Ads by Google X

رواية الابواب الخمس البارت الثاني

 


البارت الثاني
للكاتبة Reem

وخلها
راح الچان تك روحي...وخلها
جفاها وحط مرض بيهه...وخلها
يهل تنشد عليه اسكت...وخلها
بقت بس رحمة الله تحيط بيه

واكف نجم ويشوف حبيبته تنزف لاخوه وراح تعيش وياه بنفس البيت كوه حاصر دموعه ويمثل فرحان حتى لحد ينتبهه ميدري اكو عيون تراقبه وتريد توكعه
جابو ذكرى للبيت دخلت وطب نجم سلم على اخوه وباركله ومد ايده بأتجاهه وكال بصوت مخنوك مبروك

ذكرى : رفعت راسي وصارت عيني بعينه مكدرت اطلع صوت بس همس وكلت شكراً
دموعي رادت تخوني وتنزل قويت نفسي وبگلبي اكول لتبجين اسكتي ميصير هذا حماج بعد مو حبيبج دنكت حتى لا اثير الشكوك وبقيت اسمع هوساتهم ودبجاتهم والكل يهوس وفرحان
اجت يمي امي باستني واخذتني من ايدي وياها زوجة الجبير عرفت اسمها صالحه ودخلوني بغرفه

صالحه : بلخير خيه وبلتمام منه المال ومنج العيال
ذكرى : افرك بيدي من التوتر جرتني امي وكعدتني على الجربايه وبدت تحاول تهديني
صالحه : اذا تحتاجين شى بس صيحي تلكيني يمج بلحظه
ذكرى : رفعت راسي وكلت ليش انتم باقين هنا بلبيت
صالحه : وين نولي خيه غير بيتنا وغرفنا وغراضنا لو بعدج بسم الله وتردين تهججينا
ام ذكرى : عيني ام مهند مو قصدها بس هي متعرف وسألت لان اول ليله توقعت ماكو احد يبقى بلبيت

صالحه :اعرف ماتقصد بس علمي بتج بهيج ليله لطلع صوت وتفضحنا تره البيت اذا يفرغ بيه ١٠ انفار وحموينها هنا عيب يسمعون صوتها ولا تشلع گلب العريس هي جم دقيقه ادوس على نفسها وراها كلشي سهل لا تتعاير
ذكرى : بلعت بريگي واجر نفس قووي
ام ذكرى : شبيج يمه
صالحه : شبيهه قابل انتي بس عوفيها وتعالي نطلع بره حتى العريس يجي ويستعجل بياضها
ذكرى : اشوف شلون صالحه سحبت امي واخذتها منطتها مجال حتى تكعد ويايه وحدنا وعيوني تستنجد بأمي وطلعن وسدت الباب شراح يصير خايفه ومرعوبه ومااعرف غير شى بسيط عن هاي الليله حجته الي زوجة عمي

كمت اقرا ايات بعدني هستوني ودخل صمد هاي اول مره وحدنا كلشي صار خلال شهر واحد هي خطوبه وعقد وزواج حتى ملحكت افهم منه شى ولا افهم طبعه حياته رجال غريب وخلوني وياه بغرفه وحدنا
كعد بصفي وكال بصوت خشن
صمد : شلونج
ذكرى : هزيت راسي بخوف
صمد : احجي شبيج خرسه قابل
ذكرى : زي زي زينه
صمد : بس لا تعتعتين
ذكرى : شنو يعني
صمد : يعني الكلمه متنطقيها كامله تشعلين اهلها يله

ذكرى : رفعت راسي وكلت لا والله احجي عدل
صمد : هههه شبيج ترجفين
ذكرى : رجعت دنكت وسكتت
صمد : اسمعيني ذكرى عدنا نص ساعه نكمل كلشي اذا مو اقل
ذكرى : ليش شكو
صمد : نلعب دعبل هاي شبيج امج محجت وياج
ذكرى : ابتعدت منه وكفت وبتردد وخوف كلت عفيه خليها باجر

صمد : اسمعي يابنت الناس اني مو طبعي القوه والاذيه بس اذا ضليتي هيج معانده اخذج بلقوه كله ولا يكولون صمد مابيه خير اخوتي كلها بساع بساع ورفعو روسهم زلم حوك وماتأخرو تردين يكولون صمد مابيه حظ واصير علج بحلك النسوان

ذكرى : وهاي شلها علاقه بلرجوله
صمد : انتي مبينه تحبين المناهده واني مالي خلكها شو تعالي
ذكرى : سحبني من ايدي وجر البركع من راسي وانجر شعري ويااه حيل اذاني شاغت روحي حتى البدله بلقوه نزعها اليه جان ويايه مؤذي مارحم عياطي حاولت اكتم صوتي مثل مكالت صالحه بس مكدرت هو مرحم طفولتي وقله خبرتي سد حلكي واخذني ومباشره سحب البياض وعافني اتلوه على الفراش لبس دشداشه وطلع وركع الباب وراه والهلاهل اشتغلت
كرهت نفسي وقسمتي والساعه القبلت بيها ضليت لازمه رجلي وابجي واناشغ محد دخل عليه حتى امي توقعت اطب تاخذني بحضنها بس ماصار هذا الشى
اندكت الباب خفت ورجعت ليوره وغطيت جسمي بلفرشه مال العرس جان اطب وحده من الجناين اسمها بديعه شافت
حالي ركضت عليه

