الفصل الثالث
ايدي كانت بتترعش من الصدمه معقول خلاها ترد عليه ، وقبل ما اتكلم ولا ازعق لقيتها بتقولي صاحب التليفون ده عمل حادثه وفي مستشفى ***** ، للمره التانيه سمحت للشيطان يلعب بيه ، وكانت النتيجه ان كنت هخسر اكتر حد حبيته في الدنيا ، جريت على المستشفى وانا بدعي ربنا يكون بخير ، لقيت انه اتعرض لكسر بسيط في رجله ولما دخل يعمل الاشعه كان تليفونه مع الممرضه وهي الي ردت عليه......
رجعنا البيت وقررت اني هأجل موجهته بموضوع الرسايل حتى لو انا فاهمه غلط عالأقل ينفي شكوكي ، بس الغريب ان الرسايل لسه محتفظ بيها على تليفونه منا طبعا مستحيل اقوله اني هكرت تليفونه ومعايا نسخه من الرسايل....
فات يومين وكنا بنتعامل عادي جدا ، بس بالصدفه وانا برتب ورق شغله لقيت ظرف كان لونه اصفر ، مسكته وبصيت عليه لقيته لسه مقفول ، كان الفضول هيموتني ، الغريب ان الظرف ده حتى مكنش مكتوب عليه اي حاجه ، المهم انا قررت اني افتحه ، لقيت حاجه شقلبت كياني صدمه عمري في صحبتي ساره....
نص الرساله
" احمد انا بحبك وعمري ما هسيبك ، ولو عشت عمري كله هستناك ، وهستنى انك تحبني زي ما بحبك ، روح عمرها ما هتحبك زي ، انا منكرش اني غلطت بس عشان بدافع عن حبي روح متستهلكش ، انا الي كلمتها وقولتلها على عنوان الشقه المشبوهه ، بس مش ذنبي ان البوليس جه وقبض عليها ، وانا الي كنت ديما بفتح عنيها عشان تدور وراك ، ماهي لو بتحبك كانت هتثق فيك وعمرها ، ما هتشك فيك ، بس صدقني ، هي متستهلكش انا الي استهلك "
لقيت ايد اتحطت على كتفي لفيت ولقيته هو احمد مكنتش عارفه اتكلم ، هقوله ايه ولا اعتزر بايه ، اترميت في حضنه وانا منهاره ، وهو متكلمش ، فضل حاضني لغايه لما هديت ، وهنا قررت اني اتكلم واحكيله عن كل وجعي....
عرفت اني كنت بشك في اكتر راجل مخلص فالعالم كنت هخسره بسبب غبائي وتسرعي ، الرسايل الي شفتها عالواتس كانت بينه وبين صاحبه ، وكان عاوز يفتح معاه شركه جديده ، بس احمد كان صعبان عليه المديره الي فالشركه القديمه انها هتخسر كتير لو هو سابها.....
انا من يومها وانا قررت اني عمري ما هدور وراه ولا اشك فيه ابدا مهما يحصل.....
الحمد لله الحياه رجعت من تاني بنا احسن من الأول وكنا احسن زوجين وحبيبين فالعالم.....
لغايه لما حصل الي مكنش متوقع في يوم أحمد قالي انه مسافر اسبوعين في محافظة تانيه عشان بيفتحوا فرع جديد للشركه بتاعته ، طلبت منه اروح معاه بس قالي انه هيبقى مشغول طول الوقت ومش هيعرف يعد معايا ، وانا اكيد هزهق وانا لوحدي ، المهم هو سافر وانا رحت اعدت عند مامتي لغايه لما يرجع ، وكنا بنتكلم من وقت للتاني كان بيطمن عليه انا وروح وخلاص ...
وفي يوم سبت روح مع ماما ورجعت شقتي اجيب منها حاجات ، فتحت باب الشقه ، ودخلت واتصدمت لما ملقتش العفش ، جريت ادور فالشقه لقيتها كلها فاضيه ، جريت صرخت ونديت على الحارس ، لقيته بيقولي ان احمد هو الي جه واخد العفش كلو ، استغربت بس قلت يمكن عاملي مفاجأه ، اتصلت بيه كتير تليفونه مقفول...
رجعت تاني لماما وانا مضايقه ، انه كان من المفروض لازم يشاركني وياخد رأيي وكمان العفش بتاعنا كان حلو وغالي جدا ، لما وصلت لماما لقيت ماما اعده بتعيط وحضنه روح ، جريت عليها وانا مخضوضه ، واطمنت ان روح كويسه ، سألت ماما في ايه مالك لقيتها بتبكي وبتشاور على ورقه وقعت منها فالأرض ، وطيت واخدت الورقه ، الي لقيت فيها الي مكنتش اتوقعه ابدا ، ان احمد يطلقني...
ايوه الورقه كانت ورقه طلاقي........
الي اكتشفته بعد كده ان احمد اتجوزني عشان يقدر ياخد فلوسي بعد مع عملتله توكيل. الي سحب بيه كل رصيدي وباع ورثي من بابا ، ومفرقش معاه بنته ، اما ساره فلفت عليه لما اتجوزني وخططوا سوا ازاي يخدعوني ، و اتجوزوا بعد كده بفلوسي....... 
