#غاليتي 2
🌹بقلم الشاعرة شهرزاد🌹
الحلقة الثانية
المنجي قرب منها وبحت فيها : لا ماتحركيش توا اتزيد كراعك
غالية نزلت راسها وزادت تبكي اخرى
سعاد : سامحني يامنجي انتعبوك ياوليدي
المنجي مشى يفتح باب السياره : عيب ياعمتي انتو هلي
سعاد : الله يجبر بخاطرك .. توا نمشي نلبس جلبابي
امينه فنصت فيها : والله مانك قاصتيها اترعشي البنت غادي 😡 توا تمشي معاها هناء
وبحتت في هناء : امشي البسي عبايتي عبايتك لبستها غاليه
هناء تضحك : غالية عبايتي هاتيجي عليها فيلو
المنجي قرب منها و متحشم وجه يصب عرق
غاليه وجها انحمرر و طبست راسها
قرب ورفعها : بسم الله
امينه : افطن يمي راك تعثر بيها في العتبه
غاليه منزله راسها وساكته
قرب بيها للسياره
وحطها في الكرسي الي احداه : مدي كراعك قدام ماتخليهش مثنيه
غالية تبكي : مش قادره
المنجي بحت لقاها حفيانه : هناء جيبيلها كندره من عندك
امينه ضحكت : لا كندرة هناء كبيره عليها هذي كرعيها صغار
بحت في كرعيها وضحك 😬
غاليه مدت يدها و قعدت اتغطي فيهن بالعبايه 😒
______________
أميرة تلبس في وشاحها ع المرايه : كان خليتنا كم يوم اخرى في الفندق مش عارفه عليش من ثاني يوم ماشيين فوق هلك
احمد يكد في شعره في الحمام : انا مانتريحش الواحد مش كيف حوشه امس كان نلقى را مالصاله مشيت للحوش طول بس امي قالتلي انتو فوقنا ونحنا حوش عرس مايصير شي
اميره اتلم في الشنطه : هيا باهي وتيت انا
احمد طلع مالحمام يلمس في جيوبه : مانسيتي شي ؟ وين حطيت مفتاح السياره ؟
اميره : مش عارفه شوفه ع المدخل فم الباب
احمد يضحك : كان يريح مفتاحها سياره ايجار وين انجيب حقها بعدين انبيع اثاث الحوش الي درته لكي
اميره تضحك : واتخليني نرقد ع الوطا ؟
احمد يضحك : بدال ماتقوليلي فداك ياحبيبي
اميره : تي توا حسستني ان المفتاح راح جديات وقاعدين اندورو في السياره الي انسرقت
احمد نغزها في جنبها : ولا تعطيني ذهبك انبيعه ؟
اميره ضحكت ضحكه شريره : هاهاهاها كانشي اتبيع سيارتك كله الا ذهبي
احمد مسك المفتاح ورفع الشنطه : وانتي مايهون عليك القرش اطلعي قدامي هيا
________________________
غالية تبكي بصوت واطي
هناء مقعمزه لاوره في النص : خلاص وانتي دموعك مايكملن كملتي عمرك اتبكي على كل كبيره وصغيره
المنجي بحت فيها في المرايا : خلاص سيبيها في حالها
هناء ضحكت : والله جديات ديما تبكي انت مش عارفها المنجي : اصلا انتي حيوانه كان سكرتي فمك و وطيتي صوتك راهو مافصلتيش امي ع الصبح خليتيني نطلعلك مالروشن
هناء : مش مني هي من امس لابسه قفطان اطول منها تعثرت فيه في الصاله
المنجي بحت في غاليه وابتسم : كيف طحتي امس ؟ 😏
غالية بحتت فيه وسكتت 😑
هناء : طالعه مالحمام تعثرت في القفطان وطاحت في الاستقبال
المنجي قعد يضحك 😂😂
غاليه اتبحت فيه وساكته وفي عقلها ( قعد يضحك !! اكيد يقول كنها ماقالتها ! توا يحسابني فرحت بالخبطه فيه ؛ اوووووف عليك موقف حقير حطيت روحي فيه )
المنجي سرح في الطريق ( وانا الي نحسابها فضحتني امس تاريتها زمطتها وسكتت .. بس ليش سكتت وغطت ع الموضوع وماحكتش حتى لهناء الي قريبه منها !! )
