الحلقة العاشرة والاخيرة من الجزء الرابع... افتح انا الشر"للكبار فقط".
انا مكنتش فاهمة اى حاجة غير ان دلوقتى انضمت لينا الست الرابعة واخر ايد فى الكتاب ، ماجر كان سايق بسرعة جنونية كانه مستعجل على حاجة ، واحنا فى الطريق كنا شايفين اهل القرية بيجروا على البيت القديم ، تقريبًا سمعوا صوت الصراخ والقتل من جوه البيت ، كملنا فى طريقنا لحد ماوصلنا للفيلا اللى كنت بروح فيها لماجر علشان حفلات عبدة الشيطان .
واحنا داخلين من باب الفيلا قال:
= سميحة بس هي اللى هتيجي معايا فوق علشان تعمل طقوس الكتاب ، وانتوا استنونى فى الاوضة دى
سميحة طلعت معاه ودخلنا انا واميرة وسميرة فى الاوضة اللى قال عليها ، اوضة مفيهاش غير ترابيزة دائرية و6 كراسي واستغربت لان احنا عددنا 5 وسألت نفسي ، الكرسي السادس ده هيكون لمين ؟!
مشغلتش نفسي بالاجابة اوى لاني شايفة ان اللى جاى اهم ، الاوضة كانت مليانة رسومات على الحيطان وفيها اسماء كل اللى ماتوا فى عيلتنا حتى اخواتى عماد وياسر وبابا وماما ، كل حيطة كان عليها اسماء عيلة من عيلتنا ، وقفت مستغربة وسميرة واميرة كانوا مستغربين اكتر وواقفين قصاد الحيطة وهما سارحانين ، كمان كان فيه رسومات غريبة وخرائط كل اللى قدرت افهمه منها ان دى عبارة عن خرائط علشان يقدر يحدد بالظبط هما مدفونين فين ، كان فيه دم كتير على الحيطة وباين انه دم قديم .
بعد مامرت دقايق واحنا قاعدين فى الاوضة سمعت صوت ماجر وسميحة وهو بيقولها خشي برجلك الشمال ، فتح باب الاوضة ودخل هو وسميحة وكان فى ايده الاربع كتُب ، حطهم على الترابيزة واتنهد وكأنه ارتاح من هم كبير ، وقالنا :
= احنا دلوقتى فى بداية مرحلة مُلكنا للعالم ، الخرائط كلها هتتغير ، الدنيا مش هتبقى زى ماهي ، الارض هيكون ليها كبير، احنا اللى هنختار مين يكون فى صفنا ومين ضدنا ، احنا اللى هنحاسب وهنعاقب ، مبدأ المسامحة مش موجود ، عندنا مبدأ واحد فقط هو الموت وكبيرنا اللى مستنيينه من سنين
سكت للحظات وبعد كده قالنا :
= اقلعوا هدومكم زى مااتولدتوا علشان هتموتوا دلوقتى
قلعنا هدومنا وحط كتاب قصاد كل واحدة فينا وفتح صفحة عبارة عن صورة لراجل كبير فى السن ماسك عكاز خشب مسنود عليه ، شعره ابيض طويل وعينه حمرا ، وجسمه مايل للقمحي
وقف ماجر وقعد يقول كلام مش مفهوم ، جسمنا كله اترعش ، شوفت حاجات غريبة ، شوفت صور اغريقية قديمة للراجل اللى فى الصورة وهو كان بيقول تعويذات على ملك اغريقي ميت فى القبر وقام من جديد وشوفت صور وهو بيحرك الملك وبيخليه يعمل كل اللى هو عايزه ، شوفت صور وهو بيعيد الحياة للديناصورات القديمة والتنانين وازاى كان بيستخدمهم فى الحروب ، فجأة كل الصور اتوقفت وشوفت ماجر وهو بيحط السكينة على رقبة سميحة وبيفتح جزء صغير منها والدم عمال ينزل على الصفحة اللى فى الكتاب سميحة بتفرفر قدامنا وروحها بتطلع وماجر مُبتسم وبيملس على شعرها ، قطع جزء من رقبة اميرة برضو وقعد يقول تعويذاته عليها والدم ملا كل المكان ، وسميرة وراها ، الدور جه عليا ، حسيت انى خايفة جدًا وفى نفس الوقت مش قادرة اتصرف ، حط السكينة على رقبتي وقطع جزء منها زى الباقى والدم ابتدى ينزل مني ويغرق الارض ، شوفت شريط حياتى قدامي والغريب ان فى نهاية اللى شوفته ان شوفت نفسي وسط نار عظيمة وكأنها نار جهنم وانا بتعذب جواها .