بديعه : ياااصخام بوجهي هاي شصاير بيج
ذكرى : نزلت دمعتي الحابستها من الظهر لهسه وكتلها عفيه اريد اروح حمام
بديعه : كومي حبيبة كومي هذا شجاه ماشايف مره شعامل بحالج
ذكرى :لزمت ايدها عفيه وين الحمام راح اموت من الالم
بديعه : تعالي اوديج عليه
ذكرى : همه وين
بديعه : منو
ذكرى : صمد واهله
بديعه : كلها بلهول فرحانين وياكلون واني كلت اطب اجيبلج اكل اخاف جوعانه وشفت حالج سمي وكومي
ركضت بديعه جابت دشداشه طويله ولبستني وحطت روب فوك ملابسي وطلعتني واني لازمه بيدها مثل الطفل الصغير
بديعه : خيه لتوكعين شبيج ترجفين الجو مو بارد مال رجف
ذكرى : عفيه مستحيه واخاف صمد يأذيني بعد

بديعه : لا تخافين صمد خوش صمد بس هو طباكات شوي بس گلبه ابيض وانتي اكيد عاندتي واذاج
ذكرى : شسوي هسه
بديعه : امشي اوديج اغسلي اكو مي حار بلجدر بلحمام حضرته كلت اكيد تحتاجوه
اغسلي وتعلي وسمي على جسمج واني هسه ارجع اجيبلج ملابس هاي توصخت هسه على جسمج ومن ترجعين للغرفه اجيبلج اكل راح تصحين وترتاحين

ذكرى : هزيت براسي ومحجيت شى ودخلت للحمام جان قديم وبس لبخ حتى ما مصبوغ كعدت على التخته ولزمت الطاسه
واذب مي على راسي وجسمي وابجي لحد مغلست شعري وجسمي واندكت باب الحمام مدت بديعه ايدها تنطيني الملابس
انتظرج بلغرفه
ذكرى : ماشي نشفت جسمي لبست وطلعت صارت بوجهي ساهره
ساهره : بلخير عيني وتعلج وتباوع من فوك ليجوه

ذكرى : شكراً مشيت سريع وطبيت للغرفه همزين الحمام قريب من الغرفه اسمع صوت ضحكهم وسوالفهم مشطت شعري ودخلت بديعه جايبه صينيه اكل حطتها وطلعت ورجعت بيدها طفله صغيره عمرها اشهر
ذكرى : هاي بتج شكد حلوة
بديعه : اي بنيتي اسمها بان عمتها سمتها ردتها نرجس مارضت تالي سكتت وخوله سمتها على اسم صاحبتها
ذكرى : الله يحفظها الج
بديعه : الله يرزقج مثلها اكلي وقوي نفسج انتي عروس ولازملج قوة
ذكرى : متأذيه عفيه

بديعه : تحملي كلنا بلبدايه هيج وراها عادي تعوذي من الشيطان ولاتفكرين بشى هاج اگلي
ذكرى : مديت ايدي واخذت اللفه من ايد بديعه جنت حيل جوعانه اكلت لكمه وبعدني مبالعتها
جان يطب صمد من خوفي بلعتها وذبيت اللفه بلصينيه
صمد : روحي بديعة رجلج يريدج
بديعه : تمسون بلخير

ذكرى : وخرت الصينيه وحطيتها بلكاع واجه كعد بصفي صمد سحبني بهدوء وباس راسي
صمد : لتضوجين مني جان لازم يصير هيج حتى نخلص وهسه براحتج مااتقرب الج لمن ترتاحين
ذكرى : مااعرف شون اشكرك
صمد : انتي حليوه بس دمج بارد ليش هيج جامده
ذكرى : يعني شسوي
صمد : لا تسوين شى طفي الضوا اريد انام تمدد وانطاني ظهره وعافني اباوع عليه وحايره بزماني وبلرجال الي انكتب عليه

سمعت صوت هوسه كمت على كيفي ادور على اللاله الكهرباء طافيه شغلتها اباوع للساعه المعلكه بلحايط اربعه ونص الفجر هاي شكوو
صمد : طفي اللاله يمعوده
ذكرى : شصاير عفيه هوسه بره
صمد : تعالي نامي ماكو شى وتعلمي هاي الهوسه يوميه
ذكرى : ليش شصاير
صمد : الله مطولج ياروح بابا هذا شغلنا نطلع من الفجر حتى انلحك انلم العتيك ونبيعه
ذكرى : انت هم وياهم
صمد : لا اني وزير
ذكرى : عفيه شبيك ويايه بس سألت
صمد : طفي اللاله وتعالي افهمج
ذكرى : طفيتها واجيت امشي على كيفي وكعدت يمه وفهمني طبيعة شغلهم
وامك تطلع وياكم