هناء : كنكم سكتو ؟
المنجي : شي غير انسوق .. سنه كم تقرن انتن ؟
هناء : مفروض تانيه جامعه بس وقفنا عشان الحرب
بحت في غاليه : وانتي ؟
غاليه : مش قالتلك هناء تانيه جامعه 😒
المنجي : نسأل على تخصصك مش سنه كم 😤
غالية : زي هناء 😒
المنجي : وهناء شن تخصصها
غاليه : اسألها 😒
هناء تضحك : ووووواااااوووو وانتو من يومكم هكي زمان غالية اتجي المنجي يقعد يسب برا يقول الدلوعه البارده
غالية : اكيده حتى توا يسب قاعد
المنجي ضحك : بدال ماتشكريني ؟؟
غاليه سكتت
هناء : منجي ! عادي انقوللها انك زمان اتقولي وجها زي الصينيين ؟؟
المنجي تنهد : خلاص انتي قلتيها اصلا 😐
غاليه تعصبت : درس ع اليمين ونزلني معلش ! 😤
هناء قربت منها تبي اتبوسها : تي بطلي ياكلبه انحبك انا
غاليه ادف فيها : حولي ماتبوسينش
هناء تضحك واتبوس فيها بالغصب : والله اتبطلي انبصروو معاكي 😂😘
المنجي : خلااااااص هناء ارجعي لاوره
هناء : حي تدوي غرباوي 😍 نعليا نتعب
المنجي ضحك : قعدت معاهم سنين في الحقول كني ماناخد كلامهم .... ومد يده وعلا الاغاني
_______________________
أحمد يحكي مع امه : وشن صارلها توا غاليه
امينه : ياناري يااحميده ع الزلقه الي زلقتها
سعاد تضحك : خيتك وعارفها ديما شيرتها مذهوبه
احمد : لا عارفها تذكري طيحتها مالسياره وانا شايلهن للجامعه فتحت الباب تبي تنزل طاحت 😂
اميره كشخت : باهي انا وين من هذا كله 😑
احمد بحت فيها وسكت
اميره تبي اترقع الموضوع : قصدي تحكو وانا مش فاهمه شي ! 😊
سعاد تحشمت : سامحينا احبيبه غير خدانا الكلام بس
اميره : لا عادي 😊
سعاد : نحنا جيرانهم من زمان وبناتي متربيات عند امينه يعني كيف خواتهم واكثر
اميره : اهاااا .... وكشخت على احمد
امينه مسكت التليفون : خليني نطمن عليهم انظر شن صار ....
وبدت تتصل : اهو الخط يضرب .. : ألو
المنجي : نعم
امينه : وين انتو شن صار
المنجي يبحت في غاليه : جو تمام ياامي مش كسر الدكتور قال إلتواء بس
امينه : الله يبشرك بالخير ويطمن بالك الحمدلله هي ماهناك شي كان انكسرت را شن صار فيها
المنجي : شويا وانجي ماتبي شي انتي
امينه : سلامتك ياباتي
___
المنجي سكر وحط التليفون في جيبه
بحت في غاليه مدلها يده : صبي هياا
غاليه مسكت في الكرسي وصبت : تمام نعرف نمشي بروحي
المنجي كشخ عليها : بجوك العتب مش عليك اصلا ومشى وسيبهن
غاليه انصدمت وبحتت في هناء
هناء سكتت ومسكتها : عاطك قطعه في لسانك هذ
غاليه تعصبت : حقير هذ 😒 ماتزعلش مني هو خوك بس تافه ياريته ماجابني كله من امك كلماته
هناء قرصتها : خلاص سكري فمك را يبرم يقتلني نا وياك
غاليه : حولي سيبي يدي حتى انتي معش نبيك صاحبتي
هناء ضحكت علت صوتها : وووويووووو خوفتيني
المنجي برم فنص فيها : سكري فمك ياحيوانه الناس يبحتو فينا 😡
هناء تضحك : عاجبك توا يانص انصيص اهو تهزبت 😏😬
غالية سكتت وتنهدت
هناء : لولي تذكري الموعد الي درته مع مهند هنا 😢
غاليه ضحكت : توا عليش اتقلبي في المواجع على روحك
هناء : والله جديات حتى هي كنا جايبينك طايحه مالسلوم
