-->

روايه لا اريد الحب الحلقه السابعه والعشرون والاخيرة

روايه لا اريد الحب الحلقه السابعه والعشرون والاخيرة


     🎭🎭🎭🎭🎭🎭🎭🎭

    لا أريد الحب 

    الحلقة السابعة و العشرون 

    أنتى الحب 

    🎭🎭🎭🎭🎭🎭🎭🎭


    ** وقف كمال أمام والدته التى حجبت بجسدها كيم عنه و ارتفع صوت مريم الممزوج بالألم تعيد كلماتها مرة أخرى بحزم :


    _ كمال أنا بحذرك كيم لجأت لنا و طلبت الأمان و إحنا استحالة نخليك تمسها فأبعد عنها و خلى كلامك معايا أنا و ماما سمية ..


    ** هز كمال رأسه بحدة و نظر إلى مريم و قال :


    _ ممكن افهم معنى كلامك دا ايه ..


    ** زفرت مريم فى محاولة منها لعدم استسلامها لصرخات حزنها و المها و قالت :


    _ معناه انك لازم تتجوز كيم يا كمال و تعترف بولادك منها الولاد ملهمش اى ذنب بطريقة مجيهم لكن من حقهم عليك و عليها انهم يتولدوا و يعيشوا رفعين راسهم و محدش يقول عنهم انهم ولاد حرام ..


    ** مسح كمال على وجهه بيديه و توجه الى فراش مريم و جلس بجانبها و احتضن يدها و قال بإنكسار :


    _ انا عاوز اعيش و اموت و اللى ذمتى انتى و بس يا مريم انا أقسمت لك ان عمرى ما هلمس غيرك و لا لمست غيرك و كيم دى لوثتنى و لوثت شرفى باللى عملته ازاى عوزانى اقبل ان يكون اولاد من واحدة تانية غيرك ازاى يا مريم ..بقلمى منى أحمد 


    ** اندفعت دموع مريم و شهقات حزنها الذى استولى على كامل احساسها تقول :


    _ و انا مش هقدر اجيب لك ولاد تانيين يا كمال ربنا حكم عليا انى مقدرش اخلف تانى يا كمال انكتب عليا كل سنة لما احتفل معاك بعيد ميلاد ابننا اكتم حزنى و اهرب من ذكرى ان مش هقدر اخلف تانى كمال انت محتاج عزوة وولاد و كيم حامل فولادك اللى من صلبك انت لازم تقبل بيهم و تعترف بوجودهم علشان بنا يبارك لنا فابننا و حياتنا سوا انا عارفة انك مستغرب ان انا اللى اقول الكلام دا لكن يا كمال الدنيا خلتنى افهم ان الحب مش انانية الحب انى اشوفك مرتاح البال زى ما انت كنت مستعد تضحى علشان تبعد عننا الخطر ارجوك يا كمال اتجوز كيم و اديك ولادك اسمك ..


    🎭🎭🎭🎭🎭🎭🎭🎭🎭🎭🎭


    ** مرت الشهور على اسرة كمال فى هدوء بعدما انتقل بأسرته الى فيلا أشتراها فى القاهرة ليمكث فيها ترافقه مريم و ابنه يحيي و كذلك كيم التى أسس لها جناح منفصلا خارج الفيلا ليؤكد لها ان وجودها فى حياته ماهو الا وجود ورقى فقط حتى يعترف بأطفاله منها .,. حاولت مريم كثيران تجعل كمال يرى حقيقة كيم ما هى الا فتاة سقطت فى عشقه و اقتنصت الفرصة التى أتت اليها و لكنه رفض اى تعامل معها من قريب او بعيد لتكتفى كيم بصداقتها مع مريم ووجودها فى نفس المكان مع كمال .,. بقلمى منى أحمد 


    ** اما ياسر و علا  فقد استقرا مع والدته بعدما سافر اولا الى الاسكندرية و تقابل مع عائلة حكيم يرافقه افضل المحامين ليجرى صلحا متبادل الأطراف بموافقة الجميع حتى يضمن ياسر ان تعيش علا حياتها دون مشاكل او خوف من فقدان ابنها  .,. 