صمد : نوبات تطلع ونوبات لا گبل مايفوت اليوم اله وهي ويانه هسه كل يومين والثالث تطلع وعندج فلاح يطلع بنه (عامل بناء)
يشتغل ويه خلفه ليغاد من منطقتنا وكت نزلته من العسكريه
وانه وعبيد وجوحي ويه امي والصغير بزر الدلال نجم نايم للظهاري مخلصها دياحه عود يدرس تكول دكتور مابيه حظ
ذكرى : نبض گلبي حيل وحسيت ضربه بمعدتي من جاب طاريه خفت يسولف بعد عنه وتفضحني عيوني غيرت الكلام
بسرعه

ذكرى : اكلك امك شكلها مو جبير بس متعوبه وانتم ماشاء الله كبار
صمد : اي امي تزوجت عمرها ١٣ سنه بس بلغت وعدها عبيد وعمرها ١٥ سنه متشوفيها صغيره مو حيل جبيره الزمن اكل بيها هيه هسه عمرها يمكن طخ الاربعين
ذكرى : وانت متروح للجبهه
صمد : اني فرار
ذكرى : لطمت على صدري صدك تحجي

صمد : وجع على شنو تلطمين كالو يجي عفو والتحق لا تنگين راد للجبهه منتظر القرار واسلم نفسي عيفج من هذا الموضوع
ذكرى : خفت ليجون الانضباطيه وبنفس الوقت حايره بحال ابويه واخويه معقوله مسألو عنه شالوني وشمروني اله هيج اختنكت حيل ومابيدي غير اسكت وابلع گلشي صرت مرته بعد راحت صفنتي من كاال

من هسه اگلج امي اياج تلاسنيها واخوتي مالج دخل بيهم ونسوانهم لا تندكين بيهن
ذكرى : يعني احبس روحي بلغرفه
صمد : ماكلت هيج اريدج هاديه مالي خلك كالت امك وكالت اختك وكالت مرت اخوك
ذكرى : صدك اختك وين شفتها بس مره وحده
صمد : تدرس وماضل شى وتتخرج من المعهد
ذكرى : انيالها تمنيت ادرس مثلها واكمل حتى لو معهد
صمد : ماعندي مره تطلع لعتبت الباب تنجبين هنا ونكعدين
ذكرى : حاظر
صمد : انتي ليش هيج مايعه احسج مو مره حوك حتى بلحجي تجرين الحجايه جر
ذكرى : خجلت وكتله شفت مني حتى تحكم عليه هيج

صمد : نجرب ونشوف اكلج ارتاحيتي ونمتي بعد كافي دلال
ذكرى : لا عفيه مصار كم ساعه وبعدني ممكمله كلامي رجع تقرب مني هلمره جان اهون من القبلها بس اكيد ماعندي اي مشاعر وياه وحتى هو تأديه واجب وغريزه وبس

عمشه : كاعده بلهول بلكاع وتحسب بفلوسها وتحطها بلصندقجه (صندوق ) مالتها وتباوع يمنه يسره اخاف احد يشوفها جان تكعد بصفها ساهره
عمشه :سلاماً قولاً من رب رحيم لا هله شتردين
ساهره : شبيج خاله فززتج
عمشه : وخلخاله تعمه بعيونج واطير كون عمرج انه جم مره حاجيه وكايله مااريد لا انتي ولا صويلحه تنشدن عليه بخاله گله عمه
ساهره : غير انتي خالتنا اخت امنا ولساني ماخذ هيج

عمشه : لزوم اكطع لسانج واتوبج انه مااريد اذكر امجن من اذكرها كون الزم بخوانيكجن
واغم كصتي عبن دخلتن داري واخذتن ولدي

ساهره : وتاليها ياعمه شون بيج ماتنسين صرنا جناينج وانه وصالحه كل وحده صار عدها وليد وانتي لهسه تندبين على ولدج
عمشه : انوح العمر كله عبن اخذتن تعبي وشگاي اسكتي مالي ضيجت حال شتردين فضيني
ساهره : بعد مااصيح خاله والله مرات انسى موبيدي
عمشه : بت غنيه فضيها شرايده
ساهره : عمه اروحلج فدوة شفت صالحه لابسه ترجيه جديده وسألتها وكالت انتي مشتريتها الها والجنه الجديده طكيتلوها محبس وكردانه واني ضليت بلظيم

عمشه : وزلمتج ليش مايشتريلج
ساهره : سوده عليه منيله مو كدامج ياعمه الحال تعبان وحسره علينا الفلس
عمشه : اي بهاي حكچ مو جوحي يطبب كواني التمن وكواني الطحين وما ملحك لعيشتنا كومي ولج مني هاي قشامرج مو عليه زلمتج يكبس الفلوس على گلبه فلس مايطلع منه وتتزوهرون ويانه بعد وين ما ملحكين للعيشه

