Ads by Google X

روايه فرعون الفصل الخامس عشر


 الفصل الخامس عشر

مؤمن
تانى يوم لبست الجلابيه الزفره اللى حيلتى وخدت حامد ورحنا على بيت طاهر وخبطنا على الباب .
فتحلنا عم طاهر الباب ودخلنا ورحب بينا احلى ترحيب الراجل بصراحه .
شويتين وجات وحده حلوه سلمت علينا وطلعت امها قلت ياكرمك يارب اكيد البت حلوة زى امها وحتى لو مطلعتش زى امها عم طاهر حلو برضك زينه لو طالعه عليه
.
بعد شوية كلام وحديت ملوش عازه حامد قال لعم طاهر :
يلا عادنقرو الفاتحه ياعم طاهر خير البر عاجله
قولتله :ايه مش هنشوفو العروسه فلاول .
عم طاهر بلع ريقه وبص لحامد وبصلى ...حامد نغزنى فجمبتى بكوعه حسيتها اتخرمت ...قلت خلاص مش مهم نشوفوها بعدين نقرو الفاتحه فالاول .
عم طاهر رفع اديه وقرا الفاتحه فثوانى ولما قال امين سمعنا زغروته حلوه من جوه ...
الصراحه قلبى رفرف وحسيت انى عريس بحق ...دى الفرحه حلوه قوى ياولاد
صدقنا انى وحامد وبعدها عم طاهر نده بعلو حسه ....ياااااجنه دخلى ليل خليها تشوف عريسها وعريسها يشوفها ...
انى بصيت فالارض من الكسوف ...ايوه والله اتكسفت وحسيت انى عرقت اكده وعترعش ....امال لما انا الراجل حصلى اكده البت ياعينى حاسه بأيه ..يلا دلوك ناخدو على بعض ونبقو ستر وغطا على بعض .
شويتين وسمعت صوت رجلين دخلت علينل و بتقرب بالراحه ...مكسوفه ياعينى ...وانى دماغى تقولو وقعت على صدرى من الكسوف بس رفعت عينى وبصيت على رجليهاا ويااااااريتنى مارفعتها ولا بصيت ...
شفت رجلين لابسه شبشب وسوده قوى قلت يمكن لابسه شراب لحم الهوانم ولا حاجه ...بس له دى فيها صوابع والشراب ملهوش صوابع ..
رفعت راسى بسرعه وبصيت وحسيت ان قلبى اللى كان عيرفرف من شويه وطاير فالسما حسيته قال دب فالارض وعدت عليه عربيه نص نقل فرمته فرم
بصيت لحامد اللى بص للسقف وبصيت لعم طاهر لقيته مبتسم 😁
رجعت بصيت للعروسه تانى ...
طاهر :تعالى ياليل ادخلى سلمى على عريسك ... البت جايه علينا وهى مكسوفه انى رجعت لورا فقعدتى وهى وقفت قصادى انى وحامد مش عارفه مين العريس فينا
طاهر قلها :اهو ديه عريسك يابتى ....
مدتلى ايدها وانى سلمت عليها وقعدت على الدكه اللى على يمينا
طاهر :احممم طب تعالا ياحامد نقعدو انى وانتا عالدكه اللى بره نتحدتو شويه ونسيبو العرسان يتعرفو على بعض
حامد هيقوم مسكته من دراعه وزعقت:له حامد ميطلعش خليه معاى ..
طاهر استغرب لكن سابنا وطلع وقعدت انى وليل وحامد وطاهر قصادنا بس بره الاوضه ..
بصيت لحامد اللى رجع يبص للسقف تانى
مؤمن بهمس :ايه عاجبك السقف قوى يخوى ...الهى يوقع على نفوخك يبعيد
حامد :مالك يامؤمن محنا قلنا من لاول ان البت عفشه .
مؤمن :منتا قلت عفشه بس مقولتش عفشه آخر حاجه ..مقلتش عفشه عفاشت السنين .
يبووووى بص شوف خشمها خشمها ...ولا مراخينها المبطبطه على وشها ...فين اخرام مراخينها ياحامد عتتنفس كيف .......
طب بص سيبك من دا كله عنيهاااا فييين هاه فين عنيها ؟!
حامد :خلاص يامؤمن البت لاحظت وهتاخد على خاطرها منك اكده من اولها
مؤمن :خليها تاخد على خاطرها وتقول مش عاوزاه .
حامد :ياخى بص عالبيت حواليك وشوف البراح وانسى اى حاجه تانيه
يلا هقوم انى اقعد جمب عام طاهر وانتا اتحدت معاها شويه ..قومت ومؤمن مسك كف ايدى ويهمس :متسبنيش ياحامد ...حامد
..نترت ايدى منه بالعافيه ومشيت وهو لسه بينده بهمس ...حاااامد ...ياحامد متسبنيش الله يخرب بيت ابوك ...
مؤمن :خرج حامد وسابنى لحالى معاها ...بصيتلها شويه كتار وانى عحاول ادور على اى حاجه حلوة فوشها تعجبنى ملاقيش ...
