قصة_العين_بالعين
( الجزء الأول )
اسمى إنجى 29 سنه . من القاهره ف حى المعادى , من وسط كويس عندى عربيتى عندى شقتى عندى حياتى . عندى ولد وبنت وكنت متزوجه . ومنفصله بقالى حوالي سنتين . الحكايه بإختصار ان انفصالى كان بناءا على طلب منى , لأنى ماكنتش حابه اكمل مع بنى ادم بالشكل ده ! طبعا هو كان غنى جدا , وسيم جدا .
نُزهى بطريقه غبيه وكان يصرف علينا ببزخ ومن غير حساب ,مرح وكان يحب يهزر مش هنكر ,,, بصوا ! هو فيه كل حاجه كانت اى بنت تتمناها تكون موجوده ف شريك حياتها . واللى انا بالطبع كنت مخدوعه فيه بشكل كبير . وفضل الخداع ده يكبر ويكبر بعد جوازى وبعد حتى ما خلفت العيلين . لغاية ما اتصدمت ... كان فيه خصله كرهتنى فيه فجاه , وهى خصلة وحشه اوى وهى انه كان بيستلذ بمعاناة الناس . يفضل يتريق على اى حد واى شكل واى تفصيله صغيره .. كان مُتنمر بشكل هيستيرى لدرجه انه لو مالقاش حاجه يتنمر عليها كان بيتنمر عليا انا او حد م العيال . للدرجه اللى كانت بتوصلنى لدرجة اكتئاب حاده . وف الاخر ألاقيه جاى يقولى ماتزعليش انا كده ومش هتغير !!
حاولى تتاقلمى معايا .. لغاية يوم من الايام كنت عازمه اتنين من صحباتى . وكانو اقرب اتنين ليا ,,,, حسيت ان فيه حاجه مش مظبوطه . الاتنين كل واحده بتسال اسئله غير منطقيه وف وقت غير توقيت التانيه ... جوزك فين ؟ جوزك جاى امتى ؟ طب هو هيتأخر ؟ وكلام من هذا القبيل ؟ انا عملت مش واخده بالى .. ! او بمعنى أصح محبتش اصدق . دول اكتر صحاب ليا معايا من زمان اوى وطالعين مع بعض وحبنا لبعض اكبر من اى لحظه شك او لحظه قلق من ناحيتهم ... بس بينى وبين نفسي قولت لا . لازم اتطمن وبالى يرتاح مش هفضل عايشه ف القلق ده ..
خصوصا انى شخصيه قويه ومابحبش حد يخدعنى او افضل مخدوعه ف حد ....بدات زى اى زوجه مصريه اصيله افتش وراه . هدومه . مفاتيحه اشوف لو مفتاح غريب معاه او حاجه . اى حاجه تدلنى على اى حاجه غريبه بتحصل لكن مع الآسف مالقيتش ساعتها حاجه . قولت دى لحظه شيطان جاتلى ومره واحده لقيت الفكره بتروح عن بالى ....
لغاية ف يوم من الايام لقيته نايم وجاتله رساله على تليفونه اللى مقفول ب 100 قفل وتليفونه بالنسباله خط احمر ولو شافنى بس قريبه منه ممكن يبهدلنى ويقولى دى مساحتى الشخصيه وماتقربيش منها وكده .. شئ ما ألهمنى خلانى افزع للتليفون اشوف الرساله دى من بره مكتوب فيها ايه .. لقيت رساله مبعوته من رقم مش متسجل عنده مكتوب فيها " مستنياك " كل الشكوك جوايا اتراكمت وآمنت وصدقت ان فيه حاجه بيعملها . ولازم اعرفها والاهم بالنسبالى هى مين ... الموضوع القديم اتفتح من تانى وبدات اشك ف صحابي ... " زينه وليلى " طبعا فضلت افكر كتير انا هتأكد ازاى وهعرف ازاى ونارى هتبرد ازاى ... لغاية ما جاتلى الفكره ...
الجزء الثاني من هنا