ساهره : فدوة عمه حتى لو ترجيه صغيره
عمشه : وهسه تجي بدعه(بديعه) تريد
ساهره : لا متريد
عمشه : عبن فقيره وعلى كد ايدجن ادمغن بيها كومي مني لااشعل اهلج نفر نفر
اتعب واطلع من صباحيات الله واصوخلجن ذهب غمت كصتها وكالت اهمداني ماحطيت بيدي ملوي برجلي جنجل (حجل) ضاله اعلف بيكم كومي يله وجيبيلي المدكوكه اريد اكل واذا مابيها راشي لا تراويني وجهج
ساهره : هسه متشتريلي
عمشه : من يطلع ورث غنيه اشتريلج
ساهره : دومج هيج تفرقين بينا
عمشه : المدكوكه لاتنسيها بنت المدكوكه

ذكرى : مر اربع ايام على العرس وخلصتها بلغرفه مااطلع بس على كد الحمام وبليوم الخامس طلع صمد للشغل ومكعدني كعدت من النوم لبست دشداشه ومشطت شعري وشلته وطلعت صارت بوجهي ساهره مسلمت كلت صباح الخير
ساهره : ياخير صار الظهر جناين تالي وكت وتهز بيدها وراحت للمطبخ
سمعت صوت امهم
عمشه : تعالي يمه ذكرى
تقربت منها وبستها وكعدت بصفها
عمشه : شلونه وياج صمد
ذكرى : بخير والحمدلله
جان اسمع صوت خوله وهاي اول مره نلتقي وجهه بوجهه شفتها بس بقرايه الفاتحه والعرس شوفه سريعه بوستني
بلخير الله يسعدكم
ذكرى : يوم الالج
خوله : الله كريم وكالت لامها
يوم رايحه لامل ما اتأخر

عمشه : اخوتج على جيه وانه مالي دخل اذ شافوج بره تعرفين بعبيد مايرضى طابه طالعه
خوله : هو عبيد كادر بس عليه
عمشه : ام لسان اسگتي ولي ولا تتإخرين
ذكرى : طلعت ركض خوله وسمعتها سلمت وجان يطب نجم جمد من شافني كاعده بصف امه مكدرت ارفع عيني بعينه وكال بصوت هادئ
السلام عليكم رديت وعليكم السلام
عمشه : هله بسورها ونورها هله بلجاي وجايب رويحتي فتحت ايدها حتى تحضنه وبعدها كاعده بلكاع تعال يبعد امك هيج تعوفني وتروح شجاك شدولبك ورحت عني يبعد جبدي

نزل بمستوى كعدت امه وحضنها وعينه على ذكرى
نجم : ماكو شى يمه كتلج اغير جو يم صديقي بكربلا رحت جم يوم واجيتج
ذكرى : من رخصتكم
عمشه : وين رايحه چاتستحين من حماج هذا اخوج
ذكرى : اكيد اخويه واتشرف بيه وعلى راسي اني اريد اروح اساعد البنات
عمشه : تلحكين على الكراب اگعدي
ذكرى : كعدت بصفها نفس مكاني وهو كعد بلجهه الثانيه
مجرد كعدتي يمه احس روحي تطلع واقرا ايات واتعوذ من الشيطان
جان يكول
نجم : مرتاحه
ذكرى : هاا
نجم : مرتاحه ويانه
ذكرى : الْحٍمَدٍ للـّہ

عمشه : شبيهه جنهه ورد حير بروحك يمه وبعلامك تحصل الشهاده منا ازوجك منا
ذكرى : كمت بسرعه وكلت بتوتر
اخذو راحتكم وطلعت حتى بدون ماانتظر جواب عمتي
كعدت بلغرفه واتنفس بخوف وگلبي دكاته عاليه واضرب على خدي يلخبله شبيج هذا حماج حماج واعيد بلحجايه اروح واجي
ردت بس اهدا لحد متعبت وكعدت شلت هم شون يوميه اشوفه لازم اتعلم لازم انسى كلشي احسه اتجاهه الهي ساعدني

وره اسبوع من زواجي تقسم الشغل
صالحه : تعرفين تخبزين
ذكرى : لا بس اعرف اشلع خبز ويه ماما
صالحه : هاي الضاله نخبزلج ونوكلج هم اسمعي خيه هاي سوالف الدلال والتمعقج انسيها ذاك بيت ابوج وراح هذا بيت عيالج واليجري علينا يجري عليج
كل يوم على وحده الخبز
ذكرى : كتلج والله مااعرف
بديعه : اني اعلمها
ساهره : انتي اسگتي وحيري بلشغل العليج
بديعه : اعلمها وراها مالي دخل بيها
صالحه : تعلمي بسرعه لا اطولين افتهمتي عليه الغدا وعليج انتي وبديعه العشا وغسل المواعين ومسحت العصر وساهره عليها الريوك ومسحت الصبح البيت مرتين ينمسح هوايه احنا وبسرعه يتوصخ وجهال يتحركون ويوصخون
ذكرى : مجال عندي غير هزت الراس والموافقه وتعلمت والصار الخبز يوم عليه ويوم على بديعه وهنه بس الجمعه عليهن شفت بديعه شكد تخاف منهن واني هم قررت ابتعد ومااريد مشاكل جانت مشكلتي الوحيده نجم وجوده بلبيت