غاليه ضحكت : عليك يوم يوم السلوم عمري ماننساه سعفني احمد وامي امينه
هناء زعلت : الله الله 💔
غاليه بحتت فيها : مازلتي ياهنيوه ؟
هناء هزت راسها : لنقاني مازلت بحتي ليا سنه معش نندري عليه ومازلت ماقدرتش انحب غيره
غاليه ضحكت وتبي اتغيرلها جوها : الحمدلله قلبي ميت باهي الي عمري ماحبيت كان هذا را متعذبه زيك و دايره كتاب حياتي ياعين
هناء ضحكت وقعدت اتغني بصوت واطي : ماشفت زيوو كتاااب
غالية : الفرح فيه سطرين
هناء : والباقي كلو عذااااب 💃🏻💃🏻😂😂
وقعدن يضحكن 😂😂
____________________
10:30 م
امينه ادير في الشاهي في دار المقعد : حطلنا شي حاجه انتفرجو
رجب : خلي الاخبار ياوليه الواحد يعرف راسه من كرعيه ويشوف البلاد وين ماشيا
امينه : والله تعبنا الواحد اخبار في الحوش وصوت الدلف برا معش تريحنا
رجب مدلها طاسة الشاهي : حطي ككاويه
امينه خدتها منه : مرات احمد هذي موعرها يارجوبه
رجب : مالك ومالها انتي كل حد في حاله مالبدايه قتلك نا لا تجي شورها لا تقربيها
امينه عطاته الطاسه : مش نا ياحاج هي دايره راسها براس غاليه راقدة الريح
رجب استغرب : ايش دخل غاليه
المنجي خش عليهم : السلام عليكم
رجب : وعليكم السلام
امينه : نعطيك شاهي يمي ؟
المنجي : به ماتحطيش ككاويه في الطاسه توا ناخدها في يدي
رجب بحت في امينه : باهي ايش دخل غاليه ؟
امينه : خش احمد انشغل علي خيته قال كنها غاليه
وقعدت نحكيله نا فلي صار
رجب : باهي وين المشكله
امينه : قلبت وجها وكشخت على سعاد مسكينه رعشتها وقالتله هات مفتاح الشقه و صبت اتخبط
المنجي : وكنها ؟
امينه : هي من ايام الخطوبه مشاكل على غاليه
رجب كشخ : لا كله الا غاليه هذي بنتي الي ماضنيتها الله يربحها
امينه بحتت في المنجي : انت يمي مشيت وسيبت غاليه وهناء في الابتدائي البنت تربت هن و كبرت هن وربيناها وتكفلنا حتى بمصاريف قرايتها بوك قال كيفها كيف هناء
المنجي : مش عمي مختار مهندس وحالته متريحه .. خطرها ماشفتهش انا في الفرح لا هو لا عياله ؟
امينه تنهدت : اييييييه اسمله علي مختار
رجب : مختار طاح في ضنوه ياوليدي نزلو راسه للوطا وجلطوه وقاعد مطوح مقعد في الحوش
المنجي انصدم وقمعز : سألتك بالله ؟؟؟؟؟
رجب : والله زي مانقولك
المنجي حط يده على راسه : ياعليك دنياا شينا
رجب بحت فيه : عندك خالد هذا سكار نكار وابتاع حبوس ونصاب ومافي عله ماهي فيه
المنجي : باهي وينه توا هو ؟
رجب : باته متبري منه كملها مشاكل مع المنطقه وكل يوم واحد جاي يدق ويشكي منه
امينه : ويغيب يغيب شهر شهرين ويجي سكران يخش يضرب البنات يدقدقهن ويطلع
المنجي مصدوم يسمع وساكت
رجب : والثاني الصغير خاش على نفس الخط غير على مستوى راقي شويا يشرب في الدكنوني ومصاحب جماعة الشاليهات و سيارات و مايندري عليها وين تفتح
امينه اتهز في راسها : اسمله عليك ياسعاد
رجب : خلاص وهو مختار راتبه كويس كان بعدين مع التقليص و يدفع في قسط القرض الي خذاه عشان يسلك ديون ولده ماقعدله شي
المنجي تنكد : لا حول ولا قوة الا بالله وكيف قاعدين توا