    ** كذلك استقر الحال بين عبد الرحمن و يسرية و بناته فى منزلهم لتعيش يسرية حياتها كما تمنتها دوما مع زوجها الذى اظل عليها بحبه و رعايته ..


    🎭🎭🎭🎭🎭🎭🎭🎭🎭🎭🎭🎭


    ** و فى صباح يوم جديد أشرقت الشمس على فيلا كمال  لتستيقظت مريم على صوت طرقات و بكاء و أنين مكتوم جعلها تسرع  و تهبط إلى الأسفل لتجد كيم تقف أمامها و قد سكن الألم محياها .. فصاحت مريم على كمال الذى هبط متبرما إلى الأسفل ليقف محدقا بهما فى فتور فنهرته مريم و قالت :


    _ كيم بتولد لازم ننقلها المستشفى انت واقف تتفرج علينا ببرود اتحرك يا كمال على ما البس حجابى شيل كيم للعربية انت مش شايفها حالها عامل ازاى ..


    ** رفع كمال حاجبه و قال ببرود :


    _ انتى عارفة انى عمرى ما هلمسها و ..


    ** صيحة واحدة من مريم جعلت كمال ينصاع لامرها حين قالت بصوت هادر :


    _ كمال ..


    ** اسرع كمال و حمل كيم و توجه بها الى سيارته و اجلسها فى المقعد الخلفى و انتظر مجىء مريم التى اسرعت مهرولة لتجلس بجانب كيم فى الخلف فتبرم كمال بضيق ليقود سيارته و هو يهمهم فى سخط ..


    ** أخذ فريق الاطباء الذى استدعته مريم كيم و دلفوا بها الى غرفة الجراحة لتمضى أقل من الساعة و تخرج احدى الممرضات و هى تحمل بين يداها فتاة جعلت قلب مريم يهوى بين قدميها لتحملها مريم بين ذراعيها و تنهمر دموعها فأقترب منها كمال و حدق فى ملامح الطفلة ليجد قلبه ينبض بقوة فرفعت مريم نظرها اليه و ابتسمت و قالت :


    _ ماشاء الله عليها يا كمال دى طالعة شبة ماما سمية ..


    ** فجأت مريم كمال بمد يدها بالطفلة تجاهه ليأخذها كمال و هو يرتجف خوفا لتخرج ممرضة اخرى وهى تحمل بين ذراعيها طفلا فحملته مريم و نظرت الى وجه كمال الذى لمعت عيناه بالدموع فوقفت بجانبه و قالت و هى تبكى :


    _ ربنا يجعلهم لكم من الذرية الصالحة يا كمال ..


    ** أتت الممرضة لتحمل الطفلين منهما فأحتضنها كمال و قبل رأسها و قال :


    _ انتى بنتى الاولى و الاخيرة يا مريم و حبك جوايا بالدنيا بحالها و ربنا يبارك لنا فابننا يحيى انما قولى لى انتى سبتى يحيى فين ..


    ** ابتسمت مريم و قالت :


    _ سبته مع دادة نعمات اطمن يا كمال يحيى بخير يا حبيبى ..بقلمى منى أحمد 


    🎭🎭🎭🎭🎭🎭🎭🎭🎭🎭


    **  أتت سمية و أصطحبت معها نيفين التى كانت خافت ان تتركها وحدها و هى فى بداية حملها و اطمئنت سمية على صحة كيم التى تمددت على فراشها تبكى امام الجميع و تعتذر من كمال على ما فعلته به و ب مريم و طلبت منهما السماح لتفاجىء مريم بقولها :


    _ مريم انا عوزاكى انتى تختارى اسم بنتنا و كمال هو اللى يختار اسم ابننا ..


    ** صاحت نيفين بسعادة تفاجىء الجميع و تقول :


    _ سمية و مصطفى ..


    ** حدقت مريم بها و هى تبتسم لتقول بسعادة :


    _ خلاص نيفو اختارت و مينفعش نرد كلمتها خلاص دا بعد اذنكم القمر دى سمية و الباشا دا مصطفى ..


