رواية القلب ومايريد ( ارض الانتقام ) الحلقة الثامنه والعشرون

روايه القلب وما يريد
( ارض الانتقام)
الحلقه ال 28
جسور سمع صرخه بوسي باسم بروج فأخد المفاتيح من علي المكتب وجري ركب عربيته..... بوسي دورت علي اسلام في البيت ملاقتهوش لا هو ولا جدها.. رجعت اوضتها تاني علشان تتصل بيه لاقت جسور لسه علي الخط
بوسي بزهق : هو انت لسه علي الخط
جسور : انزلي وهاتيها معاكي انا تحت
بوسي : تحت فين!!!!!
جسور : تحت عند بوابه القصر
بوسي : انت اتجننت
جسور بعصبيه : بسرعه علشان اوديها المستسفي

بوسي : حاضر حاضر بس انا مش هعرف انزلها
جسور : وانا مش هعرف اطلع علشان انزلها... اعقلي كلامك
بوسي: طيب هخلي حد يسندها معايا
بوسي ندهت علي منه ولبسوا بروج عبايه وطرحه وسندوها لغايه ما نزلوها
رقيه : بنتي... يالهوي... ايه اللي جرالها
بوسي : مش عارفين فجأه وقعت وسعي كده يا ماما جسور واقف بره خرجوا
وحطوها في العربيه بالعافيه
منه : انا هروح معاها خليكي انتي يا بوسي ولما اسلام يجي خليه يلحقنا علي المستشفي
*******************************************

في المستشفي
قولنا ميت مره منشلش تقيل علشان الحمل
منه : يعني ايه حامل ؟!
الدكتوره : انتي مش قايله لصاحبتك ولا ايه
بروج : لا دي اختي.. وبعدين انا مشلتش حاجه تقيله
الدكتوره : لا اكيد شيلتي حاجه تقيله وتعبتي نفسك علشان الحمل عمل فيكي كده
بروج : مشلتش حاجه يا دكتوره... مشلتش غير فجر كان نايم علي الكرسي تحت فطلعته اوضته
الدكتوره : وفجر ده كام سنه
بروج :عشر سنين
الدكتوره بصت لمنه : شللي هيبقي علي ايد اختك
وبصت لبروج بغيظ :وهو ده مش تقيل.
بروج بطفوليه : لا مش تقيل
الدكتوره : تمام هو مكنش تقيل بس ده قبل حملك لما حملتي يبقي تقيل
بروج : طب يلا نخرج بقي لسه هعدي علي الاراضي اشوف الشغل فيها وصل لأيه

الدكتوره : نقول طور يقولوا احلبوه. فيه ايه مالك... بقولك مش عايزه حركه ولا هرس كتير انتي لسه في الاول يعني الحمل في خطر... انا اول مره اتعصب كده... اندهيلي جوزك من بره اقوله مدام انتي مهمله ومبتسمعيش الكلام
بروج : جوز مين اللي بره
منه: جسور... هو اللي جابنا هنا
بروج : ومين اللي عرفه بتعبي
منه : تقريبا بوسي لما ملاقتش اسلام ولا جدك موجودين اتصلت بيه
بروج : ليلتها زي وشها باذن الله .... وانتي يا دكتوره جوز مين اللي تقوليله ده طليقي ولو عرف بحملي ممكن ينزله علشان ميربطهوش بيا حاجه
الدكتوره : لا اله الا الله ربنا يهدي سركوا
منه بصتلها باستغراب فبروج شاورتلها ان هي تسكت
قاعد بره حاطط رأسه بين ايديه... عمال يهز رجله بعصبيه زايده... بقالها فتره قاعده جوه... يا تري عندها ايه... معقوله تكون مريضه بمرض وحش... استغفر ربنا من الافكار الوحشه دي ورفع رأسه فلقي اسلام قدامه

اسلام : هي كويسه!!
جسور بصله بقرف : معرفش
وقام وقف لانه مش طايق وجود اسلام ومش عايزها تشوف القلق في عنيه.
جسور : انا لحد هنا مهمتي خلصت سلام
ومشي
منه سندت بروج
منه : علي فكره حرام انك متقولولهوش
بروج : علي فكره ملكيش دعوه
خرجت ولاقت اسلام فضلت تدور في المكان عن جسور ملقتهوش
بروج : عرفت مكاني منين
اسلام : اكيد هتروحوا اقرب مستشفي يعني ايه اللي جرالك... مش قولتلك خلي بالك من نفسك
بروج : روح شوف انت بتعمل ايه
منه : هو جسور راح فين ؟!
اسلام : مشي
بروج بتريقه : وعيزاني اقوله ده حتي مسألش انا فيا ايه
***********************************************