امينه : سعاد مرات ادير في طلبيات موالح واتبيع و باتك يساعد في البنات يكسيهن ع العيد ويشريلها حاجات المدارس مره مره يذكرهن بكم تفتوفه هكي
المنجي : ان شاء الله في ميزان حسناتك ياحاج والله ماخساره فيهم جيران عمر
رجب : الحمدلله هذين بناتي بذات البنت غاليه مانتحملها هي وهناء وين نلقاهن مع بعضهن قلبي ينشرح
امينه تشرب في الشاهي : بينك وبين السو ياحويج
المنجي : توا بلكي شي يوم انخطم انسلم عليه عمي مختار
رجب حط الطاسه : واجب عديله
امينه : حتى انت من قبل فرح احمد معش خشيت عليه يارجب
رجب : توا كان سخر ربي وعطانا عمر بكرا نشرب معاه طاسة شاهي
غالية راقده في سريرها وتسمع في اغاني
( اليسا - جوايا ليك )
(( جوايا ليك احساس بيكبر كل يوووم ❤
العين تنام والقلب عمرو ماجالو نوووم ❤
من كتر شوقي ولهفتي شايل هموووم ❤
إرتحتلك ❤
احساس غريب بحسّو لما ببصلك ❤
وبحنلك لو حتى جنبي في حضن قلبي بحنلك ❤
سلمتلك اغلى ماعندي حتى قلبي فتحتلك ❤ )))
مبتسمه وتذكر في المنجي كيف رفعها وكيف عاملها كويس واهتم بيها وشالها وتذكر في موقف الخبطه كيف خبطت فيه وطاحت و لما تعاركو في السياره
مبتسمه واتفكر فيه وتذكر في كل شي صار بينها وبينه من لما روح ..
واتقول بينها وبين روحها
(( شن صارلك ياغاليه ؟
هذا المنجي !!؟ المنجي الي كنتي تكرهيه وماتحبيش بكل واتشوفيه تقول شفتي جن قدامك !!
وهو نفس الشعور اتجاهي يكرهني !
ومتأكده ان اليوم شالني عشان امه قالتله ومتحشم عشان خبطني ..
بس في المستشفى فنص فيا ورد يهزب زي زمان ..
معش لازم انفكر فيه الي قاعد يصير هذا غلط في غلط
لازم انطلع الافكار السوده من راسي ))
(( كن على يقين: أن هناك شيء ينتظرك بعد الصبر ليُبهرك ويُنسيك مرارة الألم ، ذاك وعد ربي "وبشر الصابرين " ❤ ))
___________________
هناء في دارها تبكي وفاتحه على صور مهند
الباب يدق
وصوت المنجي : هناااء
هناء مسحت دموعها بسرعه و حطت التليفون تحت المخده : خش
المنجي مكشخ : راضيه على روحك سألتك بالله ؟؟
هناء انفجعت ؛ كنك 😳
المنجي : حركاتك هذين راضيه عليهن ؟ تعلاي صوتك وضحكة المصريات
هناء طبست راسها : يامنجي كملت يومك وانت اتهزب فيا
المنجي قمعز ع السرير الي جنبها : شنو انهزب فيك مالكساد مثلاً الي يقل ادبه يستاهل مايجيه
هناء تغطت ودارت وجها ع الجيهة الاخرى وقعدت تبكي
المنجي انصدم : تبكي ؟؟؟
وكر من عليها المخده : اختي عندها احساس زي البنات وتعرف تبكي من امتى .... وضربها على يدها بوني
هناء تبكي : تي ااااه معش تقربني
المنجي يكر فيها من شعرها : صبي ياهاني اطلعلي برا راجل لراجل
هناء حمقت : معش اتقولي هاني 😡😭
المنجي يضرب فيها ابواني : هاني ونص
هناء تبكي : را انضبح لباتي
المنجي : اضحكي انسيبك
هناء : هاهاهاها 😊
المنجي ضحك : ياحيوانه بلا استفزاز اضحكي كويس
هناء : هاهاهاها كويس
المنجي ضحك بصوت عالي : تم توا نعرف كيف انضحكك
هناء قمعزت وقعدت تضحك : والله خلاص اهو نضحك
المنجي رقد ع السرير الي احداها : ايوه هك
هناء : حي عليييييك سرير غاليه تو تقتلك كان اتحقك