    ** ربت كمال على ظهر مريم وقال :


    _ ربنا ميحرمنيش منك يا مريم و يبارك لى فيكى ..


    ** طرقات على باب الفيلا جعلت كمال يتوجه صوبه ليجد مصطفى امامه غائم الوجه فنظر خلفه و اشار اليه ان يبقيا فى الخارج ووقف كمال بجانب اخيه و قال :


    _ مالك يا مصطفى وشك مقلوب كدا ليه فى حاجة حصلت ..


    ** دمعت عينا مصطفى و قال و هو يتمالك نفسه ..


    _ المحامى بلغنى ان المحكمة حكمت على رضوان بمؤبد و حكمت على بابا ب الا..


    ** لم يستطع مصطفى اكمال حديثه لينهار بين ذراعى كمال باكيا فخرجت سمية و هالها ما شاهدته فجذبت ابنها الى داخل حضنها و نظرت الى كمال و قالت :


    _ اخوك ماله يا كمال ماله مصطفى ..


    ** زفر كمال بحزن و قال :


    _ حكم المحكمة كان النهاردة و عمى وهدان اخد اعدام ..


    ** شهقت سمية وشددت ذراعيها حول ابنها تخفى ضعفه و حزنه بداخلها .,. شعرت نيفين بالقلق لبقاء سمية بالخارج فهى على يقين انها استمعت الى صوت زوجها فأستئذنت من مريم و كيم و خطت ببطء الى الخارج ووقفت تحدق بمصطفى  بصدمة و همست بصوت خفيض :


    _ مصطفى ..


    ** وصل ندائها اليه فابتعد على مضض هاربا من حضن والدته ليقف امامها محدقا فى وجهها يشعر بالانكسار امامها فاشار  كمال الى والدته ليعودا الى الداخل وقفت نيفين امامه تخشى ان يصدر منها حركة خاطئة و لكنها مدت يدها اليه فقبض مصطفى عليها ، شعرت نيفين ان ساقيها لا تحملها فجلست ارضا ليجلس مصطفى ارضا بجانبها واضعا رأسه على ساقها و قال ببكاء و هى ترتب على رأسه بحنان:


    _ خسرت ابويا و اخويا يا نيفين معدش ليا ظهر استند عليه و بقيت لوحدى انا كنت بستقوى بيهم حتى لو كنت رافض اسلوبهم و عيشيتهم لكن كنت بستقوى ضد الدنيا بيهم ..


    ** وضعت نيفين اصابعها على شفتيه و قالت بهمس :


    _ ابنك اللى الجاى او بنتك هما سندك و ظهرك و انا معاك استقوى بيا زى ما انا بستقوى بيك و ادعى لوالدك بالرحمة و لاخوك بالهداية و متنساش ان ربنا اكرمك باخ غير رضوان استقوى بيه يا مصطفى و خليك سنده و اعتبره ظهرك و حماك ..


    ** رفع مصطفى رأسه و حدق بوجه نيفين و قال :


    _ انتى ازاى كدا ..


    ** حدقت به نيفين بدهشة و قالت :


    _ مش فاهمة يا مصطفى تقصد ايه ..


    ** قبل مصطفى يدها و قال و هو ينظر بعمق عيناها :


    _ انتى ازاى دوا لاى وجع بحسه ازاى بكلامك حسستينى ان ربنا ادالى العوض عن اللى راح منى نيفين انتى بشر زينا و لا ملاك ربنا اختارنى من دون البشر و خلاكى من نصيبى انا بحبك اوى يا نيفين بحبك و لو فضلت عمرى كله اقولها مش هتوفيكى حقك ..


    ** دمعت عينا نيفين و قالت :


    _ ربنا كتبنا لبعض يا مصطفى لاننا شبه بعض انا داخلة على سنة متجوزة منك و محدش من اهلى سئل عليا زى ما اكون مش بنتهم مافيش الا ماما سمية و ابية كمال و مريم انت و هما عوضتونى كل الحرمان اللى عشته ..


