قصة هيثم وغرام الجزء الثاني والاخير

 

غرام: لا طبعا خالص ازعل لي عشان مغصوب علي الجواز مني ولا عشان جرحتني بكلامك ولا عشان كسرت فرحتي ولا عشان هطلقني ..

هيثم: قولتلك بلاش الاسلوب دا!!

وبعدين انتي هتفضلي لابسة البتاع دا علي وشك لحد امتي!؟

غرام: لحد ما نطلق يا هيثم و اذا كان عاجبك بقي

هيثم: هششش وطي صوتك ليسمعوا !!

مامت غرام: خير يا ولاد في حاجة؟

هيثم بتوتر: لا لا يا طنط مفيش حاجة

غرام: لا يا ماما مفيش حاجة اطلعي اقعدي معاهم و جاية وراكي اهه ..

مامت غرام: طيب يا بنتي ..

غرام قدمت الكيك و العصير هي و هيثم و قعدوا شوية لحد ما العيلة كلها روحت ..

(بعد ما العيلة روحت)

هيثم: عجبك اللي انتي هببتيه دا .. كانت ممكن امك تسمع

غرام: و انت بقي عايزني اتخرص و احط جزمة ف بوقي

هيثم: انا مقولتش كدا

غرام: لا انت قصدك كدا .. بقولك اي انا تعبت من المناقشة انا داخلة اوضتي ..

غرام سابته و مدتوش فرصة يتكلم و دخلت الاوضة و قفلت علي نفسها .. و فضلوا علي الحال دا لأيام طويلة محدش فيهم يكلم التاني ولا يشوفوا بعض .. حتي وقت الاكل كل واحد بياكل في اوضته و بيتجنب التاني

(في يوم بليل)

هيثم: اووف طب انا جعان دلوقتي اعمل اي

معقول اروح اقولها تعملي اكل .. اكيد مش هتوافق

و حتي لو وافقت ممكن اكيد تحطلي فيه سم و تقتلني

دي شكلها صفراوية اساسا و كل اللي عنيهم زرقا كدا ..

انا هقوم اعك الدنيا ف المطبخ و خلاص ..

هيثم طلع برا الاوضة لقي غرام بتجهز السفرة و محضرة الاكل ..

غرام: كويس انك طلعت .. يلا عشان تاكل

هيثم: اي دا مكرونة كمان!!

انتي بتعرفي تطبخي

غرام: اوماال دنا عليا حتة مكرونة ينهار الوان هتاكل صوابعك وراها ..

هيثم: هدوق اهه ربنا يستر

غرام: هو ف الاول ممكن يبقي صعب عليك بس بعدين هتتعود

هيثم: اتعود علي اي!؟

غرام: هااا ... اقصد يعني انه هيعجبك دوق بس

هيثم داق المكرونة و لقي طعمها وحش جدا ..

غرام: هاا عجبتك!

هيثم بصلها بقرف: انا في حياتي كلها مدوقتش انتن ولا اعفن من المكرونة دي .. اي اللي انتي عملاه دا

غرام: ما هو بصراحة يا هيثم انا مش بعرف اطبخ و دي اول مرة اعمل فيها اكل .. دنا حتي جبت الطريقة من علي النت

هيثم: مستحيل تكوني جبتيها من النت اكيد جبتيها من الديب ويب

غرام: والله من النت

هيثم: اممم طب حيث كدا بقي .. تيجي نضرب بيتزا!؟

غرام: اشطااا يلا نضرب

هيثم نزل جاب البيتزا و رجع البيت لقي غرام مشغلة فيلم و عاملة عصير مانجا ..

هيثم: يا عيني يا عيني .. عصير مانجا بحاله

اوعي تكوني جبتيه من علي النت برضو

غرام: عيب عليك دا انا اللي عملاه بخبرتي الكاملة دوق بس و ادعيلي

هيثم: ربنا يستر انا حاسس ان الجوازة هتبقي السبب في قتلي

غرام: بتقول حاجة!؟

هيثم بلهجة صعيدي: لا ولا حاجة يا كبيرة

غرام ردت عليه بنفس اللهجة: ايوا اتعدل كدا اومال

هيثم: هههه طب يلا يا كبيرة عشان ناكل البيتزا قبل ما تبرد ولا اي

غرام: يلااا

فضلوا قاعدين شوية ياكلوا و شربوا العصير و اتفرجوا علي التلفزيون ..

غرام: اي رايح فين

هيثم: هقف في البلكونة شوية

هيثم وقف في البلكونة و كان الجو حلو و بيتفرج علي منظر الشارع و منظر الناس اللي ماشية و مندمج ..

