اتوكلت علي الله وهبدا اخد حقي والعين بالعين ... جاتلي الفكره ودخلت ع الصيدليه بتاعتى اللي ف البيت وطلعت المخدر اللى اشتريته امبارح ودخلت المطبخ .. عملتلهم اتنين عصير وشعرت العيار شويه بحيث ان دماغهم تتقل وينامو مش اكتر من ربع ساعه عشان اخد تليفوناتهم واتأكد تمام التمام .... وعملت كده فعلا .
واديتهم كل واحده العصير بتاعها . وبدأو ينامو واحده واحده ... ومافيش فرق بين دى وبين دى . او بمعنى اصح كل واحده كانت راسها بدات تتقل ومش شايفه قدامها ولا شايفه ان التانيه بالفعل بتنام هى كمان .... مسكت التليفونات اللى كانت مقفوله طبعا برقم سرى وانا لقطته منهم من غير ما يحسوا لانى تعمدت اخليهم يفتحو تليفوناتهم اكتر من مره قدامى ....
فتحت ودخلت ع الرسايل والواتس واتأكدت بنفسي ... رسايل بين جوزى وبين كل واحده لسا امبارح ... بيكلم كل واحده لوحدها على العزومه اللى انا عاملاها وانه قلقان فعلا انى ممكن اكون خدت بالى من حاجه بس كل واحده كانت بتطمنه ان لا استحاله انجى تشك والكلام ده ... ماشاء الله عليه عنده قدره على الاقناع ف اكتر من اتجاه ف لحظه واحده ..... توقيت الرسايل بيقول انه كان بيتكلم مع الاتنين ف نفس التوقيت . ضحكت من الغُلب ومن القهره ... ولما طلعت فوق ف الرسايل اكتر واكتر لقيت بلاوى ...
قفلت التليفونات ... وطلعت شريحه جديده جايباها مش مسجلاها باى اسم . وعمل واتس جديد ... وطلعت ارقام اجوازهم وبعتت ل جوز " زينه "وجوز ليلي رساله " انزل مصر ضرورى ... مراتك بتدخل حد غريب شقتك وبيفضل هناك طول الليل .. وبكره هقولك على الميعاد اللى بيكون هناك فيه عشان تكون موجود وشايف بنفسك استنى رسالتى بكره الساعه 9 بالليل ".... . بعت الرساله ل جوز كل واحده وقفلت التليفون وخرجت الشريحه ... وروحت عشان أصحيهم بشوية برفيوم على شويه ميه .....
وعملت انى قلقت ومحسستش كل واحده ان فيه حاجه او ان التانيه كانت بتشتكى بردو وفهمتهم ان ممكن من هده الحيل او من اللف بتاعنا طول اليوم ....وبالفعل مشيوا ... اتصلت على جوزى اساله هييجى امتى .... والليله عدت ف آمان لغاية كده .... جينا تانى يوم . اللى هو بالنسبالى يوم الحساب .... اقنعت جوزى انى هخرج انا وزينه وليلى النهارده ... بالفعل خرجنا ع الساعه 8 ونص كده وفضلنا نلف ... ومره واحده قولتلهم تعالو نزور واحده صاحبتنا وكانو بيحبوها جدا بس ماشافوهاش بقالها فتره ....
فعلا روحنا ل صاحبتنا دى وقعدنا معاها ف شقتها .... مايعرفوش ان صاحبتنا دى معايا ف الحكايه لانى حكيتلها اللى حصل وهى اللى شجعتنى انى ماسيبش حقى ولازم اعمل علامه كبيره .. اتفقنا انى هستتدرجهم لغاية شقتها .. وبالمناسبه هى مش شقتها ولا حاجه .. دى شقه مشبوهه اخدنا مفتاحها من فتاة ليل ودفعنالها 10 الاف جنيه عشان توافق ع اللى هنعمله .... انا استاذنت منهم وفضلوا قاعدين شويه ... بعتت رساله لجوز زينه وجوز ليلي الساعه 9 بالظبط وقولتلهم مراتك بتقابل عشيقها ف المكان ده .. وبعت لكل واحد فيهم اللوكيشن من ع الواتساب ..... اللى ماصدق كل واحد فيهم ورد عليا بمنتهى السرعه يا عينى كانهم مستنين الرساله . قالى انت مين ولا انتى مين ؟؟؟ قولتله انا فاعل خير ومايرضنيش اللى بيحصل من ورا ضهرك ...اتصلت على جوزى ومارضيتش ابعتله رساله قولتله
إلحقنى يا محمد انا مخطوفه ف المكان الفلانى وفيه واحد بيهددنا بس انا مسكت تليفونى وبكلمك بشويش هو مايعرفش ان معايا تليفون احنا ف المكان الفلانى ف البرج الفلانى الشقه الفلانيه . اعمل حاجه ارجوك طبعا عامل الوقت وعامل ان التلاته ييجو مع بعض كان لازم منه .... جوز صاحبتى كان مستنى تحت البيت .. وكان دوره ف الموضوع هو و3 من اصحابه انه يطلع جوزى الاول ويأخر الاتنين التانيين يطلعهم بعد جوزى ب 5 دقايق مش اكتر ... بالفعل ولحسن الحظ جوزى هو اللى جه بدرى ... طبعا دخل مالقاش حد غير اوضتين مفتوحين كل واحده فيهم نايمه ف اوضه متخدره وعريانه وبمثابة دخوله الشقه أغمى عليه نتيجة الحقنه اللى حقنهاله جوز صحبتى من تحت وهو طالع البيت ده من غير ما ياخد باله . حقنة عامله زى شكة الدبوس كده ...
المفروض ان كان فيه خناقه تحت العماره كان بطلها طبعا وبتمثيل جوز صاحبتى هو والناس اللى معاه . وعملو انهم بيتخانقو ودخلو جوزى ف النص وشكوه الشكه دى ... مفعولها بيبدا بعد دقيقه واحده ..... وبالفعل هو دخل الشقه يدوب دخل اول اوضه لقا زينه نايمه فيها ووقع مغشي عليه ... قلعته هدومه ونيمته جنبها ... وليلى نايمه ف الاوضه التانيه ... طبعا رسايل الواتساب بينهم اكبر دليل على ان فيه علاقه مشبوهه بينهم .... طبعا كل واحد من اجواز البنات جه لوحده والدم بيجرى ف عروقه . ودخل لقا الوضع .... والتانى كذلك لقا الوضع .. مش بس كده ... دنا كمان بلغت الشرطه تيجى تثبت حاله وتاخدهم .....
ومش بس كده انا كمان دخلت معاهم ف اللعبه لما حد بعتلى رساله ع الواتساب ان جوزك بيخونك ... انا طبعا اللى باعتاها ل نفسي عشان احبك الموضوع وفعلا كل اللى خططتله حصل .... والشرطه فعلا لحقت جوزى من القتل بعد ما الاتنين الرجاله كانو نازلين فيه جلد وسلخ وضرب وكان اشبه انه بيطلع ف الروح والبنتين اتجرجرو ع القسم وبمواجهة المتهمين الثلاثه أقر كل منهما بعلاقتهم وأنكرو انهم كانو متفقين يتقابلوا و و و و و وكلام ورغى كتير كل واحد فيهم خد سجن 3 سنوات بثبوت الواقعه . والمحامين بتوعى انا واجواز البنات عملو الصح وحبكو المساله اللى هى اصلا كانت محبوكه ..... مش انا اللى يتلعب معاها بالديل .. اقطعه على طول .... وكله بالحُب والعين بالعين .....
انتهت يهمنا رأيكم بالتعليقات