    ** قبل مصطفى رأسها مرة اخرى و قال :


    _ انتى صح يا نيفين ربنا كتبنا لبعض علشان احنا بنكمل بعض انتى النعمة اللى كنت محتاج لها علشان تكمل حياتى ..


    ** قبلته نيفين فوق وجنتيه و قالت :


    _ ساعدنى بقى اقوم شكلى بقيت زى الست العجوزة اللى هقولك ساعدنى يا ابنى و خد بايدى ..


    🎭🎭🎭🎭🎭🎭🎭🎭🎭🎭🎭


     

    ** و بين اسوار السجن دلف المسخوط يبتسم فى وجه مأمور السجن و يقول :


    _ عندى اذن زيارة لمسجون هنا اسمه رضوان وهدان ..


    ** اشار له المأمور و قال :


    _ اذن خاص كمان و ماله دقيقة العسكرى يناديه من الزنزانة انما انت تقرب له ايه ..


    ** ابتسم المسخوط فى سخرية و قال :


    _ لا انا مش قريبه دا مديون لى بمبلغ كبير و جاى اشوف هيسدده ازاى قبل ما ينفذ حكم المؤبد اللى عليه خصوصا ان اخوه برا مالوش فاللى بينا و انا يا سعادة الباشا عاوز حقى دا نص مليون جنية مش حاجة هينة ..


    ** ولج رضوان ووقف يحدق بوجه المسخوط بخوف فلاحظه المأمور و قال :


    _ انا هسيبك معاه خمس دقايق و هرجع يا ريت تخلص كلامك معاه بسرعة ..


    ** ابتسم المسخوط و ربت على شاربه و جلس بجانب رضوان و قال :


    _ هتوحشنا و الله يا رضوان تعرف ان روحت لاخوك و طردنى قالى انه مالوش دخل بتجارتنا سوا و النص مليون اللى ليا عندك ..


    ** قاطعه رضوان و عيناه تقدحان بالشر :


    _ اتنين مليون يا مسخوط ..


    ** لمعت عينا المسخوط بطمع و قال :


    _ أأمرنى يا رضوان .. 


    ** خفض رضوان صوته و قال :


    _ كمال الزينى عاوزك تخلص عليه ..


    ** انفجر المسخوط ضاحكا و قال و هو يرفع حاجبه بسخرية :


    _ دا باينه غالى اوى عندك علشان تدفع فيه المبلغ دا عموما اعتبره بح بس عاوزنى انفذ امته ..


    ** مال رضوان على المسخوط و قال :


    _ عاوزك تنفذ الليلة مش عاوز يطلع عليه شمس فاهم و إياك يفلت منها كمال الزينى لازم يصلوا عليه الظهر ف المقابر ، انت عارف حكم الإعدام هيتنفذ بكرة العصر فابويا و كمال لازم يكون فقبره قبله انت فاهم  ..


    ** تطلع المسخوط حوله يراقب غرفة المأمور بحرص يستمع إليه و هو يلهو بشاربه ليرفع حاجبه و يميل عليه قائلا بصوت خفيض كفحيح الأفعى  :


    _ وفلوسى هخدهم منك ازاى بعد ما أتحكم عليك ب خمسة و عشرين سنة ايه هستنى لما تخرج و لا ايه .. بقلمى منى أحمد 


    ** زجره بغضب و قال و هو يتلفت حوله بقلق  :


    _ فلوسك هتاخدهم على داير مليم قبل ما توصل بيتك مش ابن وهدان اللى يرجع فكلمته المهم تنفذ  ..


    ** ربت المسخوط على كتفه و قال و هو يبتسم فى شر  :


    _ اطمن كمال هيسبق أبوك على الآخرة ما انت عارف المسخوط رصاصته مبتخيبش..


    🎭🎭🎭🎭🎭🎭🎭🎭🎭🎭🎭


    ** يراقبه عن كثب و رأه يجلس فى حديقه فيلته يحمل طفلا صغيرا يداعبه فزفر فى ضيق و همهم بسخط :


    _ والله مالوش ذنب العيل الصغير دا يتيتم بدرى كدا بس هقول ايه عمره بقى لحد كدا .,. سيب بقى الواد من ايدك خلينى اسلمك لعزرائيل ولا انت هتتعبنى معاك ..


