(الفصل الثاني)
كُنت قاعده بحرك الدِبلة بتوتر شديد جداً وواخده بالي منه بيبتسم بفخر وبيبصلي بهدوء ،، النادل قرب مننا حط قُدامي الكابتشينو اللي بحبه وقدامه قهوة سادة ..
_للمرة المليون بقولك قوم إمشي يازين إحنا مش هننفع لبعض..
_طب وهو عارف الحوار ده؟
_هو مين؟
غمزلي_بعض!
"لفيت وشي الجمب التاني وحاولت بكُل الطُرق أداري الإبتسامة اللي قدر يرسمها على وشي بكُل سهولة ولكني فشلت كالعادة".
_طب قوليلي إيه يرضيكي وأنا هعمله والله!
_اللي يرضيني إنك ترضي ربنا وتتقي الله فيا علشان يباركلنا في حياتنا.
بنفاذ صبر_تاني يا فريدة ،، ماقولتلك هبطل أشرب؟
_تاني وتالت ومليون ،، هو ده شرطي! وأعتقد ده كان شرطي قبل ما يكون بينا الدبلة اللي في إيدي وإنتَ وافقت وقتها وقولت إنك هتنفذ!
_هو مش كُن فيكون ،، واحدة واحدة وكُل حاجة هتتظبط ..
_لو متظبطتتش دلوقت مش هتتظبط أبداً ،، وبعدين واحدة واحدة إيه؟ إحنا كتبنا الكتاب سنتين وفرحنا السنة دي ،، 3 سنين مش كفايه يخلوك تتغير؟ وبعدين ثواني كده هو إنتَ يعني بتتغير ليا؟ ماهو ليك إنتَ علشان تقدر تربي ولادنا بعدين على الخير ،، علشان ترضي ربنا فيراضيك.
عيني جت في عينه لاقيته بيبصلي بكُل أريحية : مبتفشليش تقنعيني ،، ولا مرة فشلتي في ده ،، ربنا يباركلي فيكي.
زين ده بقى حُب حياتي كُلها أنا فاكره من سنين أول لُقا بينا لما كُنت فالسوبر ماركت وبجيب اندومي اللحم البقري اللي بحبه وبدون إدراك لأي شيء من اللي حصل والله لاقيته واقع في الأرض ودماغه جوا كرتونة الإندمي مبقتش عارفه أنطق ولا اتكلم لاقيته بيشيل الكرتونة بكُل شر ومثبت عينه جوا عيني وفجأة قام وقف وقتها قلبي وقع ..
_إنتِ مش تفتحي ؟؟
_ياكابتن والله آ ..
_كابتن إيه وزفت إيه على دماغك؟
_زفت على دماغي؟ تصدق بالله؟
بصلي بنفاذ صبر_لا إله إلا الله
_امك لو كانت فضت 5 دقايق ،، 5 دقايق بس والله تربيك فيهم مكنش زمان ده حالك ،، جتكم البلاوي مليتو البلد .
قبل ما أمشي بصيتله ولاقيت الصدمة على وشه ونظرات الذهول جوا عنيه محسيتش بنفسي من كُتر الجري غير وأنا قدام باب الشقة وبرن الجرس بسرعة ،، معرفش إمتى طلعت السلم ده كله الحقيقة يعني ..
_إيه إيه!! مابُراحة!
_م معلش ياماما أنا أنا ..
_إنتِ إيه في إيه؟؟
دخلت أوضتي جري وقفلت الباب وفضلت أعيط ،، أنا مش كده وإسلوبي عُمره ماكان كده مع حد ،، دايماً مُتبِعه إسلوب "فلتقل خيراً أو لتصمت" وطبعاً علشان لساني زي الدبش بصمُت معروفة يعني ،، ليه إتكلمت النهاردة! وياربي يوم ما اتكلم كده يبقى لحد غريب؟ وولد كمان!! فجأة سمعت جرس الباب وماما بتناديلي من المطبخ أفتح ..
_أيوة جايـ .. ،، إن إنت؟؟
_أيوة أنا ،، كُنت جاي أثبتلك إن ماما ربتني وأقولك إنك نسيتي الـ ..
_أها ياسافل ياللي مش محترم؟ وصلت بيك تراقبني وتيجي لحد هنا ده إنتَ يومك إسود!