بصتلى هى وقالتلى :
اشرب العصير بتاعك سِخن ...مسكت كباية العصير وشربتها فبق واحد وهى بصت الناحيه التانيه وضحكت ..
بلعت ريقى وقويت نفسى وقولتلها :معلش اصلى ريقى ناشف
ليل :حقك معلش ....انى اسمى ليل انتا اسمك ايه
مؤمن : انى مؤمن ...قلت اكده لقيتها ضحكت سالتها :عتضحكى ليه
قالتلى :اصل انتا اللى فعلا يتقال عليك المؤمن دايما مصاب .
ضحكت على كلامها وهى كمان ضحكت وبصيت لبره لقيت عم طاهر باصصلنا مبتسم والمهبل حامد فاشخ خشمه وعيضحك معانا من غير مايعرف ليه
.قلتله فنفسى اضحك يبن الهبله بعد ماورطتنى والله بس نطلعو لاطلع الضحك ديه من عنيك ..
اتكلمنا شويه هى تسأل اجاوب انى اسال تجاوب
بصراحه استغربت عليها ...البت جريئه وعتتحدت وتنكت ومش مستحيه منى ...بس كلامها حلو تحس انها عتعرف تتكلم كيف الناس المثغفين دول
قلتلها مع انك صغيره بس كلامك موزون وردودك كلها جاهزه ومترتبه كيف الخوجه صابر بتاع المدرسه !...لما كنت اقعد جاره فقعده كان يتحدت كيفك اكده ..
ليل :منى متعلمه وععرف اقرا واكتب زين قوى
مؤمن :كيف ديه ؟ يعنى عتروحى مدرسه !
ليل :له معروحش بس ليا وحده صحبتى اسمها جواهر بتتعلم وتعلمنى .
مؤمن :حلو العلام عينور الراس ..
يبختك انى لما كنت صغار كنت عشوف العيال وهى رايحه وراجعه من المدرسه وكان نفسى اروح اتعلم معاهم بس النصيب عاد .
قالتلى :طب متتعلم دلوك
قلتلها :له معدش ينفع كبرنا عاد .
قالتلى : مفيش حد عيكبر عالعلام الواحد عيتعلم لحدت آخر يوم فعمره .
اتنهدت وقلتلها :مش قلتلك كلامك زين اتنهدت وهى المضروبه على كد ماصغيره فهمت عليا وقالتلى .
بس الحلو معيكملش صوح .
:انى بصراحه معرفتش اقول ايه سكت وهى اتبسمت وسكتت ..
قمت وقفت وقلتلها طيب اروح انى عشان اشوف وكل عيشى ...
وصلت باب الاوضه وافتكرت انى مرمتلهاش فلوس عالصينيه ورجعت تانى طلعت من جيبى فلوس كنت محضرها وحطيتها عالصينيه وطلعت استأذنت من عم طاهر اللى حلف ستين يمين نقعدو نتغدو لكن انى قلتله مره تانيه ....اصل مين ليه نفس ياكل ..
طلعنا ومشينا وانى ساكت خالص ومسوح على نفسى وحامد ماشى بعيد عنى بمسافه وخايف منى ...
حامد :متاخد من الفرحه انتا يامؤمن باين على وشك .
مؤمن :الهى بحق جاه النبى تفرح فرحتى وتتاخد كيف منا متاخد اكده بالظبط يابعيد ...
حامد :مالك بس يافقرى ...انتا مشفتش البيت ولا القيراطين ...ولا الغنمات ...انى عديت ٨ فالحوش وكنه فيه تانى يبن المحظوظه .
مؤمن :والغنمات هيعملولى ايه وانى نايم جمبها ياحامد ...طب بذمتك انتا تقدر كل صبح تفتح عنيك على وش
ليل جمبك عالمخده
حامد :له







مؤمن : عتقولهالى صريحه دلوك .!طب روح ياحامد غور على بيتك ومتورنيش وشك تانى واعتبر صحبتنا فضت جزره وقطمها جحش
حامد:هههههه مش هاخد عليك السعادى ...انى مروح وهجيلك بالليل واجيبلك معاى قزازه لوكس وانسيك ليل وابو ليل وانسيك نفسك كمان .
مؤمن :غور ياخى ..يلعن ابو معرفتك
وسبته ومشيت وانى مش شايف قدامى غير وش ليل اللى كل ماافتكره بطنى توجعنى وابقا عاوز ادخل الحمام ..
********
غريب
حسيت ان بابا هيصحى من النوم قفلت الاجنده وخبيتها وعملت نفسى نايم ...داده سميره شافتنى وانا بعمل كده ...
قام بابا وجه قعد جمبى وحسيت ببوسه طبعها على جبينى ومسك ايدى باسها وغطانى وقال لداداه سميره ...
انا رايح اصلى فالجامع ياداده عاوزه حاجه اجيبهالك معايا وانا راجع ..
داده سميره :لا ياحبيبى متجبش حاجه ...صحيح شغالين الفيلا كلهم جم وسألو على صحة غريب بيه وانا طمنتهم وقلتلهم هو نايم دلوقتى سيبوه يرتاح وانا هقلو انكم جيتوله لما يصحى ...