    ** و كأن كمال استمع اليه فنادى على مريم و لكنها لم تلبى ندائه لتخرج كيم من غرفتها تبتسم له بمودة فنظر لها كمال مقطب الحاجبين فحملت كيم يحيى عنه و قالت :


    _ مريم صممت تاخد سمية تنام فالاوضة فوق انا هطلع لها يحيى و اجى لان فى موضوع حابة اتكلم معاك فيه ممكن يا كمال ..


    ** زفر كمال بضيق و قال :


    _ ماشى يا كيم روحى طلعى يحيى لمريم و انا هستناكى هنا ..


    ** اسرعت كيم فى خطواتها و تركت كمال وحده لتلمع عينا المسخوط و اعتدل فى مكانه و اعد سلاحه و لكنه تراجع حينما ظهرت المرأة من جديد و جلست امامه تحجبه عن عيناه فزفر بضيق و تأهب لينال فرصته ..


    ** جلست كيم و قالت بصوت مرتبك :


    _ كمال انا عارفة انك لحد دلوقتى مش مسامحنى و انا عارفة ان معاك حق اللى عملته مالوش اى تبرير لكن عذرى انى حبيتك حتى لو انت محبتنيش علشان كدا بعد اذنك تسمحى لى انى ارجع امريكا تانى ..


    ** وقف كمال بغضب و نظر لها بحدة و قال :


    _ عاوزة ترجعى امريكا بسهولة كدا و طبعا عاوزة تاخدى ولادى معاكى ..


    ** اومأت كيم براسها و همت ان تجيبه و لكنه قاطعها و قال :


    _ كيم لو عاوزة تسافرى انا مش همنعك لكن اعملى حسابك انك هتسافرى لوحدك وولادى هيفضلوا هنا فحضنى انا اللى اربيهم انا مش مستعد اتحرم من ولادى ولا ولادى يتحرموا منى عجبك على كدا سافرى مش عجبك يبقى تقعدى هنا و اظن ان الكل هنا بيحبك و بيعاملوكى كانك واحدة منهم ..


    ** دمعت عينا كيم و قالت :


    _ بس انا مقدرش اسيب ولادى يا كمال دول هما الحاجة الوحيدة اللى مخليانى اتحمل كرهك ليا ازاى هسافر و اسيبهم ..


    ** ابتعد كمال عنها فابتسم المسخوط و ضغط على زناد سلاحه لتنطلق رصاصته و لكن تحرك كيم المفاجىء ووقوفها امام كمال جعلها تتلقى رصاصة المسخوط فسقطت بين ذراعيه ليحدق كمال بها برعب و هو يرى دمائها تلون ثيابها و رفع عيناه يبحث عمن اصابها ليهرول رجال حراسته و يحيطون به ليلمح احدهم المسخوط و هو يسرع بالهرب فأسرعوا خلفه يلقون القبض عليه .,. خرجت مريم الى الحديقة تبحث بعيناها عن زوجها بعدما سمعت صوت الرصاصة و قلبها يهوى بين قدميها بخوف لتقف امام مشهد كيم الراقدة بين ذراعيه تبتسم فى وجهه فجلست بجانبهما فادارت كيم عيناها اليها و همست بوهن :


    _ لمسنى يا مريم كمال لمسنى و و خايف كمان عليا ..


    ** رفعت مريم يدها تمنع شهقات حزنها لتنظر الى وجه كمال الذى احتله الحزن تدمع عيناه لتسمع صوته المرتجف يقول :


    _ تانى مرة حد يضحى علشانى يا مريم و المرة دى كيم انا مش عارف عملت لها ايه انا علشان تضحى بحياتها و تموت بدالى ..


