البارت التانى
سلمى / انا كمان استغربت
شروق / لا ماتستغربيش لان هى دايما كانت بتغير من اى حد فينا يكون معاه حاجة وهى مش معاها نفس الحاجة وكانت دايما بتستخدم فلوسها لتحقيق كل اللى هى عايزاه وطبعا انتى كنتى فاكرة محمود كان بيحبك اد اية وبيعاملك كانك بنته اللى بيخاف عليها من الهوا الطاير وهى طبعا كانت غيرانه من علاقتكوا دى وعشان كدة هى غرته بفلوسها لحد ما اخدته اما اللى بعد كدة مايهمهاش يعنى يسمى بنته على اسمك او حتى انه يكون لسة بيحبك كل دة مش فارق معاها المهم انها اخدته منك وخلاص
سلمى / بس هى ما قدرتش تغريه بفلوسها الا لما بابا رفضه وساعتها هو حس بكسرة وعوض كسرته دى بيها
شروق / يا بنتى انتى لسة بتدافعى عنه مصيبة ليكون لسة معشش فى قلبك بجد
سلمى / تعالى بس نقعد فى البلكونة لحسن انا مخنوقة اوى هنا
شروق / الله البلكونة بتاعتك روعة يا لولو انتى مهتمية بيها جدا والاجمل انها واسعة وفيها كل ماتشتهيها العين من مناظر خضرة ولا العصافير وااااو
سلمى بتنهيدة / محمود هو اللى كان جايبهوملى وهو اللى علمنى اعتنى بيهم ازاى
شروق /بصت لسلمى ووضعت ايدها على كتفى سلمى وسالتها .... لولو انتى لسة بجد بتحبيه ...؟
سلمى / ابدا خالص بس انا حزينة عالحب فى حد ذاته فهمانى الحب اللى انا كنت صايناه ومستعدة انى احارب عشانه ولقيته هو اتخلى عنه بكل سهولة عشان عايز يوصل بسرعة لطموحه
شروق / انا فعلا مستغربة انه مع اول رفض لباباكى ماحاولش تانى واستسلم لاغراءات هالة بسرعة
سلمى / بصى اللى انا عارفاه ومتاكدة منه انه كان بيحبنى جدا ولا زال انما مش الحب اللى يسيطرعلى كيان الشخص ... تعرفى ان مامته حكيت لبابا انه مش سعيد مع هالة وانهم مش مهتميين ببنتهم وبقت تيجى تقعد مع جدتها عشان هى اللى تراعيها وعلى فكرة هى بتيجى تقعد معايا هنا وفى ساعات بتبات بتسلينى وحقيقى انا حبيتها بجد
شروق / بس اوعى تكون البنت هى الطعم للوصول ليكى
سلمى / يعنى اية مش فاهمة
شروق / يعنى يخلوكى تتشعلقى بالبنت وبعدين يحاول هو انه يرجعلك
سلمى / لا خالص لسببين ان مامة محمود بتحبنى جدا وما تتمناش لية اى ضرروممكن تقف معايا ضد ابنها كمان وبعدين اصلا انا اللى طلبت منها ان سلمى تطلع تقعد معايا لانى بزهق من القعدة لوحدى
شروق / طيب انتى كنتى بتقولى ان زميلك فى الشغل اتقدم لباباكى الله يرحمه قبل الوفاه يا ترى انتى وافقتى عليه ولا ايه
سلمى / لا طبعا موافقتش عليه انا لازم اللى هتجوزه احبه مش عايزة جواز صالونات
شروق/ طيب ما انتى حبيتى اهه كان اية اللى نابك منه غير جرح القلب وخلاص
سلمى / دة ما كانش حب دة كان حب من طرف واحد
شروق / ازاى مش انتى بتقولى انه كان بيحبك ولا زال
سلمى / ايوة بس مش الحب القوى اللى انا حبيتهوله
الحب ان اجدك دون ان اضطر للنداء الحب ان تاتى قبل ان الوح لك
الحب ان يسبق سؤالك دمعى ويسبق صوتك حاجتى الحب ان تعطى لانك تريد ولا لانى اريد
شروق / برده ازاى يعنى ماكانش بيحبك حب قوى يا بنتى دة انتوا الاتنين ما كانش ليكوا مثال فى حبكوا
