الشايب
البارت السادس والاخير
سليم واقف ومش قادر يصدق أن حمزة كدب عليه وافتكر اخر مرة شاف فيها حمزة
فلاش باك*
فريدة كانت قاعدة مع سليم قبل ما يسافر بيوم وبعدين مشيت وهو كان باصص عليها ومبتسم وحمزة جاء من ورا سليم
حمزة:حلوة صح!
سليم بصله:قصدك مين
حمزة وقف جمب سليم:فريدة
سليم ابتسم:فريدة احلى واحدة شافتها عيني...طيبة وجدعة ومحترمة وبتحب الكل
حمزة:عندك حق....انت بتحبها؟
سليم بصله:لية بتقول كدا!!
حمزة:بسال عادي
سليم كان هيرد بس حمزة قاطعه:بس انتوا صحاب واكيد مش بتحبها واساسا هي محبتش غيري!!
سليم بصدمة:هي بتحبك!!
حمزة ابتسم:اية دا هي مقالتلكش!انا وفريدة بنحب بعض وحاليا مرتبطين بقالنا شهرين وكلمت طنط عايدة وهنعمل خطوبة في إجازة نص السنة
سليم ابتسم بالعافيه:الف مبروك يا حمزة ربنا يتمملكم على خير
سليم مشي وهو مصدوم وتايهه ومش مصدق اللي بيحصل!معقول فريدة بتحب حمزة!طب هي لية مقالتلهوش!!دا اقرب صاحب ليها!معقول تخبي عليه حاجة زي كدا....افكار كتير وأسئلة كتيرة في دماغ سليم ومش لاقي الإجابة وقرر يروح لفريدة ويحط النقط على الحروف
سليم راح عند المكان اللي دايما بيشوف فيه فريدة واتصدم لما شاف فريدة قاعدة ومعاها حمزة وبيضحكه وهو ماسك أيدها
سليم كان واقف مصدوم وبيكدب عينه مش مصدق أن حمزة وفريدة بيحبه بعض....فضل ماشي مصدوم وراح البيت عند عزيزة ومحسن
سليم بجمود:انا مسافر معاكم بكرا
باك*
سليم فضل واقف وقرر يقابل حمزة ويفهم كل حاجة...سليم راح ناحية الخطوبة وشاف فريدة قاعدة وراح قعد جمب وعد وكانت فريده قصاده والاتنين عينهم على بعض...الخطوبة خلصت والكل روح البيت
تاني يوم سليم صحي واتصل على رقم ابو حمزة وابو حمزة رد وبعد سلامات كتير بينهم سليم طلب رقم حمزة وابو حمزة اعطالو الرقم وهو اتصل بحمزة
حمزة:الو مين
سليم: انا سليم
حمزة:سليم مين
سليم بغيظ:سليم محسن يا حمزة
حمزة:ااه ازيك يا سليم
سليم:كويس..فاضي نتقابل؟
حمزة: اه
سليم: نتقابل فين؟
حمزة:تعالى البيت عندي بالمرة اعرفك على مراتي والعيال
سليم ابتسم:تمام
سليم قفل مع حمزة وطلع لبس وراح بيت حمزة وخبط وحمزة فتح وسلموا على بعض والاتنين قعدوا سوا وبعد كلام كتير بينهم
سليم بجدية:سبت فريدة لية يا حمزة؟مش انتوا بتحبوا بعض
حمزة ابتسم:لا يا سليم انا اللي كنت بحبها بس هي لا
سليم بص لحمزة وهو مصدوم:بس انت قولتلي
حمزة قاطعه:أيوة قولتلك إن احنا بنحب بعض بس كنت بكدب عليك
سليم بنرفزة:لية عملت كدا
حمزة اتنهد:من واحنا عيال صغيرة وفريدة مكنتش شايفة غيرك يا سليم مهما اقرب منها ومهما اجيبلها لعب كنت انت بردو نمبر وان انا عملت كدا لاني كنت بغير منك يا سليم فريدة كانت بتحبك انت ومكنتش بتحبني وكان لازم ابعدك عن فريدة علشان تحبني بس بردو محبتنيش
