الجزء 3
طلع من الدار و طلعت معاه روحي
شن الي نحس بيه هذا .. جسمي متخدر دايخه و كلي مشاعر و حب
ما قدرتش نرقد للصبح نضت دوشت و لبست حوايجي و ما قدرتش نطلع من الدار لين جتني امي قتلي تعالي افطري نزلت معاها و كان حسام واقف على امه
ارتبكت و صوت نبضات قلبي يسمعها كل من مر بجنبي
وقفته ،، شعره ،، لحيته ،، عطره ،، لبسته ،،
كله يذوب فيا
كنت متحشمه نقيم عيني فيه او نكلمه و لما قربت منهم قلت صباح الخير
ردت عليا امه و ابتسمتلي و سألتني اذا كنت رقدت كويس او لا
و حسام قال صباح الخير من غير حتى ما يتلفت لي !! استغربت .. زعمه احمد خوي فيه حاجة ؟؟
ناضت ام حسام و امي للمطبخ بيفطروا و حسام طلع و انا طلعت وراه
ناديته قالي نعم !!
قالها بصوت جديد نبره جديده
قتله شن في ؟؟ احمد خوي فيه حاجة ؟؟
قالي لا ليش تقولي هكي ؟
قتله امالا خيرك ؟ ليش ملامحك متغيره و وجهك ما يتفسرش ؟؟
قرب مني و قالي الي صار مبارح غلط و معاش نبي نكرره لان احمد قاعد بين عيوني
قتله اهاااااااا توا تفكرت احمد بين عيونك ؟؟ اوك الي صار غلط بس ليش المعامله هادي ؟؟ كانت احلى ليله في حياتي و احلى و اول شعور ليا .. هكي تعاملني ؟؟
قالي انا اسف بس متضايق من روحي لان مش انا الي نخون الصحبه و خوك مأمني عليكم ما يجيش ندير هكي معاه
اهااااااا صح عندك حق 👌🏻
رد فعلك جميل اعجبني بس مدام خوي مأمنك علينا رد بالك تفكر حتى تكلمني او تسمع صوتي حتى
كنت نبي نخش الحوش شدني من ايدي قالي انتي مش فاهمه عليا
نحيت ايدي منه و قتله لاااااا انا فاهمه كويس عليك لان الي تعطيكم وجه معاش تعجبكم و خشيت و خليته
قعد يتصل بيا ما رديتش عليه بعتلي رساله عيب عليك الكلام الي قلتيه
صكرت تليفوني و ناديت امي قتلها نبي نروحوا حوشنا .. قتلي توا ؟ قتلها ايه توا
قتلي ع الاقل لين يطلع خوك
قتلها انا نبي نروح امي ارجوك
مشت امي كلمت ام حسام قتلها نبوا نروحوا حوشنا و سامحونا على تعبكم و هكي
قتلها لا ما نخليكمش تروحوا و اتصلت بي حسام ولدها قالتله راهو اهل احمد يبو يروحوا حوشهم
قاللها اعطيني نكلم خالتي خيريه ( امي ) خدا كلمها قاللها علاش شن مضايقك و هكي قتله لا خلاص هداكا هو
قاللها الساعه 3 الضهر نجي نرفعك تشوفي احمد و بعدها الي يريحك ديريه
قتله به اوك
جتني امي قتلي الساعه 3 بنمشي نشوف خوك و بعدها يروح بينا حسام
قتلها من الي يروح بينا ؟؟ انا مش ح نركب مع حد .. فكرت نتصل بي اختي تجي تاخدني عندها او تروح بيا الحوش لكن راجلها دراه و مش ح يوافق و اتصلت بي نهى صاحبتي قتلها تعالى روحي بيا الحوش
قتلي امي لا عيب كيف تروحي هكي قتلها قوليلهم اي حاجة ديري اي سبله
جتني نهى و روحت الحوش و اول ما وصلت خشيت داري
شن الي تغير فيا ؟ ليش هكي فجأه ؟ كيف نقدر نرجع مريم الي قبل ؟ وين قوتي ؟ وين عزة نفسي ؟ وين كبريائي ؟
لازم ننسى و نمسح كل شي و نعتبرها غلطه و فاتت ..