وبعد شهر ونص عرفت بروحي حامل اخذتني عمشه للجده وفحصتني وبشرتها
واول مدخلنا جان نجم كاعد ورافع رجله ويقرا مباوع ابد بأتجاهنا ولا كأنو دخلنا
عمشه : وينجن يمكموعات بصوت هز البيت
نزلت صالحه وساهره وبديعه طلعت من المطبخ خير عمه
مرت صمد حبله
ذكرى : عيني مااجت اله على نجم الوكع الكتاب من ايده بلحظتها خفت لحد ينتبهه بس هوسه عمشه وهلاهلها غطت على جفلته

صالحه : كون تجيبين وليد مو بنيه مثل بدعه
بديعه : وشبيها البنات رزق وخير من الله وشالت بتها الكاعده بلكاع وباستها
عمشه : بيج خير واحبلي مو ضاله على الوحيد وتلاسنين
صالحه : ومنو كلج ياعمه ضاله على الوحيد اني حامل وعليه ٣ اشهر
ساهره : ياااا وماحجيتي
عمشه : منو امها بعد غنيه لاتعرف خوه ولا حنيه
بديعه : بلخير تكومن بلسلامه اروح اكمل مواعين

ذكرى : كل هاي الهوسه وبالي يم نجم الطفر وطلع بره مرات الوم نفسي ليش افكر بيه واكول مو بيدي ماطول كدام عيني ومرات اكول عيب عليه هذا بحكم اخويه
باركت لصالحه حتى مجاوبتني واخذتها ساهره مبين راح يتعاركن مهتميت الهن بالي كله بغير مكان الوحيده الجانت هادئه ومالها حس بلبيت هي خوله تدرس لو يم صديقتها امل حتى متدخل بسوالف الجناين رغم صالحه وساهره دوم بالهن يمها ويحجن هاا طبت هاا طلعت هاا لبست ميتات منها موت وهي مطنشه الكل تحسها مو من اهل هذا البيت اصلاً

واجه صمد ومن عرف حامل كلشي ماكال بس كون يطلع ولد مثل اخوتي مو مثل فلاح
حسيته دوم يقارن بينه وبين اخوته
بكلشي
وره فتره صار تفتيش قوي على الفراريه واشتدت الحرب وقرر صمد يسلم نفسه لان اذا لزموه يعدموه لان يعتبر متخاذل لان الدوله طابه حرب
وبلرشاوي والمعارف رجع والتحق وياه عبيد وجوحي
البيت بقى بيه فلاح وجبته عكس اخوته ونجم الجان يدرس ومالتقي بيه اثنينا نتحاشى الكعده سوه

عيشتي من الصبح لليل شغل وكراب وهوسه النومه حسره عليه الاكل قليل وهمه هوايه مرات استحي اكل اضل اعلس خبز من الجوع لو من اروح لبيت اهلي اكل زين
امي تكول تحملي هاي قسمتج
مرات اكول لو رافضه ليش خفت وسكتت وليش وليش وياريت يفيد الليش وره ميوكع الفاس بلراس

انظف وراهم كل شويه وصالحه وساهره مايشتغلن بس من عمشه موجوده لان تلعب بيهن طوبه واليوم التطلع بيه للشغل يحطن رجل على رجل ودك سوالف وتبسبس وتأمر حتى الجهال يوصخون يكسرون ولا يمهن واني وبديعه نوكع بيها من البيتونه مسح وكنس للطرمه واني حامل كل شويه اكول راح اطرح من التعب وفوكاها صمد اذا اجه وراد يتقرب مني وكتله تعبانه يستلمني دك رزايل وياخذ حاجته ويكوم برضاتي او بدونها ماارتاح منه بس من يلتحق اقلها كراب وشغل بلنهار وبليل اذب روحي على الفراش مثل الميت

وارجع الصبح نفس المنوال واذا حجيت شى وياهن يستلمني اثنينهن ومن اشكي لصمد يسكتني لدوخيني وانتن نسوان بينجن شفته لا ابالي كمت مااشكي وابلع وانجب واسكت واكرب كرب المطي حتى بس ماتصير مشاكل وطلايب واذا شكيت لعمتي يبوو يضمنها اليه ويطلعنها ويخلني اصيح التوبه اذا احجي هاي حياتي بيت عيالي ٧ اشهر شفت الويل والله اعلم شمضموملي

بطني واصله لخشمي عليه سبعة اشهر وتعبانه واكفه على التنور اخبز والحر والشمس براسي ردت اشيل العجين ثكيل وكع من ايدي وصار بلتراب وعاطت صالحه وهي على ابواب تجيب ومجازت مني تفتر ورايه شسوي تعيب وتتأمر واني ابلع واسكت
صالحه : وثول كون غير تنتبهين
ذكرى : كعدت بلكاع احس ظهري راح ينشلع متشوفين شون ثكيل

صالحه : صيحي ساهره بدعه لو متقصده توكعين العجين حتى رجولتنا من ترجع ترزلنا اعرفج خبيثه سكوتيه من جوه لجوه
ذكرى : كمت ابجي تعبت حيل تعبت

