)
ــــــــــــــــــــــــــــــــــــــــــــ
نسرين بتتصل بهناء وهي بتبكي بكاء شديد، وبتحكي لها ع اللي حصل من هيثم..
هناء مش مصدقة اللي بتسمعه، ازاي يكون راجح بيخطط لقتل أبوه بدم فاسد، ونسرين دلوقتي بتحذرها..
_ ينفع كده يا هناء ... يرمي عليا يمين الطلاق، ويتهمني إني بتآمر مع راجح على قتل أبوكي، ده جزاء صبري عليه السنين دي كلها ... يعني عارفة انه ماشي مع واحدة زميلته في الشغل وساكتة مش عايزة اتكلم .. وفي الاخر يتهمني تهمة شنيعة زي دي .. يقول لي اني بجيب دم فاسد لراجح علشان يحطه لأبوه في الشاي..
(هناء مذهولة م اللي بتسمعه .. بس بدأت تفهم ايه اللي كان في علبة الدواء)
_ أنا مش فاهمة يا نسرين انتي بتتكلمي عن ايه؟
_ انتي لازم تيجي تزوريني في البيت يا هناء، وانا افهمك على كل حاجة.
_ أنا مش هقدر اسيب بابا يا نسرين .. بس أرجوكي تفهميني عن كل حاجة.
_ أخوكي هيثم بيسرق فلوس من أبوه من يوم ما دخل في المرض جديد ... وكان بيسرق حاجات من مخازن المصنع اللي في عهدته ويروح يبيعها لحسابه الشخصي .. ويصرف الفلوس على بنت ماشية شمال زميلته في الشغل .. والتفاصيل دي حكى لي عنها راجح .. وبعت لي صوره مع البنت دي علشان يحذرني منه..
والنهاردة أخوكي جاي يتهمني اني بتآمر مع راجح على أبوكي .. علشان راجح طلب مني أمانة أجيبها له ... وانا رفضت أقول لهيثم ايه هي الأمانة دي..
_ أمانة؟؟؟ أمانة ايه دي اللي طلبها منك راجح يا نسرين؟
_ راجح طلب مني أجيب لك هدية على ذوقي، يقدمها لك يوم جوازك .. وقال لي بس ما تشتريش الهدية غير بعد ما اتصل بيكي أقول لك اشتريها يلا ... وحلفني إني ما اقولش لحد عن الهدية علشان تبقى مفاجأة.
(هناء سمعت صوت أبوها بينادي عليها، وقفلت الفون مع نسرين)
ــــــــــــــــــــــــــــــــــــ
يبدو إن نسرين كانت شريكة هيثم في الحاجات اللي بيسرقها، وساكتة وراضية عن كل اللي بيعمله..
صبرت على خيانته من غير ما تواجهه .. كانت تداري على سرقته من أبوه وهي راضية وساكته ... وفي النهاية اتطلقت بسبب حاجة ملهاش فيها يد..
كانت كبش فداء لخطة راجح اللي عمل كل الحاجات دي علشان يخلي هيثم يشك في مراته، ويطلقها..
راجح بيحاول بكل السبل انه يهد البيت على دماغ الكل قبل ما يقتل أبوه ..
تخطيط اجرامي واسع .. مفيهوش اي عشوائية .. علشان بعد ما الوفاة تحصل .. يكون البيت كله داخل دوائر الشك..
ـــــــــــــــــــــــــــــــــــــــــــــ
هناء بتتصل بآدم وتحكي له كل الكلام اللي سمعته من نسرين، علشان هي مش عارفة تحكي لأبوها الكلام ده ازاي؟؟
وآدم بيسمعها بإنصات شديد، وبيطمنها ... وبيقول لها انه قابل الطبيب الشرعي وراجع في الطريق..
_ متخافيش يا هناء .. لو وصل بيا الأمر إني أبات عندكم في البيت، مش همشي من عندكم .. مش هسيبك لوحدك وسط الوحوش دول..
أخوكي راجح هددني بالمطواة وانا خارج من عندكم .. بس ولا يهمني .. لأن المجرم اللي زي راجح ده بتكون شخصيته ضعيفة..
دلوقتي مش فاضل غير اننا نكشف منين بيجيب الدم الفاسد ده.
ــــــــــــــــــــــــــــــــــ
الأب بيخلي هناء تجمع كل اخواتها في البيت، وكمان أمها ومرات أبوها، علشان عايز يقول لهم على مفاجأة مدوية ..
هيثم قعد منتظر في أوضته .. وراجح منتظر في أوضته .. وأم هيثم وأم راجح كل واحدة في أوضتها..
هناء وآدم عند الأب في الأوضة.. وآدم بيحكي له..