ماهر :وهو كان نايم بجد ولا كان عامل نايم زى دلوقتى ..؟
داده سميره غيرت الكلام : وجابو معاهم اكل من البيت ابقى تعالا عشان تاكل اكل بيتى تلاقيك تعبت من اكل بره وانتا مبتستحملهوش ..
سمعت تنهيدة بابا وبعدها خرج وسمعت صوت قفلة الباب فتحت عنيا ...
قربت منى داده سميره وقعدت جمبى وبصتلى شويه وقالتلى ..
عارف ياغريب ياحبيبي ..احنا ممكن نخبى ونمثل على اى حد والناس تصدقنا ...الا الناس اللى بتحبنا ...عشان من كتر حبهم فينا بيبقو عارفينا وحافظينا اكتر من نفسنا ...وبيتجرحو اوى لما يلاقونا بنبعد عنهم او بنتجنبهم لكن رغم كده مبيبينوش ..
هزيتلها دماغى وهى قامت وراحت قعدت على الكنبه وانا اتعدلت وطلعت الاجنده وفتحت على الصفحه اللى وقفت عندها .
📖
اميره
جريت عالمطبخ بعد ماخبيت الاجنده وابتديت احضر فطار ...بس انا مش عارفه هو بيحب يفطر ايه ...قررت انى اعمل كل حاجه واللى يعجبه ياكل منه ..
حطيت جبنه، ولانشون، وزتون، ومربى وقشطه وعملت بيض عيون ولقيت فول معلب عملت فول وسلقت بيض سلق وحمصت عيش توست وسخنت عيش بلدى وعملت شاى ...ملقتش لبن سايب لكن لقيت علبه حطيتها على الصينيه برضو واخدتها ودخلت الاوضه حطيت الصينيه عالكوميدينو وقربت من ماهر وابتديت ابوس فكل حته فوشه بوسات صغيره ...
ابتسم ومره وحده لقيته حضنى وشدنى نومنى فوقه وفتح عنيه وابتدا يرجع فشعرى ورا ودنى بعد مامسك خصله وشمها ...
قلى :ايه بقا اللى مصحى اميرتى بدرى كده .
قلتله :بدرى ايه يااستاذ كسلان الساعه عشره ...يلا قوم حضرتلك الفطار .
قلى :بس انا مبفطرش تعبتى نفسك ليه ...وبعدين انا اللى كنت ناوى اعملك الفطار بأيدى لما اصحى .
قلتله :اولا حكاية مش بفطر دى من النهارده تنساها ...الفطار دا اهم وجبه ولااااازم تتاكل....تانى حاجه بقا انتا الملك بتاعى والملك ميعملش حاجه ...يشاور بس وكل حاجه تيجى لحد عنده ..
ماهر :ياااااحياتى انا مقدرش عالدلع دا كله كدا كتير عليا .
قلتله :انا من النهارده هعودك عالدلع بتاعى ومش هتقدر تستغنى عنه
جبت الصينيه وحطيتها قدامه وهو اول مابص عليها برق عنيه ...ايه دا كله انتى بتفطرى جون سينا يبنتى ..
قلتله :منا معرفش انتا بتحب تفطر ايه عملت كل حاجه
قلى انا مبفطرش بس طالما الفطار بقا اجبارى هفطر اللى انتى بتفطرى منه ..
قلتله :لاااا متقدرش ..انتا عارف انا بفطر ايه ..بفطر فول وطعميه ومخلل وبصل اخضر وبرنجان وبطاطس
قلى عارفه معنديش اعتراض ولا على حاجه من اللى قولتيه دا غير عالبصل ...تاكلى بصل الصبح اقطع رقابتك ...ناقصه صنانه هى .
ضحكت على كلامه وابتديت ااكله بأيدى ومخلتهوش يمد ايده وهو بس ياكل وهو باصصلى ومبتسم
خلصنا فطار واخدت الصينيه وديتها المطبخ وانا بشيل فالاكل لقيت ماهر حضنى من ضهرى ودفن وشه فرقابتى وبياخد نفس جامد وقلى ..
ريحتك حلوه اوى ومنعشه بحس براحه وانا بشمها
قلتله ايه ياماهر انتا مش شغاله عندك غير حاسةالشم بس ولا ايه ..
لقيته ضحك بصوت عالى و شالنى مره وحده وهو بيقول ...لا طبعا مين قال كده كل الحواس عندى شغاله اللمس والتزوق والبص واللمس الخمس حواس هشغلهملك كلهم مع بعض دلوقتى ....
انا حسيت بحراره طالعه من وشى من الكسوف ...ايه اللى قولته دا والله مقصد كده ..غمضت عنيا ودفنت دماغى فصدره وهو حس بيا وضحكته زادت ودخلنى رمانى على السرير وقفل الباب وانا شديت الغطا وغطيت وشى من الكسوف ..
فضل ماهر معايا اسبوع ليل نهار فالشقه مخرجش منها وبصراحه الاسبوع دا حسيت نفسى فيه ملكه متوجه وشفت حب ودلع من ماهر مكنتش اتخيله ..
وانا كمان دلعته ومكنتش باخليه ياكل الا من ايدى كل مايقولى نطلب اكل من بره كنت برفض واقوله انا بلاقى متعتى وانا بعملك اكلك بأيدى .