صالحه : وجعت امي شبيج تونونين
ذكرى : عفيه ابوس ايدج عوفيني ظهري مااحس بيه من الوجع والطفل احس راح ينزل
صالحه : يمه يمه من عياره النسوان كومي وارجعي اعجني لا اشيل العجين واحطه فوك راسج منا للغدا كون كامل وضربت ذكرى على جتفها حيل وتأشر بيدها كووومي جان تضربها برجلها على ظهرها وتعيط بعلو صوتها اذا متكومين امسح بيج التراب گله
ذكرى : صوت البجي مالتي صار عالي انهارت اعصابي وهاي فوك راسي تعيط وضربتني على جتفي وتسحل بيه من الردن مال الدشداشه وشاغت روحي من ضربت ظهري متحملت طلعت ركض لبيت اهلي بعد عنهم اربع بيوت ايد لازمه بطني وايد لازمه ظهري ودخلت اركض الهم بدشداشه العجين وحالي يصعب على الكافر

ام ذكرى : ياستار شبيج بنيتي
ذكرى : كعدت بلكاع بلمطبخ وادك على راسي والله بعد مااتحمل راح اموت خلصوني من ذاك البيت تعب
كعدت ماما بصفي وحضنتني وتبجي ويه بجيتي جان يطب اخويه فوزي شاف حالي تخبل
فوزي : مالج رجعه بذاك البيت خدامه الهم وليش متكولين شمسكتج
ذكرى : نفس السكتكم وخلاكم تنطوني لهيج ناس

فوزي : والله مقبلت وگلبت الدنيا وابويه وامي سكتوني مردت الج هيج ناس ذوله مو من ثوبنا ويباوع على امي حسيت اخويه مكسور ومهموم ومتأذي عليه كومني من الكاع وبيده غسل وجهي وحضني وطلب من امي توكلني تمددت على الكرويته (القنفه) اريد ارتاح اريد اغمض وافتح والكي كل هذا حلم مصاير من التعب والبجي غفيت وفزيت على دكت الباب
وسمعت صوت عياط عمشه وصمد

دخلو وصمد اجه ركض ولزم ايدي وعصرها
صمد : شون اطلعين من البيت بليه علمي
ام ذكرى : ابني على كيفك وياها شوف حالها بطنها واصله لخشمها لتأذيها
عمشه : ماتكولين لبنتج الطلعت بطرك ثوبها وبليه علم زلمتها ومطيحه العجينات بلتراب موش حرام موش نعمه الله هاي عبن ماتعبانه بيها
ذكرى : اااخ ايدي عوفني باوعت على عمشه وكلت وحاصرتني الدمعه والله عمه وكع من ايدي ممتقصده

عمشه : صالحه تكول كمت تعيطين مااخبز وشمرتي نعمه الله بلكياعين وطلعتي
ذكرى : والله جذابه وكع من ايدي وهي تعيط عليه وتتأمر وضربتني على ظهري برجلها شيغت روحي والله عمه وداعت الجهال الي بطني عساني لا ولدت اذا كذبت
هدأت عمشه وكعدت وسحبت صمد من ايده وكعدته بصفها
وجان يطب فوزي يعيط

فوزي : امشو اطلعو بره مالكم مره عندي
ام ذكرى : فوزي شجاك اسكت
صمد : مو هي تايهه الك وبكيفك هاي مرتي وحلالي واني المسؤول عنها امشي لج وسحب ذكرى من ايدها ومتحمل فوزي لزم صمد وتضاربو وعمشه وام ذكرى يعيطن
ذكرى : بين اخويه ورجلي كل واحد يسحب منه جهه واحد ضرب الثاني متحملت الديصير كمت اصرخ بعلو صوتي كافي ارحموني والله راح اموت وصارت تقلصات بطني كلت هذا هو راح اجيب من شافو وضعي هيج حارو بيه وركضو للجده جابوها واجوي ومن فحصتني كالت تقلصات مال تعب

باوع صمد وخزرني وكال يله كومي لبيتج هناك ارتاحي
فوزي : كلت مالك مره عندي ومن اليوم اذا عتبت الباب اكسر رجلك منطيك مره لو خدامه لجيفتكم
ذكرى : رجعت الهوسه وطب ابويه سكتو اثنينهم باسني وسألهم شصار جان يكول صمد
صمد : ماكو شى عمي جاي اخذ مرتي واروح
ابو فوزي : باوع على بنته وتقرب منها وكال ترحين بابا لبيتج
ذكرى : صفنت على حالي قابل اطلك والي بطني شنو ذنبه كلت بصوت ناصي اي باوع بابا على صمد وكاال اخذها يابه وعينك عليها
فوزي : يابه شلون ياخذها
ابو فوزي : رجلها ومن حقه كافي حجي صوتكم للشارع المره تاليها ومرجعها لرجلها يله روحي بنتي لبيتج

عمشه : عين الماصلت على النبي يله كومي ولاتخششين الشيطان بين زلمتج واخيج
كمت ولبست نعالي وبنفس حالتي رجعت للبيت وعفت اخويه واكف بلباب مورث من الاعصاب يباوع بقهر على حالي