••مين يافريدة؟ كان صوت ماما جاي من المطبخ ..
_إيه ده؟ كمان إسمك فريدة! حلو فريدة مش وحش..
_أكيد إسم الست الوالدة أحلى .. وبحركة سريعة هبدت الباب في وشه .
دخلت أوضتي بعصبية وفضلت أبرطم وأتنفخ وفجأة الباب خبط تاني ملحقتش أروح أفتح وكانت ماما سبقتني ..
_أيوة حضرتك؟
_حضرتك والدة فريدة؟
"كنت واقفه جوا مذهولة ،، الحيوان اللي هيجيبلي مصيبة دلوقت الخرابة ده"
_أيوة يابني أنا ،، خير؟
_بنت حضرتك كانت في السوبر ماركت من حوالي ربع ساعة ونست الإندومي بتاعها ..
_إن إيه؟ دي يومها اسود ومهبب
"أها ياخرابة إنتَ"
••إنتِ يازفتة ياللي جوا؟
_قلب الزفتة دي ولا إيه؟
••هتموتيني ناقصة عُمر هو أنا مش قولتلك إن الزفت اللي بتشتريه ده فيه ..
_فيه دود والزيت اللي فيه بيجيب سرطان ده حتى في واحد أكله وجاله إمساك وإضطرو يقطعولو بطنه ،، حافظه انا كده؟
••روحي يا فريدة يابنتي مـ ..
_منك للاااااه ،، أي خدمة بلخص عليكي اهو ،،ألا قوليلي ياست الحبايب هما إزاي قطعوله بطنه؟
••هو مين ده؟
_اللي جاله إمساك من الإندومي ،، فكراني في كيچي وبتقوليلي حاجات متدخلش ع نونو صغنن حتى؟
••هتفضلي نونو وصغننة بالنسبالي لحد ما أموت يافريدة ..
حضنتها بكُل حُب ماهو أنا معنديش في الدنيا دي كُلها هي غير هي بس.
تاني يوم راجعه من الكُلية حسيت بصداع شديد جداً فـ دخلت الصيدلية أجيب أي مُسكن ..
_لو سمحت يادكتور ممكن أي مُسكن للصداع
رد عليا بسخرية_ليه وهي الهانم بتحس زيينا؟
_هو إنتَ؟ إنتَ إيه عفريت؟ كل ما أروح مكان ألاقيك؟ بتتنطط في كل حتة زي القرود كده؟
_أه ماهي القرود بتتلم على بعضها
_أما إنتَ مش مُحترم بصحيح ،، إيه ده؟ دي الكوفية بتاعتي!! أهااا ياحراااامي!!!
_تؤ ،، متقوليش بتاعتك ،، أنا جيتلك لحد باب بيتك علشان اقولك إنك نسيتيها وإنتِ قليتي أدبك فـ خلاص مبقتش بتاعتك ،، يلا ياشطرة من هنا ..
مشيت بكُل عصبية وفضلت أبرطم يعني إيه مبقتش بتاعتي وهي بتاعتي!! ده ايه قلة الاحترام دي؟ نفسي أعرف أمه كانت فين وهو بيتربى؟
_كانت بتطمن عالطفل اللي قطعوله بطنه من الاندومي!
"كمان بتتجسس علينا ،، ده انت ايامك سوده معايا "
كملت طريقي للبيت وعملت نفسي مش واخده بالي منه نهائي ،، كده كده ماما قالتلي إن الكلب لما بيهوهو محدش بيرد عليه فعادي يعني"
مرت أيام كتير أوي وكُل ما أروح مكان ألاقيه في وشي زي عفريت العلبة وفي مرة الجرس كان بيرن بسرعة جداً ..
_أيوة ياللي عالباب جاية هي الدنيا طار ..
_ت
_انتَ ايه اللي جايبك هنا؟
_جاي أشوف فريدة.
_ولاا؟ انت مجنون ولا ايه حكايتك! يلا يابابا طرقنا انتَ رجلك خدت عالبيت ولا ايه؟
_انا مش عاوز ارد عليكي لإنك شبر ونص بس فبعتبرك زي بنتي!
••أهلاً وسهلاً يادكتور زين اتفضل
_يتفضل فين؟
همسلي_إوعي بس من وشي عاوز أتفضل
"دخلت وراهم لما أشوف إيه اللي بيحصل"
••فريدة؟ إعملي لدكتور زين حاجة يشربها
همست بصوت هادي جداً_وياترى دكتور زفت بيحب ايه؟
_بيحبك.
