#بنات_إبليس 8 والاخيره حقيقيه بدون اضافة خيال
ساره:نزلت من السياره للحوش ..اول شي دراته نحت العبايه وخشت الحمام طووول تغسل في وجها وتستفرغ ..حست ان خلاااص روحها بتطلع
قامت عيونها وكان وجها يصب عرق
سيف:متكي ع الباب ...عروسه حامل من اول ليله !هه تخيلي توا نشهدر بيك قدامهم كلهم ونقول ان البيبي مش ليا وانك جتيتي مش بنت وحامل زياده
ساره:نفسها يقطع...حقير واطي ورح تقعد هكي
سيف؛يالله يا فاسده لمي روحك واطلعي حطيلي العشي تحركي
ساره:ساكته وتشوفله بوجه تاعب
سيف:سمعتيني ولا نجي نسمعك بطريقتي ؟
ساره:فهمت انها رح تعيش اسوء ايام حياتها 💔
وان سيف بينتقم علي كل لحضه رفضاته فيها واختارت حازم 💔
سيف:بصوت عالي...شنو تبيني نجييييييك؟!
ساره:سكتت وطلعت من الحمام بدون ما تحكي
_________________
محمد:مقعمز جنب بنته ويلعب فيها ...
زهره:تمسح في مكياجها وتشوفلهم من المرايا
محمد:كأنها جنو بترقد
زهره:اي عاد من الصبح فاتحه عيونها وتلعب
محمد:هي شنو ترقديها و...
زهره:و شنو؟
محمد:ضحك ...هيا عاد رقديها الفرخه هيا
زهره:هههههه من عيوني حاضر
محمد:خدي حوايجه وخش يدوش اما زهره مسحت مكياجها وقعمزت ترقد في جنى ❤️❤️
ساره:حطت العشي ع الطاوله وعطاته بضهر
سيف:تعالي هنايا
ساره:وقفت وتحاول تتحكم في اعصابها
سيف:تعالي جاي قعمزي كولي
ساره:معنديش نيه
سيف:يا&@@كان متجيش توا بتندمي ره
ساره:تحملت الكلمه وجت جنبه قعمزت
سيف:لالالا مش هنايا
ساره:شبحتله مش فاهمه ...نعم !؟
سيف:اشر علي الارض ...هادا مكانك
ساره:شبحتله بصدمه...شنو؟
سيف:تحرررركي قعمزي لوطه
ساره:نزلت من ع الكرسي وقلبها يتقطع
سيف:لوح عليها فخذ دجاج ...تعشي
ساره:سكرت عيونها ودموعها ينزلو بحررررررقه💔🔥
🔥رِوايـَــــاتْ بـــــَــــنـــو تــِةْ الشــِـــيـــــــخْ🔥
🔥أَروى الطــَـــاهـــــِرْ المــــســـلاتـــــــــي🔥
استمر الوضع هاذا مع ساره لمدة اسبوعين ومعاملة سيف معاها زفت اهانه وتقليل قدر ليها ومرات حتى توصل لي الضرب 💔
اما زهره كانت عايشه اسعد ايام حياتها رغم ان شوفة معاذ اضايق فيها هلباااا لاكن جديات كانت فرحانه مع محمد ❤️
منال:هكككككي للمره الالف نقولك طلقني كرهتك معش نبيك خلاص
عبدو:شن تحكي انتي كيف تبي تطلقي وانتي بي ها العمر شن بتحكي عليك الناس وانتي عندك بنات على باب زواج
منال:طز فيك وفي بناتك خلاااااص انا معش طايقاتك
رانيا:تبكي....بالك في سحر في القصه يابابا ونبي متاخذش بي كلامها 😭
منال:سكري فمك انتي انا لا مسحوره ولا شي اهو حالتي زي الفل ليا شهووور نطلب في الطلاق من بوك هوا مسكر راسه
رتاج:بابا خليها تهدا وبعدين ساهل
عبدو:عطاها بضهر بيطلع لاكن وقف لما سمع كلامها
منال:لانه مش راااااااجل بووووكم مش راجل حتى حقي في الفراش مش قادر عليه
عبدو:التفتلها وطاح فيها ضررررب بدون شعور وبناته الزوز واقفين بصدمه مش مصدقين يلي سمعوه ويلي يشوفو فيه ...اما عبدو ختم الطريحه بي انتي طااااالق !!💔
_______________
ساره:تغسل في الماعين وتشوف من الروشن !...كانت في حركه غريبه برا سيارات ماشيه جايين وناس اول مره تشوفهم واقفين مع محمد وعبدو واتصلات في جرت بعض !
