قصة لن نفترق ملك ويوسف كاملة وحصرية بقلم حنين حاتم
هسألك سؤال وتجاوبيني بصراحه يا ملك
- اسألي يا ستي
- انتِ بتحبي يوسف صح؟
- يوسف مين؟!
- خطيبي يا ملك
- هدى انتِ بتهزري!
- انا مكنتش عايزة اسألك السؤال ده بس غصب عني والله يا ملك...انا كنت شفت صورة ليه عندك قبل كده ومن يومها وانا عايزة اسألك بس كنت بنسى... لكن لما يوسف جه اتقدملي واتخطبنا افتكرت موضوع الصورة ده وقلت لازم اسألك
- اا.. الصورة اللي عندي دي كانت... كانت من زمان اصلا يا بنتي... وبعدين انا مسحتها من زمان
- طب وكانت عندك ليه اصلا؟
- عادي... كنت عاملاها اسكرين زيه زي اي حد انتِ عارفة اني مخابرات اصلا ومعايا صور ولاد وبنات دفعتنا كلهم
- تمام يا ملك... وانا اسفة اني سألتك سؤال زي ده
- حقك يا ستي ولا يهمك
* اكتر حاجة كنت خايفة منها حصلت.... كنت خايفة هدى تلاحظ حبي ليوسف.... الحقيقة اني فعلا بحبه... بس غصب عني... انا بحب يوسف من زمان... من قبل ما اعرف انه بيحب هدى وهيخطبها...حبيته من اول سنة في الكليه.... مقولتش لحد خالص حتى اقرب الناس ليا.... انا وهدى اصحاب بقالها سنتين... هي اقرب صاحبة ليا ومقدرش اخسرها....حتى بعد ما هي ويوسف اتخطبوا انا فضلت معاها وطريقتي متغيرتش ابدا... هي مكنتش تعرف اني بحبه يبقى اكيد ملهاش زنب....يوم ما اتقدم لهدى كان اصعب يوم في حياتي... فضلت يومين منمتش من كتر زعلي ووجع قلبي... ومع ذلك كنت جنبها دايما... وهي بتشتري فستان الخطوبة....وهي عند الكوافير... حتى في القاعه مسبتهاش لحظة....اكتر حاجة صعبة عليا هو احساسي اني خاينة... بكره نفسي في كل لحظة بفتكره فيها.... من يوم ما خطب هدى وانا بحاول اطلعه من قلبي.... مسحت كل صوره وقررت اني هقطع مذكراتي... كنت بفضل اكتبله فيها واكلمه كأنه قدامي.... بس خلاص ده معدش بيحصل... انا متأكده اني هنساه... لازم انساه عشان هدى وعشان صداقتنا.
________________
- ملك...عايزاكي تيجي معايا نجيب حاجات لشقتي
- تمام يا قلبي هلبس واعدي عليكي
- تمام
* لبست ونزلت مع هدى... جبنا حاجات لشقتها هي ويوسف.... اتفاجأت لما لاقيته جه معانا... كانوا حلوين اوي مع بعض.... انا مقدرش اكون السبب في تفريقهم ابدا... حتى لو كنت بموت مش هسمح ابدا انهم يبعدوا عن بعض بسببي...
هدى : كفاية كده النهاردة... جبنا حاجات كتير اوي
ملك : ايوا نكمل بكرا بقى وهاجي معاكي بردو
- معلش تعبتك معايا يا ملك
- بت متقوليش كده هزعل منك
ابتسمت.. - حبيبيي والله...طب بقولك كنت عايزة اجي اسلم ع مامتك عشان وحشاني اوي
- تعالي طبعا... انتِ كمان وحشاها وكانت لسه بتسألني عليكي
- طب هقول ليوسف يروح هو وهاجي معاكي
- تمام..
* روحنا البيت عندي... قعدنا انا وهدى وماما... هدى اتغدت عندنا وقضينا اليوم مع بعض.... هدى بالنسبالي اكتر من اختي... كل اما بشوف طريقتها الحلوة معايا بحس بالزنب اكتر....انا عارفة انه مش بمزاجي بس حقيقي اصعب احساس ممكن حد يحسه في حياته.
_____________
ملك : تعالي يا هدى معايا الاوضة عايزة اوريكي دريس لسه شرياه امبارح عشان حنتك
- بجد... وريني بسرعه..
- اهووو
- الله... حلو اووي يا ملك... احلى من بتاعي انا شخصيا
- ما لازم صاحبة العروسة تبقى احلى من العروسة يا بنتي
- اومااال
ضحكنا.. - ربنا يفرحك دايما يا قلبي... ان شاء الله هتكوني احلى عروسة في الدنيا
- ان شاء الله يا حبيبتي... عقبالك يارب ما تبقى عروسة قمر كده
- يارب... هروح اعملنا شاي وآجي
- ماشي..
* فجأه عيني دمعت.... حسيت بوجع في قلبي.... نفسي اخلص من الاحساس ده بقى....
عملت شاي ودخلت الاوضة.... لاقيت هدى واقفة ومعاها.... مذكراتي!
- انتِ ازاي تعملي فيا كده؟!
