Ads by Google X
روايه رحم للايجار الحلقه التاسعه -->

روايه رحم للايجار الحلقه التاسعه

روايه رحم للايجار الحلقه التاسعه


     (((عندما يعشق الرعد)))

    (رحم للإيجار)

    (الحلقة التاسعة)

    عدي كان مش مصدق اللي شايفه. البنت دي شبه حلا بالظبط. نفس الشكل واللون والملامح والشعر..كان يبصلها ويحقق فيها خايف يكون بيتهيألو. وبعدين فاق لنفسه. 

    عدي: طيب انا اعمل ايه دلوقتي. لو اختها المستشفي. حدخل في س وج ومين دي وجبتها ازاي. لا انا هخدها البيت عندي. 

    وشالها عدي وراح علي شقته. ودخلها الاوضة ونيمها في السرير. وحاول يفوقها. بس هي واخدة مخدر . ومش هتفوق بسهولة. 

    عدي فضل قاعد قصاها. بيبصلها وبيبتسم. مش ممكن في شبه كدة. اكني شايف حلا قصاد عيني. بس يتري مين دي وكانت بتعمل ايه علي البحر في الوقت ده. 

    وقام وقف قصاد الشباك واهو بيفكر في حلا وبعد شوية. سمع صوتها بتأن وابتدت تفوق. قرب منها وقعد علي الكرسي اللي قصادها. 

    هنا: بتحاول تقوم وماسكة راسها. وبتتألم. ااه يا دماغي. انا فين انت مين

    عدي: اول لما فتحت عنيها. تنح وسرح. مش ممكن ازاي نفس لون العين كمان. دي عنين حلا 

    هنا: قعدت تبص علي نفسها وعلي عدي اللي متنح ليها. انت يا جدع انت انت عملت فيا ايه وقامت مسكته من هدومه. 

    عدي: اهدي. اهدي يا أنسة انا معملتش حاجة. انتي مش كان في شباب عايزة تخطفك. فاكرة ولا لا

    هنا: عقدت حاجبها. اه صحيح. انت اه . مش انت كنت جاي تجري من بعيد

    عدي: الله ينور عليكي كويس. ان الذاكرة لسة شغالة. ممكن بقي تسيبي هدومي 

    هنا: بصت لإيديها. علشان كانت ماسكة فيه اكنها. كانت هضربه. احمم وسابت ايديها. وانا فين بقي كدة ان شاء الله 

    عدي: في بيتي

    هنا: نعم يا عم الظريف. وجبتني بيتك ليه انت اتهبلت

    عدي: اللهم طولك يا روح. انت بالعة ايه اتهدي بقي كدة واسمعي. كنت هعمل ايه وانتي متخدرة ومغمي عليكي. جبتك هنا لحد ما تفوقي.والحمد لله اني كنت موجود كان زمانهم خطفوكي والله اعلم كانوا عملوا فيكي ايه

    هنا: لا عندك حاسب. انا اصلا كنت هخلص عليهم. اه انا 100راجل. 

    عدي: هههههههه. لا بجد ده انتي كنتي عاملة في ايديهم زي الكتكوت المبلول

    هنا: ما تحسن الفاظك. يا جدع انت. وبكبرياء هما بس اللي خدوني علي خوانا. لكن انا كنت ممكن اشلفتهم

    عدي: ههههههههه. اه ما انا عارف

    هنا: انت مش مصدق. لا انا محدش يقدر عليا 

    عدي: ماشي يا عم فندام. ممكن بقي تقوليلي انتي مين وايه اللي نزلك في وقت متأخر زي ده لوحدك. 

    هنا: بان عليها الحزن. لا مش ممكن دي حاجة خاصة ومش عايزة اتكلم فيها

    عدي: بس كدة اهلك ممكن يقلقوا عليكي. تحبي اوصلك ليهم 

    هنا:انتهدت. لا متقلقش محدش هيقلق. وانا متشكرة ليك. انا همشي عن اذنك. وجات تقوم

    عدي: وقف قصادها. انتي مش هترجعي لاهلك

    هنا:دموعها نزلت. ومسحتها. لا انا هشوف مكان اقعد فيه. 