سلمى / بصى يا شروق الحب اللى انا نفسى فيه هو الحب اللى يوصل بالاتنين لاعلى قمة من قمم الحب بمعنى ان كل واحد فيهم يشوف الدنيا من خلال عين نصه التانى فاهمة يعنى ايه نصه التانى بمعناها الحرفى يعنى كل واحد فيهم ما يعرفش يعيش لوحده ولو جه فى يوم اتفرقوا عمر ما واحد فيهم هيعرف يعيش لوحده وهتكون هى دي نهايتهم اما جوازالصالونات فممكن كتير جدا بيجى معاه الحب وبيكون حب صادق خالى من اى رومانسية وبمعنى اصح بيبقى حب عشرة انما ممكن فى يوم من الايام واحد فيهم يمر بتجربة حب رومانسية مع حد تانى وساعتها هيتقلب كيانه لانه عايز الرومانسية اللى حس بيها وعايز الانسان اللى حس معاه بده لكنه فى نفس الوقت صعبان عليه العشرة اللى عاشها مع الطرف الاول وممكن يكون فيه اطفال فيحس انه مضطر انه يبعد عن حبه اللى اتمناه عشان خاطر عياله وعشرة العمر مع مراته
شروق / طيب ما حب العشرة فى الاخر هو اللى انتصر اهه يعنى دة معناه انه هو الاقوى
سلمى / ابدا مش اقوى اصلا كون ان جت فرصة انه يحب حب رومانسية معنى كدة ان حب العشرة ماامتلكهوش ولا سيطر عليه وكونه انه يسيب حبه عشان ما يهدمش بيت فممكن كمان انه يضحى بالبيت دة ويروح لحبه اما بقى حب الرومانسية فهو اشمل يعنى بيشمل معاه حب العشرة ومن المستحيل ان واحد فيهم يقدر يحس بحب تانى فمهمتى ولا لسة
شروق / يعنى
سلمى / طيب انتى تعرفى الشاعر الكبير جبران خليل جبران حب الشاعرة والكاتبة مى زيادة حب رومانسية على الرغم ان هما الاتنين عمرهم ما شافوا بعض انما كتابتهم ومراسلتهم وضحت صفات كل واحد فيهم وسيطر عليهم هما الاتنين الحب وعشان كدة ما اتجوزوش لانهم عرفوا ان لوكل واحد فيهم عاش مع حد تانى هتكون نهايته وعلى فكرة مش لازم ان الرومانسية تكون بكلام الحب اللى ما بينتهيش انما بيكون بالاحساس والتصرفات يعنى ممكن تقابلى واحد ويحبك جدا لكن مش بيعرف يعبر عاللى جواه بالكلام لكن بيتعرف بالتصرفات لما تلاقى نفسك مش بتحسى بالامان الا معاه وبتحسى ان حمايته ليكى شملاكى فى كل مكان حتى لو ما كانش معاكى وعشان كده بر ضه بتلاقى فيه ناس كتير ليل مع نهار عمالة تقول كلام حب ومع ذلك بتبقى متاكدة انهم كدابين وعندك مثلا عمار الشريعى حب واتجوز من اذاعية وهو عمره ما شافها انما انعكس حبه على تصرفاته وممكن تستغربى ازاى الاذاعية دى قبلت انها تتجوزه وهى عارفة انه عمره ماهيشوفها وطبعا كل واحدة بتتمنى ان حبيبها يشوفها دايما فى احسن صورة انما هى كانت دايما بتقول ان عمار بيبقى فاهمها باحساسه ان كانت فرحانة ولا زعلانة بتبتسم ولا بتبكى
ومن الاخر انا معنديش اى سبب ان اتجوز واحد وانا عارفة انه فى احتمال انه ممكن يحب حد تانى غيرى
شروق / ياااااه يا سلمى دة انتى رومانسية اوى
سلمى / ابدا خالص بس كل اللى انا عايزة انى اتجوز اللى بحبه وبس
شروق / يبقى عمرك ما هتلاقيه عشان انتى اصلا مش مدية نفسك فرصة انك تعرفى حد
سلمى / يا بنتى دة نصيب ومكتوب يعنى ممكن اقابل الشخص دة فى المواصلات او حتى فى خناقة او فى اى مكان غير متوقع
قبك معدش ملكك مدام عشقتك
قلبك ماعدتش ملكك مدام سكنتك
مدام بحبك خلاص بق قلبى انا
قلبك ماعدتش عندك مدام بحبك
خدته واخدتك عندى انا
مستحيل انك تبعد حبيب عنك
حبيب لقى فيك كل اللى يتمناه
مستحيل تهرب ارتاح بقى وقرب
اصل اللى يحبك مايعرفش كلمة لأ
قلبك بقى حتة منى ارضى وطاوعنى
جواك سامعنى وليه مانعنى نعيش حياتنا وحبنا
سلمى / المهم مش ناوية انتى وياسين تحققوا حلمكوا وتفتحوا مجلة
