الخطيئه ...
الحلقه 2
كنت خلاص قررت اوقف المهزلة اللي بتحصل دي ولبست هدومي وكنت نازلة من الشقة بس نهلة قابلتني على السلم ، وكانت جايبة معاها اللى المفروض أنه هيعمل معايه علاقة عشان ابقى حامل ، قد ايه الفكرة سخيفة ومهينة
- انتي رايحة فين يا منال ، رايحة فين يا مجنونة
= ماشية يا نهلة ، رايحة اعيش تحت رجلين جوزي اللي بيحبني ونفسه يجيبلي نجمة من السما ، مش مهم الأولاد ، مش عايزة أولاد هو ابني وجوزي ، بس لا هخونه ولا ههين نفسي تحت أي مسمى
- ما بلاش الكلام العبيط دا بقى ، الدنيا اتطورت دلوقتي والعالم كله بيحسبها بالعقل ، احنا مش في العشرينات يا حبيبتي احنا دلوقتي في سنة ٧٢ ، وانتي مضطرة ، يالا يا منال ، يالا يا حبيبتي ، ادخلي استني في اوضة النوم الراجل واقف تحت مستنيني انزل اندهله ، ادخلي البسي قميص نوم حلو كدا وحطي شوية برفان وشوية مكياچ في وشك ، بلاش هو يحس انك بتعملي دا غصب عنك
= يا سلام ، هو انا كمان هخاف على شعوره ، ما يحس وللا يتحرق ، هو انتي ليه بتتكلمي معايه كإني متأجرة
- يا حبيبتي هو اللي متأجر ، انتي سته وست أهله ، دا واحد صايع ، سواق تاكسي بيجري على خمس عيال ، وانا مفهماه زي ما احنا اتفقنا أن جوزك مسافر وانتي محتاجة علاقة عابرة كدا عشان الحرمان اللي انتي عايشة فيه ، وهو اخد مبلغ مش بطال قصاد الخدمة دي ، هينفذ المطلوب منه ويغور في ستين داهية ، لا انتي هتشوفيه تاني ولا هو هيشوفك والموضوع كله هيموت ، مش من مصلحتنا بقى ندخل الشك في دماغه ونخليه يركز معانا في اللي احنا بنعمله انتي برضو بنت ناس ، واسمك واسم عيلتك وعيلة جوزك مينفعش يتلطوا في حكاية زي دي
= خلصيني يا نهلة ، انا عايزة افوق من الكابوس دا بأي شكل ، ارجوكي خلصيني
- ماشي يا حبيبتى ، انا هنزل اجيب اسمه ايه دا عماد باين اللي واقف تحت وانتي ادخلي اوضة النوم كدا دلعي نفسك وخليكي متعاونة عشان المهمة تخلص بسرعة ، انتي متجوزة بقالك عشر سنين ، ومش انا اللي هقولك أن الحكاية دي بالذات مبتحصلش من غير رضا .. يالا يا قمر ، يالا يا حبيبتي ، البسي اسود ها ، بيبقى تحفة عليكي .. بقولك ايه يا منال ، فيه ازازة ويسكي جوا انا جايبهالك ، انا عارفة انك مبتشربيش ، بس حاولي تاخديلك كاس كدا عشان تفكي وتبقي براحتك ماشي ؟
ونزلت نهلة وانا دخلت اوضة النوم ، غيرت هدومي وعملت كل اللي هي قالت عليه ، وقفت دماغي تماما ، وخدت كاسين ، وحسيت فعلا اني بدأت انتعش واحس اني خفيفة اوي ، الخنقة اللي كنت حاسة بيها ابتدت تختفي ، هي ليلة سودا وهتعدي وهنساها ، انا عارفة اني هنساها ..
شوية ودخلت عليا نهلة ..
- ايه القمر دا ، يا بخته ابن المحظوظة ، مكانش ينفع حتى يحلم بليلة زي دي ، والله انا لو مكانه ابيع اللي ورايا واللي قدامي قصاد ليلة زي دي مش انا اللي اخد فلوس
= يا نهلة قولتلك ١٠٠ مرة بلاش كلامك دا ، بيحسسني أن انا رخيصة بجد
- بهزر معاكي يا بنتي مالك ، ما تفكي بقى ، يالا ، الواد واقف برا ، ليلتكو سعيدة انتو بقى
= ايه دا انتي رايحة فين
- هلف ساعة كدا بالعربية وهرجعلك تاني
= لا متسبينيش لوحدي معاه
- ايه شغل العيال دا ، مينفعش طبعا ، لازم انا اكون برا الشقة كلها ، اجمدي بقى يا منال وخلصينا من الفيلم دا ، يالا ، انا نازلة ساعة وراجعالك تاني
ونزلت نهلة ، دقيقتين بعد ما نزلت سمعت باب الأوضة بيتفتح ، كنت برتعش من الخوف ودقات قلبي بتزيد ..
دخل الأوضة ، كان بيغني انا كل ما اقول التوبة ، مكنتش قادرة ابص في وشه ، كنت دافنه وشي في المخدة من الكسوف ، بدأ يغازلني ..
- دا ايه الهنا اللي انا فيه دا ، انا مش شايف وشك صحيح بس باين من جسمك اللي زي الشمع دا انك قمر ، شكلك بنت ناس كمان ، اصل قميص النوم دا وريحة البرفان الغالي اللي طالعة منك دول ميقدرش على تمنهم غير ولاد الناس ، لعلمك انا كمان ابن ناس ، انا خريج كلية آداب ، وكنت معيد في الجامعة ، بس ظروفي صعبة شوية ، هبقى احكيلك حكايتي بعدين لو مهتمة تسمعيها يعني ، اصل النكد يعني غير مستحب في ليلة زي دي ، لعلمك انا متجوز ومخلص لام العيال اوي ، ولولا العوزة مكنتش عملت كدا بس يالا ، بقولك ايه ما هو كدا مينفعش ، انا عايز اشوف وش الجميل برضو ، لازم نتعرف ، ونتكلم واناغشك وتناغشيني ، محسوبك فؤاد ..
فؤاد .. كل اللي كنت بفكر فيه طلع صح ، انا مش ممكن انسى صوته حتى لو قعدت عشر سنين ما اسمعوش ، بصيت في وشه واتصدمت وهو اتصدم ، كوباية الويسكي وقعت من أيده على الأرض
- انت يا فؤاد ؟؟
= منال !!!
الحلقة الثالثه من هنا
بدل ماتدور وتبحث علي الروايات خليها علي تليفونك وحمل تطبيقنا