غرام: اتفضل الشاي

هيثم: خليكي انتي تخصص مشروبات بس

غرام: دنا عليا حتة شاي يلهويي اشرب بس

هيثم: انتي بقي منقبة من امتي

غرام: من ونا عندي 17 سنة

هيثم: امم .. طب لي اخترتي النقاب

غرام: يعني حبيت شكلي بيه .. و كمان دي حاجة بترضي ربنا مني

هيثم: طب و مكنتيش خايفة ميجلكيش عرسان بسبب انهم ميعرفوش شكلك

غرام: محدش من حقه يشوف شكلي غير اللي يستاهل انه يشوفه يا هيثم!

و بعدين انا مؤمنة جدا ان اللي هيحبني هيحبني من غير سبب .. ولا تقولي بقي عشان قلبك ابيض ولا اخلاقك ولا شكلك ولا جوهرك .. مفيش حاجة اسمها حب عشان حاجة ..

هيفيد بأيه انه يحبني من شكلي.. ما هو لو لقي واحدة احلي مني هيسبني و يروحلها اكيد .. و لو حبني عشان قلبي ابيض .. في بنات كتير قلبهم احسن و ابيض من قلبي بكتير ...دا غير ان مفيش حاجة اسمها حب عشان شكل .. ممكن يبقي اعجاب لكن مش حب!

الحب بيبقي من غير سبب يا هيثم

هيثم فضل متنح في عنيها و مندمج في كلامها و سرح

غرام سكتت شوية و قالت: عارفة ان عيني حلوة هاا اي تاني

هيثم اتحرج و رجع لصوابه تاني: هااا .. لاا .. لاا مقصدش سرحت شوية بس

بس بجد كلامك لمسني من جوا

غرام: بجد

هيثم: ايوا بجد

غرام: انت عمرك حبيت قبل كدا

هيثم: من خمس دقايق

غرام: حبيت خمس دقايق!

هيثم: لا دنتي غبية بقي و هتتعبيني

غرام: ما تقول انك حبتني علاطول مش حوار يعني

هيثم بصلها و هو متفاجئ: انتي ازاي كدا يبنتي

ايوا يا ستي .. حبيتك ..

غرام: اممم طب انا هقوم انام (جريت بسرعة و سابته و دخلت الاوضة و هو حاول يوقفها ملحقش)

هيثم: دي عبيطة دي ولا اي!

هو اي اللي هدخل انام .. ايوا هي عبيطة فعلا انا مبكدبش!

يا ترا شكلك اي يا غرام .. هتفضلي مشوقاني كدا كتير

كفاية عيونك لوحدها!

انا متأكد ان النقاب دا مخبي وراه تحفة فنية كبيرة

(تاني يوم الصبح)

غرام: اعااااااا هيثم الحقناااي بسرعة

هيثم قام مخضوض و نط من علي السرير جري علي غرام يشوف فيه اي

هيثم: اي يا غراام في اي .. حصلك حاجة .. انتي كويسة .. اي الحصل!؟

غرام: مفاجأة يا فوزي مفاجأة مفاجأة .. عملت كريم كراميل

هيثم: عملتي اي يا عنيا!

غرام: كريم كراميل والله و طعمه حكااية خدلك معلقة و مد ايدك

هيثم: انا فعلا همد ايدي بس عليكي انتي .. تعاليلي هنا بأه

مسك عصاية المقشة و جري وراها ف الشقة كلها و هي طلعت علي كرسي الانتريه و تقمصت الدور و قالت: بقولك اي يلاا اوعي تكون فاكر اني هتهز من الحركات دي ولا حاجة لا يابا اصحي للكلام دنا ممكن مخليش حتة في وشك سليمة

هيثم: انتي كد بتلعبي في عداد عمرك خلي بالك!

غرام: انا معايا ورق يوديك في ستين داهية ..

هيثم: ورق اي

غرام: ورق بافرة هيهيهيهيهيهيهي

هيثم: ايوااااعع

هيثم مسك العصاية و قعد يرقص بيها و شغل اغاني و غرام كمان كانت بترقص و كان بيحدف عليها فلوس فضة علي اساس انه بينقطها

غرام: اهاا .. خلاص مش قادرة تعبت

هيثم: اهاا ونا كمان والله تعالي نقعد

غرام دخلت جابت الكريم كراميل و هيثم داقه و عجبه ..

هيثم: يا تكاتك يا حركاتك يا كريماتك يا كراميلاتك

لا بجد عااش حلو اوي ..