فتحت الواتس لان بقالها يومين متفتحش نت
فلاقت دارسي بعتالها رساله :
" حبيبتي صورتك راحت لثري عربي وحبك جدا يا إما تيجي وتقابليه برضاكي يا إما هجيبك انا بطريقتي وعلي ما اطن اختك قالتلك انا اقدر اعمل ايه.. ومتخافيش طول ما انتي بتطاوعيني مش هشهر بصورك "
بوسي كانت هتجنن ومش عارفه تعمل ايه ففضلت تدور في الاوضه..... سمعت صوت عربيه اسلام فبصت من الشباك... تقوله طب لو قالتله هيطين عيشتها.. طب تقول لبروج بس بروج تعبانه تعمل ايه بس ... طب تروح لمرات ابوها لا برضه متضمش يمكن تكون مرتبالها مصيبه
نزلت تشوف بروج لاقت بروج قاعده بس اسلام مش موجود
بوسي : حمد لله علي سلامتك
بروج بصتلها بغيظ علشان قالت لجسور
بوسي بقلق. :بتبصيلي كده ليه
بروج : قولتي لجسور ليه
بوسي مقدرتش تكتم قلقها اكتر من كده
بوسي : بروج انا واقعه في مصيبه
بروج : مصيبه ايه انطقي

بوسي حكيتلها علي كل حاجه ..... لسه بروج هتنطق وتهزقها بس لاقوا صوت جلل المكان وكان صوت اسلام
اسلام : ليلتك مش هتعدي النهارده
بوسي اتنفضت وراحت استخبت ورا بروج.... بروج وقفتله
بروج : اهدي يا اسلام خلينا نفكر
اسلام بعصبيه : نفكر ايه دي متخلفه
بوسي : بعتتلي صورتها علشان كده اطمنت
اسلام وهو بيحاول يوصلها : ااه تتطمني للي جوزت اختك لراجل كبير
بوسي بعياط : قالتلي ان بابا عايز يشوفني..
اسلام : وانتي غبيه صدقتي . وبعدين عايز يشوفك ايه اذا كان سابك وانتي مولوده مكلفش نفسه يبصلك اصلا
بروج : اسلام اهدي
اسلام : محدش يقولي اهدي
بروج : ملكش دعوه وانا ههحل الموضوع

اسلام : هتحليه ازاي يعني... ليه هو انتي اللي حليتي مسأله جوازك الاول ولا منذر
بروج اتعصبت وحست بوجع في بطنها فمسكت بطنها وصرخت
اسلام : ايه ايه ؟!
بروج بتعب : الظاهر معجبهاش كلامك
بوسي مكنتش مركزه معاهم وعماله تعيط وخلاص
اسلام :معلش انا اسف بس دي مصيبه
بروج : عارفه بس علي ما اظن لازما عدي يعرف علشان هو محامي وممكن يقولنا نعمل ايه
اسلام بتريقه : ملاقتيش غير عدي... عدي طيب ومش هيسلك مع الناس دي
بروج : وانت متهور ومضمنش تعملنا مصيبه... فلازما اقول لعدي .. بوسي روحي هاتيلي موبايلي
********************************************

‘كان لسه بيجهز علشان يروح الشغل ..... رن موبايله
عدي: بوجي ازيك
بروج قالتله علي اللي حصل
عدي : وانتي ايه مقعدك عند جدي مش في بيتك ليه
بروج : نعم هو انت متعرفش اني اطلقت
عدي : امته ده
بروج : يوم كتب كتابك
عدي بنرفزه : محدش قالي.. هي كانت تعرف ؟؟!
بروج : اه
عدي بغيظ : طيييب
بروج : سيبك من الموضوع ده هتعمل ايه في موضوع بوسي لان اسلام متعصب خالص
عدي : هو جنبك
بروج : اه
عدي : خليه يكلمني

اسلام : نعم يا عدي ومتقولش ان هنحل الموضوع ودي
عدي : مقولتش كده بس سيبني انا هحل الموضوع انت ملكش دعوه ومتكلمش بوسي
اسلام بزهق : ازاي مليش دعوه
عدي بأعلي صوته : ولاااا صوتك ميعلاش وقولت ملكش دعوه يعني ملكش نيله دعوه علشان مزهقش عليك. . اصلا مش موضوعك ولا حوارك وانا أخوها وكفيل اجيب حقها. يبقي نقفل علي الموضوع.. اه وقول لجدك علي اللي حصل وقوله عدي اللي هيحلها
وقفل في وشه السكه... قام باتصالات كتيره وخرج شنطته ولم شويه هدوم فيها
رجعت من جامعتها فلاقته خارج من اوضته وشايل شنطته
فبصتله من غير ما تسأل ولما لاقته هيكمل طريقه من غير ما يكلمها
داليدا : رايح فين
عدي : البلد
داليدا : ليه خير