روحت امي العشيه متأخر و اول ما خشت جتني الدار قتلي حسام و امه قاعدين تحت نوضي .. قتلها شن هادوا ما عندهم ما يديروا ؟ قتلي تحشمي لاقيين فيهم الخير اكثر من راجل اختك الي سمع بي المشكله اختفى .. به شن يبو ؟؟
قالوا لا ما تجيش نقعدوا بروحنا هنا .. غسلت وجهي ع السريع و لبست و نزلت سلمت و قعمزت .. قتلي ابله سعاد ( ام حسام ) خيرها الحلوه زعلانه و تبي تقعد في حوشهم ؟ قتلها ما نبيش نضايقوا حد و شبحت لي حسام .. قتلي لا حشاك الحوش حوشكم مستحيل يتضايق منكم حد .. قتلها ابله سعاد في النهايه الواحد ما يرتاحش الا في حوشهم و اكيد حسام مش ح ياخد راحته لاني انا موجوده عندكم ..
قتلي حسام عنده شقته و تو نلزوه و ضحكت
و عيونه كان فيهم لوم كبير و نظراته ليا تقول انتي شن اديري و شن تقولي ..
قتلها تمام كان هكي عادي .. امي كانت مصدومه فيا و في كلامي ..
حطيت حوايجي في شنطه و مشينا معاهم .. حسام طلع و لما جى الليل خشيت الدار و حطيت ميك اب خفيف و لبست بيجامه و فتحت تليفوني و اول ما فتحته اتصل بيا ..
ما رديتش و بمجرد ما كملت الرنه قعدت نشوف في الرسايل الي باعتهم كلهم حرام عليك ليش اديري فيا هكي و انا مش قصدي ..
و انا قاعده نقرا في الرسايل اتصل تاني .. رديت : نعم !!!
قالي ليش مصكره فونك ؟ قتله حره .. تفضل ؟
قالي ليش تكلمي فيا هكي ؟ قتله نبيكش تضايق و يأنبك ضميرك لان انا قاعده اخت احمد ما تغير شي ..
قالي انا جاي الحوش و نبي نشوفك .. قتله كان شرطي ان نجي نقعد هنا انك ما تقعدش معانا .. ليش جاي ؟
قالي مش ح نقعد بنجي نتفاهم معاك و بنطلع ..
صكرت الخط و بعد نص ساعه بعتلي رساله انا لوطه في الصاله
تجاهلتها لاني كنت نبيه يركب الدار و نحرقله قلبه ،، و بالفعل اتصل و ما رديتش و لحضات و الباب يطق و فتحه و خش ..
نضت من فراشي قتله انت كيف تخش عليا هكي ؟ قالي اتصلت و بعتت رسايل و ما رديتيش ..
قتله نعم شن تبي ؟؟
شدني من خصري بقوه لصقني فيه قالي انا نحبك نحبك نحبك ليش اديري فيا هكي ..
حاولت نبعده ما قدرتش كان شادني بقوه .. قتله سيبني خير من تنوض الصبح قالب وجهك عليا .. قالي لا انا اسف مش قصدي لكن انتي فهمتي غلط .. قعدت ندف فيه بي ايديا و كان هو يزيد يصكر عليا بي ايديه و يقولي ما نبيش يصير بيننا هكي ..
قتله انا نسيت الي صار بيننا لان بدل ما انوض و انا بنطير من الفرحه حضرتك قتلي متضايق من الي صار ..
قالي كذابه انتي ما نسيتي شي ..قتله نسيت .. قالي فمك يرجف و قعد يشوف لي فمي قتله صقعانه و ارجوك سيبني و اطلع من الدار .. قالي لا مش صقعانه فمك يرعش يبيني انا ..
حسام ارجوك اطلع .. كنت نبي نحافظ على قوتي قدامه و ما نضعفش
قعدت نحاول نبعده عليا لين حسسته اني متضايقه منه .. رخاني و قالي ما اقوى قلبك يا مريم و كانوا عيونه مليانات دموع حزن شوق ندم هلبا حاجات
قربت منه قتله مش قتلك ما نبيكش تندم بكره الصبح
الحلقة الرابعه من هنا
