(الفصل الثاني عشر)
سارة في مكتب ضابط السجن الرائد ممتاز منهاره بشدة .. ويدخل العسكري بكوب من عصير الليمون ..
العسكري .. اللمون يا فندم
ممتاز .. حطه عندك ..
وبعد ان ينصرف العسكري
ممتاز .. اهدي بقي يا ساره اومال .. مش كدا ؟!.. انا خلاص علقتهوملك الاتنين دول .. واديتهم درس عمرهم ما ينسوة ابدا
سارة .. انا مش قادرة اصدق اللي انا فيه دا ؟! انى هنا ليه اصلا ؟! انا معملتش حاجة ؟! ليه حابسيني هنا مع المجرمين دول ؟!
ممتاز .. اهدي طيب واشربي اللمون .. اشربي
سارة تمسك بكوب الليمون وترتشفه منه قليلا ثم تقول
سارة .. انا عايزة امشي من هنا يا فندم .. ارجوك مشيني من هنا
ممتاز .. تمشي من هنا ازاي يا سارة ؟! وانتي محبوسة علي ذمة قضية
سارة .. ظلم !! صدقني ظلم .. انا مقتلتش حد .. اللي قتلت بثينة .. وبثينة هي اللي برة وانا هنا اللي محبوسة مكانها !! يرضي مين دا بس ياربي !! القاتل حر طليق .. واللي معملش حاجة هو اللي يتحاكم مكانه !! ظلم !! ظلم !!
ممتاز .. سارة انا هنا مش جهة تحقيق .. انا بنفذ القانون وبس .. انتي لو فعلا مظلومة اثبتي دا !!
سارة .. اثبت ازاي ؟! وانا فجأة لقيت ناس معرفهاش شهدت ضدي !! ولبسوني مصيبة معملتهاش!!
ممتاز .. قومي محامي كويس يدافع عنك وصدقيني مفيش جريمه كاملة ولو انتي مظلومة بجد .. اكيد برآتك هتظهر في يوم من الايام والجاني الحقيقي هياخد عقابة
سارة .. وعلي ما يحصل بقي .. دا ان حصل اصلا .. اكون انا انتهيت هنا !!
ممتاز .. متخافيش . . محدش هيقرب منك ابداا طول ما انا هنا .. دا اللي اقدر اعملهولك بصراحة
سارة بآسي .. كتر خيرك يا فندم
ممتاز .. طب اشربي اللمون
سارة .. لا كفاية كدا .. من فضلك رجعني الحجز
ممتاز يرن جرس الاستدعاء فيدخل العسكري
العسكري .. تمام يا فندم
ممتاز .. رجع المتهمه الزنزانه بتاعتها يابني
سارة تعود الي زنزانتها ورد فعل علي وجه ممتاز ..واثناء مغادرتها للمكتب يدخل النقيب شهاب فيندهش عند رؤيته ل سارة وهي تغادر مكتب ممتاز
شهاب .. ايه يابني .. هو انت قلبت المكتب استراحة للمساجين ولا ايه ؟! وجايبلها لمون كمان !!
ممتاز .. بطل رخامه !!مش فايق للغتاته بتاعتك دي خالص انهارده !!
شهاب .. اها !! ..طيب .. ايه مالك ؟!
ممتاز .. مضايق شوية
شهاب .. ليه ؟!
ممتاز .. مضايق وخلاص
شهاب .. ايه سها مزعلاك في حاجة ؟!
ممتاز .. سها مين ؟!
شهاب .. سها مين ؟!! سها اختي .. مراتك يا عم انت !!
ممتاز .. اها .. لا سها اختك دي دايما مزعلاني لدرجة اني اتعودت علي كدا خلاص وزعلها ليا بقي عادي جداا بالنسبة لي !! رزلة وغتيتة زيك كدا
شهاب .. في ايه يا جدع .. مش اختي ؟! لازم تبقي طالعالي طبعا .. هههههه
ممتاز .. فرحان انت ان اختك طالعالك في الغلاسة ؟!
شهاب .. اومال ايه !! تقل الدم في شئ اساسي في عيلتنا يا سيادة الرائد
ممتاز .. ما انت لو كنت اعرف كدا من الاول مكنتش صاحبتك ولا اتجوزت اختك من اساسه !!
شهاب .. بقي كدا ؟! انت اد الكلام اللي بتقوله دا ؟! طب انا هاتصل بيها واقلها واستلقي وعدك يا معلم
شهاب يمثل انه يتصل بأخته وممتاز يصدق ف يفزع ويحاول منعه
ممتاز . انت بتعمل ايه يخرب بيتك ؟! هات التليفون دا .. هات يا عم مش ناقصة عكننه وحيات ابوك
شهاب .. ايه خفت ؟! عالم تخاف متختشيش صحيح !! قلي بقي متضايق من ايه ؟!