عدي التفتت وبصلها : واقولك ليه. كنتي قولتيلي يعني ان جسور وبروج اطلقوا
داليدا : افتكرت ان بروج قالتلك
عدي : بالبساطه دي
داليدا : وانت قررت تعاقبني يعني وتسيبني وتروح البلد
عدي: هروح البلد بس مش هسيبك
داليدا : هتعقد قد ايه كدا
عدي : تلت ايام
داليدا : كتير
ولما لاقته بيبصلها باستغراب : قصدي كتير علي اني اقعد لوحدي
عدي : لا مش كتير معاكي مفاتيح الشقه اقفلي علي نفسك واقعدي
داليدا : طيب ما اروح معاك اصلي هخاف اقعد لوحدي
داليدا كانت خايفه بس خوف من ان اهله يقنعوه ان هو يسيبها وهي سواء قبلت ولا لأ مبقاش ليها غيره
عدي : وجامعتك
داليدا : بكره الجمعه ومفيش جامعه واللي انت رايحله في تلت ايام حاول تخلصه في يومين وترجع معايا
عدي : خلاص روحي اجهزي
داليدا بفرحه : هوا
عدي كان عارف انها محتاجه تغير جو رغم انها مبتتكلمش عن اللي هي حساه بس بيسمعها بالليل وهي بتعيط بيبقي نفسه يخفف عنها ويكلمها ويحسيها بالأمان بس بيخاف انها تفهمه غلط
********************************************

خرجت من الجامعه بعد يوم متعب محاضرات وسكاشن
لاقته واقف قدام العربيه بتاعته فراحتله
تلا : لسه هنا انت خلصت محاضراتك من بدري
عاصي : اعمل ايه بقي مراتي لسه مكنتش خلصت .... تعرفي هتخلص امتي
تلا بابتسامه : علي ما اظن خلصت
عاصي : طب ناديلها بالله عليكي
تلا : ايه اللي موقفك بجد
عاصي: والله مستنيكي يا حبيبتي
تلا : حبيبتي
عاصي : اه حبيبتي عندك مانع
تلا : اصلك اول مره تقوليهالي
عاصي : كلمه بحبك احلي لما تبقي حلالي
تلا: الله الله وشاعر كمان... ها كنت مستنيني ليه بقي
عاصي : هنتفسح
تلا : لا انا مقولتش لأهلي
عاصي : انتي عبيطه يا تلا... انتي خارجه مع جوزك يا حبيبتي ...

تلا : برضه لازم اطمنهم.
عاصي : لا واجب برضه ... تعالي نركب العربيه وكلميهم في الطريق
تلا ركبت معاه واتصلت بجدها
عاصي : ها.. رد ؟!
تلا : مغلق او غير متاح هتصل ببروج
اتصلت ببروج
بروج : ايوه يا تلا
تلا : بقولك هخرج انا وعاصي شويه
بروج : طب خلي بالك من نفسك ومتتأخريش... اه وعدي اتصل بيا دلوقتي قال انه هيجي هو ومراته
تلا بفرحه: بجد عدي جاي... خلاص ماشي مش هتأخر .... سلام
عاصي داس فرامل جامد ووقف العربيه
تلا بصت علي وشه لاقته مضايق جدا : في ايه... ايه اللي حصل
عاصي بعصبيه : هو ايه اللي بجد عدي جاي وفرحانه اوي انتي مالك اصلا

تلا : الله الله في ايه انا فرحانه علشان هيجي هو ومراته. اللي هي اختك بالمناسبه... بتغير من جوز اختك ؟!
عاصي : انشا الله يكون اخويا برضه بغير
تلا سهمت من كلمته وفكرت يا تري لو عرف حكايتها مع بلال هيكون رد فعله ايه
عاصي : سرحانه في ايه
تلا فاقت من سرحانها ومسكت ايده : خلاص بقي متزعلش
عاصي بص علي ايديها
عاصي : عارفه لو واحده غيرك مسكت ايدي الماسكه دي كنت طلبتلها البوليس وتهمتها بالتحرش
تلا بغيظ : مش هتلحق اصلا لاني هكون خنقتك وخنقتها
عاصي: حبيبي
عاصي وقف عند بيت صغير بس جميل وذوقه تحفه
عاصي : انزلي
تلا نزلت من العربيه
فعاصي راح وسلم علي راجل كبير كان قدام البيت
عاصي : تلا تعالي علشان عمي محمد هيفرجنا علي البيت.