    عدي: حس ان وراها حاجة. بس مش عايزة تتكلم. طيب لو تحبي خليكي هنا الليلة وامشي الصبح

    هنا: بصتله بغضب. قصدك ايه يا جدع انت لا مش علشان ساعتني. وعرفت اني ماليش اهل هتسوق فيها وتفتكر اني سهلة. لا انا ممكن اكلك بسناني

    عدي: يخربيتك. اقفلي البوتجاز اللي اتفتح في بوقك ده. انا مقصدش حاجة من اللي جات في دماغك. انا قصدي تباتي لوحدك هنا. وانا في اوضة تانية. وكمان الباب ليه مفتاح اقفلي علي نفسك. لو خايفة مني. 

    هنا:حكت شعرها وهي بتفكر وبتعض شفيفها. 

    عدي: ابتسم. لان حلا كانت بتعمل نفس الحركة وهي بتفكر 

    هنا: مالك يا جدع انت مسهوك كدة ليه

    عدي: يخربيت فصلانك. انتي يا بنتي لسانك ده ايه. فظيعة. 

    هنا: اصلك بصراحة بصاتك مش عجباني. مش مرتحالك

    عدي: اتنهد. اسف لو انا نظراتي ضايقتك. بس لما تعرفي سببها هتعزريني. وعموما زي ما قولتلك. اقفلي علي نفسك. وعلي فكرة انا مش حد وحش لا انا راجل ومش من النوع اللي في دماغك. اسيبك دلوقتي ترتاحي... اه المفتاح في الباب عن اذنك.. وخرج عدي وقفل الباب وراه

    هنا: انتي غبية يعني الراجل بيساعدك. وكمان شكله محترم وانتي عمالة تديله فوق دماغه. ده كويس انه مطردنيش. اوففف لا انا هخرج اقوله كلمتين عدلين. 

    وخرجت هنا تدور علي عدي لقته قاعد في الريسبشن. وماسك صورة وعنيه فيها دموع. هنا بصت حاوليها لقت صور ليها في كل حته وكمان صورة. بالحجم الطبيعي. تنحت وقربت من عدي وقعدت جنبه. 

    هنا: صور مين دي 

    عدي: بحزن. دي تبقي حلا مراتي الله يرحمها. عرفتي ليه انا كنت ببصلك بإهتمام. مش لاني عنيني زايغة ولا وحش. لا لاني مكنتش مصدق الشبه اللي بينكم

    هنا: بتضرب كف علي كف. لا اله الا الله. هو في كدة ده انا حاسة اني باصة لنفسي في المرايا. الله يرحمها

    عدي: الله يرحمها. كانت احلي حاجة في حياتي. او بمعني اصح كانت حياتي كلها

    هنا: زعلت علشانه. قامت وقعدت جنبه. معلش ربنا يصبرك

    عدي: تعرفي النهاردة ذكري وفاتها الثلاثة. زي النهاردة من 3 سنين. عشت يوم من اسوأ ايام حياتي. يوم صعب صعب اوي وانا شايلها بين ايديها وهي ميتة. ودموعه نزلت ومكنش قادر يسيطر عليها

    هنا: عيطت علشانه وعلي حالها هي كمان. وافتكرت مرفت مامتها وانها مش فاضل ليها حد غير ابوها اللي سايبها لمراته تبهدلها

    عدي: مسح دموعه. وقام. الاكل عنك في المطبخ لو جعانة كلي وادخلي اقفلي علي نفسك. تصبحي علي خير. ودخل اوضته ومسك صورة حلا وبكي اكتر واكتر

    عدي: ليه ليه سبتيني. انا مش عارف هي طلعتلي منين. ظهرت في حياتي ليه علشان تجدد وجعي. انا اول ما شوفتها يا حلا حسيت انها انتي كنت عايز اخدها في حضني. بس مش علشانها لا علشانك انا عايزك انتي يا حلا عايزك انتي يا حبيبتي.

    في القاهرة في الفندق وفي جناح همس. الباب خبط. وهمس سألت مين رعد رد عليها. فتحتله

    رعد: اول لما شافها. ابتسم من جمالها. لانها اخدت حمام وغيرت هدومها ولبست من الهدوم اللي اشتراها رعد ليها وشعرها كان لسة مبلول وكان شكلها يجنن. 

