رواية علاقة مشبوهة الجزء الثاني

 

مقدرتش وقتها دموعى غلبتنى وحكتلها

قالتلى مفاجاه عمرى ما توقعتها

قالتلى بصي يا ميار ربنا يعلم يا بنتى انك من وقت ما اشتغلتى مع عمك الحج وانى بحبك فى الله ورغم أن مفيش ود بنا بس حاساكى زى بنتى إللى مخلفتهاش 

قولتلها فرحتينى بكلامك اوى يا حجه ربنا يخليكي

قالتلى بصي فى شقة هنا تحت فى اول دور فاضيه كنت عملاها للخزين وكده خديها يا حبيبتى انا هجيب رضا تنضفهالك وهحطلك فيها شوية حاجات وتقعدى فيها دلوقتي لحد ما ربنا يكرمك بابن الحلال إللى يستر عرضك

بينى وبين نفسي فرحت بكلامها بس اول ما جابت سيرة الجواز حسيت بنار فى قلبي محدش عالم باللى جوايا يارب طفى نار وهدى قلبي

ضحكتلها وقومت بوست رأسها وقولتلها بس اخواتى هيوافقوا

قالتلى سيبيها عليا انا هكلمهم ومهما كان هما اخواتك بس الانسان تقيل ومتزعليش يا حبيبتى من كلامى

قولتلها بس انا هاجرها منكم

ضحكت ضحكة كده بطيبة وقالتلى سيبيها على الله

خدت المفتاح وروحت المحل واليوم عدى الحمد لله كنت مبسوطة جدا حسيت انى مش هتحوج لحد تانى روحت البيت وبنت اختى فتحتلى قالت العروسة جت العروسة جت

جريت اختى عليا تعالى ليا بسرعه العريس جوا واهله

قولتلها انتى ازاى ازاى تعملى كده فيا

هو انتى مش عارفة رائي يا شيماء وفضلت اعيط جاتلى حالة هستيرية دى بتجيلى مع اى عريس يجيلى واحس انى هتخطب واترميت ع الارض وفضلت اصرخ واقول لا لا لا

محستش بنفسي غير وانا فى المستشفى لقيت جمال أخويا الكبير وشريف ومحمود وشيماء وجوز اختى كريم بيقولها قولتلك بلاش دلوقتي لازم برضاها قالتله دى بقت عانس لحد امتى هتفضل كده جمال قالها بس مش بالضغط يا شيماء وازاى تمشي بدماغك هى مالهاش رجالة

رد شريف شيماء معاها حق دى كان لازم تتجوز او تتقتل بعد ما خلت سمعتنا فى الارض ولا نسيت يا جمال ردت شيماء قالت دى هتبوظلى سمعتى انا وعيالى بقعدتها عندى إللى هيقف معاها ياخدها عنده انا مش ناقصه واهى قامت وبقت كويسة قولتلها برا لا انتى اختى ولا اعرفك برا اطلعوا برا محمود وجمال هدونى وكريم وشيماء وشريف مشيوا قولتلهم امشوا انتوا كمان محدش مصدقنى كلكم برا برا

جمال هدانى وقالى معلش يا ميار انتى هتيجى عندى قولتله عشان مراتك تنبط ولا انت كمان يا محمود هتقدر تقعدنى وسط اهل مراتك وتقولهم اختى شريفه سكتوا ومردوش ومشيوا

خذلتونى وكسرتونى يا اخواتى يا اللى من دمى

يومها حسيت انى اتيتمت بجد انى ماليش حد بعد ابويا وامى

خرجت تانى يوم من المستشفى وكتر خيرهم دفعوا الحساب لكن تمن حياتى وشبابى وعمرى انا إللى دفعته لوحدى

تمن الظلم والخيانة والغدر انا إللى دفعته رجلى خدتنى عند الحج ابراهيم يمكن الغرب يشيلونى

روحت هناك بدموعى وكسرتى ووحدتى اول ما الحجه فاطمة فتحتلى وقعت ع الارض

فوقت وانا ع السرير كانوا حواليا كلهم خايفين عليا حسيت أنهم اهلى فعلا رغم أن المعرفة كانت من بعيد

البشمهندس كان موجود قالى انتى كويسة يا ميار دلوقتي قولتله الحمد لله

الحجة فاطمه حطتلى أكل واكلت حاجات بسيطة كده

الحج ابراهيم قالى ريحى النهاردة انا إللى هفتح قولتله لا ازاى

قاطعنا البشمهندس قال انا نازل يا حج عشان خطيبتى عايزانى فى مشوار قبل الشغل

قاله ماشي يا ابنى توكل انت على الله

الحجة قالت معرفش ايه خطيبتى خطيبتى هى الدنيا خلصت مفيش بنات غير المسلوعه دى

الحج ابراهيم قالها خلاص بقا يا فاطمة اختياره وهو حر الجواز مش بالعافية

قالى يلا يا بنتى ارتاحى انتى النهارده وانا هتوكل على الله

قولتله لا ازاى ميصحش

الحجة قالتلى ريحى بقى انتى يا بنتى انتى تعبانة

فعلا كنت مرهقة نفسيا وجسديا مش قادرة حتى اتحرك من مكانى الدنيا كلها بتلف بيا قلبي جواه نار مبتهداش على بابا وماما ولا من اخواتى ولا من اللى حصلى

قطع شرودى ان التليفون رن بصيت لقيت رقمه هو ايوة حسيت انى هموت وجسمى كله اتنفض استجمعت نفسي ورديت و.......

               الجزء الثالث من هنا

بدل ماتدور وتبحث علي الروايات خليها علي تليفونك وحمل تطبيقنا

تعديل المقال