_إيه؟
_بقولك المانجا بحب المانجا
"إيه يافريدة مالك؟ إنتِ هيجيلك تهيؤات ولا إيه! فوقي كده أومال! بس وحياة أمي لأطفحهاله"
عملت المانجا وحطيتله بدل السُكر ملح ودخلت بإبتسامة كُلها برود ..
_إتفضل!
"بدأ يشرب من كوباية المانجا بكُل أريحية من غير مايبان حتى علامات الخضة على وشه ،، كُنت بغلي من جوايا ،، إزاي خطتي تفشل كده"؟
إتكلمت بسخرية وأنا ببصله بقرف_ها إيه سر الزيارة السعيدة أوي دي؟
_فعلاً السعادة منورة وشك .. إنتِ يابنتي بتخافي تضحكي وشك يكرمش ولا إيه؟
أمي ضحكت من قلبها •• طب والله حلوة منك يادكتور.
_والله حلوة منك يادكتور نينينيني ،، هو في إيه؟
رد ببرود_مافيش الخطوبة الإسبوع الجاي!
_أه جاي تعزمنا على خطوبتك يعني؟ طب ياسيدي شكراً يلا اتفضل مش بنروح لحد مناسبات!
_لأ ده مش بمزاجك ده غصب عنك أصلاً ،، كان بيقول أخر كلمة وهو بيتحرك علشان يمشي ،، عاوزه حاجة يا أمي؟
_عاوزه حاجة يا أمي؟ نينيني جتك نيلة في تُقل دمك.
الايام بتعدي وكُلها شبه بعض ،، كُل يوم بقف في البلكونة سرحانة في اللاشيء ،، مبقتش بنزل من البيت حتى الشغل سيبته علشان مشوفهوش رغم إني بقيت بحب أشوفه اللي قال المثل بتاع " ما محبة اللي بعد عداوة" شخص شاطر جداً ،، أنا فعلاً حبيت وجوده في يومي حتى لو مش موجود أوي ،، لما حسيت اني بدأت أتعلق بيه أخدت نفسي ورجعت خطوة لورا زي الشاطرة بالظبط ماهو مش هينفع أبداً أجازف بقلبي ،، فاشلين جداً البنات اللي بيحبوا وبيتخطبو ويتجوزو وبعدين يتحولو لأرانب تولد بس ،، وبعدين لفلبينيين ينضفوا ويطبخوا ويغسلوا ،، أغسل شراب واحد غريب ليه أنا يعني بلا هم!
••فريدة؟
_نعم يا أمي!
••يلا علشان ننزل نجيب الفستان والدهب.
_إيه ياماما إنتِ هتتجوزي ولا إيه؟
••إنتِ عارفه لو مبطلتيش اللماضة دي أنا هعمل فيكي إيه؟
_فستان إيه ودهب إيه ياماما؟
••فستان خطوبتك.
_إيه ده الله هو انا هتخطب؟ مش عيب كده محدش يعزمني!
••بطلي استهبال بقى وقومي ..
_استهبال ايه؟ انتِ بتهزري ياماما ولا ايه؟ اقفلي الباب ياماما واصطبحي وقول ياصبح الله يخليكي.
•يابنتي احنا المغرب اصلاً
_طب وات إيڤير اتمسي وقولي يامساا
••قومي إلبسي يافريدة وهي كلمة واحدة مش هكررها.
"سابتني ومشت بدون حتى ماتقول نص كلمة ،، أمي مريضة قلب بحاول دايماً أخد بالي منها ومن كُل المؤثرات اللي حوالينا ،، بحاول أبعد عنها الهم والزعل ،، مطولتش معاها في الكلام علشان متسببش في ذرة زعل تدخل قلبها ،، أنا حتى معرفش مين اللي هتخطبله ده ،، بس أياً كان يعني مش فارقه كتير هو مش هيستحملني بإسلوبي ده وهيخلع لوحده "
_يلا يا أمي أنا جاهزة.