    همس: اتفضل. ادخل

    دخل رعد و بعديه جه العشاء

    رعد: تعالي اقعدي واقفة ليه

    همس: بإحراج حاضر بس هو احنا ممكن نسيب الباب مفتوح

    رعد: بغضب لا مش ممكن. وبعدين هو انا مش قولتلك متخفيش مني انا مش هأذيكي. اقعدي علشان ناكل

    همس: بخوف. حاضر وقعدت علشان تاكل

    رعد: مرر ايده في شعره. وبيحاول ميتعصبش. همس

    همس: نعم 

    رعد: ممكن تثقي فيا. انا مش زي ناجي ولا منصور ولا ابرهيم.

    انا رعد الحديدي فاهمة. يعني مش من النوع الزبالة ده. فهماني يا همس

    همس: هزت راسها. فاهمة. اسفة بس اعذرني انا مشفتش حد بيعمل كدة. يعني كل اللي قابلتهم. كانوا.. 

    رعد: قاطعها. انسي يا همس. انسي كل اللي شوفتيه. من هنا ورايح اللي هيفكر يبصلك بس هنسفه. انتي هتبقي مراتي. عارفة يعني ايه 

    همس: بس انا خايفة تحصل مشاكل لما يعرفوا اني هتجوز بالشكل ده. خايفة يعملولك فضايح

    رعد: قولتلك متخافيش. طول ما انتي معايا. وبعدين انتي مش هتقولي اننا هنتجوز علشان العملية. هتقوليلهم. اني عايز اتجوزك عادي 

    همس: بس هما اكيد هيستغربوا. من جوازنا. اصل انا فين يعني وحضرتك فين. مش معقول انك تتجوز واحدة زي كدة عادي من غير سبب

    رعد: بص في عنيها بحب. لا في اني بحبك ومن اول نظرة

    همس: تنحت😳😳 ايه 

    رعد: احمم. قصدي يعني تقوليلهم كدة. اني بحبك. علشان محدش يضايقك باي كلمة

    همس: هزت راسها وهي قلبها بيدق. مش مصدقة انه قال كدة. حتي لو مجرد كلام. كانت فرحانة من جواها. ونفسها ان ده يكون حقيقة

    رعد: اه يا همس كان نفسي اقولهالك. بجد. من غير لف ودوران. بس معلش لسة وقتها مجاش. لما اتجوزك. واتأكد انك بتحبيني. همس ممكن اطلب منك طلب. 

    همس: اه طبعا اتفضل. 

    رعد: انا عايزك تتحجبي. مش عايزك تخرجي بشعرك تاني

    همس: اتكسفت. انا اصلا كنت بفكر في كدة. بس مكنتش متشجعة

    رعد: خلاص. من هنا ورايح مش هتخرجي بشعرك. اتفقنا

    همس: اتفقنا. 

    رعد : ابتسم. ممكن بقي تاكلي.انا جوعت

    همس: ابتسمت. حاضر اتفضل

    وخلص رعد وهمس العشاء. 

    رعد: انا هروح انام واسيبك تنامي تصبحي علي خير. خالي بالك اوعي تفتحي لاي حد. تكلميني سامعة

    همس: سامعة. مش هفتح متقلقش. 

    رعد :خرج من عندها ودخل جناحه. وطلع تليفونه...... ايوة يا مروان اسمع. انا هديك شوية بينات لناس وعايزك تجبلي كل المعلومات دي الصبح. مفهوم

    مروان: تحت امرك. يا رعد باشا. قولي البيانات

    رعد: اسمع......... تمام كدة فهمت هتعمل ايه. وكمان الصبح تجبلي المعلومات دي وتجيني الفندق انا نازل في فندق.... عارفه

    مروان: ايوة حضرتك عارفه. وان شاء الله انا مش هنام غير لما اجمع لحضرتك اللي انت عايزه

    رعد: تمام سلام انت دلوقتي

    وقام رعد واخد حمام ورجع علشان ينام. او بمعني اصح. يفكر في همس. بس تليفونه رن... مها

    رعد: يوووه. عايزة ايه يا مها. تؤ اوففف. الو ايه يا مها في حاجة

    مها: انت فين يا رعد انا مستنياك من بدري. اتأخرت ليه

    رعد: انا مش راجع الڤيلا النهاردة

    مها: ليه في حاجة حصلت

    رعد: لا عادي ورايا شغل هخلصه وهبات برا

    مها: طيب هتبات فين

    رعد: مها متنسيش نفسك. انتي مش هتحققي معايا

    مها: انا بس بطمن عليك

    رعد: لا اتطمني. انا كويس يالا تصبحي علي خير. وقفل الفون

    طيب اكلم همس دلوقتي ولا الاقيها نايمة. هجرب. واتصل رعد علي اوضتها. 