مهتمتش للموضوع ...سكرت الروشن بس كأن الوضع زاد علي حده لما سمعت الزغاريط ..فتحت الروشن وشافت الزحمه زادت
لبست متع الصلاة وطلعت بسرعه تحاول تفهم ....
كانت ام حازم طايحه ع الارض تبكي وتزغرط بصوت متقطع 💔
ساره:قربت شويه تشوف وقلبها وقف لما شافت حازم قدامها وكلهم يبكو ويحضنو فيه ....طاحت بركبيها ع الارض وعيونها تجمدو من الصدمه
تشوف مش مصدقه
حازم:يحضن في امه وباقي عيلته وجت عينه في عين ساره 💔لاكن الشي يلي يحررررررق ان غير اتجاه عيونه بدون ميكلمها ولا حتى تعبير الوجه...واضح ان سمع بيها تزوجت !!💔
بعد قريب ساعه كامله من البكي والتصوير والزحمه خشو الرجالا للمربوعه والنساوين في الحوش وهاذا كله ساره مقعمزه ع الارض تسحاب روحها تحلم !
ام ساره:بصوت يرجف ...نوضي بنتي خشي داخل مش حلوه تقعميزتك برا هكي
ساره:حازم؟امي حازم؟؟حازم ييلي جي ؟
ام ساره:نزلت دمعتها...اي حازم طلع مش متوفى كان مفقود واخذينه اسير ومحدش يعلم بيه
ساره:داخت من الصدمه وهيا تهلوس بي اسمه 💔
__________________
منال:رجعت لي حوش خوها مطلقه وكلللللهم مصدومين طبعا خوها زاد ضربها اكتر واكتر 💔لما عرف انها هيا يلي طلبت الطلاق وقللت ادبها علي راجلها ...وصلت لي حوش خوها وبرغم انها خسرت راجلها وصغارها بس كانت فرحاااانه اخيرا رح تهرب مع حبيب القلب يلي عطاها شوية كلام معسول وخلاها تحس انها رجعت مراهقه
منال:هيا وينك ؟
منتصر:اهو تحت الروشن ..تشوفي فيا؟
منال:اي....لوحت الفلوس من فوق
منتصر:خذاهم...تمام هكي
منال:به شنو ننزل توا؟
منتصر:منبيش تقعدي معاي ونلود بيك استني نمشي نحجز اول طياره لتونس وناخذ الحجات يلي ناقصه ونجيك وتي روحك في الليل
منال:تمام
منتصر:تم حبي هي سلام
منال:سلام...سكرت الخط وتشوف لي روحها في المرايا ...اوووف كيف بنخفي اثار الضرب هياا يلي علي وجهي بسسس
ساره:مقعمزه ع الكرسي في الجنان وقاعده تحت تأثير الصدمه ...تسمع في كلام وزغاريط الفرح يلي داخل لحضات شافت حازم طلع وماسك التالفون كأنه بيتصل !
ساره:ناضت وقفت قدامه برجلين يرجفو وقلب بيطللللع 💔
حازم:اهلين
ساره:ساكته وتشوف لي عيونه
حازم:الف مبروك ربي يهنيك
ساره:تتفحص فيه كان متغير ...لحيته طويله هلبا وواضح عليه التعب والارهاق 💔
حازم:سكت
ساره:بدون مقدمات حضناته ....وين كنت ؟وين خليتني انا ادمرت حازم متتت بعدك دمروني قتلو كل شي حلو كان عندي ....بدت تبكي بي العبره وصوت عااالي ....حازم خووودني من كل شي
انقذني من هاذا كله زي ما تعودت ادير قبل 😭💔
حازم:فك يديها بهدوء ...عيب الكلام هاذا انتي توا مرا متزوجه حرام تقربي عليا
ساره:طاحت ع الارض ماسكه في رجله ....بالله عليك😭افهم مني شنو يلي صار حازم وراس كل دقيقه في حبناااااا
حازم:بعد من عليها...يلي صار انك كنتي تبي تتزوجي وخلاص
ساره:جتها حاله هستيريا بدت تبكي بصوت عاااالي ....حاازم لااا😭😭😭
رتاج:حازم تعالا العشي واتي درتلك سفره خاصه
حازم:عطاها بضهر ورجع داخل وساره نهاااااارت💔
جت سلمى وشوي ناس من العيله قاموها ودخلوها ويحاولو يخلوها تهدا حتى شوي
_____________________
زهره:مسكينه ساره صدمتها توا اكتر من صدمة موت حازم وجعتني جديات 💔
محمد:في النهايه نصيبات وهيا اختارت تكمل مع سيف الله غالب
زهره:اي بس حرااام تسخف
محمد:مسك خدودها....يامحلاااااها غزالتي الطيبه
زهره:ضحكت
محمد:ريحتي كلها العاب ناريه بندوش وتيلي حوايجي
زهره:حاضر ياروحي
محمد:خش الحمام وزهره فتحت الدولاب اطلع في حوايجه تالفونه شرين هلبا بعدين ...وصل مسج !
