طبعًا دخلت فى صدمة شديدة لما عرفت ان العُقد ده ممكن تمنه يوصل لـ 10 مليون دولار ،
ولما سرحت شوية الراجل لاحظ ده وضحك وكمل كلامه وقالى:
= متتفاجئش يااستاذ العُقد ده من قبل الخلافة العثمانية ،
وهو يخص واحدة كان بيحبها ارطغرل وهربت وسابته وهي كانت بتحب
العُقد ده جدًا لدرجة انها مكنتش بتقلعه ابدًا وكمان خسرت اقرب صديقاتها
لما حاولت تهزر معاها وتقطعه تخيل
.. ياه للدرجادى
= واكتر يااستاذ ، ارطغرل نشر جيوشه علشان يدوروا على الست دى
واداهم مواصفات العُقد وقالهم ان اول مايشوفه عُقد زى ده يمسكوا اللى لابساه
لكن لسوء حظه ان البنت دى لما عرفت بالموضوع سابت العُقد عند اختها من والدها
ومكنش حد يعرف حاجة عن اختها ولا هي مين ، والمؤسف فى الموضوع ان البنت
بعد ايام ماتت ومحدش عرف السبب ايه ، ومع موتها اختفى العُقد لوقتنا هذا
وكل الوصف اللى كان بيقوله ارطغرل تم تدوينه وتم رسمة العُقد ووصفه
وبقى مطلوب فى اكبر المتاحف فى العالم وطبعًا تجار الاثار قالبين الدنيا عليه
.. للدرجادى العُقد ده مهم؟!
= اكتر مما تتخيل يااستاذ ، لكن قولى هو حضرتك لاقيت العُقد فين؟
طبعًا اترددت شوية لكن ادركت الموضوع بسرعة وقولتله:
.. لا ملقتوش ولا حاجة ، اصل الصورة دى واحد قالى اسأل عليها
لأنه عايز واحد زيه
= اكيد واحد من اللى بيدوروا عليه ، العُقد ده ثروة قومية يااستاذ
خرجت من البازار وكلام الراجل عمال يدور فى دماغى ومبقتش عارف اعمل ايه
ولاعارف اقول لاخواتى عليه ، ولا عارف انفذ وصية امى واديه لياسمين
خاصة ان اى حد ممكن يشوفه عليها ، هيحاول ياخده بأى شكل حتى لو هيأذيها
وزى اى حد بيحصل عنده حالة وفاة بينزل صورة للمتوفى على الانترنت علشان الناس
تترحم عليه ، اخواتى برضو عملوا كده ، ودى طبعًا مصيبة كبيرة خاصة ان لو حد
لمح العُقد وهو فاهم ده ايه ، الموضوع ساعتها مش هيعدى على خير
عدى كام يوم والحياة ماشية بروح الشغل وبرجع البيت وبزور ندا ومفيش اى جديد
لحد مافي يوم وانا مروح لقيت ناس نازلين من بيتنا وركبوا عربيتهم ومشيوا
وحسن اخويا واقف على باب العمارة بيقولهم : مع السلامة وفى امان الله
طلعت البيت وسألته :
= مين الناس دى ياحسن
بصلى ورد عليا بضحكة سخرية :
.. العُقد فين ياناصر؟!
= عُقد ايه ياحسن ؟! ، هو احنا مش خلصنا الموضوع ده وقفلنا الباب؟
.. العُقد بتاع امك الله يرحمها فين ياناصر
= تانى موضوع العُقد ياحسن مش اديتلكم فلوسه والموضوع انتهى
بنفتحه تانى ليه ؟
حسن ضحك بسخرية وفتح الدرج اللى جنبه ، لمحت فلوس كتير موجودة فيه
خد منهم 25 الف جنيه ورماهم فى وشى وقالى :
.. الفلوس بتاعتك اهي رجعتلك ، فين العُقد؟
فهمت ان الناس اللى كانت موجودة جت علشان العُقد ، وقبضوه كمان
هزيت راسى وخطيت على الفلوس اللى رماها فى وشي وقربت منه
وقولتله :
= العُقد بح ، طول مافيه ناصر مافيش عُقد ، وحتى لو مفيش ناصر
برضو مفيش عُقد .....