    همس: كانت ابتدت تنام.. بصوت ناعس. الو

    رعد: ابتسم. انا صحيتك. 

    همس: عرفت صوته. وقامت قعدت. وابتسمت. ايه لا انا لسة كنت هنام. خير في حاجة 

    رعد:ايه لا انا بس كنت بشوفك لو محتاجة حاجة قبل ما تنامي

    همس: متشكرة. انت جبتلي كل حاجة. 

    رعد: تمام. خلي بالك من نفسك. تصبحي علي خير

    همس: ابتسمت. وانت من اهله

    وقفلت همس. وكانت مبسوطة. يااااه. ده انت ورا جبروتك ده. قلب حنين بجد. واتنهدت يا بخت مراتك اللي متجوزة احسن راجل انا اقبلته في حياتي. تلاقيك مدلعها اوي

    رعد: ااه يا همس. انا مكنتش اتخيل اني هحبك اوي كدة. انا عايز اتجوزك دلوقتي. مش بعد يومين. بس يا رعد هتعمل ايه مع توفيق. اكيد هيرفض. بس لو رفض. انا هعرف ازاي اخليه يوافق. تصبحي علي خير يا همستي

    في صباح جديد علي رعد وهمس وعدي وهنا.

    في الاسكندرية في شقة عدي 

    هنا صحيت من النوم وقامت فتحت الاوضة وخرجت. ودورت علي عدي لقته في المطبخ. بيحضر الفطار

    عدي: شافها ابتسم. صباح الخير

    هنا: بتتاوب. وشعرها ملخبط. وخدودها حمرا من النوم. صباح النور

    عدي: اتعلق نظره. عليها لان حلا كانت بتبقي في نفس هيأتها وهي صاحية من النوم. وسرح شوية

    فلااااش باك

    عدي قاعد بيتفرج علي TV وحلا كانت لسة صاحية. 

    حلا: بتتاوب. وشعرها منكوش. وخدودها حمرا. صباح الخير يا دودي

    عدي: ابتسم. وشدها وقعدها علي رجله. وباسها من خدها. صباح النور يا قلب دودي

    حلا: ههههههه. بتعمل ايه علي الصبح. حد يتفرج علي الكورة وهو لسة صاحي من النوم

    عدي: قرصها من خدها. علشان في بنت شقية جننتني امبارح وخبت مني الريموت. ومخلتنيش اتفرج علي الماتش. 

    هنا: هههههههه ما انا كنت عايزة اتفرج علي المسلسل التركي

    عدي: الله يخربيت التركي اللي لحس دماغكم ده. دول كادبين والله هو في زي المصري يا بنتي

    حلا: لا عندك يا معلم. دول عندهم شوية رجالة تلوح

    عدي: شالها ورماها علي الكنبة. وبيزغزغها. كدة ماشي انا هوريكي الرجالة اللي تلوح يا ام لسان طويل

    حلا: هتموت من الضحك. هههههههههه خلاص يا دودي والله مش هغيظك تاني

    عدي: تغيظي مين انا بعون الله احلي من الممثلين بتوعم دول. انا دودي يا قلبي

    حلا: انت هتقولي ما انا عارفة ده انت مصيبة

    عدي: قرب منها بحب. بس تعرفي. بموت فيكي وانتي لسة صاحية خدودك بتبقي عايزة تتاكل اكل

    حلا: بدلع. امممم خدودي بس

    عدي: تؤتؤ كلك علي بعضك عايزة تتاكلي

    حلا: طيب اقوم انا بقي احسن اتاكل 

    عدي: انا بقول ندخل جوا نشوف هتتاكلي ازاي

    حلا: اتعلقت في رقبته. شيلني

    عدي: هههههه والله ماحد وجعلي ظهري غيرك 

    حلا: براحتك مفيش اكل

    عدي: لا ده انااشيلك واشيل عيلتك كلها الا الاكل تعالي يا مجنناني وشالها ودخل بيها الاوضة