السلام عليكم معاك احمد ال....نخدم في الصيدليه حاولت نوصلك هلبا مقدرتش نفس السم يلي كلاته مرتك وماتت بيه قبلها بيوم جي شخص شراه وهوا يلي قتلها انا متأكد اتصل بيا نفهمك
🔥رِوايـَــــاتْ بـــــَــــنـــو تــِةْ الشــِـــيـــــــخْ🔥
🔥أَروى الطــَـــاهـــــِرْ المــــســـلاتـــــــــي🔥
ام سيف: البنت تاعبه هلبااا خليها ترتاح بكرا تروح
سيف:انا قلت اليوم يعني اليوم
حازم:طالع من المربوعه
سيف:مرتي وحر فيها كلميها تطلع بنروحو
حازم:طلع بدون اهتمامه لي صحابه يلي كانو يستنو فيه برا ...وبعد الف محاوله ومحاوله روحت ساره مع سيف !
منال:قعدت تستنى هلبااااا في منتصر كل شويه تشوف تالفونها ع امل تلقى مسج منه هيا انزلي انا لوطه بس للاسف مفيش!!
اتصلت مره واثنين وثلاثه والف لاكن مفيش فايده
والساعه 12ونص بضبط وصلتها رسالها منه وقريب طارت من الفرح قبل ماتفتحها
منتصر:تعيشي وتاكلي غيرها ياعزوز
وفي اللحضه هاذي عرفت ان منتصر ضحك عليها وخذي الفلوس وانها خسرت عيلتها كلها وصغارها في سبيل لا شي...ورح تكمل حياتها مع خوها ومرته يلي يعاملو فيه زي الحشره
______________________
ساره:وقفت مستنده علي الحيط مفيش شي في راسها حاليا غير الانتحار مهما كلفها الموضوع
بس وهيا في طريقها سمعت سيف يحكي ع التالفون
سيف:نضمي جوك مدخليش بيك عندك من هنيا لساعه 1صورك وانتي عريانه ميوصلونيش تشوفي شي ميعجبكش ره !!والطلعه مش توا مزال
ساره:تحكي داخلها....مش حرام نموت انا ونخلي واحد زي هاذا عايش يلعب علي بنات الناس ويضيع شرفهم؟
زهره:اتصلت برقم وكانت بتتفجر
احمد:السلام عليكم خوي محمد
زهره:اسمع ياحقير لما خذيت منك ودفعتلك اتفقنا انك تسكر فمك خير ما نكسرهولك
احمد:زهره انتي قتلتي اختك؟
زهره:اي اي اي اختي قتلتها انا به ؟وإياااااااك تفكر تقرب جيهت راجلي ورربي انت تعرف شنو شاده عليك ياواطي ...وسكرت الخط وجت بتمسح المسج والمكالمه
محمد:ليش؟
زهره:تلفتت 😨😨😨😨😨
محمد:حاط في باله ان القصه ممكن تكون بصاره ...قرب عليها ومسك التالفون منها
زهره:استنى حبيبي
محمد:باعدها بقوه ويقرا في المسج ...قام عيونه وكان وجها اصفرررررر ...شنو؟شنو شنو هاذا؟
زهره:لا مقلب هاذا مش ....
محمد:متحاااااااوليش تكذبي مش عيلللللل انا
زهره:عيونها دموع بدت تتكلم بطريقه غريبه ....لاني نحبك محمد نحبك والله والله نحبك
محمد:لوح التافون ويديه علي راسه يحاول يستوعب
زهره:بدت تبكي بي الصوت
محمد:يارب ...يااااارب يارب
زهره:هيا كانت تخون فيك متستاهلكش 😭انا يلي حبيتك قبل ماتخطبها قتلها فوتيه ونصحتها هيا موخرتش
انت كويس وهيا تعامل فيك غلللللط ومش مهامه بيك ومحتقراتك بس انا لاااااا
محمد:دفها بقوه لين طاحت ع الارض ...انتي كيف قدرتي تضحكي عليهم كلهم؟؟؟؟كككككككيف اختك هاذي
زهره:بدت تتكلم كأنها مريضه نفسياً😭درت كل شي ع خاطرك انا
خليت شيماء متحسش بيا ودرت علاقه مع معاذ
محمد:😨خوي!!