يا ام نياازي صحي نيازي و قوليلوا غرام عملت كريم كراميل

غرام: يلا اي خدمة بس متتعودش علي كدا ها ..

هيثم: ههههههه ماشي يبشة متشكرين

غرام: طب انا هقوم البس عشان نازلة رايحة لماما ..

هيثم: طيب هاجي معاكي استني

غرام: لا لا خليك هنا انا هرجع بسرعة مش هطول

هيثم سكت شوية: طيب تمام روحي هستناكي

غرام نزلت عند مامتها و رجعت بليل و اول ما فتحت باب الشقة لقت الدنيا ضلمة ... فتحت النور لقت ورد و بلالين كتيير اويي في الارضة و الورد مكتوب بيه كلمة بحبك .. و لقت بالونة مكتوب عليها اسف ..

و البالونة اللي بعديها مكتوب عليها سامحيني

و اللي وراها مكتوب عليها انا راجل حمار انا عارف

ضحكت و بصت علي البالونة اللي بعديها و لقت مكتوب عليها ممكن نبتدي من الاول!؟

هيثم: ممكن ولا اي!؟

غرام بفرحة : اي دا يا هيثم .. انتي اللي عملت كل دا!

هيثم: ايون عشان كدا منزلتش معاكي

انا عايز اقولك اني بجد ندمان و مش عارف انا ازاي عملت معاكي كدا و قولتلك الكلام دا .. انا اسف ياريت تسامحيني

غرام: مسامحاك و مش زعلانة منك

و علافكرة انا كمان بحبك بس انت كنت حلوف

هيثم: اوبااا لا يخربيت ابويا انا ابن ستين ف سبعين والله .. انا كمان بحبك .. و كلمة حب دي قليلة عليكي والله

غرام: طب ما انت طلعت حلو و بتقول كلام رومانسي اهه

هيثم: اسمعك تاني!؟

غرام: ياريت

هيثم: اسمعي يا ستي .. الحب الحب .. الشوق الشوق

غرام: بلوبيف بلوبيف

هيثم: هههههه جدعة طلعتي حافظة

غرام: عيب عليك انا كمان حساسة و عندي مشاعر

هيثم: بس اي الرومانسية اللي زي الزفت دي

غرام: هشش اخرص .. دا اجمل ما قيل عن الحب ايش فهمك انت

هيثم: هههه طب بالمناسبة دي بقي

تسمحيلي ارفع النقاب بنفسي

غرام: ارفع براحة

هيثم: تمام .. ارفع ولا هتعضي

غرام: لا ارفع

هيثم رفع النقاب و اتصدم من المنظر اللي قدامه

بشرة بيضا جدا و عين زرقاء و شعر اشقر ناعم و خدود حمرا و مناخير صغيرة و كانت حاطة ميكب خفيف مخلي شكلها رقيق و حلو ..

هيثم: انتي مين!

غرام: مين اي انا مراتك

هيثم: مراتي!

يعني انا كنت عايش معاكي انتي .. حد ييجيي يضربني بالقلم يا جماعة

غرام: هههههه عشان تعرف انا اي بس

(هيثم حضن غرام و سهروا سوا و ناموا مع بعض ف نفس الاوضة و حبوا بعض و عاشوا سوا ايام حلوة عوضتهم عن اللي شافوه من بعض قبل كدا)

(بعد سنة)

هيثم: غرام بقولك اي هو ..

غرام: هشششش وطي صوتك بنتك نايمة

هيثم: ياااه شايفة يا غرام و هي نايمة شكلي ازاي

غرام: شكلي مين يا عنيا!!

دي شكلي انا يابا .. عيوني دي ولا مش عيوني

هيثم: خلاص يا باشا ولا تزعل شكلك يا قمر

غرام: ايوا كدا اظبط

هيثم: انا بحبك اوي

غرام: ونا اكتر بجد

" ولا يُشترط في الحبِّ أن تسعى إلى الكمالِ لتُعجَب؛ يكفي أن تكون صادقًا بأقلِّ ما تملكه، فلا يليق بالحب أن يخالطَه رِيَب وشكوك، ومن يحبك يُؤَمِّنك على نفسِك كما هي، ويكتفي منك بما تراه قليل.- "مُطمئنة فكرة أن يُحبك أحدهم بدون مُقابل، فقد يُحبك، لأنك أنت، أنت فقط."

بدل ماتدور وتبحث علي الروايات خليها علي تليفونك وحمل تطبيقنا

تعديل المقال