سليم:بس انا شفتكم كنتوا بتضحكوا مع بعض تاني يوم وانت كنت ماسك أيدها
حمزة ابتسم:ساعتها انا كنت بقولها أني بحبها بس هي رفضت وقالت إن انا زي اخوها
سليم قاعد وهو مش قادر يصدق معقول كل السنين دا كان مخدوع وحمزة كدب عليه
سليم بص لحمزة:انت السبب في كل حاجة حرام عليك ياخي
سليم قام بغضب ناحية حمزة وحمزة وقف وسليم مسك هدوم حمزة وكان هيضربه بس قاطعه صوت بنت حمزة
:_بابي
سليم بعد عن حمزة وبص للبنت
حمزة:تعالي يا فريدة
سليم بص لحمزة كتير وحمزة شال فريدة
حمزة:اعرفك فريدة بنتي
سليم بص لفريدة:ازيك يا فريدة
فريدة:كويسة
سليم ابتسم وبص لحمزة:للدرجة دي بتحبها
حمزة: واكتر من كدا كمان فريدة حبي الاول يا سليم
سليم بصرامة:انسى فريدة يا حمزة لأن سليم خلاص رجع ومحدش هياخد فريدة مني
سليم مشي وهو جوا غضب كبير ناحية حمزة ومش قادر يصدق أن هو بعد عن مصر كلها بسبب كذبة حمزة!!والأهم من دا كله أن بعد عن فريدة بسبب حمزة!!
سليم قرر أن هو يقابل فريدة ويتكلم معاها وطلع موبايله واتصل بفريدة
فريدة:الو يا سليم بيه
سليم:فريدة عايز اشوفك
فريدة:انا في الشركة دلوقتي اجي لحضرتك المكتب؟
سليم:لالا انا برا الشركة وعايز اقابلك برا الشركة
فريدة:مفيش مدير بيقابل موظفة برا الشركة صح ولا اية يا سليم بيه
سليم بغيظ:فريدة في موضوع مهم عايز اكلم معاكي فيه
فريدة:مفيش بينا اساسا مواضيع يا سليم بيه علشان يكون في بينا موضوع مهم
سليم:يا فريدة
فريدة:سلام يا سليم بيه عندي شغل
فريدة قفلت وسليم كان متغاظ منها واتصل بفارس
فارس:الو يا معلم
سليم:انت فين؟
فارس:مع ريم بنفطر برا
سليم ابتسم:ربنا يسعدك
فارس ابتسم:يارب...كنت عايز اية
سليم:افتح الاسبيكر
فارس:فتحته
سليم بدأ يشرح لفارس وريم هو عايز اية
ريم:تمام يا سليم
سليم قفل وريم اتصلت بفريدة
ريم:الحقيني يا فريدة
فريدة وقفت:في اية
ريم:انا اتخنقت مع فارس وانا قاعدة تعبانة ومفيش حد معايا
فريدة مشيت:طب أنتِ فين انا هجيلك
ريم ابتسمت وقالت مكانها لفريدة وقفلت وبصت لفارس
فارس:ما شاء الله خطيبتي ممثلة شاطرة
ريم بغرور:انا شاطرة في كل حاجة
فارس ضحك:طب يلا بينا
ريم ضحكت:يلا
فريدة راحت المكان اللي ريم قالت عليه بس ملقتش ريم ولقت سليم وراحت ناحيته
فريدة بقلق:فين ريم يا سليم هي قالت إنها هنا
سليم:اهدي يا فريدة واقعدي
فريدة قعدت وهي مش فاهمة حاجة وسليم قعد قصادها
سليم:ريم كويسة وانا اللي طلبت منها تعمل كدا
فريدة باستغراب:لية طلبت منها تعمل كدا
سليم:علشان عايز اتكلم معاكي في موضوع
فريدة وقفت بغضب:انت فاكر نفسك اية انا قولت مفيش بينا مواضيع
سليم وقف برجاء:علشان خاطري يا فريدة اسمعيني بس
فريدة بصت لسليم وبعدين قعدت وهو قعد وابتسم والجرسون جاء
سليم:تشربي اية
فريدة:مش عايزة
سليم:عايز واحد مانجا وواحد قهوة مظبوط
الجرسون:تمام يا فندم
فريدة:قولت مش عايزة على فكرة