    ** رفعت كيم يدها و لمست وجه كمال فنظر اليها و قالت و هى تربت على وجنته :


    _ ولادى امانه فرقبتك يا كمال ربيهم انت و مريم بالحب حبهم هما الحب اللى رفضت تحبهولى و انتى يا مريم انا عارفة انك معتبراهم ولادك و انا حقيقى مش خايفة من الموت ولا خايفة على ولادى لانى عارفة انك هتربيهم احسن ما كنت هربيهم ..


    ** شهقت كيم تلتقف انفاسها بصعوبة لتغمض عيناها و هى تهمس بصوت تتلاشى منه الحياة :


    _ احضنى يا كمال انا سقعانة و عاوزة احس بالدفا للمرة الاخيرة فحضنك ..


    ** لبى كمال امنيتها الاخيرة لتفارق كيم الحياة بين ذراعيه ..


    🎭🎭🎭🎭🎭🎭🎭🎭🎭🎭🎭


    ** وقفت مريم تهندم ثياب مصطفى و هى تقول بألم :


    _ اختك طبعا تحت مع بابا يا مصطفى صح ..


    ** أومأ مصطفى و قال :


    _ ايوة يا ماما لبست و قاعدة مع يحيىو بابا تحت بس انا مش عارف ليه حضرتك مصممة ترتبى هدومى هو انا عيل صغير و لا ايه اشمعنة مش بتعملى كدا مع يحيى و سمية..


    ** قبلت مريم وجنته و قالت :


    _ علشان انت حبيبى الصغنن و اللى بتسمع كلامى فيهم انت يعنى مش عارف يحيى اللى مش بيحب حد يدخل اوضته و اختك بابا مش بيرضى يخلينى اعمل لها حاجة هو اللى بيختار لها لبسها و بيلبسها و اختك بتدلع عليا ..


    ** قبلها مصطفى و احتضنها و قال :


    _ انا بحبك اوى يا ماما عموما انا جهزت يلا بينا .. بقلمى منى أحمد 


    ** هبطت مريم و مصطفى يحتضن يدها بسعادة فنظرت الى يحيى و سمية يجلسان بجانب كمال فرفع نظره اليها مبتسما حتى هبطت ووقفت بجانبه و قالت :


    _ جاهزين ..


    ** حمل كمال سمية و مد يده ليقبض على كفة يحيى و خرجوا جميعا من الفيلا مستقلين السيارة حتى وصلوا الى وجهتهم فهبط كمال و ساعد مريم لتغادر ليتشبث يحيى و مصطفى بيدا مريم و حمل كمال سمية من جديد وتوجهها الى قبر كيم ووقفوا جميعا امام شاهد القبر ليتلوا الجميع لها الفاتحة و بعدما فرغوا من تلاوتها قبل كمال وجنة ابنته ونظر الى مريم و قال :


    _ عمرى ما كنت اتخيل ان حكمة ربنا تبقى نعمة كبيرة بالشكل دا عليا يا مريم ..


    ** ربتت مريم على كتفه و قالت :


    _ شوفت يا كمال حاربت كيم و رفضتها و مكنتش فاهم انها رحمة من ربنا بينا علشان كيم تهدينا ولاد يبقوا السند لبعض شايف الحب بينهم عامل ازاى و انت يا كمال نفذت وصية كيم و حبيت الولاد زى ما كنت تتمنى و اكتر ..


    ** احتضنها كمال بتملك و قبل رأسها و قال :


    _ دول ولادك انتى يا مريم حتى لو كانت كيم اللى ولدتهم ربنا جعلها السبب اللى عوضك بيه عن اللى حصل لك ربنا ميحرمنيش منك و يقدرنى و اعوضك عن كل لحظة زعلتك فيها ..


    ** خرجت مريم و كمال و بصحبتهم اولادهم ليستقلوا السيارة من جديد و على وجوههم ارتسمت ابتسامة حب تجعل من يراها على وجوههم يدرك ان تلك الاسرة خلقت ليجمعها الحب ..


    تمت.. لكم منى كل  الحب  ♥️ 


    🎭🎭🎭🎭🎭🎭🎭🎭🎭🎭🎭


    #منى أحمد 

    🎭لا أريد الحب🎭

     🎭منى أحمد🎭

     

    إرسال تعليق