دخلوا واتفرجوا علي البيت
عاصي : ها ايه رأيك
تلا : تحفه
عاصي : خلاص يا عم محمد امشيلنا في الاجراءات
تلا : اجراءات ايه ده هتلاقيه غالي
عاصي : هو غالي بس ميغلاش عليكي يا قلبي
خرجوا من البيت وتلا فرحانه جدا.. ركبوا العربيه
تلا : يلا نروح بقي
عاصي : نروح ايه ده لسه في شوبنج واكل قال نروح قال
********************************************

اتصل بيها فردت : السلام عليكم
بلال : وعليكم السلام ورحمه الله وبركاته
منه : ها عملت ايه... استغفرت ؟!
بلال : طبعا 500 وانتي
منه : الف
بلال سكت فمنه حست انه احبط
منه : تتعوض بكره باذن الله ومتيأسش من اول جوله كده لاني مش هسيبك تفوز بالساهل ... بقولك ايه بتصلي الفجر في ميعاده ؟!
بلال : لأ
منه : خلاص هبقي اتصل بيك اصحيك
بلال بابتسامه : والله تشكري
منه : يلا السلام عليكم
******************************,***********

وبالليل وفي وقت متأخر
بعد وصول عدي وداليدا
اسلام ،: حضرتك. جيت وبرضه معملتش حاجه
عدي : انت كل ما بتتكلم بترفزني والله..... اصبر ربع ساعه بس
وبعد ربع ساعه جه تليفون لعدي
عدي : ايوه انت بره تمام
شوال جوه القصر والكل واقف حواليه مش عارفين فيه ايه
ضرب فوزي الشوال بعكازه : في ايه الشوال ده
عدي فتح الشوال : فيه ده
الكل اتفاجأ لما لاقوا دارسي
عدي : اولا كده مفيش صوره اتعبتت.. الثري العربي كان عايزك تروحي حضرتك هناك علشان يجبروكي تتجوزيه زي ما اجبره بروج والصوره كانت الحجه.

ثانيا بقي انا قولت اجبهالكوا علشان في تار قديم لازما يخلص وبعد كده هنرجعها تاني تار ضرب بروج علشان توافق علي الجوازه انا منستهوش
ثالثا بقي اني هعملها محضر عدم تعرض باللي هي كتباه لبوسي علي الواتس ودي شغلتي بقي
رابعا ابنك هيجي هنا يا حج علشان يدور علي مراته فاتصرف انت معاه
داليدا خافت منه علي طول كان هادي. ومبيتكلمش بس فجأه عمل مصايب
خبوها في اوضه مهجوره في القصر ودخلت بروج عليها وهي متكتفه وحالاتها متبهدله
بروج: فكراني
دراسي : بروج متعمليش حاجه تندمي عليها
بروج ضربتها كف: دي علشان خدتي ابويا مننا
وكمان كف : وده علشان ضربتيني
وكمان كف : ود علشان اجبرتيني علي الجواز
وفضلت تضربها كفوف كتير : وده علشان كنتي عايزه تعيدي نفس اللي عملتيه فيا في بوسي
*****************************************

حسنيه : يلا يا بني خد مراتك واطلعوا استريحوا ده انتوا جايين من السفر
بص عدي لداليدا
عدي : يلا
داليدا مالت علي ودنه : يلا ايه
عدي : المفروض انك قبل ما تصممي تيجي معايا كنتي فكرتي اننا هنضطر نمثل اننا زي اي زوجين طبيعين بيناموا في اوضه واحده
وطلع وهي لحقته
دخلت الاوضه وهي متردده
لاقته بيفرش علي الارض
داليدا : بتعمل ايه
عدي : هنام
داليدا : وليه متنامش انت علي السرير وانا انام علي الارض دي اوضتك
عدي : واللي كان هناك بيتي برضه بس انا صممت ان انتي تقعدي في اوضتي رغم اني كنت مرتاح فيها جدا واقعد انا في الاوضه التانيه علشان شباكها بيطل علي سكن شباب واكيد كانوا هيضايقوكي.