زهره:خليتك تتوهم ان في اشباح في الحوش عشان نطلعو من جنب اهلك وتقعدلي😭
محمد:طاح ع السرير مش مصدق
زهره :نحبك محمد خليت اختي تلمس شيشة السم عشان يقعدو فيها البصمات 😭حطيتلها السم في القرفه يلي شربتها قبل ماتروح
محمد:يشوفلها بصدمه...زهره
زهره:عيونها تحبني صح ؟اي تحبني مش رح تخليني !عارفه انا
محمد:انتي طالق
زهره:وقفت بعد ما سمعت الكلمه وطلعت تجري من الدار ...اما محمد رجليه مش قادرين يخلوه يوقف
___________________
ساره:خشت لي الدار بخطوات هاديه واول طعنه بي الموس كانت في قلب سيف يلي كان راقد ميعلم بشي ضرباته 7طعنات وفي كل طعنه كانت تتلذذ وتشفي النار يلي داخلها 💔الدم في كل مكان
مخلتش مكان في جسمه مطعنتاش فيه ولما تأكدت انه مات رسمي طلعت من الحوش ومعش حد يعلم بيها!!!
محمد:يحاول ياخذ نفس ويتحكم في روحه بس كانت الصدمه اكبر من كل شي ...سمع صوت قوي براا وناض يجري شاف من الروشن وكان منضر زهره وراسها يلي مقسوم بين زوز يرعش💔
الدكتوره:زهره لوح روحه من فوق؟
البنت:اي ههههه مكانش عندها الشجاعه تكمل
الدكتور:تقتل اختها معقوله😨😨مستحيل !
البنت:مفي شي مستحيل
الدكتور:قامت عيونها بصدمه.....لو كانت زهره خلاص ماتت معناها انتي .....
البنت:اي اي انا ساره وهاذي قصص بنات ابليس
خطط زهره وقتل اختها بدون رحمه خلتها وحده من #بنات_إبليس رتاج واخفائها ان حازم عايش يوم عرسي خلتها وحده من #بنات_ابليس سلمى ومنال والذهب يلي خنبوه وياما دارو حجات ترعش بس مخلوش اروى تحكيها في الروايا هاذي خلتهم من #بنات_ابليس وانا الناس كلها مش فاهمين قصتي ويسحابوني قتلت راجلي لاني نخون فيه بس خلتني الاشاعات هاذي وحده من #بنات_إبليس
الدكتور:لاكن لاكن ...معش عارفه شنو نحكي محمد وين وبنته ؟
ساره:محمد قرر يربي بنته بروحه بعيد علي كل شي صار وطلع سافر بيها
الدكتوره:وحازم ؟حازم ياساره
ساره:قامت عيونها وكانو يلمعو بي الدموع ....اول ما تطلعي من الحبس رح تعرفي
الدكتوره:مزال بنسأل....
ساره:وقفت ع الروشن وعطتها بضهر ....خلاص اكتر من هكي معش بنحكي شي
الدكتوره:بلعت ريقها بعد الصدمات يلي خذتهم ووقفت ...رغم يلي حكيتي عليه منشوفش فيك وحده من بنات ابليس هاذم انتي الدنيا والضروف ضلموك هلبا تصرفك كان غلط
ساره:بنسبه ليك ....اما ليا كان صح الصح وهي اطلعي يكفي
الدكتوره:طلعت من الزنزانه وكل القصص تلود في راسها وخاطرها تعرف العيله كيف تحملو جنازتين في يوم واحد؟ وكيف كانت ردت فعلهخ وسلمى وين؟....طلعت من الحبس تراجي في التاكسي شافت راجل مقعمز كانت حالته غريبه شويه يدخن وواضح ان ليه ايام ع الحال هاذا
الدكتوره:خوي بنسألك
الحارس:تفضلي
الدكتوره:تعرفه الشاب هاذا يلي مقعمز غادي؟
الحارس:كل يوم هنايا هاذا مرات يبات ومرات يروح ويرجع من الصبح ممكن مريض او شي
الدكتوره:فتحت بابا التاكسي بتركب بس بعدين رجعت لي الشاب
الدكتوره:لو سمحت ....حازم صح؟
حازم:هز براسه ومردش عليها
الدكتوره:واضح ان الحب يلي بينك وبينها ما ماتش رغم كل شي صار بينكم صح
حازم:بنستناها ديما
الدكتوره:مسحت دموعها وركبت في التاكسي 💔
الحب عمره مايموت مهما صار 💔منبيش نكتب نصايح زي كل مره لان القصه تكفي ومنبيش نقول مقولتي لانها بعيده هلبا ع القصه
بنات ابليس في كل مكان بس انتي ديري بالك منهم 💔