شروق / اولا عشان نفتح مجلة يبقى عايزين راس مال واحنا الحمد لله ابيض يا ورد
سلمى / طيب ما تعملوا قرض
شروق / ياسين بيقول مش عايز يبدا بديون ويا عالم المجلة هتمشى ولا لا يعنى ممكن ما نعرفش نسدد القرض ساعتها بقى الحل هيكون ايه
سلمى / الموضوع عمره ما يتقاس كدة لان اى مشروع محطوط ليه احتمال المكسب والخسارة وكمان احتمال الخسارة فى البداية لقلة الخبرة وبعدها ينجح والا عمر ما فى اى مشروع هيتفتح .... بصى هو احنا لازم نقعد مع بعض ونحسبها كدة الاول وبعدين نتوكل على الله
مر عدة ايام على سلمى تحاول شغل وقتها باى شىء عشان ما تحسش بالوخدة وكل يوم سلمى الصغيرة تقعد معاها وتبات كمان والاتنين حبوا بعض جدا واقترحت سلمى الكبيرة عى جدة سلمى الصغيرة انها تقدملها فى حضانة عشان تاخد عالناس وما تبقاش وحيدة ورحبت الجدة جدا وبقت كل يوم الاتنين ينزلوا مع بعض سلمى الصغيرة تروح الحضانة وسلمى الكبيرة تروح شغلها وفى يوم وسلمى فى مكتبها اتفاجات بان حجرة والدها مفتوحة وان فى مدير مالى جديد اتعين مكان والدها وتقريبا هو فى نفس سنه
سلمى حسيت بضيق فى صدرها من الرجل اللى اخد مكان والدها وفكرت ازاى هتتعامل معاه من بعد والدها وازاى هتقدر تشوف واحد قاعد مكان والدها او يستخدم ادواته وفجاة قامت من مكانها ودخلت بسرعة مكتب والدها من غير ما تخبط عالباب
الشخص / اية دة هو فى اية
سلمى / اسفة لية حاجات هنا تخصنى عايزة اخدها ومدت ايدها بسرعة عالمكتب اخدت اقلام والدها ونظارة القراية الخاصة بيه وفنجان الشاى بتاعه واى شىء اخر له علاقة بوالدها وخرجت من غير ما تتكلم مما اثار دهشة هذا الشخص ومش فاهم اية اللى حصل وازاى تدخل تاخد الحاجة من غيرما تستاذن وازاى هو ما وبخهاش على فعلها ده وفضل قاعد فى ذهول من فعلتها
عدى اول يوم وعادت سلمى بيتها ومعاها سلمى الصغيرة انما فضلت طول الليل تبكى على فراق والدها وانها مش متقبلة تتعامل مع حد مكانه ولا قادرة تشوف حد قاعد مكانه عالمكتب
اتفاجات سلمى بسلمى الصغيرة بتمسح على دموعها وبتقولها معلش يا لولو مين اللى زعلك وان اضربة
هنا ابتسمت سلمى وحضنت سلمى الصغيرة وحسيت ان فعلا وجودها بيهون عليها
سلمى / بقولك اية يا قمر تيجى ننزل نجيب شيكولاتة وايس كريم
سلمى الصغيرة/ ماشى وحضنتها وقعدت تبوس فيها
فى الصباح وسلمى فى عملها لمحها المدير المالى الجديد ونظر لها باقتضاب نظرة نافذة اتوترت منها سلمى ودخلت مكتبها من غير اى كلمة
المدير المالى للساعى / مين الانسة اللى لسة داخلة دى
الساعى / دى الانسة سلمى محاسبة معانا وفى قمة الاجتهاد والادب
المدير المالى / بسخرية مهو واضح انها فى منتهى الاخلاق
الساعى حاول ان يشرح له من تكون ولكن المدير المالى زعق معاه وقاطعه وقاله انت هترغى معايا يالا اتفضل
المدير المالى فى نفسه طيب كويس جدا انها هتشتغل معايا عشان انا لازم اعلمها الادب واخليها تندم عاليوم اللى اشتغلت فيه معايا عشان تبقى تدخل كدة وتاخد الحاجة من على مكتبى بقلة ذوق
الساعى / انسة سلمى الاستاذ محمد عامرعايز حضرتك
سلمى / محمد عامرمين
الساعى / المدير المالى الجديد
سلمى بضيق للساعى / طيب اتفضل انت
سلمى خبطت عالباب ودخلت
محمد عامر حاول ان يستفز سلمى فقال لها / حضرتك دخلتى ازاى من غير ما تخبطى هو انتى داخلة سويقة
