اتصلت بهدير صاحبتي اللي كانت علي علم بكل شئ من اول ما اخو جوزي رد عليا في التليفون قبل مايخرب بيتي
كلمت هدير وعرفت منها انها اتصاحبت علي اخو جوزي وبقا بيتمني يقابلها
كمان عرفت منها انه حكالها عن سبب خرابه لبيتي وان والدته بتكرهني عشان كانت عاوزه تجوزو لابن اختها وانه شايفني اقل من اني اكون واحده من عيلتهم وكلام كتير جارح عشان اهلي ناس علي قد حالهم وان والدته علي علم بكل اللي هو عمله
والكارثه الاكبر ان جوزي كمان كان عارف وكانو بيعملو كل التمثيليه دي عشان يحرموني من حقي ومن عيالي وكان بيمثل عليا اني زوج مثالي مع انه من جواه زهق مني وبيحاول يتخلص مني بأقل ضرر يحصله حتي لو علي حساب سمعتي انا واولاده
كان ممكن بالتسجيلات اللي سجلتها هدير افضحهم بس برضه هيتقال ليه سمحت لنفسها تكلم جوزها وكان لازم احس بانتقام شديد
المهم بدأت انتقامي بأول مقابله بين هدير واخو جوزي هدير وقتها كانت في ابهي صوره ليها مع جمالها الزياده خلته هيتجنن عليها
بعدها كان بيطلب من هدير تقابل والدته ب اي طريقه ومعاها والدها
خليت هدير تقلت شويه وبعدها قولتلها جه الوقت المناسب عشان تقابليهم
فعلا كلمنا راجل كبير في السن نعرفه كويس اوي راجل مادي جدا قولناله هيمثل بس انه والد هدير بمقابل مادي طبعا وافق علطول
واتأجرنا شقه في مكان نضيف جدا وقلت لهدير تدي العنوان لاخو جوزي وفعلا تمت المقابله
والدتهم اتوهمت بالمستوي الاجتماعي للبنت اللي بيحبها ابنها وطبعا انا عرفاها بتحب المظاهر وكنت متوقعه انها هتتوهم كده اما جوزي سابقا كعادته مشالش عينه من علي هدير
وهدير في المقابل بدأت قد ماتقدر تغريه بطريقه غير ملحوظه نفذت اللي قولتلها عليه بالحرف الواحد
وبعد انتهاء الزياره بدون مايحسو وبعد اما هدير حست ان طليقي اتوهم بيها مسكت فونه وكتبت رقمها وهو ابتسم وحط تليفونه في جيبه عمل اللي توقعته بالظبط
بدأت هدير تكلم الاثنين وتسجل مكالمات قد ماتقدر زي ماقولتلها لحد اما زارتني وقصينا مكالماتها مع طليقي وركبناها بطريقه معينه وجه الوقت المناسب لتنفيذ الخطه والانتقام واني ارجع ولادي
اتصلت هدير باخو طليقي وبدأت تبكي بشده وتشتمه. وهو بيحاول يفهم طبعا وقتها كنا عارفين ان هدير بقت بالنسباله ادمان وبقت الاكسجين بتاعه ومن غيرها هيتجنن واحده واحده هدير قالتله اخوك زباله وبيقول اني هبقي بتاعتكم انتو الاتنين واتهمته انه اداله رقمها
أخو طليقي مصدقش بعتتله التسجيلات اللي قصيناها واتس وقفلت السكه في وشه بعد اما لقته خلاص شبه اتجنن من الصدمه وكلمتني شويه ونمنا
تاني يوم الصبح صحيت علي خبر موت طليقي بعد خناقه شديده مع اخوه اللي الشرطه مسكته واتهمته بالقتل
لبست هدومي بسرعه ورحت بيتهم والدته كانت بتصرخ ووسط صراخها اول ماشافتني سكتت من الصدمة
مشيت ناحية ولادي واخدتهم ف حضني
اما هي بدأت تصرخ وتقول اطلعي من هنا متاخديش ولاد ابني دول من ريحته
بصيتلها باحتقار وقولتلها ابنك مات خلاص وانا اولي بعيالي خليهم يتربو ف بيت نضيف مينفغش يتربو في بيوت قتالين قتلا ومشيت وسط ذهول اللي قاعدين معاها من جيرانها اما هي من صدمة كلامي متحركتش من مكانها ولا نطقت حرف بعد اما خرجت سمعت صوت الستات بتصرخ عرفت انها اغمي عليها او حصلها حاجه
تاني يوم نشرت كل المحادثات اللي كانت تبرأني نوعا ما وانهم كانو متفقين عليا كلهم ومن غير ما حد يعرف اني انا اللي نشرتها زي ماهما عملو فيا وقصيت كلام وركبته يبين اني مكلمتش حد أصلا وان كل ده ملعوب منهم والبركه في البرامج بتاعت التلبفون ساعدتني جدا في قص رتركيب الكلام
حاليا عايشه في بيت اهلي بربي عيالي وبس ولحد النهارده محدش يعرف اللي عملناه انا وهدير وازاي اخدت حقي
بحس بوجع شديد اني اتسببت في موت ابو اولادي ولكن عيبي اني مبعرفش اسيب حقي ومكانش فيه حل اني ارجع سمعتي وولادي غير كده
بنصح اي ست متجوزه متكلميش ابدأ اي راجل غير جوزك حتي لو جوزك انسان زباله اتطلقي منه او كملي معاه من غير ماتستني حنيه من راجل غيره ودي كانت قصتي ايه رأيكم اللي انا عملته صح ولا غلط
بدل ماتدور وتبحث علي الروايات خليها علي تليفونك وحمل تطبيقنا