سليم برخامة:دا مش ليكي على فكرة
فريدة كشرت:ماشي اتفضل بقا قول عايز اية
سليم اتنهد:من واحنا عيال صغيرة يا فريدة وانا بحبك كنتِ اول صاحبة ليا وفضلتي جمبي ودايما بتدعميني وواقفة معايا حبيتك وحبك فضل يكبر معايا لحد الكلية وساعتها انا اتخرجت وأنتِ كنتِ لسة فاضلك سنتين ساعتها قررت أن بعد ما تخلصي هتقدملك واكون جهزت نفسي علشان نتجوز علطول بس اللي حصل أن حمزة كلمني وقالي أن انتوا الاتنين بتحبه بعض مكنتش مصدق وكنت جاي أسألك بس لقيتك واقفة معا وبتضحكي وماسك ايدك ساعتها عرفت أن اللي حمزة قالو كان الحقيقة وقررت اسافر وابعد عنك أنتِ وحمزة وبالفعل سافرت واشتغلت وعملت دكتوراه وعملت شركة خاصة بيا وبعدين رجعت القاهرة عملت شركة ليا وبقيت سليم الغرباوي من اكبر رجال الأعمال وبعدين لقيتك وكنتِ مقدمة علشان تشتغلي في الشركة عندنا ومن غير اي تفكير وافقت يا فريدة
فريدة سامعة وهي مصدومة من سليم ومن حمزة
فريدة ضحكت:واو يا سليم...يعني انت سافرت علشان سمعت كلام غلط من حمزة!طب ما انت عارف أن حمزة اكبر كداب!!وانا وانت كنا أصحاب مقربين فأكيد كنت هقولك لو في حاجة زي كدا!!كنت تسالني على الأقل!بس حضرتك سافرت من غير أعذار وسبتني هنا قاعدة مستنياك ويوم ما ترجع تبقى ناسيني!!
سليم:انا عمري ما نسيتك يا فريدة دايما كنتِ في تفكيري وعمري ما نسيتك انا بحبك يا فريدة
فريدة ابتسمت:بتحبني!!اممم والمفروض اعمل اية
سليم:ننسى اللي فات ونبدأ من جديد
فريدة:بالبساطة دي!!عارف يا سليم انا كمان بحبك بس مش هقدر انسى اللي حصل
سليم:فريدة حطي نفسك مكاني
فريدة زعقت:حطيت نفسي يا سليم لو حد قالي كدا كنت هاجي اسالك وبعدين ابقى أقرر اعمل اية مش اروح اسافر من غير اي أعذار وارجع ناسية كل حاجة
سليم:يا فريدة
فريدة قاطعته بصرامة:الكلام خلص يا سليم بيه بعد اذنك
فريدة مشيت وسليم فضل قاعد مش عارف يتصرف ازاي هي عندها حق بس هو غصب عنه فكرة أن فريدة تبقى مع حد غيره كان رافضها!
فريدة ماشية ومش عارفة تفرح أن سليم بيحبها ولا تزعل لأن هو سابها علشان كلام حمزة
فريدة روحت البيت ونامت وتاني يوم نزلت الشركة وفضلت تشتغل...سليم وصل الشركة وشاف فريدة واقفة مع موظف وبتضحك معا وهو راح ناحيتهم بغضب
سليم:اية اللي بيحصل هنا
فريدة ببرود:مفيش حاجة بتحصل يا سليم بيه
سليم بغضب مكتوم:واقفة مع الأخ دا لية
فريدة:وانت مالك
سليم: هو اية اللي انا مالي (بص للموظف)لو لقيتك واقف مع أي موظفة في الشركة هتتطرد
الموظف بخوف:حاضر يا سليم بيه
الموظف مشي بسرعة وفريدة مشيت وسليم كان مضايق ومش عارف يصالح فريدة ازاي ودخل المكتب وفضل يفكر ازاي يصالحها....فريدة حصلت شغل وروحت البيت بس لقت ورقة على الباب من عايدة(فريدة انا نسيت المفتاح في البيت لما توصلي البيت تعالي خوديني من المكان...)