_ الدكتور خيري قال لي ان ده دم حيض .. ويبدو إنه ليه تلات أيام من وقت نزوله .. وليه أكتر خمس ساعات في العلبة دي، علشان كده الدم اتجلط..
_ دم حيض؟ وايه اللي جاب الدم في العلبة، وايه لازمته؟؟
_ الدكتور خيري بيقول ان في حالات وفاة كتير كانت ناتجة عن حالات تسمم، لكن الطب الشرعي مش بيقدر يتوصل نوع المادة السامة، أو موعد تناولها، وعلى الأرجح بيتخلط في الشاي علشان لون الشاي مش بيتغير لما يتضاف له السائل ده..
(الأب بيتضايق، وبيزعل على نفسه أوي، وبيطبطب على كتف آدم وبيشكره)
وآدم بيحكي له عن تصرفات راجح وهيثم، وعن كلام المهندس رامز، وعن اتصال نسرين مرات هيثم ب هناء، وكلامها ليه عن مؤامرة مع راجح لقتله بدم الحيض..
(الأب بيدمع وهو في عز ضعفه)
_ كان قلبي حاسس ان كل ده هيحصل من لحظة ما الولاد ما بدأوا يستضعفوني ويرفعوا أصواتهم عليا وانا عاجز على سرير المرض ..
مع انهم كانوا زي الكلاب لما كنت كويس وبصحتي .. كان الواحد فيهم بيبوس جزمتي علشان ياخد مصاريف زيادة ...
(المهندس رامز بيتصل على تليفون هناء، وبيقول لها بلغي أبوكي ان المهندس رامز وصل ومعاه الأستاذ عبدالله المحامي..
(الأب بيقول لآدم انزل افتح لهم الباب ودخلهم الصالون ... وبيقول لهناء تروح تجمع اخواتها وأمها ومرات أبوها في الصالون .. وتيجي تاخده تنزله عندهم)
ــــــــــــــــــــــــــــــــــــ
الكل مجتمع في صمت في الصالون ..
هيثم وراجح وأمهاتهم .. والاستاذ المحامي، والمهندس رامز .. وآدم واقف جنب الباب منتظر الأب يدخل مع هناء اللي بتدفعه بالكرسي المتحرك..
رحب بالكل .. وبص على زوجاته واولاده ... وبدأ يتكلم..
_ أنا كنت راجل بخيل .. ومش بفكر غير في نفسي وبس .. وعملت ثروة بالملايين .. ومع ذلك كنت عايش نفس الحياة اللي كنت عايشها قبل ما شغلي يكبر ويبقى بالملايين..
كنت حاسس ان أولادي صايعين ومش على قدر المسئولية .. كنت خايف ان الفلوس الكتير تخليهم يفتروا على الخلق ...
بس كنت غلطان لما اتجوزت اتنين بدون سبب..
كانت مراتي الأولى كويسة خالص .. وخلفت لي هيثم، ومع ذلك غلطت واتجوزت عليها واحدة قريبتها وبدون أي سبب..
ده اللي خلاها تكرهني .. ومش قادرة تصفى لي لحد النهاردة ..
و ده اللي خلى مراتي التانية تحس انها الكل في الكل هنا .. خصوصا بعد ما خلفت لي راجح..
ولما مراتي الأولى خلفت هناء .. حست انها بدأت تسترد نفسها ومكانها في البيت .. مش عارف ليه أصلا.. مع اني كنت زعلان اني خلفت هناء .. ومتضايق انها بنت ... وحلفت يمين طلاق اني مش عايز عيال تاني .. لا أولاد ولا بنات
وبدأت كل واحدة تشحن ولدها عليا .. وتحسسه اني بكرهه وبحب التاني .. ومش بصرف ببزخ عليهم علشان أحوش فلوسي للولد التاني..
علشان كده اتفاجئت إني عايش مع أقذر زوجتين وأقذر ولدين في الدنيا..
حسيت ان البيت كله أعدائي..
ولما المرض بدأ يهدني .. لقيت الكل منتظر موتي بفارغ الصبر..
وكله بيزعق في وشي لما احس بتعب .. ولا اطلب طلب..
ما عدا هناء .. اللي كنت ألاحظها في نص الليل وهي بتدخل الاوضة تغطيني ..
تيجي ملهوفة في ميعاد الدوا علشان تسقيني الدوا ..
وكانت في لحظة هتوقع ضحية حركة قذرة عملها راجح بالدم الفاسد اللي حطه علبة الدوا، علشان أشربه واموت بدم الحيض..
دلوقتي بس عرفت هو ليه كان مصمم يخليني اشرب شاي يوم ما كنت عايز اشرب ينسون..
