الفصل الاخير
صدقيني انا منفعكيش انا لو حصل وفي امل اطلع من دي بنسبة ١% وطلعت من العمليه دي صدقيني هيجي يوم ومطلعش من غيرها هفضل مريض قلبانت اللي بتديني امل ان الدنيا لسه قدامي مش عارف تدي نفسك امل انك تعيش ولو عشاني هو انا مستاهلش
- انتي تستاهلي كل خير لكن مش معايا انا للاسف واسف في اللي هقولهولك دلوقتي بس خليكي متأكده اني بحبك وعملت كده عشان عارف مصلحتك ....انتي ط....
كتمت بوقه بايدي بسرعه وعيطت وبدئت الحاله الهستيريه والخوف يتملكوني تاني - متقولهاش ارجوك متقولهاش والله لو قولتها يا مروان لاموت نفسي ويبقي موت بموت بقي ارجوك متقولهاش انا مليش غيرك في الدنيا متحرمنيش منك هترميني للدنيا تاني تنهش فيا والله ما بقي فيا حيل تاني لنهشها حرام عليك يأخي حس بقلبي اللي عاش سنين نفسه تحس بيه حرام عليكو كلكو غاوينلي وجع القلب ليه .
من كتر عياطي وكلامي اللي بصرخ فيه بوجعي شدني نزلني في حضنه وضمني لي جامد عشان اهدا فضلت متشبثه في حضنه ومتبته فيه وانا ببكي من قلبي. لا .
لغايه اما مامته دخلت وانا لسه في حضنه وبتضحك عشان تطمنه ومتوتروش كفايه انا عليه - لا كده انا أزعل يا سي مروان هو من لقي احبابه نسي صحابه ولا ايه .
مسك ايد مامته وباسها- دانتي الكل في الكل يا كرميلا
- يا قلب كرميلا انت عارف كرميلا بتحبك ازاي
بصلي ساعتها وهو بيضحك وقالي- ما تقومي يا بت وخليني احضن امي شويه
ضحكت وقومت وهو اخد مامته نزلها لحضنه وحضنوا بعض اوي يمكن كانو الاتنين كاتمين دموعهم بس انا اللي دموعي غلبتني ونزلت .
بعدها اتحايل على مامته تروح وتيجي الصبح وبعد محايلات وافقت وفضلت انا جمبه او بمعني اصح فضلت في حضنه وبليل طلب اكل .
- مروان مينفعش تاكل عشان عمليه الصبح
- عارف ممكن تسكتي
سكت لغايه اما جابو الاكل اللي طلبو وبعدين قومني وقعد ومسك الاكل وهو بيضحك وبيقولي- يلا المم رايح فين يلا يلا يلا
ضحكت- انت بتعمل ايه يا مروان
- اصل انا عارف ان سيادتك مكلتيش من اخر يوم كنا سوا في البيت ولو سبتك كده يوم كمان هلاقيكي واخده سرير جمبي هنا في المستشفي
- بس انا مش جعانه يا مروان
- بت بت مش قادر اناهد هتعصبيني هتصل بالمأذون هااا.
اول ما قال كده لقاني اكلت علي طول ضحك وفضل يأكلني بأيده مش بقولكم لو عشت سنين اوصف في حنيه قلبه كلام الدنيا كله مش هيكفي .
لاول ليله من يوم جوازنا انام الليله دي في حضنه علي سريره في المستشفي لكن كنت مقلقه كل شويه اصحي اطمن انه بيتنفس وقلبه بيدق وانام تاني كنت هموت من القلق عليه .
الصبح صحيت عليه وهو بيلعب في شعري
قولتله - خلاص ؟؟
ابتسم وهز راسه يا ايوه لكن كان حالته مش مطمنه خالص كان التعب زايد عليه وواضح من شكله ومن نبضات قلبه .
قومت والممرضات جم يجهزوه للعمليه وانا كنت بتأمل او يمكن بحاول احفظ ملامحه وهو كمان كان بيخطف مني نظرات سريعه وقبل ما يدخل بصتله بعيون مدمعه وقولتله - هستناك
ابتسم وقالي - اللقا نصيب
باس راسي وايدي وخدوه مني علي العمليات وكأن حته مني اتاخدت مني
____________________
......بعد سنه ونص..........
لقي اللي بتنط عليه من وراه وبتصرخ - بااابتي
- يابنتي حرام عليكي يا بنتي انا لو هموت مش هموت من القلب لا هموت منك ومن خضاتك يا بنتي راعي اني صاحب مرض يا بنتي .