    هنا: انت يا عم الشيف. انت روحت فين 

    عدي: فاق علي صوت هنا. ايه معلش أسف. كنتي بتقولي حاجة

    هنا: حاجة ايه عم. ده صوتي اتنبح انت كنت سرحان في ايه

    عدي: لا ابدا. انا قربت اخلص الفطار. تحبي اعملك قهوة معايا

    هنا: لا انا هعملها كفاية عليك الفطار شكله يفتح النفس

    عدي: ههههه مش قوي كدة.انا علي قدي

    هنا: ازاي بس يا معلم. ده انت بتقطع الخضار ولا الشيف شيربيني

    عدي: هههههههه. الشيف شيربيني مرة واحدة. ماشي يا ستي. وانتي بقي بتعرفي تدخلي المطبخ

    هنا: عيب عليك. ده انا بعمل بيض مقلي ايه حاجة كدة استغفر الله العظيم متتاكلش

    عدي: ههههههه. لا ده انتي كارسة. تعالي نفطر الاول وبعدين نعمل القهوة

    وقعدوا الاتنين يفطروا. وبعد ما فطروا. وقعدوا يشربوا القهوة

    عدي: انتي اسمك ايه

    هنا: هو انا مقلتلكش

    عدي: لا مقولتليش

    هنا: هنا. وانت 

    عدي: هو انا مقولتلكيش

    هنا: ههههههه لا مقولتليش

    عدي: ههههه. اسمي عدي

    هنا: ده من ايام الكفار ده ولا ايه

    عدي: والله انا اللي هبقي من الكفار واعذبك. لو ما لميتي لسانك ده

    هنا: هههههه خلاص يا عم بضحك معاك

    عدي: هنا نتكلم جد بقي لو سمحتي. انتي امبارح مردتيش تتكلمي عن اهلك ولا ترجعلهم. وانا شايفك بنت ناس ومحترمة. وبجد عايز اعرف ايه حكايتك. خصوصا انتي نيمتي في بيتي ليلة بحالها. ولازم ابقي عارف عنك كل حاجة. محدش عارف ايه اللي ممكن يحصل. اهلك يبلغوا. وممكن حد يكون شافني وانا شايلك وجايبك هنا. فلو سامحتي فهميني 

    هنا: اتنهدت. وانا ميردنيش اني اذيك. انا هحكيلك علشان انت شكلك راجل محترم. انا ماما ماتت من 7 سنين وبابا اتجوز واحدة تانيه والست دي كانت جارتنا. ومكنتش بتحب ماما مرڤت الله يرحمها. ومن اول يوم. ليها في البيت وهي مش طايقاني. وانا بعدي واتحمل واطنش. وكمان عندها ابن اسمه توتي. ده لوحده يطفش اسكندرية بحالها. وانا كان ممكن اعدي اي حاجة الا انها عايزة تجوزني توتي قصدي تامر ابنها

    عدي: وباباكي فين دوره في الموضوع

    هنا: بسخرية بابا. بابا مبيكسرش كلمة للهانم. واللي تقوله هو اللي يمشي. وانا مقدرتش استحمل لقتهم بيحددوا معاد كتب الكتاب. يوم الخميس. هربت امبارح وقولت اني مش هرجع تاني وان شالة حتي انزل القاهرة وادور علي شغل واعيش هناك. 

    عدي: فكر شوية. اممم انا ممكن اساعدك

    هنا: بجد هو انت تعرف حد في القاهرة يشغلني

    عدي: ابتسم. اه انا 

    هنا: انت ازاي

    عدي: انا اصلا عايش في القاهرة وشغلي هناك. وباجي اسكندرية بس اسلم علي خالتوا وعلي حمايا وحماتي . وارجع تاني

    هنا: ده يبقي جميل مش هنسهولك 

    عدي: ولا جميل ولا حاجة. يالا اشربي قهوتك والبسي وجهزي نفسك. علشان ننزل القاهرة

    هنا: نطت من علي الكرسي. هوا يا باشا 

    عدي: هههههه. علي مهلك يا مجنونة

    في الفندق في جناج همس رعد خبط. عليها وفتحت واول لما رعد شافها ابتسم لما لقاها مغطية شعرها

    رعد: صباح الخير

    همس: ابتسمت. صباح النور. 