دلوقتي بس عرفت ليه كان مصمم يسقيني شاي في كافتيريا بلدي قديمة.. وليه دخل جوة القهوة واتأخر وهو بيوصي لي ع الشاي بتاعي..
(الموجودين كلهم بيبصوا على بعض، وراجح قاعد بيفرز عرق السنين من الكسوف وسط الناس)
_ انا عرفت ان أم راجح هي اللي كانت بتشحنه يعمل كل ده.. وعرفت بكل بلاوي هيثم وسرقاته المتكررة ليا في مرضي .. وعرفت علاقاته القذرة في الشغل الاضافي اللي بيروح له بعد ما يسيب المصنع بتاعي ..
عرفت من نسرين دلوقتي كل حاجة، اللي راجح كان سبب طلاقها لما أوهم أخوه هيثم انها هي اللي بتجيب له دم الحيض..
ودلوقتي مفيش غير هناء بنتي وأمها وبس اللي مكانوش يتآمروا عليا، مع إني مش مرتاح لها ليا فترة، وحاسس إنها شريكة في كل المؤامرات
(راجح بيصرخ مع الرعشة)
_ مرات أبويا شريكتي .. وهي اللي بتجيب لي الدم في كل مرة ... ولما علاج العظام بتاعها خلص .. معرفتش تخرج تجيب لي عبوة دم .. والدليل طلبت مني العلاج النهاردة علشان يسكن لها الألم وتقدر تخرج..
(هيثم بيحط راسه في الأرض، وهناء بتبص على أمها وهي في قمة الحزن والأسى بسبب المفاجأة دي)
_ خلاصة الموضوع .. علشان مبقاش ثقيل عليكم..
أنا من شهر واحد بالظبط .. سجلت تنازل عن كل أملاكي لبنتي هناء في الشهر العقاري .. ومفيش كلب هيورث مني قرش واحد ... حتى البيت ده اللي احنا فيه كتبته لها..
واشتريت لنفسي شقة صغيرة في نفس العمارة اللي ساكن فيها الدكتور آدم خطيب بنتي ... وهو اللي ساعدني في شرائها بدون ما يعرف السبب..
ولما قلت لك عايز اسكن جنب بنتي علشان تراعيني في المرض ... لاقيته بيرحب بيا ترحيب شديد .. وبيقول لي أنا وهناء تحت أمرك يا عمي .. ولو هتعيش معانا في نفس الشقة .. لأن ده من أعمال بر الوالدين..
كلام آدم خلاني أبكي .. لأني كنت أتمنى ولد من أولادي هو اللي يقول لي الكلام ده..
ومن النهاردة يا مهندس رامز هنحول كل التوقيعات الخاصة بالشغل لهناء بنتي .. وحضرتك يا أستاذ عبدالله هتخلي هناء تعمل لك توكيل عن شغلها..
وأنا هعيش الأيام اللي فاضلة لي في شقتي اللي جنب شقة بنتي ... واتمنى ان الدكتور آدم يعجل باجراءات الجواز..
وهسيب هيثم وأمه وراجح وأمه هنا في البيت مع بعض ... ومش هبلغ عن راجح بتهمة الشروع في القتل .. ولا عن هيثم بتهمة السرقة..
هسيب كل واحد في بوذ أمه علشان تشرب من عفن تربيتها..
بس الأستاذ عبدالله هيعمل لنا محضر عدم تعرض ضدكم ... علشان أحمي بنتي هناء من مؤامراتكم السافلة عليها هي وجوزها..
ــــــــــــــــــــــــــــــــــــــــــــ
الأب فض الجلسة، وكان هيثم وراجح في قمة الثورة والغضب، والغيظ .. وخايفين يتصرفوا أي تصرف يتبلغ عنهم ويروحوا في داهية..
وكانوا مستسلمين للموقف استسلام وخضوع الخايف من العواقب..
واتعمل محضر عدم تعرض لهناء او لجوزها آدم الدكتور الجامعي الشاب..
والأب ساب لهم البيت يعيشوا فيه، رغم انه من أملاك هناء...
علشان أكبر عقاب ليهم إنهم يعيشوا في وش بعض .. بعد ما خسروا كل حاجة..
والأب ينتقل للشقة الجديدة جنب بنت اللي هي أحن الناس عليه .. وجوزها اللي بيحبها من كل قلبه، ومش هيتخلى عن أبوها .. علشان إنسانيته في المقام الأول .. وعلشان حبه لهناء في المقام الأول مكرر
ــــــــــــــــــــــــ
الحلقة الأخيرة خلصت
والقصة خلصت
ويارب الرسالة تكون وصلت
وإلى اللقاء في القصة القادمة
تحياتي