داليدا : يااه ده انا شكلي ضايقتك اوي
عد حط المخده تحت رأسه ونام : انتي شايفه كدا ....طيب
قعدت علي السرير وقالت باستغراب : عدي انت ليه مبتحاولش تدافع عن نفسك... يعني بحس انك مطنش من ناحيه كده اي حد يأخد عنك فكره وحشه مبتحاولش تدافع وتقوله لا انا مش كدا
عدي ببساطه : مش ممكن انا كده فعلا
داليدا بحيره : مظنش
عدي التفت وبصلها : بصي انا اللي حصلي يخليني مطنش رأي الناس فيا لأ يخليني اقولهم بما انكوا خدتوا عني فكره وحشه بروزوها
داليدا ضحكت
عدي بابتسامه : يلا تصبحي علي خير
داليدا فضلت صاحيه : وانت من اهله
وخلال ثواني كان نام وهي فضلت تراقبه من بعيد
***********************************************

والصبح بدري الكل صحي علي صوت عربيه الشرطه
ولاقوا الشرطه جوه بيتهم فالكل اتجمع
رقيه اتفاجأت بان بدر طليقها جه فعلا زي ما عد قال بس الاضافه اللي هو عملها انه جاب البوليس معاه
رقيه : ايه اللي جابك هنا
بدر : فين مراتي يا رقيه
رقيه : مش هنا يا شاطر روح دور عليها في اي داهيه تأخدك انت وهي غير هنا
بدر : بقولك فين مراتي
فيروز جات من وراها : عايز ايه ياد انت
بدر : عايز مراتي ياما
فيروز : اما مين انا معنديش ولاد كل خلفتي بنات يا اخويا
فوزي : في ايه يا حضره الظابط
الظابط : ابن حضرتك متهمك بخطف مراته.
فوزي : ابن مين معنديش اولاد انا.
بدر : اللي بتعمله ده غلط يا حاج متمشيش ورا المتخلفه دي

وشاور علي رقيه .... داليدا لاقت عدي بيتحرك من جنبها اتجاه ابوه فمسكت ايده رجعته مكانه تاني
داليدا : هو عايز يستفزكوا يا عدي مش اكتر
وقفت بروج قصاد أبوها وكل منهم بيبص للتاني نظره كره
بروج :والله ما شوفتك متنحرر اوي كده وغيور علي بنتك اللي كنت هترميها للثري العربي بتعمل راجل علينا بس
بدر رفع ايده وضربها فبروج بصاله بكره
بدر : اخرسي
رقيه اخدت بروج. في حضنها : تتشل في ايدك يارب
عدي عاوز يوصل لأبوه بس داليدا ماسكه في دراعه ومش راضيه تسيبه خايفه ليجراله حاجه وهي ملهاش غيره دلوقتي
وقفت بوسي تتابع الموقف بصدمه بقي الراجل ده ابوها طول عمرها بتحلم ان تشوفه وتترمي في حضنه بس كفايه آللي هي شافته في اليوم ده كفيل انه يخليها تكرهه
الظابط للعساكر : فتشوا القصر
الظباط فتشوا القصر وملاقهوش فعدي ابتسم لأبوه نظره تشفي
الظابط : اسفين يا حج
فوزي : العيب مش عليك العيب علي اللي قدم بلاغ كاذب
داليدا مالت علي عدي : مش المفروض يتحاكم بتهمه البلاغ الكاذب

عدي : انتي بتتكلمي في ايه الظابط ده صاحبه الروح بالروح واصلا ملهوش انه يقدم بلاغ مدام معداش علي اختفائها 24 ساعه
داليدا : يعني التفتيش ده مش رسمي
عدي : اكيد بس انا حبيت ان اخليه يفتش البيت علشان مش كل شويه ينطلي في القصر
الظابط وبدر خرجوا
بوسي موبايلها رن ولاقته جسور
فلاش باك
جسور كان ماشي بعربيته وشاف بدر والظابط واقفين يتكلموا فاتصل ببوسي

جسور : هو ابوكي جه عندكم ولا حاجه
بوسي : لأ ليه
جسور : اصله واقف مع الظابط
بوسي : بتقول ايه.. طب جسور انا هقفل وهكلمك بعدين
جسور : فهميني بس في ايه
بوسي : بعدين بعدين
بوسي راحت قالت لعدي فخد دارسي ونزلها سرداب في القصر محدش يعرف مكانه الا هو وجده
فوقها من سرحانها صوت الموبايل
بوسي : الو
جسور : ابوكي كان عندكوا بيعمل ايه
بوسي بعياط : يتهمنا بخطف مراته وضرب بروج

الحلقة التاسعه والعشرون من هنا

بدل ماتدور وتبحث علي الروايات خليها علي تليفونك وحمل تطبيقنا

تعديل المقال