اول ماقولتلهم انى هعوضهم عن العُقد كله بقى بيبص لبعضه
ومركزين يشوفوا التعويض بتاعى هيكون ايه، وكملت كلام:
= انتوا كل اللى يهمكوا الفلوس ، وانا يهمنى عُقد امى ميتبعش
وعلشان كده انا تمنته وطلع تمنه دهب 19 الف جنيه انا هديكم 25 الف
قسموها على بعض زى ماتحبوا ومعنديش كلام تانى فى الموضوع ده.
بصوا لبعض وكأن الموضوع عاجبهم وردت ايمان وقالتلى:
.. افرض الراجل ضحك عليك ، اكيد العُقد ده يساوى اكتر من كده
اتعصبت عليها وقولتلها :
= العُقد مش هيتباع وانتى عارفة انه ميجبش اكتر من كده
واظن كفاية اوى انى هأجل جوازى وهديكم الفلوس اللى عمال
احوشها طول عمرى علشان الم البنت الغلبانة اللى بقالها سنين مستنيانى
حسن قطع كلامها وقالى وهو مش فى كامل وعيه من المخدرات اللى بياخدها:
... ماشى يااخويا عداك العيب ولو جت فى الفين تلاته مش هتفرق
حط ايده على مناخيره وسكت شوية وبعدها كمل كلام وقالى:
... بس ادينا بقى نصيبنا دلوقتى علشان منتكلمش فى الموضوع ده تانى
طبعًا انا عارف انه عايز اى فلوس علشان يروح ياخد الهباب اللى بيشربه
وعملت حسابى انى اقسم الفلوس عليهم وكلهم قاعدين لانى لو اديته هو يقسمها
هياخدها كلها ومحدش فيهم هياخد جنيه.
دخلت جبت الفلوس من جوه وقسمتها عليهم حسب الشرع ماقال
وبالرغم ان ماليش ذنب ادفع الفلوس دى وفى النهاية العقد هيروح لياسمين
زى ماامى وصتنى لكن معلش ، لانهم مش هيسيبوها فى حالها وهي على نياتها
ومش هتقدر تسد معاهم ولا هتسلم من شر ايمان
طبعًا عملت مشكلة مع ندا بسبب موضوع انى اجلت الجواز كام شهر بسبب
موضوع العُقد والفلوس اللى دفعتها ، لكن بعد ماهديت وعرفت الموضوع كويس
عذرتنى واقتنعت ومش بس كده ، دى كمان خدت العُقد تشيلوا فى البيت عندها
لانى مش هينفع اشيله فى الشغل وقت طويل.
بعد شهرين جالنا عميل مهم جدًا كان بيشتغل فى الانتيك والحاجات السواريه
وكان باعتلى صور لحاجات عندى هيوصلها عن طريق الشركة بتاعتنا
وهو معايا وريته الصور علشان ااكد على الحاجات بالظبط اللى هيبعتها
جت صورة امى الله يرحمها بالغلط ، اول ماشافها سألنى بإهتمام:
= مين دى؟
.. امى الله يرحمها
= الله يرحمها ويحسن اليها ، بس الصورة دى باين عليها حديثة
.. اه امى لسه متوفيه من 4 شهور
= العُقد ده شكله جميل جدًا ، شكل الحاجة الله يرحمها كانت بتحب الانتيك
.. اه فعلا امى كانت بتحب العُقد ده جدأ
= لو حابب تبيعه ، انا ممكن اخده منك بسعر حلو اوى
.. لا لا مالوش لزوم ، امى وصيتها ان ميتبعش
لقيت الراجل عمال يلح عليا انه يشوف العُقد ويشتريه منى واضطريت
اكدب عليه وقولتله :
= العُقد ده مش حقيقي على فكرة، ده كان شبه عُقد قديم وجبته هدية لامى فى عيد ميلادها
كان باين على ملامح الراجل انه مقتنعش ، لكن عدى الموضوع ومن بعد كلامه
اهتميت جدًا اعرف ايه هي اهمية وقيمة العُقد ده خاصة بعد اصرار الراجل
واهتمامه المبالغ فيه انه يشتريه ، خدت صورة للعُقد وروحت اكتر من محل انتيكات وبازارات
علشان افهم ايه العُقد ده ، فيه منهم اللى اتعرف عليه وفيه منهم قالى عُقد ذهب قديم
عادى جدًا ، لكن فيه محل كان صاحبه راجل سودانى اول ماشافه دخل فى ذهول
وقالى :
= عُقد الحاكم اللى الدنيا كلها مقلوبة عليه ، تمنه ممكن يوصل لـ 10 مليون دولار ......