دخلت وحسيت الوجوه مگلوبه
اجت عمشه وصاحت وينج عتوي
عبيد نزل وكال لامه
تعبانه يمه ظهرها
عمشه : يبعد امك تعال اكنس وامسح بمجانها چا انت العتوي كرت عيني
عبيد : شبيج يمه شگلت اني
عمشه : صيح مريتك لا اصعدلها وتعرفني من يطكن خبالات عمشه ابويه مااعرفه
عبيد : صاعد يمه لا تصعدين
شويه ونزلت وكفت على الدرج
صالحه : خير عمه محتاجه شى
عمشه : الصار اليوم مايصير بعد التغلط بيجن اسحل بيها الخرابه كلها

صالحه : اني شعليه مشفتي شسوت
عمشه : اسكتي بت غنيه تعلميني بيج اركدي شوي لاتخلين عگلي يگلب عليج وانت يازلمه البيت وجبير اخوتك ضب مريتك شوي طايحه بنات الوادم خدامه حاجيها هاي المره مالي حيلجن مره ثانيه اركع راس براس والزمجن الشارع
وانتي بدعه وساهره يشملجن الحجي لا تكولن ماكالت عمشه

ذكرى : نظرات صالحه تخوف دخلت لغرفتي وصمد عافني وطلع حتى مكلف نفسه يطيب خاطري تمددت ومهتميت ردت بس ارتاح ويوم كامل نايمه شصار مصار ميهمني
وثاني يوم كعدت واجت بان تركض صايره تمشي حليوه سمره والشعر تمري والخدود متفحه تنحب حيل كل مااشوفها اكرصها من خدها
نزل عبيد وكال
شون صرتي
ذكرى : الْحٍمَدٍ للـّہ احسن
عبيد : لا تسون مشاكل انتن خوات
ذكرى : بگلبي اكول ياخوات وتريد مرتك تشرب من دمي هزيت راسي وكتله الله كريم
طلع عبيد وجوحي وصمد رحت وره البيت اجيب الصونده حتى اغسل الطرمه جان تلزمني صالحه من رگبتي وخنكتني
صالحه : اسمعي لج لا عبالج السويتي اعبره الج اني اترزل من وراج لج ادوسج بنعالي هنا واخلي ايدج من رجلج ما تميزيها بعدج متعرفين صالحه

ذكرى : عوفيني اختنكت اتنفس كوه واحجي
صالحه : تشتغلين خدامه جوه رجلي وصوتج ميطلع الا والله اگلبج شاذي وميصيرلج دوا طول حياتج

جان تنجر صالحه بقوه من ايدها وحصرها بلحايط واني اكح حيل اريد هوا ركزت واشوف نجم لازمها من ايدها حيل ودافعها للحايط ويحجي ويصك على سنونه يريد يكطعها
نجم : هلمره لزمتيها مره ثانيه اسويج اني شاذي اكول مرت اخويه الجبير وبت خالي وعيب ادخل بالع سوالفج وحركاتج التخزي واكول يله تكبر وتعقل بس لهنا وبس اذا لمستي شعره منها وتراب ابويه لا طلاكج على ايدي وكولي نجم المدلل على كولتج سواها

صالحه : عوف ايدي اله اكول لاخوك عليك واخلي اليوم يهطرك
نجم : ذاك عبيد كلها جم ساعه وتلكي راجع للبيت واني احجي وعبيد يحجي ونشوف عمشه المن تسمع ويه منو تطبك تردين تجربين
اباوع على صالحه وجهه اصفر دفعته وطبت

نجم : اجه تقرب مني وعيونه كلها خوف
بيج شى
ذكرى : شكراً لوما انت يمكن جان ذبحتني
نجم : خلي تولي هاي بوخه بس حجي ولغوه وتهديد
ذكرى :اخاف منها تعرف شون تأذيني
نجم : لتخافين محد يأذيج واني اشتم الهوا ادخلي غسلي
ذكرى : باوعت عليه وكتله انت هسه مثل اخويه مثل الردت اصحي واصحي نفسي
وجان يكول
نجم : وانتي مرت اخويه واختي ومثل ما احامي لخوله احاميلج وافهم قصدج انسي القديم كله ذاك راح وماانظرلج بغير الخوه
روحي ارتاحي

ذكرى : دخلت اجر بروحي وماانكر خوفي من صالحه رغم محاوله نجم يهديني
وبقى بالي تهديدها
مر اسبوعين وجمعت عمشه ولدها وكعدتنا كلنا وكالت
عمشه : عين الله عليكم كبرتو وتزوجتو وانه دوم اكولن عندي خمس زلم گلتها لفلاح من اشتعلت لشته وين ما وله واكولنها اليوم صرتو زلم وكاع ابوكم ضلت للغريب انه من يوم ماهجيت بيكم اعتبرت ابن عمي وعمكم فلاح غريب
اريدن كاع المرحوم تردوها
عبيد : يمه انسويها مذابح ويه عمي
جوحي : هاي فلوسنا وكاعنا لزم ترد النا سنين ياكل بخيرنا واحنا الفلس بعازته