خلاص امبارح كان اخر يوم فالاسبوع والاجازه اللى واخدها ماهر خلصت واضطر انه يرجع لشغله وبيته التانى
اتفق معايا انه هيعدى عليا كل يوم ساعتين فى الوقت اللى يكون فاضى فيه لغاية مايعرف يتصرف و ياخدله اجازه تانيه .
الساعه دلوقتى ١١ يعنى ليه ساعه ونص فالمكتب... اتصلت بيه فيهم ٣ مرات ..ومتت من من الضحك عليه وانا بعاكسه وهو بيرد عليا قدام الموظفين ويقولى ...
ايوه ياعزيز بيه ..وانتا كمان وحشتنى ياعزيز بيه .. قولتله هات بوسه رد عليا :عيب ياعزيز بيه ..
فطست لما لحيت عليه وقلتله مليش دعوه عاوزه بوسه دلوقتى ..سكت ثوانى وقلى ...العقد هيكون عندك بكره وعليه بوسه ياعزيز وخد البوسه مقدما ياعزيز بيه... وباسنى فالتليفون وانا من الضحك السماعه وقعت من ايدى وسمعته ضحك على ضحكى وقفل بعد ماسمعته من السماعه بيقول ..شكلك مجنون وهتجننى معاك ياعزيز بيه .
غريب :ابتسمت وانا متخيل منظر بابا قدامى وهو بيقول كده قدام الموظفين ...وكملت قرايه .
اميره :خلص ماهر شغله الساعه ٤ العصر كلمته تقريبا كل نص ساعه فيهم ...
بعدين روح على بيته التانى
انابقا نضفت الشقه كلها مع انها نضيفه بس عشان الهى نفسى ....
خلصت المغرب و فضلت الف فالشقه لوحدى وفالاخر دخلت اوضة النوم ورحت على السرير لاول مره من يوم ماتجوزنا من غير مايكون ماهر جمبى ،حضنت مخدته اللى بينام عليها ونمت على ريحته للصبح .
الصبح ابتديت اصحى على بوسات ناعمه على وشى وحسيت بحد دفن دماغه فرقابتى واخد نفس،.... ابتسمت وانا مغمضه عشان دى حركة ماهر وبعدين افتكرت انى بايته لوحدى وماهر بايت فبيته التانى 😨
اتخضيت وفتحت عنيا مره وحده ولسه هصرخ لقيت ماهر حضنى وبيقولى :
اششش انا انا مفيش حد اهدى .
قلتله :ماهر! انتا جيت امته .؟ قلى لسه جاى دلوقتى، مقدرتش اروح الشركه من غير ماشوفك عشان وحشتينى اووووى، وكمان جيتلك عشان تفطرينى زى ماعودتينى ،
عشان كلهم فالفيلا عارفين انى مبفطرش محدش صحى يفطرنى ...
بصيت للساعه لقيتها ٨ بصيتله باستغراب وقلتله ...دى الساعه لسه ٨ ايه يبنى بايت تحلم بيا ولا ايه ...
لقيته ابتسم وقلى :طب والله العظيم حلمت بيكى، وطول الليل وانتى معايا فالحلم وفحضنى ..
قربت منه وحضنته وانا بقوله طب تعالا بقا فحضنى عشان احققلك حلمك ...ضحك وقام وقف وقلع الجاكيت وابتدا يقلع هدومه ...قلتله بتعمل ايه يبنى انتا ...
قلى اصلى فالحلم مكنتش لابس هدوم وطالما بقا هنحقق الحلم يبقا نحققه بالمظبوط😉 ...
قرب عليا ومعرفش ليه وقتها افتكرت مكالمتنا امبارح وعزيز بيه ومقدرتش امسك نفسى من الضحك
وهو لما شافنى مش قادره ولا عارفه ابطل ضحك بقا يضحك على ضحكى مع انه مش عارف انا بضحك ليه وشدنى ليه وهمس فودنى ...تعاليلى طيب وانتى مسخسخه كده صبااحك مسخسخ.... وووو🙈
دخلت استحميت ورحت المطبخ احضر الفطار وهو دخل ياخد شور وبعد شويه لقيته جايلى المطبخ ولافف بس فوطه على وسطه البيه ووقفلى وهومكتف ايديه وبيبصلى ...
قلتله :ايه ياعم انتا اللى عامله دا مش تلبس هدومك عشان الرقابه ..
قرب منى وحضنى من ورا وضهرى بقا على صدره ميل عليا وقلى :
طول منا معاكى وطول منتى قدامى مفيش رقابه ...لفنى عليه وانا انفاسى عليت من قربه واتوترت من بصته ليا ونزلت عيونى رفع وشى بصوابعه وطبع بوسه على شفايفى وقلى ...ولا كسوف ..
بعدت عنه بسرعه وكملت الفطار وهو ابتسم وقعد يفطر ولاحظت انه بياكل كتير قلتله ايه ياماهر ياحبيبى اتفجعت ولا ايه !