••هتروحي كده بالإسود ده؟
_أه إيه رأيك في بنتك؟
••ده أنا بختي مايل فيكي والله ،، اتفضلي انزلي
وانا نازله شوفت العربية بتاعته قدام باب العمارة وهو كان واقف ساند عليها وباصص الجمب التاني فضلت بصاله بحُب بحاول أشبع عيني منه ،، بحاول أعوض كل الأيام اللي بعدت نفسي فيها عنه ومشوفتهوش وبعدين إفتكرت غض البصر فإستغفرت وبصيت فالأرض ونزلت ..
_يلا اركبي!
بملل_يادي الاستفزاز ،، احنا ابتدينا بقى؟ اوعى من وشي علشان مش فضيالك.
_ليه الهانم رايحة فين؟
بسخرية_رايحه اتخطب.
_لمين؟
_مش عارفه ،، ماما صحيح هو انا هتخطب لمين صحيح ولا ده كمان مفجأة ؟
_يلا ياعروسة اختاري تحبي أنه خاتم؟
_لا ياعمو ماما هتختارلي هي ،، ما هي اللي اختارت كُل حاجة بقى مجتش على دي.
"حسيت بعنيها لمعت كده وفجأة سحبتني من ايدي وخرجنا برا المحل ،، أنا عارفه إن كلامي سِم بس برضو محدش بيعمل كده في حد ،، يعني ايه تحدد خطوبتي وتختارلي خطيبي وكل ده وانا معرفش لأ وكمان أتفاجيء بخطوبتي! حسيت بزعلها عليا وعاللي هي عملته بس زعلها مكنش قد كسرة نفسي ،، هو شخص كويس وكل حاجة ومستعدة أحاول وأديه فرصة علشان أمي أولاً وعلشان أنا حساه ،، لكن أعتقد لو كان ليا حرية الاختيار وانا اللي وافقت واختارت مكنش زمان نِفسي مكسورة أوي كده دلوقت"
مكنتش أقدر أمشيها زعلانة_يلا ياماما ندخل نختار الدهب!
نظرة عنيها وقفتني عن كُل حاجة ..
_خلاص ياماما بقى مكنتش أقصد ماانتِ عارفه اسلوبي يعني ،، يلا ياشيخة ادخلي ادخلي انتِ هتتقمصي من أولها؟
"واختارت فعلاً دَهبي وأخدني أختار فُستان الخطوبة وصمم إني أشتريه ،، فضلت أقنعه إن ليه أشتريه؟ ما أنا مش هعمل بيه حاجة بعدين فـ ليه مصاريف على الفاضي ،، كان بيبصلي ويسكت وفعلاً إشتريت فُستان أزرق وخِمار من نفس اللون ،، حسيت إنه بيحب اللون ده لما شوفت عينه جت عالفستان ده واللون ده بالتحديد وثبتت ،، لاقيت قلبي بيقودني لإني اختاره وفعلاً بَصلي وقتها بَصة مش نسياها "
صممت مروحش الكوافير ،، طول عمري مبحبش العك الكتير وهو احترم رغبتي في ده ،، صحيت من نومي بعد الضهر ما أنا عروسة بقى جَت لي بنت جارتنا وفضلت تعملي ماسكات ..
_نو مش هحط كُل الميكب ده مُستحيل!
_يابنتي مينفعش وبعدين قصري الخمار شوية علشان دي خطوبتك!
_هو يعني خِماري اللي هيضيق عليكم المكان؟ بصي اخرجي برا معلش وأنا شوية وجاية.
"قصري الخِمار شوية نينيني ،، بنت مبحبهاش أصلاً"
حطيت روچ خفيف جداً وأيلينر وخرجت بكُل هدوء وأنا مُحرجة جداً ومش عارفه اعمل ايه ..
"وبعدين بقى في المواقف المُحرجة اللي مبعرفش اتصرف فيها دي"؟
لسه بفتح باب أوضتي لاقيته واقفلي على الباب فبحركة سريعة جداً رزعت الباب في وشه :'
إيه ده اللي عملته يادي الهبل!
فتحت الباب براحة جداً لاقيته واقفله بـ بوكية الورد وكان لابس بدلة جراي غامق وكانت دقنه مظبوطة نوعاً ما ،،حسيت في اللحظة دي إني أول مرة أشوفه في حياتي كلها ،، نظرات عنيه كانت كفيلة تحسسني بدفا العالم ..