المنجي بحت في السرير : ماشاءالله درتولها حتى سرير
هناء : اها باتي شرا الدار سريرين عشان ديما بايته عندي ايام القرايا بذات
المنجي تردد قبل مايسأل : شن جوها هي البنت هذي ؟
هناء استغربت : شن جوها من اي ناحيه يعني ؟
المنجي : باتي حكالي ظروفهم والله صعبو عليا خوها خالد كان يعز عليا
هناء : انا باتي مايخليش فيا نعدي غادي بكل مره عديت روح سكران قعد يضرب في البنات كرست في الدولاب ورعشت
المنجي : لا الافضل انك معش تمشي وهما اكيد فاهمين الجو
هناء هزت راسها : حتى عمتي سعاد حكت لأمي قالتلها مش هانزعل كان ماجتش هناء بس خايفه يصيرلها حاجه وناخد حشمتها وغاليه خودوها حتى تعيش عندكم عادي
المنجي : ماقالت هكي الا وهي عارفتنا نحنا كيف
هناء : حتى عمي مختار مره عزم بيها على باتي قاله هي شبه عايشه عندكم خودوها
المنجي قمعز : كيف ؟؟؟؟
هناء ضحكت : قصده لأحمد
المنجي : اهاااا ! باهي
هناء : احمد كان يبي اميره وقتها ؛ باتي قاله والله كان عليا مانخليها تطلع برا غير اهم حاجه القبول بينهم واحمد داوي لأمه على بنيه
المنجي : وباهي ؟؟
هناء : هضا الباهي
المنجي : باهي مايجوهاش ناس هي مش مخطوبه
هناء قعمزت في سريرها : يجوها لكن لما يسألو على خوتها يطفشو واحد يشرب والاخر ابتاع بنات و وجيج اخر
المنجي صبا : ان شاء الله ربي يهديهم .. انطفيلك الضي ؟
هناء رقدت وتغطت : ياريت وخود الباب في طريقك
_____________
10:30 ص
احمد فتح روشن الدار
اميره حطت يدها على عيونها : تؤ تؤ تؤ معقوله هكي
احمد زقب ع السرير احداها : صباح الخير يالحب
اميره غمت روحها بالورغان : انت شن جابك هنا ؟؟
احمد : مش ساد امس مرقدتيني في الصاله ؟
اميره بحتت فيه : ترقد حتى في الحمام الحقيره الي اسمها غاليه هذي ياانا ياهي
احمد تأفأف : ياحبي انا اخر همي في الحياة غاليه والله ماني مدورها
اميره قمعزت اتلم في شعرها : لالا انا مانفهمش معش اتخليها اتخش للحوش الي انا فيه
احمد بحت فيها : تبي باتي يلزني انتي؟ تي مربيها
ورقد على ظهره : واااااو بطلت وانا نعاود في نفس الاسطوانه
اميره : اصلا انتو دايرين للذبان كراسي اتخششو في الشلتت لحوشكم
احمد اضايق : بدينا في الغلط
اميره تعصبت : لا كلام حق عيله سكاره نكاره شن تبو فيهم
احمد قمعز : انقولك البنت مربيينها نحنا يعني الي يمسها يمسنا اتقولي عليها شلتت معناها نحنا شلتت
اميره صبت وعزقت المخده ع الارض : لاهي دمكم لاهي لحمكم ....
ومشت الحمام وخبطت الباب بالقوه : شلتوته وحقيره 😡
احمد تنهد و برم رقد على بطنه
وسمع الباب يدق
صبا يجري فتح
امينه ماسكه سفره : صباح الخير يااحميده
احمد خداها منها : صباح النور يمي معقوله جايبتيها بروحك
امينه : وشن فيها كان ماتعبت لوليدي لمن نتعب
احمد حط السفره على طاولة الاكل في الصاله : تي مفروض نحنا الي نتعبولك ياست الكل
طلعت اميره مالحمام
لابسه روب ابيض قصير وشفاف : صباح الخير ياعميمه
امينه انصدمت : ص ص ص صباح النور ياعميمه 😳
اميره قربت مالسفره وحولت المفرش : يسهف بكل المنظر دقيقه انجيب تليفوني انصوره ع الفيس .. وخشت