- بطل اوفر وشوفلي حل في البهايم اللي بتشغلني عندهم
- هببتي ايه تاني يا اخرة صبري
بشحتفه وعياط زي الأطفال قولتله - اترفدت
- تااااني يا بنتي اعمل فيكي ايه اعلقك علي باب الشقه واللي رايح واللي جاي يديكي علي قفاكي ولا اجيب شعرك الحلو ده في ايدي
- يا شيخ اقعد مبخافش
- هببتي ايه المرادي
- طب من غير ضرب
- انطقي مش فيا حيل اناهد كتير
- كسرت الزوحليقه بتاعة الحضانه اللي بشتغل فيها
- نعم كسرتيها ازاي يعني
- كنت بتزحلق عليها يا مروان الله
- نعم ياختي يعني مره تترفدي عشان ضربتي الواد عشان مرداش يديكي حته من الشكولاته و المرادي تترفدي عشان كسرتي الزوحليقه طب اعمل فيكي ايه ها اعمل فيكي ايه هتجلطيني
- براحه علي نفسك يا بيبي عشان متتعبش
- اتعب ايه يا شيخه يارتني اموت واخلص منك اللي هيشلني ده متجوز عيله في حضانه
- بعد الشر يا مرمر هو انا ليا غيرك بردو يا حبيبي
- كلي بعقلي حلاوه كلي
ضحكت - بحبك يا ولا
ضحك وحط ايده علي وشه - الواحد ميعرفش يتعصب عليكي شويتين
ضحكت - اممم عشان بتحبني انكر بقي عشان ربنا يسخطك قرد انكر بقي
ضحك ومسك ايدي بحب وقال- هو انا اقدر اعترض دانتي كفايه ضحكتك اللي بتخلق راحه رهيبه جوايا تعرفي انا بفضل اجيب صورك واضحك علي ضحكتك حقيقي انتي القمر اللي منور حياتي تعرفي انا لو مت في اي لحظه هكون مبسوط كفايه اني قضيت معاكي اجمل سنه ونص في عمري يمكن لسه مشبعتش منك بس علي الاقل عشت في حضنك شويه وحققت امنيه حياتي وهي اني اكون معاكي .
حطيت ايدي علي بوقه بسرعه - بعد الشر عليك انت مش هيحصلك حاجه أبدا وهتقاوم اي تعب عشاني عشان انا استاهل تفضل جمبي دانا ما صدقت احب الدنيا بوجودك وعقدي تتفك علي ايدك دانا ملقتش راحتي غير في حضنك عارف انت العوض اللي عشت استناه سنين انت دعوه كل سجده انت حاجات كتير
انت أماني ومأمني انت الملجئ الوحيد لقلبي انا بحبك
ابتسم وشدني في حضنه - دانا اللي بموت فيكي وفي هبلك اللي هيجنني ده
- علي فكره انت ظالمني انا بريئة
- ظالمك ايه يا بت دانتي لسه معترفه انك انتي اللي كسرتي الزوحليقه
- اممم ماهو انا عملت كده بمساعده حد يخصك وهو اللي لعب في هرموناتي خلاها تطلب معايا اعمل كده
- حد حد مين
ضحكت ومسكت ايده حطيتها علي بطني - حد هنا
- ايييه !!!
ضحكت و انا باصه في عيونه - شوفت بقي ان الحياه لسه فيها حاجات تستاهل تعافر وتقاوم اي تعب عشان تعيشها .
لقيته بكا من الفرحه وكان حقيقي مش مصدق نفسه خدته في حضني وقولتله - ده عوض ربنا ليا عن معاناتي وليك عن مرضك فا عشان كده ابقي قوي عشانه وعشاني ممكن .
بصلي بفرحه الدنيا وقالي- بحبك
جه صوت اغنيه من بعيد بتقول :. _
" هنعيش ونشوف معاناة وظروف والفرحة هترجع من تانى والدنيا هتبقى مصالحانى حالنا بيتغير فى ثوانى وفى غمضة عين فى سباق ماشيين وفراق وحنين الشدة تملى تقوينا وتبين مين قلبه علينا على حس الأمل اللي مالينا عايشين راضيين دا ياما حكايات .. أولها ناس بتنسى وآخرها وآخرها حب لقيناه عوضنا على اللى عشناه
"