ونذهب الي وكيل النيابة مازن الذي يقوم بالتحقيق في قضية مقتل قاسم عماد الدين .. حيث يدخل النقيب سالم الي مكتبه
سالم .. معالي الباشا .. صباح الفل
مازن .. صباح الفل سالم باشا .. اتفضل اقعد
سالم .. دا سعتك تقرير الطب الشرعي ودا كمان تقرير المعمل الجنائي
مازن .. وريني كدا
مازن يقرأ التقارير بدقة وتركيز
مازن .. فعلا سبب الوفاة ضربة بألة صلبة قوية علي الرأس احدثت كسر بالجمجمة ونزيف داخلي بالمخ!!
سالم .. والآلة دي طبعا اللي هي الشومة المستخدمة في الحادث !! واللي تقرير المعمل الجنائي اثبت ان البصمات اللي عليها هي بصمات البنت اللي اسمها سارة يس ..
مازن .. بس معقول بنت بالرقة دي تقتل بالطريقة البشعة دي ؟! خسارة بجد .. مع انها مصرة انها مقتلتوش !!
سالم .. يا باشا كلهم بيقولوا كدا اول ما يتقبض عليهم ويحسوا انهم هيدفعوا تمن جريمتهم !! هو من امتي سعتك مجرم بيعترف بجربمته ابدااا .. الا لما يفقد الامل خالص ويعرف انه لابسها لابسها .. ساعتها يعترف بكل حاجة !! بس بعد ما يكون طلع عنينا في التحقيق والتحريات !!
مازن .. بس صدقني يا سالم عندي احساس ان البنت دي مقتلتش الولد دا !! باين عليها بنت ناس .. دا غير انها رقيقة جداا .. بقي بنت بالرقة دي تعرف تمسك شومة وتكسر بيها دماغ بني آدم وتقتله ؟!
سالم .. ميغركش المنظر ياباشا .. ياما تحت السواهي دواهي .. والمجرم دايما بيظهر للناس بصورة عكس صورته الحقيقية .. اسألني انا يا باشا .. سنين وانا بتعامل مع المجرمين وعارف اسالبيهم كويس اللي يقدروا بيها يوهموك انهم ناس كويسين وشرفا!!
مازن .. بس انا مش مرتاح للبت بثينة دي ؟! عايزك تعملي تحريات عنها .. سارة دي متجوزة صح ؟
سالم .. ايوا .. متجوزة من تاجر ادوات صحية اسمه سيد .. راجل كبير في سن ابوها
مازن .. يااه !! في سن ابوها ؟!
سالم .. ايوا .. ومتجوز قبلها كمان وعنده ولاد في سنها واكبر منها كمان
مازن .. ايه دا ؟! دا ابوها رماها بقي ؟!
سالم .. معروف سيادتك ان النوع دا من الجوزات بيبقي وراه مصلحة وخصوصا لو العريس غني ومعاه فلوس .. وسيد دا تاجر ادوات صحية معروف وغني جداا
مازن .. سبحان الله .. انا مش فاهم ازاي اب يهون بنته بالشكل دا ؟! دا كدا مش بيجوزها !! دا بيرميها في النار .. لأن معظم الجوزات دي بتنتهي بالفشل !!
سالم .. عندك حق .. دي ساعات بتوصل لدرجة ان الزوجة ممكن تتعرف علي شاب في سنها وتحبه وبتوصل بيهم انهم بيفكروا يتخلصوا من الزوج العجوز دا بأي طريقة .. واكيد طبعا حضرتك مر عليك وسمعت كمان عن قضايا كتير من النوع دا
ممتاز .. فعلا
ونذهب الي سارة التي تجلس داخل الزنزانه حديثة تفكر في طريقة للخلاص من هذا السجن ظلما .. وفي الجانب الاخر تجلس فكيهه ونوال مكسورين صامتين بعد ان اخدوا درس لا ينسي نتيجة فعلتهم الشنعاء مع سارة .. ينظرون اليها في غل وغضب ويريدون الانتقام منها . وفجأة تنظر سارة الي يدها اليمني ويبدوا انها تذكرت شئ ما .. تبتسم فرحا .. ثم تنهض وتجري مسرعة نحو باب الزنزانه وتطرق الباب وتنادي بأعلي صوت قائلة
سارة .. افتحوا الباب عايزة اقابل الرائد ممتاز ضروري .. انا افتكرت حاجة مهمه .. افتحوا الباب ارجوكم .....
سارة افتكرت حاجة خطيرة.. ايه هي ؟! دا اللي هنعرفه
بدل ماتدور وتبحث علي الروايات خليها علي تليفونك وحمل تطبيقنا