كل حاجة اتقطعت بالنسبالى مفيش نفس ومفيش دقات قلب لكن حاسة بكل حاجة حواليا ، عيني مغمضة مش قادرة افتحها ولا قادرة احرك اى شئ او اشوف اى حاجة ، مجرد انى سامعة صوت مش مفهوم حواليا وحاسة ان في حاجة غريبة بتحصل
جسمى بقى سُخن جدًا وحسيت بأيد حد مسكت قلبي من جوه بالقفص الصدرى ، بعدها على طول عيني فتحت ، الصورة مكنتش واضحة فى الاول ، بعد كده ابتدت توضح تدريجي ، لقيت سميرة وسميحة واميرة قاعدين على الكراسي ، من ناحية قلبهم مفتوح بالسكينة ، الدم اللى على جسمهم بيختفى بشكل تدريجي ، جسمهم شكله متغير وعروقهم زرقة وباينة اوى من ايديهم ورقبتهم ، عيونهم حمرا ، قاعدين على الكراسى بثبات ، بصيت على نفسي لقيتنى زيهم ، اتحركت وقعدت على الكرسي ، بصيت حواليا لقيت ماجر موجود وفى رقبته وقلبه نفس فتحة السكينة والكرسى اللى جنبه ابتدى يظهر عليه تدريجيًا الراجل اللى شوفناه فى الكتاب واول ماظهر بشكل كامل ، قام ماجر وقومنا تلقائى ، ركعنا قصاده واحنا بنقوم سمعنا صوت حد عمال يقول من بره الفيلا :
.. متعمليش كده يااميرة ، انا عارف انك جوه وان الشيطان الاغريقي ده معاكى ، افتحي الباب
اميرة اتلفتت للصوت وابتسمت ، ماجر ضحك ضحكة سخرية ، وقال للراجل الكبير :
= مولاي ياحوت استأذنك فى انضمام فرد جديد لقوتنا
هز ياحوت راسه وخرج ماجر وخرجنا وراه ، سألت اميرة
= مين ده ؟
.. ده ايمن جارى اللى بوظ عليا الحمل قبل كده وقتل ناقل الارواح
وقف ماجر قصاد باب الفيلا والراجل عمال يخبط بجنون ، الباب اتفتح لوحده ، فى غمضة عين لقيت ماجر واقف قصاده وكاتم نفسه وبضربة واحدة دخل ايده جوه قلبه ، خرجه من مكانه وقتله فى الحال .
ياحوت اتسند على العكاز بتاعه لحد ماوصل لجاري ايمن ، ومسك قلبه رجعه لمكانه تانى وبمجرد مالمسه ، فتحت عينه تانى وبقى لونها احمر زينا وقام من مكانه ركع لياحوت ، ضحك ياحوت وخرج قلبه تانى من مكانه وقتله .
اتلفت ياحوت لينا وقال:
= مش دايمًا الخير بينتصرعلى طول ، اوقات كتير بيطول الزمان والخير بيقف قصاد الشر وهو ضعيف ، انتوا الشر ولازم تكونوا اشر الخلق ، من النهاردة اى حد فيكم هيقتل حد هيقدر يصحيه وهينضم لينا وهينصاع لاوامرنا ، سميحة انتى هتحملى فى ناقل الروح بس المرة دى هتحملى مني انا ، هي دى الطريقة الوحيدة اللى محدش هيقدر يقتلوا بيها علشان نسيطر على العالم اجمع ، عائلاتكم كلها اللى ماتت دوروا عليها فى القبور ، دخلوا ايديكم فى قلوبهم وخلوهم ينضموا لصفوفنا من جديد ، دوروا على العاهرات ، قطاع الطرق ، الخاطئين ، اللى ايمانهم ضعيف وهتوصلولهم بسهولة ، اللى هترجعوه للحياة مش بس هيرجع بجسده ، لا ده هيرجع بقلبه وحقده وغله وسوءه علشان كده دايمًا اختاروا الاسوء ، جمعوا كل اللى تقدروا عليه وحاولوا تبعدوا عن المؤمنين ، مش عايز يكون وسطنا مؤمن واحد ، او حد يفكر انه يخون ويقضى علينا ، لازم تبقوا درع الحماية بتاعى.
= مش دايمًا الخير بينتصرعلى طول ، اوقات كتير بيطول الزمان والخير بيقف قصاد الشر وهو ضعيف ، انتوا الشر ولازم تكونوا اشر الخلق ، من النهاردة اى حد فيكم هيقتل حد هيقدر يصحيه وهينضم لينا وهينصاع لاوامرنا ، سميحة انتى هتحملى فى ناقل الروح بس المرة دى هتحملى مني انا ، هي دى الطريقة الوحيدة اللى محدش هيقدر يقتلوا بيها علشان نسيطر على العالم اجمع ، عائلاتكم كلها اللى ماتت دوروا عليها فى القبور ، دخلوا ايديكم فى قلوبهم وخلوهم ينضموا لصفوفنا من جديد ، دوروا على العاهرات ، قطاع الطرق ، الخاطئين ، اللى ايمانهم ضعيف وهتوصلولهم بسهولة ، اللى هترجعوه للحياة مش بس هيرجع بجسده ، لا ده هيرجع بقلبه وحقده وغله وسوءه علشان كده دايمًا اختاروا الاسوء ، جمعوا كل اللى تقدروا عليه وحاولوا تبعدوا عن المؤمنين ، مش عايز يكون وسطنا مؤمن واحد ، او حد يفكر انه يخون ويقضى علينا ، لازم تبقوا درع الحماية بتاعى.
سمعنا صوت هوا شديد بره والارض حصلها فجوه عظيمة فصلتنا عن باقى المنطقة والدنيا بقت مليانة ضباب والشبورة عالية جدًا ، خرج ياحوت وهو بيتسند على عكازه وقال :
= مرحبًا بكم فى ارض ياحوت
تمت