فلاح : اني اكول ندز جماعه يتحاجون ويه عمنا ونحلها ودي
عمشه : وانت صمد
صمد : اني وياج يمه شتامرين
باوعت عمشه على نجم
نجم : الحل مالتي ميعجبكم
عمشه : كول يبعد امك
نجم : نبيع الكاع لحجي ريسان هذا يكره عمي ودوم يريد اذيته نبيعه الكاع اقل من سعرها بشوي ونخلي عمي وريسان يطاخخون بدون ماندخل لتنسون المنطقه كلها لعمي يعني حتى لو نسويها دم منربح هواي رياجيل وفلح عنده نطلع بمبلغ زين بدون اي مشاكل من بعيد لبعيد

عبيد : وليش نبيعها نرجع لكاعنا ونزرعها
نجم : وتتوقع عمك يقبل غير ثاني يوم يحركها النا هاي اذا مصفانه واحد واحد
جوحي : اذا خايف ضل بحضن امي
نجم : اني ماخايف على نفسي اني شعندي اخسره اني خايف عليكم كلكم عدكم عوائل وجهال اذا صار واحد بيكم عليه شى مرته وجهاله شلون بيهم واذا احنه نحير بيهم شنو فايده الكاع واحنا منطين دم اخويه بيها بله نفخ وتبيعون بطولات فكرو بيها زين هذا اسلم حل ناخذ القليل ونكسب روحنا
عبيد : اني ماارضى اريد كاع ابويه كلها ونرجع للناصريه
نجم : ومنو يخليك ترجع عمك من كل عقلك
جوحي : لتدخل نجم انت بعدك صغير وماتفتهم وهاي سوالف المتعلمين خليها الك

عمشه : لا والله انتم كلكم ماتفتهمون وانه ويه نجم حجيه مال دواوين وموزون هذا هو نبيع الكاع لحجي ريسان واليطلع نشتري بيه الخرابه البصف البيت ونكبر هذا البيت
جوحي : وحصصنا يمه مناخذ حقنا
عمشه : هذا ياهو اليحجي بلحگوك مالكم شى عندي تنباع الكاع ونشتري الخرابه البصف البيت ونبنيها ويه هذا ونكبر البيت وجلمه زايده اتبره منكم ليوم الدين وعود خلي عمكم يحلها ليكم

عبيد : ميصير يايمه غير ناخذ حكنا كلت نبيعها وكلمن ياخذ فليساته
عمشه : كامت عمشه وبيدها المسواك تفرك سنونها تفلت وكالت نجم يمه شوف الحجي ريسان دزله طارش وبيع كاع ابوك اذا انتم زلم فهاي الايد السوتكم زلم لا تتمرجلون على امكم واذا على الحك انه الوحيده الالي الحك بيها انه تعبت ويه ابوكم وانكسر ظهري وضاع شبابي بيها
حجي زايد مااسمع كلمن ياخذ مريته ويولي
اريدن انام

ذكرى : الكل طلع ضايج ومخنوك لان متوقعين الكاع تنباع وتتوزع الفلوس اما صالحه وساهره عيونهن نار الوحيده الجانت ساكته هي خوله حتى منطقت بكلمه
ونجم ركض بلبيعه وخلال سبوعين انباعت الكاع والكل وقع وهو الممنون ومحد كدر يفتح حلكه وعمشه اشترت الخرابه البصف البيت وبدو يكبرون البيت
وبهذا الوكت صالحه ولدت وجابت سما
وبعدها بمده ولدت اني وجبت يونس
اول فرحتي وفتحت عيني

اكو باب جان لازم ماينفتح

اني خوله البنيه الوحيده لعمشه فتحت عيني واشوف امي واخوتي يطلعون من الفجر للشغل يلمون العتيك والفافون والبواري وكلشي قديم ومستهلك ويبيعوه
جنت اشوفهم شلون يتعبون ويلمون الفلس على الفلس حتى بس يكملون البيت ويصير عدهم فلوس اليسمع اني على خمس ولد يكول انيالها اكيد مدلله بس الحقيقه غير اني حالي حال اي وحده اذا مو اقل الي مدلل بينا هو نجم تكول مو بشر نجم ونزل من السما وحط بحضن امي كلشي اله مجاب حتى دراستي مكملتها اله نجم كال لامي يله قبلت

جنت امشي واروح والبنات كلهن يعيرني بأمي بت عمشه ومجنت اهتم اكول الشغل مو عيب ولا حرام وخاصه بظرف امي تعبت وشافت الويل ومامدت ايدها لبشر وكالت انطيني ولا سوت شى بلحرام لهذا اعتبر شغلها شرف دومي هادئه وماادخل بأي شى اعرف نسوان اخوتي حيايه وتمشي بلكاع متجنبه الكل الزينه والشينه وحايره بروحي وشاريه راحة بالي لحد ما اجه اليوم الكرهت بيه امي واخوتي وقررت مااخليهم يعيشون مرتاحين


            البارت الثالث من هنا

بدل ماتدور وتبحث علي الروايات خليها علي تليفونك وحمل تطبيقنا

تحميل تطبيق سكيرهوم
تعليقات



حجم الخط
+
16
-
تباعد السطور
+
2
-