Ads by Google X

القائمة الرئيسية

الصفحات

قصة لعبة الايام الفصل الثانى


 الفصل الثانى


_انت قولتلها برده ى طارق ،هى عمرها ما هتستحمل اللى هتسمعه ،ولو حتى استوعبت تفتكر مش هتقول لحسن
_اسكتى دلوقت ى اميره
_لا مش هسكت انت عارف ان اختك اتجننت خلاص مبقتش شايفه ف دنيتها الا حسن وعاوزة توصله بأى شكل ولو على حساب الغلبانه اللى نايمه دى
"كنت بدأت افوق لما سمعت اميره بتعاتب طارق إنه قالى الحقيقه اه مكنتش لسه مصدقه اللى طارق قاله ازاى حسن مش اخوهم طيب حسن ابن مين معقول يكون ابن حرام،طفل من ملجأ ،طيب وحب جميله ليه رغم انى باحساسى ك ست كنت متاكده ان فى حاجه غلط بس ان حد يجى يقولك اللى خايف منه بتتصدم وتتوجع كأنك مكنتش تعرف ،اوقات كتير انك متعرفش بيبقى اسلم حاجه ليك"
_يا اميره انتى بنفسك سمعتى جميله وهى بتدبر انها تخلص من ورد علشان تكشف لحسن الحقيقه وميبقاش قدامه الا هى
_سمعت وعلشان كده بقولك اختك دى مريضه ولازم تروح مصحه ،لانها هتدمرنا كلنا مش حسن وورد بس



"كنت بسمعهم وانا مخضوضه،يعنى اى تخلص منى هتموتنى مثلا طيب ...انا هعمل اى ابين انى معرفتش حاجه وحتى لو طارق عرفنى الحقيقه هتعامل مع حسن ازاى ،يااارب ساعدنا يااارب مليش ملجأ غيرك"
_طارق ارجوك فهمنى ارجوك
_اهدى ى ورد،هفهمك كل حاجه
Flash back
_حمد الله على السلامه ى منصور ،بسم الله ماشاء الله مين القمر ده
_ده حسن ى عزيزة ابن عادل



_الله يرحمه بس انت جايبه ليه ى حاج هما اعمامه مرضوش يخلوه معاهم
_ياريت يااريت الله لا يسامحهم كانوا عاوزين يرموا الولد تحت القطر عشان ميبنلوش جثه واللى يسأل يقولوا ده اتخطف كل ده عشان ورث ابوه
_اى لاحول ولا قوه الا بالله وانت عرفت منين وجبته ازاى من وراهم
_انا سمعتهم بيتفقوا وانا رايح اقولهم ان المغسلين جم تخيلى عادل لسه مدفنش وبيتفقوا على قتل ابنه انا رجعت مكانى وفضلت متابعهم بعد الدفنه والعزا وهما كانوا مستعجلين طلعوا ع المحطه وحطوه قدام القطر وانا شديته بعزم ما فيا من سرعه واداريت ف الغيطان لحد ما مشيوا وهما اصلا جريوا يقسموا الورث مبصوش حتى وراهم
_طيب وبعدين ى منصور هنعمل اى لو عرفوا انه عايش لسه مش هيسبوه ى قلب امه
_ماهو علشان كده انا هسجله باسمى واللى هيسال هنقول انى كنت متجوز عليكى من غير ماحد يعرف علشان استعجلت ع الخلفه وكده اى رايك ى عزيزة
_انا موافقه ى منصور واهو ربنا عوضنا بيه ويمكن يكرمنا بسبب كفالتنا ليه انت عارف النبى عليه الصلاه والسلام قال انا وكافل اليتيم ك هاتين ف الجنه
_عليه افضل الصلاه والسلام على بركه الله



