الحلقة الخامسة والاخيرة | المجموعة النسوية الممنوعة
كريم بصلى اكتر واتمادى فى الغزل بتاعه وقالى:
= الواحد كل يوم بيبانله الناس اللى انسبله واللى فعلا بتبان فى عينه جميلة وانتى اجمل واحدة فى عينى وعايز اعوض بيكي كل اللى فاتنى ، انا عارف انى اتجوزت قبل كده ومن واحدة صاحبتك بس كل واحد وليه ظروفه ومش معنى انى فشلت فى تجربة ان كل التجارب هتكون كده ، عايزك تفتحيلي قلبك وانا مستعد اتجوزك دلوقتى حالا
انا بقيت فى ذهول من اللى بسمعه ، عمر ماجه فى بالى انه يقولى كده ، وطبعًا مقولتلوش ان سالى حكتلي على اللى بينهم وانه معشمها بالجواز لان حقيقي استحقرته جدًا ، العيب واضح انه فيه مش في كاميليا مراته اللى للحظة ظلمتها واديته العذر للى عمله معاها .
ولانى لازم ارد عليه ضحكت وقولتله :
= خلينا اصحاب احسن علشان مش هتخسرنى بس ، ممكن تخسر حاجات تانية كمان
مشيت وسبته وطبعًا بعد ماسبت كرامته واقعة على الارض ، حقيقي يستاهل انه يتهان ، والغلبانة مراته اللى طلقها انا متأكده ان حياتها هتبقى احسن من غيره وهو مش هيلاقى غير واحدة زيه تدوخه السبع دوخات وتلففه حوالين نفسه .
روحت قعدت فى مكانى وسمعت صوت صحابنا بيضحكوا وفرحانين وعمالين يهنوا يارا بجوازها ، علشان رجعت الشغل تانى ، روحت سلمت عليها وشها كان منور عن قبل الجواز وقولتلها بفرحة :
= وشك نور بعد الجواز
قالتلى :
.. ماهو الجواز كده يابنتى راجل ينور وشك او راجل يضلمها خالص ، وانا ربنا رزقنى باللى ينور وشي وطبعا انا منورة وشه
سالى طبعًا كانت معانا سلمت على يارا ودخلت قعدت فى مكتبها ، روحت وراها وقولتلها :
= سالى انا مش عايزاكى تسمعى كلام كريم تانى ومتسلميش نفسك ليه علشان هو بيلعب ، البيه النهاردة كان بيعرض عليا الجواز وبيتغزل فى جمالى وطبعًا سكيته على قفاه ، ومتقلقيش انا مقولتلوش انك حكيتيلى حاجة
ردت عليا بحزن وقالتلى :
.. انا كنت عارفة انه بيلعب وانه ظلم كاميليا ومع ذلك كنت بكابر وبهرب بيه من اللى انا عيشته مع جوزى
= فكرى فى موضوع جوزك تانى ياسالى ، يمكن تكونى غلطانة
.. لا يامشيرة ، مش معنى ان كريم خدعنى ولعب بيا انى ارجع لجوزى ، حتى لو مش هتجوز تانى ، الموضوع بالنسبالى انتهى وزى مايارا قالتلك فى راجل ينور وشك وراجل يضلمها خالص ، وانا اتضلمت بما فيه الكفاية ، مش عايزة رجالة تضلم حياتى تانى حتى لو همشي بشمعة يادوب تنورلي الطريق .
= عندك حق ياسالى ، تأنى فى اختيارك واصبرى علشان ربنا يعوضك بالخير
ميعاد الشغل خلص وطبعًا ركبت الميكروباص علشان اروح البيت ، الهوا كان شديد وانا قاعدة جنب الشباك حاولت اقفله معرفتش ، لقيت حد مد ايده من ورايا وقفل الشباك ، اتلفت علشان اشكره لقيته الشخص اللى ظهرلى فى الشقة والحمام ، كنت هصوت لكن مسكت نفسي بالعافية ، محاولتش اتلفت ورايا تانى لحد مانزلت من الميكروباص ، كنت حاسة بحاجة بتمشى ورايا ، لكن متلفتش برضو ، دخلت البيت، سلمت على بابا وماما وقعدت فى اوضتى ، غيرت هدومى واترميت على السرير حسيت بحاجة تحت المخدة ، رفعت المخدة لقيت ورقة عليها رسومات وارقام وكلام عبرى ، مسكت الورقة بسرعة وعملت بحث عليها لقيت معناها بالعربي ، استسلمى وهجعل الارض ملكِك ، يادوب نزلت الموبايل من ايدى لقيته واقف قصادى وماددلى ايده ، الغريبة انى المرة دى مصوتش ولا عملت اى حاجة ، حاولت اهدى على قد مااقدر وقولتله:
= ابعد عني وسيبنى فى حالى ولا تأذينى ولا ااذيك
رد عليا بكلام مش مفهوم وبدأ وشه يتغير لاكتر من شخص واللى فهمته ان عايز يعرفنى انه يقدر يتشكل باى شكل انا احبه عليه ، لكن مقدرتش استحمل وقفته قدامى والحرارة العالية اللى بقت فى الاوضة وحاولت اصرفه وقولتله :
= بسم الله الرحمن الرحيم انصرف ، بسم الله الرحمن الرحيم ارحل
لقيت الضحكة اللى على وشه راحت وبدأ جلد وشه يسيح ورجله اتحولت لحوافر ، وفيه قرون طلعت من جبينه ، قعدت اقرأ قرآن وانا بعيط وغمضت عينى لحد ماحسيت بنسمة هوا فى الاوضة ، فتحت عينى مالقيتوش .
نزلت جرى على الجامع اللى جنب البيت عندنا ، وحكيتله على كل اللى حصل قالى :
.. البداية يابنتى اساسا غلط ، فضولك انك تعرفى حاجات لسه اوانها بالنسبالك مجاش هو ده اللى عملك مشاكل والشيطان علشان يوسوس لبنى ادم لازم يدخله من الحتة اللى شهوته بتحبها ويتلونله بالحاجات دى علشان يدمنها ويبقى الانسان تحت طوعه ولعياذ بالله ، الستات اللى متجوزين ومشاكلهم مبتخلصش فى الدنيا وانتى ربنا يرزقك بواحد ابن حلال ميخليكيش تعانى المعاناة اللى شافوها زمايلك وكمان اوعى تفتحى الحاجات دى تانى على النت ، اديكي شوفتى لما عملتى كده حصل ايه
ادانى اكتر من اية قرآنية اقرأهم بمواعيد ثابتة فى اليوم علشان الغمة دى تنزاح وفعلا من ساعة مامشيت على كلامه ومحصليش اى حاجة الحمد لله ، وبقيت لما بروح الشغل مبتدخلش فى اى حاجة متخصنيش واتعلمت درس كبيراوى ان من تدخل فيما لايعنيه وجد مالايرضيه ، ربنا يبعد عنا الشيطان والشر واصدقاء السوء ويقرب لنا كل ماهو طيب ويبتغيه الله ويرضاه .
التفاعل بالنسبالك بسيط، لكن بالنسبالى بيمثل دعم كبير
تمت بحمد الله