    رعد: تعرفي شكلك حلو في الحجاب

    همس: اتكسفت. اصل لقيت مع الهدوم اللي جبتهالي ايشاربات وطرح 

    رعد: حط ايده في جيبه. وابتسم. اصل بصراحة كنت متأكد انك هتوافقي 

    همس: الحمد لله ربنا يجعله في ميزان حسناتك. 

    رعد: في نفسه. ويجعلك انتي مراتي يا حبيبتي. احمم بقولك ايه انا رايح الشركة هخلص شوية شغل. وكمان اجهز لموضوع جوازنا. متتحركيش من الجناح ولا .. 

    همس: قاطعته. ولا افتح لمخلوق. والله مش هفتح 

    رعد: ههههه. شطورة بتسمعي الكلام. ولو عزتيني كلميني اتفقنا

    همس: هزت راسها اتفقنا

    رعد: عموما انا مش هتأخر. ان شاء الله هكون موجود علي الغدا ونتغدا سوا. سلام

    همس : سلام. وقفلت الباب وهي حاطة ايديها علي قلبها. اه يا رب انا اكيد بحلم. هو رعد ده حقيقة. ياريت كان ليا نصيب اتجوز راجل زيك بس بجد مش كدة وكدة

    رعد: بعد ما خرج من عند همس شاور لمروان. 

    مروان: تحت امرك يا رعد بيه

    رعد: تفضل واقف علي باب الجناح. متخليش مخلوق يدخل عندها. ولا هي تخرج. 

    مروان: تمام بس لو حابت تخرج اعمل ايه

    رعد: قولها اني امرت مفيش خروج وتكلمني فورا. واسمع انا عايزك بعد لما انزل بشوية تخبط عليها تشوف هتفتحلك ولا لا ولو فتحتلك تكلمني

    مروان: طيب لو فتحت اقولها ايه

    رعد: قولها اني بعتك تخلي بالك منها وتكلمني بسرعة

    مروان: تمام يا باشا

    ونزل رعد وركب عربيته ومشي.. ولقي تليفونه بيرن.... 

    رعد: الو

    همس: الو.. انا همس

    رعد: ابتسم. ايوة يا همس في حاجة

    همس: لا بس اصل الباب خبط ولما سألت محدش رد وانا خايفة

    رعد: كان متأكد. انها هتسمع الكلام. لا متخفيش. انا هتصرف المهم انك تسمعي الكلام. 

    همس: حاضر. واسفة اني عطلتك. 

    رعد: لا عطلت ايه. اي حاجة تحصل كلميني بسرعة. فاهمة 

    همس: ان شاء الله

    وراح رعد الڤيلا علشان يباغ توفيق ومها بقراره

    توفيق: انت اكيد اتجننت.عايز تغلط غلطة ابوك وتتجوز واحدة من الشارع 

    رعد: بغضب. قولتلك متجبش سيرة امي انت فاهم. 

    مها: طيب انت هتتجوزها ليه يارعد

    رعد: علشان انا مليش في الحرام. ولو عملت العملية هبقي خلفت ابني من الحرام وانا مش هعمل كدة علشان خاطركم ولا خاطر حد

    توفيق: وانت ليه مقولتش الكلام ده من الاول

    رعد: كنت مستني لما نلاقي اللي هتعمل العملية

    توفيق: بس بشرط. 

    رعد: انا محدش يشرط عليا

    توفيق: لا هشرط. تطلقها بمجرد ما العملية تتعمل

    رعد: لا لازم تفضل تحت عيني لحد ما تولد

    توفيق: بيجز علي سنانه. ماشي يا رعد. بس انا عندي شرط تاني

    رعد: بنفتذ صبر. اوفففف. خير

    توفيق: اول لما تولد انا اللي هربي الولد مش انت 

    رعد: ليه وانت بتعرف تربي

    توفيق: رعد الزم ادبك. واللي قولته يتعمل

    رعد: لما يتولد ربنا يحلها

    مها: انت هتتجوزها امتي 

    رعد: هجهز كل حاجة وابلغكم. سلام علشان عندي شغل.

           الحلقه العاشرة من هنا

    إرسال تعليق