Back
وبعدها بسنه ونص امى حملت فيا انا وجميله ومن يوم ما وعينا ع الدنيا منعرفش الا ان حسن اخونا لحد قبل ما ابويا يموت اعترفلى بكل حاجه وخاف على حسن اعمامه يعرفوا انه عايش يقتلوه فقالنا الحقيقه علشان نمنع الورق الاصلى يقع ف ايد حسن مهما حصل بس الله يسامحها جميله استغلت الوضع وعاوزه تقول لحسن كل حاجه علشان تقرب منه
_طيب طيب ماهو لو اعمامه عرفوا هيقتلوه ازاى بقى تبقى بتحبه وتتسبب ف موته وبعدين هى حبته ازاى وامتى
_هكملك ى ورد ....
_اى ى طارق اللى حصل ،ورد قومى ى حبيبتى انا اسف والله ما كان قصدى ازعلك ،رد عليا اى اللى حصل ى طارق
_مفيش ى اخويا ،انا ..انا كنت بسألها على طريقه اكل اعمله لاميره مانت عارف كانت تعبانه لقيتها فجأه اغمى عليا
"قررت انى اكمل مع طارق التمثليه مانا لازم اعرف الحقيقه كامله ده حب عمرى ومش هسيبه لها ولا هستنى لما تقول لاعمامه ويقتلوه ان شاء الله حتى اضحى بنفسى "
_حسن
_اى ى حبيبتى انا اسف والله ى ورد انا ضغطت عليكى بزياده ى قلبى حقك عليا
_مفيش حاجه ى حبيبى متقلقش ده ارهاق بس وانا مش زعلانه منك ولا من جميله دى زى اختى
"قبل ما حسن يرد سمعت صوتها مكنتش عاوزة اسمعه ابدا بس كان لازم امثل انى عادى معاها علشان متاخدش حذرها"
_مالكم متجمعين كده ،مالك ى ورد خير تعبانه
_الحمد لله ى جميله شويه ارهاق



_قومى قومى بطلى دلع وتعطيل لحسن عن شغله يلا ى حسن العربيه مستنياك ى حبيبى عشان تسافر
"كان هاين عليا اقوم اكسر دماغها واقطع لسانها اللى بتقول بيه ى حبيبى دى بس مسكت نفسى علشان حسن "
_يلا ى روحى خد بالك من نفسك ومتقلقش عليا طارق واميره معايا وجميله طبعا
_اه متقلقش ى حسن دى ورد ف عنينا ،قالها طارق وهو بيطمنى بعنيه
_ماشى ى اخويا وده العشم ،عاوزة حاجه ى حبيبتى مش هتاخر عليكى
_تيجى بالسلامه ى حسن لا اله الا الله
_محمد رسول الله مع السلامه
"لقيتها بتقول انا جايه معاك ى حسن هديك حاجات تعديها على خالتو بالمره ،كنت عاوزاها تخرج باى شكل علشان طارق يفهمنى هى هتعمل فيا اى "
_كمل ى طارق بسرعه قبل ماترجع
_طبعا بعد وفاه ابويا حسن اتولى كل حاجه وكان بيعامل جميله بحنيه شديده باعتبار انه مكان ابونا دلوقت لكن هى مشاعرها اتحولت وبقت حب جنون ليه لدرجه انها كانت بتلبس وتتدلع انها تلفت نظره بس هو طبعا كان ف عالم تانى شايفاها عيله صغيره وبتدلع وانا اتكلمت معاها كتير وقولتلها ان حسن بيحبك من زمان وهيتجوزك انتى قالتلى يتجوزها هطفشها وهكرهه فيها وانت عارف هو بيحبنى ازاى
_ساعتها عرفت ان الكلام مش هيجيب نتيجه قولت يتجوزك يمكن لما تشوفه معاكى وازاى بيحبك تقتنع بالامر الواقع لكن العكس اللى حصل الغيره جننتها اكتر لحد ما اميره سمعتها بتتفق على.....



_على اى ى طارق كمل لو سمحت
_ارجوكى استوعبى اللى هقوله ومن غير انفعال ى ورد
_مش هيبقى اصعب من اللى سمعته ،اى اللى سمعتيه يا اميره
_كانت ...بتتفق على اتهامك ف...ف..شرفك


تعليقات