ضحك وقلى تعرفى انى على فطارى معاكى من امبارح مأكلتش اى حاجه تانيه غير شربت فنجان قهوتى بس ..وبعدين تحقيق الاحلام عالريق طلع بيجوع اوووى ...
ابتسمت وقلتله طب تعرف انى انا كمان محطتش حاجه فبوقى وقاعده على فطار امبارح برضو وطول اليوم مليش نفس لاى حاجه
قلى :طب تعالى نتفق اتفاق ...ايه رأيك كل ماحد فينا التانى يجى على باله يقوم ياكل .
قلتله يانهاااار دنا على كده انا مش هبطل اكل ليل نهار وهبقى اد الفيله .
ضحك وقلى بس هتبقى احلى فيله فالدنيا ...
بصراحه فرحت اوى انه حب يبدا يومه بيا ومعايا وبرغم انه كان بايت مع مراته التانيه الا انى حسيت بلهفته ليا كانه ليه شهور بعيد عنى ...
ابتدت الايام تمر وماهر بقا هو كل اهتماماتى ..نسيت معاه الدنيا والناس ونسيت نفسي كمان ومبقتش شايفه غيره ...
كل يوم اتصل بيه فى الشركه واساله عن ادق تفاصيل يومه ..اكل ايه، شِرب ايه ،لابس ايه، قابل مين، اتكلمو فأيه،.. وهو اتعود على كده لدرجة انه بقيت اول مااكلمه يحكيلى لوحده اى حاجه عملها من غير مااسأله ...
ولما اتقل عليه واقعد ساعتين تلاته مكلمهوش كان يتكلم هو ويتخانق معايا ويقولى سعادتك مشغوله عنى بأيه ...
بقيت بفرح وانا شايفه اهتمامى بيه اتحول عنده لادمان مبقاش يقدر يستغنى عنه ..
كل يوم بقا يجى يفطر معايا واما
وقته بيسمح يقولى هاجى اتغدا معاكى النهارده ..
بقيت عارفه هو بيحب ايه فالاكل وكان ييجى يلاقينى عملاله كل الاكل اللى بيحبه ...بقى يقولى مبقتش استطعم الاكل غير من تحت ايدك ....
اول امبارح عدى على جوازنا بالظبط شهرين ....كانو شهرين من الجنه بس مش عارفه ليه من كام يوم بقيت الاحظ ماهر بيبصلى كتير ويسرح! وكل مااقوله مالك يقولى مفيش .
مريم طول الفتره دى وهى دايما على بالى برغم ان ماهر مالى كل حياتى وواخد كل وقتى الا ان مريم
اختى وليها معزتها فقلبى ووحشتنى اوووى ونفسى اشوفها ..
وكمان عشان اقولها طلعتى غلطانه فحكمك على ماهر يامريم واخليها تشوف السعاده اللى غيرت حتى ملامحى للاحسن واخليها تنسى قلقها عليا وتفرحلى ..
استأذنت من ماهر انى اروحلها وهو وافق علطول ...
***********
📖
امبارح رحت لمريم بعد ميعاد الشغل وقلت لماهر انى هبات معاها ... خبطت على الباب ومريم فتحتلى وابتسمت اول ماشافتنى قدامها... لكن بسرعه دارت ابتسامتها وفتحتلى الباب ودخلِت وانا دخلت وراها وقفلت الباب
رحت حضنتها من ورا وفضلت ابوس فيها وهى تبعدنى
قلتلها :اخص عليكى مش يعنى عاوزه تسلمى عليا ..ايه موحشتكيش بعد المده دى كلها ؟!
ردت عليا وقالتلى :الكلام دا تقوليه لنفسك ياماما ...تقدرى تقوليلى ازاى تفضلى شهرين من غير ماتيجى تسألى عليا ؟ طب انا ومعرفش مكانك ولا عنوانك كنت رحتلك ...لكن انتى ...ايه ماهر بيه عملك غسيل دماغ ونساكى مريم ..
قلتلها :طبعا لو حلفتلك ان غصب عنى مش هتصدقى فبلاش اتكلم احسن
قالتلى طب بلاش تيجى عشان مشغوله بجناب الاميرالاى مفيش تليفون تتصلى منه وتطمنى عليا وتطمنينى عليكى !
ولا كمان مكنش عندك وقت خمس دقايق طول الشهرين دول ؟!...بس عشان تعرفى ان الوطيان كان بيمشى فدمك طول عمرك ولما لقى الفرصه طلع عليكى مره وحده ..
ضحكت وانا بحضنها وقلتلها قولى اللى تقوليه مسامحاكى ...بس تعالى اقعدى خلينى احكيلك كل حاجه وتفرحى معايا ،
دنتى والله ليل نهار متغيبيش عن بالى وبدعيلك ربنا يبعتلك واحد زى ماهر يحبك ويدلعك ..
انتى مش متخيله الفرحه اللى انا عايشاها مع ماهر يامريم ...رأيك فيه وحكمك عليه كان غلط والله .
قالتلى :ياحياتى انا متمنالكيش غير كل خير ....ويارب يكون شكى فيه غلط وربنا يخلف ظنى يبنتى انا كل زعلى واعتراضى ماهو الا خوف عليكى والله . يااميره انا بعتبرك بنتى مش صحبتى وانتى عارفه كده







حضنتها وقلتلها انا عارفه ومتاكده من ده والله وبحبك اوووى ..
