اول مرة فى حياتى يبقى عندى الاستعداد انى اخسر اخواتى دون استثناء
ولما عرفت انهم نقلوا من المنطقة ، دورت على واحد صاحب حسن
وطبعًا علشان متأكد انه مش هيقولى على مكانه ، استنيته لما خلص شغل
بليل وشديته لبيت قديم وحطيت السكينة على رقبته وقولتله:
= قسمًا بالله لو مقولتش مكان حسن فين هفصل رقبتك عن جسمك حالا
ومش هستنى لما اتحايل عليك
.. هقول ياناصر ، هقول
وطبعًا زى ماتوقعت بالظبط ، حسن باع العُقد واشترى فيلا كبيرة
وايمان و سميرة وياسمين عايشين معاه ، مستنتش كتير
وروحت على الصيدلية اللى على اول شارعنا واشتريت مخدر من واحد
صاحبي واقف فى الصيدلية ، وروحت على الفيلا اللى
قالى عليها صاحب حسن لقيت اتنين من الحرس واقفين على البوابة ،
الساعة كانت 2 بليل ، نطيت من على سور الفيلا
ودخلت عن طريق شباك من الشبابيك
واول مادخلت لمحت سميرة نايمة فى سريرها ، حطيت المخدر على مناخيرها
وربطها كويس بحبل ، وبدأت امشى فى الفيلا ، لحد مادخلت الاوضة التانية
لقيتها فاضية ، وانا خارج منها سمعت صوت مياه فى الحمام
عرفت ان فيه حد جوه استنيت ورا الباب ، لحد ماشوفت ياسمين وهي خارجة
وحطيت المخدر على مناخيرها وبؤها بسرعة لحد مانامت تمامًا وربطتها وسبتها
ودخلت على الاوضة اللى بعدها ، فتحت الباب بالراحة .
شوفت منظر رهيب ، اتصدمت لما شوفته ، لقيت حسن نايم مع ايمان
وبيعمل معاها علاقة فى الاوضة ، مبقتش مصدق اللى انا شايفه قصادى
مسكت التليفون وصورتهم ، واستنيتهم لما خلصوا خالص واتداريت واول
ماخرج حسن من الاوضة بتاعتها ، كانت نايمة على بطنها على السرير
مسكتها بالراحة من شعرها ، لقيتها بتقولى بدلع
= ايه ياحسن ماتخش تنام بقى
شديتها جامد من شعرها ، وحطيت المخدر على مناخيرها وبؤها وقولتلها
.. انا مش حسن يافاجرة
ربطتها كويس ، وروحت لحسن اللى لقيته فى الحمام ، طفيت نور الاوضة
واستنيته بره ، واول ماخرج ضربته على راسه وخدرته وربطته
روحت جبت كل واحدة فيهم من اوضتها وجبت ايمان عريانة زى ماهي
وحطيتهم كلهم فى اوضة واحدة ، وحطيت بلاستر على بؤهم ، وعلشان الامن
اللى تحت ميحسش ولا يسمع اى صوت لما افوقهم ، اتصلت بيهم من جوه الفيلا
وعملت نفسي حسن لان صوتى قريب من صوته بشكل كبير
وقولتلهم يروحوا علشان فيه ناس وزيارة خاصة جايالى ، وبعد 5 دقايق بصيت
عليهم من الشباك واتاكدت انهم مشيوا ، مسكت التليفون وشغلت المسجل
وفوقتهم واحد ورا التانى من المخدر.
وطبعًا خدوا شوية وقت عقبال مافتحوا عينيهم وشافونى كويس وشيلت البلاستر من بؤهم
وجبت الكرسى وقعدت قصادهم وقولتلهم :
= اهلا بالاوساخ
حسن اول ماشافنى بدا يتمسكن وقالى:
.. ايه يااخويا هو انت هتقتلنا علشان الورث بتاعنا ولا ايه ؟!
متخليش الشيطان يلعب فى دماغك ، نصيبك منه محفوظ على داير المليم
احنا عملنا كده علشان عايزين الخير ليك ولينا
سكت شوية وضحكت بسخرية وقولتله :
= امممممم الخير ليا ، علشان تعمل خير فيا تقتل ندا خطيبتى وعيلتها
وتحرمنى منها ، ومش بس كده ، كمان تلبسها فيا وتبقى عايز تلف حبل
المشنقة حوالين رقبتى ، وكمان تعمل خير فيا بأنك تسرق العُقد وتبيعه
وتكسر وصية امى ، فعلا عملت خير.
.. لا يااخويا انا مقصدتش اقتلها والله ، كل اللى حصل ان ياسمين دخلت
الناس علشان ياخدوا العُقد وندا قعدت تصرخ لكن الاغبياء علشان يخلوها تسكت
قتلوها بالغلط ، عمرها انتهي كده يااخويا ، خد نصيبك مننا وعيش حياتك
واتجوز اى بنت تشاور عليها وانا هخطبهالك بنفسي وفرحكم عليا كمان
= كرم اخلاقك جامد اوى ياحسن ، الا قولى ياحسن انا عارف انك مبتقدرش
تقعد من غير حريم ، اتجوزت ولا لسه؟
بص ناحية ايمان لقاها عريانة ، بدأ يتلألأ فى الكلام وقالى:
.. ان شاء الله قريب اوى يااخويا ، غطي اختك بس علشان عيب
ضحكت بصوت عالى وقولتله:
= هو جسمها غريب عليك ؟!
سميرة وياسمين بصولها هي وحسن اوى وكأنهم كانوا شاكين فى حاجة بينهم
وكملت كلام وقولت لحسن:
= بعت العُقد لمين وبكام ؟
