ياحوت ليه هيبة كبيرة جدًا ، وجوه قلبى كان فيه رهبة مقدرتش اداريها رجعت خطوتين لورا وقعدت على السرير ، واستنيت واتمنيت ان الليلة دى تعدى على خير ، خد خطوتين ناحيتى واتسند على عكازه وقالى : .. انا عارف انك مخضوضة ولسه مش مستوعبة قيمتك عندى
= انت الراجل اللى شوفته زمان ؟ اللى بيدفن الناس صاحيين؟ صح؟ .. صح ، انا اللى فرجتك كل ده علشان تعرفى ان الحياة بتنتهى ومكانك مش فى القبور
= انا مش عايزة اموت ولا عايزة ابقى معاكم ، انا عايزة اعيش
.. من زمان وبحاول بشتى الطرق انى ابعد اى حد انه يقتلك او يهدر حياتك ، امل نجاحنا الكامل ، بيبدأ بيكي ، دمك من سلالة ملك الاغريق العظيم اوسر كاف ، هو اللى حط حجر اساس البناية واحنا اللى كملنا وراه ، وجوده هيخلى جيوشنا تاكل الارض ، هو اللى هيحرك الحياة لما يرجع ، اوامره هتُنفذ وكل الموتى محدش هيقدر يموتهم تانى ، لازم تفهمى انك بتنقذى عيلتك ، انتى الوحيدة اللى مش لازم عيلتها تموت علشان تدخل وسطينا ، لكن رفضك ده معناه ان الابواب اللى مقفلينها على الارض هتتفتح وساعتها مش عيلتك بس اللى هتموت ، كل اللى حواليكي هيموت لحد ماتترجينا انك تيجي معانا ، حتى لو اضطرينا اننا نقتل البشرية كلها ونخليكي اخر واحدة على الارض
= وانا مش هروح معاكم لو انا اخر واحدة على الارض
.. انا دلوقتى صدقت انك من دم الملك العظيم اوسر كاف ، نفس العناد ونفس القوة ونفس الهبة السماوية
اختفى ياحوت من قدامى وسمعت صرخة جاية من ناحية اوضة بابا ، قومت جري اشوف فى ايه ، اول مادخلت الاوضة الباب اتقفل ورايا ، لقيت بابا نايم على السرير مش قادر يتحرك والتعابين حواليه من كل مكان ، وسطهم تعبان كبير مرسوم عليه رسومات كتير وتعاويذ وارقام على جلده ، اول ماشافنى دخلت الاوضة اتلفت ليا وطلع لسانه وفضل ينزل فى سم ورا سم ورا سم ، الارضية بقى لونها ابيض من شدة السم وبقت زى ماتكون بتفور كاننا حطينا عليها مياه نار ، التعابين سابت بابا ووشها كله بقى عندى ، التعبان الكبير قرب من وشي اوى وفتح بقه على الاخر ، شكل انيابه فظيع ، راسه فيها قرون شيطانية ، عنيه الاتنين ضموا على بعض وبقت عين واحدة ، وبدأ يتحول شكله تدريجي لحد مابقى راجل وسيم قدامى ، مااديتلوش فرصة انه يتكلم وقولتله:
= طبعًا انت جاى بناءا على طلبه ، انت ميت وبتنفذ الاوامر
بابا كان قاعد فى ذهول وبيحاول يقوم مش عارف ، لما دققت بشكل اكبر ، لقيت فى خيوط عناكب ضخمة محاوطة ايديه ورجليه ، لكن كملت كلامى مع الشخص الوسيم وقولتله: .. انا قولتله كل اللى عندى ولو قربتوا من اى حد من عيلتى انا هموت نفسي ، وابقوا دوروا على حد غيرى يكمل اللى بدأتوه
ابتسم الراجل الوسيم وقالى:
= انا ماجر ، انتى فاكرة ان احنا عندنا جيش من الاموات ، الاموات لو من غير عقل يبقوا همجيين ، احنا اكتر مما تتخيلي ، وانا قائد كل اللى هتتخيليه واللى مش هتقدرى تتخيليه ، انا هسيبك دلوقتى ، لكن فكرى فى عرض مولانا ياحوت كويس ، انتى هتكونى ملكة الكون الوحيدة بعد رجوع الملك العظيم اوسر كاف
.. اختفى من قدامى ، انا مش هكون ولا هكون فيما بعد ، وبأكد عليك تانى صدقنى لو حاولتوا انكم تقربوا من عيلتى تانى ، انا هموت نفسي وعليا وعلى اعدائى
سكت شوية ماجر ولف حواليا وبص للتعابين الموجودة فى الاوضة وشاورلهم بايديه ، نطوا بسرعة للسقف ، فضلوا ماشيين لحد مادخلوا جوه الحيطة واختفوا تماما ، لكن اثار خروجهم من الحيطة لسه موجودة ، ورجع بصلى فى هدوء وقالى :
= من ساعة ما الارض اتشقت وحصلت الحرب بسبب الفتن الطائفية اللى انتوا مش عارفين سببها ومين اللى خلاكوا عملتوها لحد دلوقتى ، وقدرنا بمكرنا وايماننا باننا الاواخر المتحكمين اننا نقسم الارض لممالك تحت ايدينا ، وننتصر فى الحرب وكمان نحكمها
قاطعته وقولتله :
.. يعنى الملكة سميرة مش انسانة ؟!!!
= مفيش ملك من الممالك انسان ، اللى بيحكم الارض دلوقتى احنا ، كل حدود معرفتك مملكتك وبس ، لكن انا بقى هقولك باقى الممالك بيحصل فيها ايه وكمان اقدر اقولك انك لما تنضمى لينا مين العائق الوحيد واللى لازم نتكاتف ونقضى عليه ....
الحلقه الثامنه من هنا