أول ماقعدت مكاني في وسط الأغاني الإسلامية اللي كانت شغاله وأنا مستمتعه جداً بـ ده لاقيت الباب بيخبط والمأذون دخل!
"اللي هو دقيقة ياجماعة نفهم! "
_يلا ياشيخنا توكل على الله ..
"ياشيخ الله ياخدك ياخرابة انتَ"
_مش موافقه.
بَصلي بلا مبالاة_طب على بركة الله،، توكل على الله ياشيخنا يلاا ..
"جزء جوايا فرحان ،، قلبي باين! حاسة إن كُل حاجة بتمشي زي ما كُنت بتمنى ،، كتب كتاب من غير خطوبة علشان منغضبش ربنا بدون قصد ،، الخطوبة إسلامية جداً مافيهاش أغاني ،، فُستاني واسع وخماري طويل ،، نو ميكب ،، شخص كويس ومحترم وعنيه بتلمع في وجودي ،،وجودي أنا وبس"
_سرحتي في إيه؟
إبتسمت_في يوم كتب كتابنا وتفاصيل معرفتي بيك..
حسيت وشه نوّر _ كُنت بحبك أوي ،، حبيتك من اللحظة اللي شوفتك فيها برغم لماضتك ،، مكنتش شايفلك أي عيوب ولحد دلوقت مش قادر أشوف ده ،،بشوف كُل حاجة فيكي ميزة ،، غيرتي فيا كتير أوي من يوم ما نورتي حياتي ،، أيوة نورتيها ماهو دخولك فيها مش زي أي حاجة دخلتها ،، يومها خليتك تشتري فُستان الخطوبة علشان يفضل عندك لحد ماتدخلي بيتي وبرضو هيفضل موجود علشان كُل مانبصله نفتكر تفاصيلنا ومننساش أي موقف حصل بينا زمان ،، كُنت دايماً بركز في تفاصيلك ،، في طريقة أكلك ،، لون عيونك لما بتضحكي ،، لمعتها لما بعملك حاجة تفرحك .. "حرك ايده ولمس كف إيدي" .. حياتي بيكِ بقت حياة .
_طب وإيدك اللي حطيتها على إيدي دي معقمها ولا نقول welcome corona ولا أعمل إيه بالظبط؟
"إتخض ومكنش عارف ينطق"
"ياعيني ده اتصدم"
_طب بالنسبة للكوفية اللي عندك دي برضو مش ناوي تجيبها؟
_لأ مش ناوي أجيبها ،، قال خايفة من الكورونا ،، اللي بتغسل ايديها كل اسبوع مرة بـ بريل خايفه من الكورونا ..
عدا كام شهر والنهاردة فرحنا وكالعادة صمم يشتري الفُستان وأنا صممت مروحش الكوافير وكانت هدية فرحي العُمرة اللي هنعملها سوا ،، ماهو كان لازم نبدأ حياتنا برضا ربنا علشان يراضينا باقي حياتنا والنهاردة عدا سنة وجاتلنا أجمل بنوتة ،، جاتلنا بنوتة بس أنا لسه بنته الأولى ،، أنا اللي بيجيلي الشيكولاتة اللي بحبها ،، أنا اللي بيفصصلي أكلي ،، أنا بس اللي واخده قلبه ،، محسسنيش لحظة إن بمجرد جوازنا وجودي إنتهى ،، إهتمامه مقلش لحظة بل زاد كتير جداً ،، خوفه وشغفه بيزيدو كُل يوم عن التاني"
_انتو بتعملو ايه؟
اتخض_ببوس بنتي!
_بتـ ايه؟
قامت من حُضنه وحطت إيدها في جمبها _ يوووه يافري ياغيورة انتِ!!
_بنت!
النهاردة كملنا الـ 5 سنين جواز ومن موقعي هذا بقول إني عُمري ماحسيت لحظة إن خلاص راحت عليا ،، أنا لسه طفلته المُدللة 
:'
:'_فريدة؟
_عاوز إيه؟
_عاوز إيه! إسمها عاوز إيه؟ طب ولما اتجوز عليكي دلوقت؟ ماهو مثنى وثلاث ورُباع بقى..
_خليك انتَ مش فالح في حاجة غير كده ،، "قربت مِنه" بس بقولك ايه؟
_ايه؟
_فين الكوفية بتاعتي ياحرامي ياخرابة إنتَ؟