سلمى / انا خبطت قبل ما ادخل وبعدين انا مش مسئولة ان سمع حضرتك تقيل
محمد عامر بضيق / بس انا ما اذنتش بالدخول عشان حضرتك تدخلى
سلمى / حضرتك طلبتنى وانا جيت يعنى المفروض حضرتك عارف انى هدخل وبعدين انا داخلة مكتب فى شركة انا شغالة فيها يعنى انا مش ضيفة ولا انا داخلة بيت شخصى لحضرتك
محمد عامر/ حضرتك جاية تعلمينى الادب
سلمى / ابدا حضرتك انا برد بس على اتهامك لية بانى قليلة الذوق
محمد عامر / انتى كمان هتتكلمى على لسانى وتقولى حاجة انا مقلتهاش
سلمى / كلام حضرتك معناه كدة وبعدين احنا خرجنا عن الموضوع الاساسى اللى حضرتك طلبتنى عشانه ممكن اعرف حضرتك طلبتنى ليه
محمد عامر / عايز كشف مصروفات المشتريات وكشف بتسوية العهد بتاعة المندوبين باصول الفواتير عن الشهر اللى فات كله وبعدين تعمليلى مقارنة بين الشهر اللى فات وبين اللى قبله عشان اعرف فين اخلل عشان استاذ ياسر قدملى المبلغ كاجمالى وانا شايف ان فى فرق كبير بس دة عايزه خلال ساعتين بالكتير
دخلت سلمى مكتبها وهى فى قمة العصبية لانها عارفة انه عايز يقرفها وفى نفس الوقت شغل الشهر اللى فات هى ما خلصتهوش لانها كانت مشغولة مع والدها فى مرضه
سلمى انهمكت فى عملها وهى متضايقة عشان عايزة تنجز شغلها عشان متظهرش انها مهملة فيه مر من الوقت اكتر من ساعتين وسلمى مخلصتش
الساعى / انسة سلمى استاذ محمد عايز حضرتك
سلمى / حاضر ..وقامت وهى متضايقة جدا عشان كدة هى اديتله الفرصة انه ياخد عنها فكرة انها مقصرة فى شغلها اقتربت من الباب وخبطت وانتظرت عشان ياذن لها ولكن ما اذنش ففهمت انه بعند معاها فرجعت مكتبها
بعد نص ساعة اخرى حضر الساعى لها وقال لها ان استاذ محمد عامر بيزق لانه طلبها وهى ماجتش
سلمى للساعى / روح قوله انها جت وخبطت وهو ما اذنليش بالدخول زى ما قال فاضضطريت انى ارجع مكتبى
الساعى حس بالتوتر بين الاتنين وان محمد عامر عايز يضايقها فدخل وبلغه ردها بطريقة هدية عشان ماينفعلش على سلمى وخرج بسرعة وراح لمكتب مدير المشتريات
حسين الساعى / استاذ سامح عايز حضرتك فى موضوع
سامح / خير يا عم حسين
حسين / اظاهر فيه مشكلة بين استاذ محمد عامر المدير المالى الجديد وبين الانسة سلمى وحاسس انه عايز يضايقها باى شكل
سامح باستغراب مشكلة مع سلمى؟ هى سلمى بتعمل مشاكل مع حد اصلا ولا عشان انت بتحبها يا راجل يا طيب ممكن تتخيل حاجات ملهاش اساس
حسين/ ابدا والله يا ريس روح للاستاذ محمد واعرف منه
محمد عامر / فتح على سلمى مكتبها وهو متنرفز جدا وقالها هو مش الساعى بلغك انى عايزك
سلمى / انا بلغته يقول لحضرتك انى جيت وخبطت وسيادتك مااذنتليش فرفضت انى اقتحم مكتبك زى ما حضرتك اقتحمت مكتبى دلوقتى
محمد عامر/ انا ادخل فى اى وقت انا مديرك ولا سيادتك ناسية
سلمى / ابدا انا مش ناسية بس كون حضرتك مديرى فده منصب وظيفى اما اذا كنا بنتكلم بمبدا حضرتك وهو انى ما ينفعش ادخل الا لم تاذن لية معنى كدة انك قررت ان المكاتب هنا بتاخد نفس حرمة المنازل يبقى مينفعش حضرتك تدخل مكتبى الا لما ااذن لسيادتك وابقى انا مغلطش لما خبطت ولما ما اذنتش بالدخول مشيت واكون غلطانة فى المرة الاولى وبعتذر لحضرتك
اما اذا اخدناها بمنطق ان دى شركة والمفروض انى اخبط اولا وادخل على طول يبقى حضرتك ما غلطتش المرة دى انما غلطت لما منعتنى انى ادخل غير بعد الاستاذان