حضنتنى واتصافينا وقضينا اليوم مع بعض واتصلت بماما فريده اطمنت عليها وصالحتها وطمنتها عليا .
يومها متصلتش انا على ماهر ولا مره، عشان كنت ملهيه فالكلام مع مريم ،
لكن هو حرق التليفون عليا حرق من الاتصالات ومريم اول مازهقت منه شالت الكلبسه من التليفون وفصلِت عنه الحراره خالص ..
وانا ضحكت وانا بتخيل ماهر بعد ماعملت كده وهو بيشتم عليها وهو اصلا شايل منها لوحده .
بيت معاها وصحيت النهارده الصبح على صوتها وهى بتكركب فالمواعين وبتعمل فطار ...
صبحت عليها وقمت استحميت ولبست هدومى بسرعه واخدت شنطتى باستعجال عشان ارجع شقتى وافطر مع ماهر زى كل يوم ..بصتلى وقالتلى :
ايه هوا دا رايحه فين انتى ؟
قلتلها يدوب الحق ارَوَح عشان زمان ماهر فالشقه دلوقتى وهو متعود انى افطره وافطر معاه كل يوم .
اصرت انى افطر معاها وانا عشان مزعلهاش اكلت لقمه كده عالماشى ونزلت جرى، ركبت تاكسى ورحت الشقه وفتحت الباب ،لقيت ماهر قاعد فالصاله ومرسوم على وشه غضب الدنيا ...
دخلت وحطيت شنطتى على الكرسى وانا بنادى على ماهر وعامله مش شايفاه ...ماهر حبيبى ...جيت ياقلبى ...ماهرررر...ميموووو.
قعدت قدامه عالكرسى ومثلت الحزن وانا بقول ..دا لسه مجاش الظاهر راح الشركه ونسى يعدى عليا 😢
ماهر بصلى باستغراب وقلى :اتجننتى امته منا سايبك امبارح كويسه
قلتله :ايه دا انتا مين ياجدع انتا وايه اللى جابك هنا وازاى تدخل الشقه وجوزى مش موجود
قلى اميييره اتعدلى معايا عشان انتى متعرفيش ماهر لما يدايق من حد بيعمل فيه ايه ..ولو فاكره ان باستعباطك دا هعديلك فصل حرارة التليفون عند مريم تبقى غلطانه .
قلتله :ايه ياعم دا انتا هتصدق نفسك انك ماهر حبيبى بجد ولا ايه ...برضو ماهر حبيبى بيبوز ويكشر كده ...طب بذمتك ماهر لو شافنى بعد غياب امبارح كان هيسيبنى ويقعد بعيد عنى كده ؟
قلتها وانا بقربله وقعدت على رجله وقلعت الجاكيت وقعدت بالتوب وقربت من ودنه وهمستله قبل ماابوسه ...طب بذمتك ماهر حبيبى كنت هبقى بالقرب دا منه ويستحمل يشوف شفايفى دول وميبوسهمش ...ها ...قلتها ومديت شفايفى قدامه بدعوه صريحه ليه وهو بسرعه لبى دعوتى واخد شفايفى بين شفايفه بلهفه وشوق واول ما بعد عنى قلتله ...
اهو انتا فعلا دلوقتى انك ماهر حبيبى ...
قام وشالنى ودخلنى الاوضه من غير مايتكلم معايا بحرف واحد وعامل نفسه لسه زعلان لكن تصرفاته ولهفته معايا اثببتتلى غير كده خاااالص .
دخلت اعمله فطار وهو خلص لبس وجه ورايا واخد كوباية لبن وحتتة جبنه رومى بس عشان اتأخر وقبل مايمشى شربنى عصير الرمان الطبيعى بتاعى بنفسه اللى بيجيبهولى كل يوم عشان عارف اد ايه انا بحبه وبحب اشربه دايما ومن ساعتها كل يوم الصبح لازم يجيبلى علبه معاه وهو جاى ويشربهانى بنفسه ...
راح على شغله وانا اخدت لفه فالشقه وملقتش حاجه اعملها قلت اما اكتب فأجندتى حبيبتى شويه ...
مش عارفه ليه النهارده فكرت فأنى نفسى اكون ام ..ياه على السعاده لو بقى عندى طفل من ماهر يملا عليا حياتى ويسلى وحدتى ..
ابتسمت وقلبى دق وحسيت بأحساس يجنن لمجرد الفكره ....
قررت انى خلاص لما ييجى ماهر هكلمه انى اروح لدكتوره ...مع انه لسه بدرى على الكلام دا بس انا نفسى اوى اشيل حته من ماهر تكبر جوايا واحس بيها جمب قلبى ....
هقوم دلوقتى اكلمه واشوف البيه اللى بقاله ساعتين فالشركه متصلش بيا ليه المده دى كلها ....