امينه اتبحت فيها وهي تمشي 😳😳
احمد وجه طاااح وانحرج بكل : باهي خشي ياامي
امينه 😳 : لا ياوليدي تريحو مازلتو عرسان
اميره جت مالدار : خليك ياعميمه افطري معانا
امينه : لا صحه افطرو انتو 😳 .. ونزلت تجري
احمد سكر الباب ورى امه : معقوله يااميره طالعه قدام امي هكي ؟؟؟
اميره تاكل : وشن فيها انا عروس جديده وبعدين قاعده في حوشي
احمد : مهما كان مفروض ماتحرجينش قدام امي والله وجي انسلخ
اميره قلبت وجها: والله لما نطلع برا الباب هكي عندك حق تدوي لكن الي يجي في حوشي ويشوفني حتى بلا دبش عادي لان حوشي
احمد : بس هذي امي
اميره عزقت الشوكه : شفتني رديت عليها ولا هزبتها ؟؟ انت كنك ادور في عركه هذا كله عشان غاليه
احمد حط ايديه على راسه : شن دخل لبستك في غاليه
اميره صبت وسيبت الاكل : والله ماني واكله اقعد فيها بروحك
____
امينه نزلت تجري فتحت الدار على هناء : هناء هنااااء 😫
هناء يادوب فتحت عيونها : نعم يمي 😧
امينه : ياناااعلي نووووضي بسرعه
هناء انفجعت و بحتت فيها : كنك شن في
امينه قعمزت على طرف السرير : ركبت انشيل في فطور لعيت خوك يانااااعلي عليك منظر شفته
هناء تضحك : كنك خشيتي عليهم في وضع مش تمام 😍
امينه ضربتها : امشي ياكلبة الكلاب را نسحنك 😡
هناء تضحك : ماهو هااا ادوي هيااا 😂
امينه : ياحنه طلعت مالحمام
واتقلد في صوت اميره : صباح الخير ياعميمه .. ولابسه روب ابيض شفاف كله
هناء : باهي عروس شن فيها
امينه هزت راسها : لاوشفااف شفاف يعني وقصير بالحيل
هناء ضحكت : تي هذي عوبه فانص غير ولدك منعمي
امينه : والحنه ياحنه مشبره لعند فوق وقالت ايش انخش انجيب تليفوني هي تمشي وانا بقيت مستوهة
هناء تضحك : الله يقرفها 😂😂
امينه : يامينتي احمد وجه تما يصفر ويتخضر
هناء قمعزت : كانهو شاكمها را ماهضا حالها بس خلاص حطاته تحت الكرعين وقدرت عليه
امينه تنهدت وصبت : المهم هو متريح نا مادخلني
وبحتت في هناء : افتحي الروشن وهوي الدار وصبي اغسلي الحمامات
هناء تأفأفت : اسمله عليا بنقله 😫 ؛ حتى البنقله يقولو انا في اتنين يوم عطله بابا 🌚😂😂
امينه تضحك : صبي وانتي ساكته
وطلعت لقت المنجي نازل مالدروج ولابس دبش طلوع
المنجي : نهارك مبروك
امينه : نهارك ابرك .. وين ماشي
المنجي : عندي كم ورقه في العمل ماشي انتم فيهن شور النقل
امينه : باهي خش انديرلك تفطر
المنجي هز راسه : سلامتك ياامي متعود مانفطرش
امينه : لااااا هضا غادي في الصحراء والغربه هنا انت عند امينه لازم تفطر
المنجي ضحك : و ولد امينه لازم يطلع توا وعنده موعد .. وفتح الباب
امينه : بااااهي باااه اهرب
المنجي ضحك وطلع ..: ماتبي شي من برا ؟
امينه : سلامتك يمي جيب معاك خبزه
المنجي : حاضر .... وجا يبي يسكر الباب
امينه : وشكاره لعيت عمك مختار
المنجي : حاضر ....
___________________
2:00
المنجي في دكان يشري في خبزه ومصبية احداه بنت وحاطه شكارة خبزة ع الكاصه احدا شكارة المنجي
الي يبيع يبحت فيها وحطلها ورقه فيها رقم تليفون والمنجي خذا الشكاره بالغلط وطلع ....