فريدة اتنهدت وراحت علشان تجيب عايدة من المكان اللي مكتوب في الورقة واول ما وصلت اتفاجات أن المكان عبارة عن جنينة والمكان كله متزين وفي ناس كتير موجودة...دخلت فريدة جوا وفجأة طلع فارس وريم ومحسن وعزيزة وعايدة وكل واحد ماسك ورقة وهي قربت تقرا الورق دا وهي مستغربة واول ورقة كانت في ايد محسن
"انا عارف انك زعلانة مني ودا حقك"
خلصت قرأ ورقة محسن وكانت عزيزة جمبه وقرأت ورقة عزيزة
"بس انا كنت رافض فكرة انك تكوني لحد غيري اعذريني"
بصت على ورقة فارس"انا كنت غبي يا فريدة كان مفروض أسألك بس زي ما قولتلك انا غبي"
بصت على ورقة ريم"تعالي ننسى اللي فات ونبدأ من جديد"
بصت على ورقة عايدة"انا بحبك وعايزك تكملي معايا اللي فاضل من عمري"
خلصت ورقة عايدة وفجأة لقيت سليم طلع وبصلها
سليم ابتسم:تتجوزيني
فريدة كانت فرحانة جدا ونسيت ان هي زعلانة من سليم:موافقة
الكل زغرط وباركلها وهي كانت فرحانة جدا وسليم كمان كان فرحان
سليم: النهاردة الخطوبة بتاعتنا هتبقى في مكان دا والكل اهو جاهز
فريدة:بس
سليم قاطعها:كل حاجة جاهزة فستانك جاهز وكل حاجة وريم هتساعدك
فريدة ابتسمت بحب لسليم وريم اخدت فريدة لاوضة ولقيت فستان حلو جدا
فريدة بفرحة:دا زوقك
ريم:لا سليم
فريدة:من يومه وهو زوقه حلو
ريم ابتسمت:يلا بقا اجهزي
فريدة جهزت وريم كانت معاها طول الوقت....سليم اخد فريدة وكانوا قاعدين سوا على الكوشة ووعد جت وسلمت على سليم
وعد:مبروك سليم مبروك فريدة
فريدة بتهكم:الله يبارك فيكي
وعد ابتسمت وراحت قعدت وفريدة بصت لسليم
فريدة:هي اية حكاية وعد دي هو انتوا بتحبوا بعض
سليم ابتسم:وعد صحبتي يا فريدة وهي كانت مخطوبة لواحد اسمه عمر بس الاتنين اتخانقه وهي كانت بتغيظ عمر بيا ودلوقتي رجعه لبعض واساسا انا محبتش حد غيرك
فريدة ابتسمت:وانا كمان بحبك
سليم ابتسم وفضلوا يتكلموا سوا
ريم:واد يا فارس
فارس:اسمي فارس مش واد
ريم ضحكت:انت لية معملتش زي سليم ما عمل لفريدة
فارس:بت أنتِ دي عاشر مرة تساليني نفس السوال
ريم ابتسمت:بس انا فرحت أن سليم بيحب فريدة
فارس ابتسم:فارس لما سافر كان دايما على لسانه فريدة وانا كنت واثق أن هما هيتجوزوا....بس عارفة اية احلى حاجة
ريم:اية
فارس:انك صاحبة فريدة من غير فريدة مكنتش هتعرف عليكي
ريم ابتسمت:فعلا يا فارس
فارس ابتسم بحب وفضل يرخم على ريم
عايدة كانت قاعدة مع محسن عزيزة
عايدة:انا كنت حاسة أنهم نصيب بعض
عزيزة:نعم!! دا أنتِ كنتِ دايما تقولي فريدة بنتي هتتجوز ظابط وانا اقولك لا هتتجوز سليم ابني
عايدة:أنتِ اللي كنتِ بتقولي أن ابنك هيتجوز دكتورة وانا اقولك لا هيتجوز فريدة بنتي
عزيزة:شكلك كبرتي ونسيتي يا عايدة