📖
النهارده هكتب وانا مش مبسوطه وحاسه ان فيه حجر على قلبى ...ماهر قلى انه هيسافر اسكندريه ٣ ايام هيتفق على شغل هناك واحتمال ميلقاش وقت يكلمنى
معقوله هقعد الوقت دا كله من غير مااسمع صوته ؟ طيب ازاى هيعدى يومى من غير مايكون هو اول حاجه افتح عليها عنيا .....انا حاسه ان قلبى بينغزنى وواجعنى اوووى مش عارفه ليه ..
هو هيسافر النهارده بالليل بس انا اكدت عليه انه ييجى يسلم عليا و يسافر من عندى ...
هقوم بقا اجهز نفسى واستعد له ..لازم يشوفنى فأجمل صوره عشان تفضل مطبوعه فعنيه ويفتكرنى بالصوره دى وهو بعيد عنى ....
*******
📖
النهارده اول يوم لماهر فبلد تانيه غير اللى انا فيها ...جالى امبارح زى ماوعدنى قبل ميعاد سفره بساعتين وقضاهم معايا وودعنى بطريقته اللى بعشقها ومشى ..
اول مصحى النهارده الصبح رن عليا وطمنى على وصوله واطمن عليا ..
سألنى فطرت وشربت علبة عصيرى ولا لا ...؟وانا طمنته وقلتله ايوه وكله تمام ...
بس الحقيقه انى مليش نفس لاى حاجه ...والعصير مش هشربه غير لما ييجى ويشربهونى بايده زى ماعودنى ...
اصلا انا هقوله انى هروح اقعد مع مريم التلات ايام دول لغاية ماهو ييجى عشان بصراحه مش قادره اقعد فالشقه من غير ماشوفه الصبح زى كل يوم ..
غريب :قفلت الاجنده بعد ماتعبت من القرايه وانا بسأل نفسى ..ازاى حد يقدر يبعد عن حد بيحبه بالشكل دا وللدرجه دى ....ازاى ابقا متأكد ان بعدى عن حد ممكن يقتله وابعد عنه واخرجه من حياتى مهما كانت الظروف ؟!
بصيت لداده سميره وطلبت منها كوبايه ميه يمكن اقدر ابلع معاها الكلام والأسئله الكتير اللى واقفه فزورى دى ومحتاجلها اجابه فأسرع وقت ...لكن مش هستعجل واسأل الا لما اقرا مذكرات ماما كلها عشان ابقى فهمت كل حاجه من طرفها هى وباقى اسمع من طرف بابا ....
*********
ليل
ابوى دخل علينا وقال لامى انى كلمت العريس النهارده وهو قلى هيشاور نفسه ويصلى استخاره ويرد عليا بكره الصبح ...جهزى بتك وجهزى ضيافه زينه يمكن ياجى ويجيب معاه حد ...
جنه :ياصلاة النبى دا بينه عارف ربنا زين ومعيخطيش غير لما يستخيره ...ربنا يزيد ايمانه ويجعله من نصيبك ياليل يابتى ....
طاهر :امين يارب ..يلا مش هوصيكى ، ارفعو راسى .
جنه :ميكونش خاطرك الا طيب يابو بتى ياغالى ...
النهارده مرحناش لجواهر لاانى ولا امى وقعدنا طول النهار نكنس ونرتب فالبيت ..وامى بعد ماخلصنا جابتلى طشت وخرفشه وليفه حمره من بتاع النخل وقعدتنى فالطشت وجابت ميه سخنه وجلفتنى جلف لما حسيت الجلد طلع فالخرفشه والليفه واقولها يمه متتعبيش حالك مش هبيض انى لونى على اكده وهى برضو تدعك ولا كنها سامعانى وتقولى اسكوتى دى سبحة العريس ..
نمت بالليل وانا مهدوده من تنضيف اليوم وكملت عليا امى بالسبوح فرهدت جسمى نمت محستش غير وهى عتصحينى تانى يوم الصبح وتقولى قومى عشان تفوقى احسن ماياجى العريس يلاقى عنيكى وارمه وانتى اصلا عنيكى مش باينين لوحدهم
قمت وانى متغاظه من كلام امى عن عنيا ...مالهم عنيا يعنى ؟ صغيرين بس كيف عيون الصقر بيشوفو الابره من فوق الجبل ...مش احسن مايكونو كيف عيون البقر ومن غير نظر !
انى اصلا مشيفاش فيا حاجه وحشه ...كل ماابص لحاجه فيا اقول فيه غيرى يتمناها ومش طايلها واحمد ربنا عليها ....
قطع تفكيرى مع نفسى ضربة مقرصة عيش لبست فدماغى شيعتهالى امى لما عوقت ومقمتش ...
مسكت المقرصه ونزلت جرى رحت دخلت الحمام وغسلت وشى ...مع انى مكنتش عاوزه اغسله حساه لساه نضيف من جلفة امى بتاعت امبارح 😄
طلعت عشان اساعدها فالفطور لقيتها محضراه وقالتلى متمديش يدك فحاجه النهارده انتى عروسه ..
قلتلها يمه حالا عملتينى عروسه دا الراجل جاى لسه يشوفنى ويقول رأيه يعنى متتعشميش قوى ..
لسه هبص لامى لقيت فردة شبشبها جت فحضنى معرفش ازاى سبحان الله وهى بتقولى ...