محمد عامر / انتى مستفزة جدا وهتخلينى احطك فى دماغى
سلمى / اولا انا مش مستفزة انا برد لى حضرتك وببررتاخيرى على سيادتك اما كونك تحطنى فى دماغك او لا فاحب اعر سيادتك ان كل اللى بينى وبينك شغل وبس ولما اغلط فى شغلى تقدر تجازينى الجزا اللى انت عايزه يعنى الامر بسيط جدا مش محتاج ان حضرتك تشغل دماغك بيه
محمد عامر / انتى مين اصلا عشان دماغى تتشغل بيكى انتى فاكرة نفسك مين
سلمى / ودة اللى انا قولته بس اظاهر ان حضرتك بتنسى انت بتقول ايه لان حضرتك اللى قولت هحطك فى دماغى
محمد عامر اخذ نفسه بصوت عالى فى وجه سلمى وهذا كان كفيل انه يعبر عن مدى الغيظ اللى جواه وقالها بعصبية انا قولتلك ادامك ساعتين وعايز اللى طلبته منك يكون جاهز ودلوقت عدى ضعف الوقت وسيادتك ما خلصتيش ده اسمه اية بقى اهمال فى الشغل ولا بتكسرى كلامى ؟
سلمى / اهمال فى شغلى وتقدر حضرتك تطبق علية اى جزاء
محمد عامر / اتصدم من اعترافها بتقصيرها فى الشغل وهو كان فاكر انها هتحاول بشتى الطرق انها تخفى اهمالها وتتحجج باى حاجة فسالها باستهزاء طبعا ما انتى مش فاضية الا للمجادلة اكيد كل واحد بيكلمك بتضيعى وقتك فى الرد واختراع الاسباب وكله على حساب الشغل عموما عندك جزا شهرين من الحافز وهتسهرى النهاردة هنا هتخلصى الشغل ومش هيتحسبلك اوفر تايم لانك انتى اللى متاخرة فى شغلك
سلمى / من فضلك بلاش سهر عشان مكان الشركة بعيد عن العمران وانا هتعب وانا مروحة عشان مش معايا عربية
محمد عامر / انا عايز الشغل دة يكون جاهز على مكتبى الصبح بدرى وانتى لازم تتحملى نتيجة اهمالك وسبها وخرج وهو حاسس بالانتصار
حسين الساعى / دخل على سلمى لما عرف انها هتسهر واتضايق عشانها عشان عارف انها قاعدة لوحدها ومش هينفع تروح بالليل كدة لوحدها واتفاجىء انها بتعيط
طيب بس يا بنتى هو اية اللى مخليه يضايقك كدة دة انتى زى البلسم ومش بتحتكى بحد اصلا ولا بتتكلمى مع حد انا هروح الحقه قبل ما يمشى عشان اكلمه
سلمى وهى لا تزال تبكى / بلاش يا عم حسين اصله هو متضايق منى من ساعة ما دخلت واخدت ادوات والدى من على مكتبه
حسين / وهو مايعرفش ان الحاج عبد الرحمن الله يرحمه يبقى والدك
سلمى / الله اعلم انا ما اتكلمتش معاه اصلا
حسين / طيب انا هسهر معاكى عشان متروحيش لوحدك
سلمى / لا يا عم حسين الحق عربيات الشركة وروح معاهم وانا هحاول انجز بسرعة
حسين / مش ممكن اسيبك لوحدى
سلمى / لو سمحت يا عم حسين امش انا مش هعرف اشتغل وحاسة انى مذنباك معايا وفتحت شنطتها واعطته مبلغ من المال وفالتله ابقى هات لاولادك حاجة حلوة وانت مروح
حسين / تسلمى يا بنتى فعلا اللى خلف ما ماتش بتفكرينى بوالدك كان على طول شايل هم اولادى
سلمى / ادعيله يا عم حسين
حسين / مش محتاج يا بنتى انك تقوليلى انا بدعيله مع كل اذان ده كان خيره عليه
مشى حسين وترك سلمى وهى بتدعى لوالدها
سلمى اول حاجة افتكرتها انها اتصلت بمدام امانى وقالتلها انها هتتاخر وانها وهى راجعة هتعدى تاخد سلمى الصغيرة وبعد فترة من انهماكها فى الشغل قامت من على المكتب ودخلت الحمام وغسلت وشها عشان تفوق واتوضت وصلت المغرب ودعت ربها انه يغفر لوالدها
البارت الثالث من هنا
بدل ماتدور وتبحث علي الروايات خليها علي تليفونك وحمل تطبيقنا