عايدة:مين دي اللي كبرت انا اصغر منك
عزيزة:لا انا أصغر
عايدة:انا اصغر
عزيزة بصت لمحسن:مين اصغر
محسن:انا الصغير
التلاتة ضحكه سوا وفضله يهزروا
الخطوبة خلصت والكل كان فرحان
فات شهر والكل كان بيستعد لفرح سليم وفريدة وفارس وريم اللي كان في نفس اليوم
يوم الفرح جاء وريم وفريدة طول اليوم سوا وفارس وسليم طول اليوم سوا وكل واحد فيهم اخد خطيبته وراحه القاعة والماذون كتب كتابهم والأربعة باركه لبعض
فريدة حضنت ريم:طول عمرنا في كل حاجة بنكون سوا والفرح بردو عملنا سوا وعيالنا كمان هيفضلوا سوا زينا
ريم ابتسمت: لآخر العمر؟
فريدة:لآخر العمر
سليم حضن فارس:الفرحة النهاردة فرحتين اني اتجوزت اللي بحبها واني فرحت بيك وانت اتجوزت اللي بتحبها وهنفضل دايما سوا
فارس ابتسم:سند لبعض وفي ضهر بعض
سليم:وعيالنا كمان هيبقوا زينا
فارس:اكيد
فارس راح لريم وابتسم:أخيرا بقيتي مراتي
ريم:أخيرا
فارس بحب: النهاردة احلى يوم في عمري أنتِ اغلى انسانة في حياتي وانا هفضل احبك لحد اخر يوم في عمري
ريم:وانا كمان بحبك وهفضل معاك لاخر العمر
فارس ابتسم وباس ايد ريم
سليم راح ناحية فريدة
سليم:ضيعنا سنين واحنا بعاد عن بعض بس اوعدك ان كل السنين اللي جاية هنفضل سوا لحد اخر العمر من واحنا عيال وانا بحبك وهيفضل حبك جوا قلبي لحد ما نعجز
فريدة بحب:محبتش ولا هحب غيرك يا سليم ربنا يخليك ليا وميحرمنيش منك ابدا
سليم ابتسم والكل كان فرحان وبيرقص والفرح خلص على خير
بعد مرور سبع سنين*
الكل كان قاعد سوا فارس وريم وسليم وفريدة ومحسن وعزيزة وعايدة والكل كان عند بيت سليم
سليم بضيق:فارس امسك بنتك مالها رخمة كدا لية
فارس ضحك:تعالي يا مليكة ابعدي عن عمك سليم
مليكة:بس انا بحبه يا بأبي وعايزة اتجوزوا
فريدة:اية يا فارس شبابك ما تشوف بنتك
سليم بغرور:يا بنتي انا كل بنات صغار وكبار بيحبوني
فهد: لا على فكرة طنط فريدة احلى منك وانا بحبها ولما اكبر هتجوزها
فريدة ضحكت وسليم بغيظ:لم ابنك يا فارس بدل ما اطردك انت وهو
فارس ضحك:صح فين مالك
سليم ابتسم:طلع يصحي جومانة
ريم:مالك دا عسل والله
فريدة:مش ابني لازم يبقى عسل
مالك نزل وهو جومانة وراحوا يلعبوا مع فهد ومليكة والباقي قعدوا سوا
فريدة:ما تيجوا نلعب يا جماعة
سليم ابتسم:نلعب اية
فريدة ابتسمت:الشايب
(محدش يزعل مني علشان مش برد على الكومنتات بس دا غصب عني لاني في تالتة ثانوي وبدأت دروس ياريت كلكم تدعولي أن احقق كل اللي نفسي فيه+مستنية رايكم في الكومنتات وهحاول على قد ما اقدر ارد عليكم ولو حد عنده اي سوال يسأل عادي
بدل ماتدور وتبحث علي الروايات خليها علي تليفونك وحمل تطبيقنا