يابومه الملافظ سعد والخشم يسقط والحجر بيلقط خلى ملافظك زينه واستفالى خير تلقى خير . قومى يلا خشى اوضتك والبسيلك هدمه حلوه يمكن الراجل ياجى فاى وكت
قلتلها يمه البس ايه من دلوك ايه اللى هيجيبه الصبح بدرى اكده بايت يحلم بيا ؟!
فجأه لقيت فردة الشبشب التانيه بقت فحضنى جار اختها ، رميتهم وقمت جرى لما لقيت امى راحت على الفرن وسحبت البشكور بتاع الخبيز وجايه جرى عليا بيه ...
لبست جلابيه حلوه كنت مفصلاها اسبانى كانت طالعه موضه جديده بشرايط اكده عالجناب وشديت الشرايط على اخرهم ولبست شال بلون الجلابيه وبصيت لنفسى فالمرايه وقلت لنفسى ...يختى عليا شكل الممثلات بتوع التلفزيون بالظبط ..رميت بوسه لنفسى وطلعت قعدت جمب امى وابوى ولقيتهم خلصو فطور فطرت لحالى ..
ابص على امى القاها تبص على ابوى ..ابص على ابوى القاه يبص لامى وباين عليهم الخوف انى معجبش العريس ويطفش اول مايشوفنى .....طب والله القزين ده صعب عليا من قبل مااشوفه 😄
شويتين والباب خبط امى قالت دا اكيد العريس قلت وه دا كنه بايت يحلم بينا صوح ...مستعجل على رزقه الشقى .
زغرتلى امى وقالتلى قومى خشى جوه الاوضه ومتطلعيش غير لما ابوكى ينده عليكى ...احسن العريس يقول عليكى خفيفه ..سامعه .؟
هزيت دماغى وشلت صنية الفطور معاى ودخلت الاوضه وسمعت حس ابوى عيرحب بيه والظاهر معاه حد تانى ....
دخله ابوى المنضره واتكلمو شويه قليلين ومره وحده جفلت لما سمعت حس امى وهو عتزغرت ...شويه وامى ندهتلى عشان اخش للعريس يشوفنى ....
بصراحه الحته دى احلى حته عندى فالموضوع ...لحظة خروج الوحش 😂
دخلت المنضره ولقيت اتنين شباب قاعدين واحد باصص فالارض والتانى باصص عليا عادى ...ابوى قلى سلمى على عريسك انى معرفتش هو مين فيهم راح مشاورلى على اللى باصص فالارض ...
مديت ايدى وهو رفع وشه ولقيت خشمه اتفتح وعنيه بعررت وبص لصاحبه بخوف وانى كتمت ضحكتى بالعافيه على منظره ...
مد يده سلم عليا وابوى شاورلى قعدت على الدكه التانيه على يمينهم وابوى قاعد على الدكه اللى قصادى ..
دقيقتين وابوى قال للى مع العريس تعالا نسيبو العرسان مع بعض شويه
لكن لقيت العريس تبت فيه بخوف ياعينى ومرضيش يسيبه يطلع ...كنه خايف آكله واحنا لحالنا ....
بصراحه صعب عليا وهو بيبصلى وشايفه الخوف فعنيه ...
اتوشوش شويه مع اللى جاى معاه وبعدين اللى جاى معاه سابنا وطلع .
لقيته معيتكلمش قلت اتكلم انى
سألته عن اسمه وضَحكت معاه شويه واتكلمنا كلمتين وبعدين حسيته مش مرتاح فقعدته وفعلا دقيقه واستأذن ومشى ..
لكن رجع تانى ورمالى فلوس عالصينيه ومشى ...قلت فسرى طب ياحزنى الفلوس دى العريس عيديها لعروسته لما تعجبه انتا ياحزين عترميلى فلوس ليه ...كفاره عن زنب عملته فحياتك وحاسس ان ربنا عاقبك بيا 😄
امى دخلت عليا رامحه وقالتلى هاه عجبك وعجبتيه ..طمنينى ..قالك ايه
قلتلها انى ان كان عليا طالما عاجب ابوى وعاجبك يبقى عجبنى هو عاد لو رد تانى يبقا عجبته مردش تانى يبقا خلاص عاد ربنا نجاه ..
امى قالتلى :له اطمنى من الناحيه دى عشان هو قرا فاتحه خلاص والفاتحه نص الكتاب مهيقدرش يرجع فيها ...وبعدين مش راميلك فلوس عالصينيه اهو يبقا عجبتيه ..
قلتلها يمه اكيد الفلوس دى عتق رقبه سايبهالنا عشان نحرره من الجوازه دى 😂
امى مالت عليا وعضتنى فدراعى وانى ضحكت وبعد اكده حضنتنى وباستنى بفرحه وانى مستغربه من الست اللى بتتحول كل ثانيه دى .
وللحكايه بقيه


بدل ماتدور وتبحث علي الروايات خليها علي تليفونك وحمل تطبيقنا

تحميل تطبيق سكيرهوم
تعليقات



حجم الخط
+
16
-
تباعد السطور
+
2
-