_____
سعاد اتحط في الغداء : عدي ياصفاء شيلي صونية الفاصولياء هذي لعمتك امينه وقوليلها عطيني فردتين خبزه غير انس ماروحش البارح
صفاء اتأفأف : ياماما زهرة القصر مانقدرش نصبي توا يفوتني قولي لمروه
مروه ضربتها بالمخده : يعني انتي اتفرجي وانا لا 😡
صفاء ضحكت : انا جبت صونيه امس من عمتي امينه اليوم دورك
مروه هزت راسها : لالا شوفي غاليه
سعاد : غاليه تلبسي عباتك و اتشيليها وتجيبي خبزه
غاليه بحتت في كراعها : بكراعي هذي ؟
سعاد : دبّي وحيده وحيده عيب ديما ادز وماصدقت درت غداء كويس بيش اندزلها
غاليه صبت عشان تلبس : باهي توا انشيلها
لبست عبايتها وجت : وين الصونيه ياماما
سعاد شايرتلها : فوق الغاز مقزره
غاليه خدتها وطلعت وسكرت الباب
وبرمت لقت قطوسه : حي على امك ياغاليه 😱😱😱
وقعدت ادق عالباب : ياهوووو دونكم ليا 😫
القطوسه قريب منها 🐱 وتمعوي
غاليه اتخبطلها بكراعها ع الارض : امشي ياكلبه امشي 😡😭
_______
المنجي خش لشارعهم فات حوشهم ولف ع اليمين شور حوش جيرانهم
وشاف حاجه سوده كلها وقصيره واتخبط ع الباب ومصبيه احذاها قطوسه
قعد يبحت وقرب بالسياره
غاليه اتلز في القطوسه : الله يربحك عدددي ياحيوانه الفاصولياء صقعت
المنجي درس قدام الحوش وفتح الروشن : السلام عليكم
غالية وجها تلون مية لون قالت هذا شن جابه توا : وعليكم السلام
المنجي : كنك ادقي واتعيطي صوت التزواي ابتاعك واصل لنهاية الشارع 😒
غالية شايرتله ع القطوسه : هذي ماتبش تعدي
المنجي بحت في القطوسه : ع القطوسه !!
وقعد يضحك
غاليه قلبت وجها : ربي يشفي .. ومشت
المنجي فتح الباب و نزل صبا قدامها : ويييين ؟؟؟
غاليه اتبحت فيه فوق : مش شورك 😒
المنجي فنص فيها : أضني سألتك ومانبصرش معاك ؟!
غالية قلبت وجها : ماشيا لعمتي امينه نعطيها فاصولياء
المنجي مشى للسياره : اصبري به
مسك شكارة خبزه ومدها لها : امسكي هذي وهاتي الفاصولياء الي قريب تقعد لبن وانتي تعرجي بيها
غالية فنصت فيه : ماهو انت السبب في طيحتي عيطت لهناء من فوق
المنجي ضحك : قصدك لما خبطتك في القاعه 😏
غاليه تلخبطت : الي هو المهم انت السبب
المنجي ركب في السياره : باهي خشي وسكري الباب
غاليه كشخت عليه وخشت وجت تبي اتسكر الباب
المنجي : اسمعي
غاليه قلبها يدق : نعم
المنجي فتح الروشن : كثرت الطلوع والمشي في المنطقه فكينا منه لما تبي حاجه من امي ولا امك تبي تعطيها حاجه رني عليا ولما تبي اتجي لهناء رني عليا انصبيلك ع الشوكه 😒
غاليه حمقت : وانت شن ...
المنجي قاطعها وفنص فيها : خشي وسكري الباب 😡 وحرق عجل السياره
غاليه خشت اتهزب : اتفووو الحقييير والله انوريه 😤 انا يحرق في وجهي العجل من يحساب روحه ويحكم فيا اخرى هضا الي ناقص عليا
وخشت اتسب
سعاد : كنك ؟ ... وبحتت فيه الشكاره في يدها : واااجده الخبزه قتلك جيبي فردتين
غاليه مدتلها الشكاره ومتضايقه : مش من امي امينه هذي من ولدها البليد
سعاد استغربت : من احمد ؟؟؟
غاليه قلبت وجها : هضا الي اسمه المنجي
سعاد : سلمه جياب بدال ماتشكريه خاشه اتسبي صدق الي قال مايثمر فيك الخير ؛ حطي الخبزه في السفره
غاليه تعصبت : يحكم فيا يقولي معش تطلعي ولما تبي اتجي رني عليا انصبيلك
سعاد فنصت فيها : احمدي ربك يخاف عليك دايرك كيف اخته وشن فيها مش خوتك الي يجو في السنه مره ويدقو فيك طرايح
غاليه : لا مادخلش بيا انا هكي ومش عاجبه يخبط راسه في الساس .....
ولقت ورقه في شكارة الخبزه 😳
انصدمت ودستها قبل ماا امها اتشوفها
وطلعت تجري لدارها : داير روحه واعر و شخصيه وطايح فيا 😍
حاطلي الرقم في الخبره وعلى اساس جو خويا وخايف عليا عليك طروح !! 😏
تي والله انرن نمسح بيه الارض ونمسح كبدي 😌💪🏼
وطلعت تليفونها و ...............
الحلقة الثالثه من هنا
