الفصل الخامس
فتحت الظرف . كان فيه صور
من شده الصدمه الظرف وقع من ايدى
اول صوره كانت صوره طفله لسا مولوده بقالها فتره صغيره جدا .. كان مكتوب وراها " اى رأيك ف بنتنا الجديده انا و حور . عيلتنا زادت فرد "
الصوره الى بعدها كانت صوره لحور و حاتم وفريد والطفله وكلهم سعداء وبيضحكو ..
كان مكتوب وراها " شايف اد اى احنا عيله سعيده . اظن دا يثبتلك انك مجرد شخص حور استغلته عشان تبقا جميله .. هى الى قالتلى كدا بنفسها .. قالتلى انها اضطرت تستغلك عشان ارجعلها لما تصلح عيوبها . عموما شكرا انك كنت مغفل "
وقفت مصدوم و بعدها جريت ناحيه الحمام وقفلت الباب
فضلت اعيط لوقت طويل
هو انا فعلا مجرد شخص حور استغلته وخلاص .. طيب و نظراتها ليا كانت كدب ؟! طيب و دفاعها عنى وقت خناقتى انا وحاتم كانت كدب بردو؟! لا لا مش هى دى الانسانه الى حبيتها .. اكيد فيه حاجه غلط بس اى هى .. هو اكيد مأجبرهاش تضحك فالصوره مثلا و بعدين لو كانت علاقتهم مش كويسه وكانت بتكرهه فعلا ف ازاى بقا عندهم طفله تانيه !!
تهت فكل الافكار دى
مفقتش غير على صوت ملك وهى بتخبط الباب جامد
÷ افتح الباب يا شادى .. مامتك قلقانه عليك جدا وهيجرالها حاجه .. شادى انت بقالك ٥ ساعات حابس نفسك فالحمام طيب طمنا انك بخير حتى . قول اى حاجه
بعياط £ شفتى يبنتى اكيد جراله حاجه
÷ اهدى بس يا طنط شادى عارف ان الانتحار حرام . اكيد .. اكيد مش هيعمل كدا
بعياط £حتى انتى متوتره اهو . بتحاولى تطمنينى مع انك انتى ذات نفسك قلقانه
فتحت الباب بتاع الحمام و خرجت
ماما حضنتنى جامد
بعياط £ شادى انت كويس صح ؟! مفيش فيك حاجه صح !
= انا .. انا كويس . ينفع بس تسيبينى انام
مسحت دموعها
£ طبعا براحتك يا حبيبى تعالا اسندك لغايه السرير
نمت عالسرير واتجاهلت وجود ملك تماما
÷ شادى .. قوم يا شادى تعالا انا هفسحك بس بلاش تفضل نايم كدا
= سيبينى فحالى يا ملك ...
÷ لا مش هسيبك يا شادى انت كدا بتضيع نفسك !! الموضوع دا من سنه ومع ذلك انت لسا متأثر منه و دا معناه انك لسا بتحبها يا شادى .. هى عاشت حياتها خلاص يا شادى ونسيتك كمان .. انت لسا بتفكر فيها ليه !!
بعصبيه = بقولك يا ملك امشى وسيبينى . افهمى بقا انا مش بحبك . مش بحبك يا ملك ولا عمرى حسيت ناحيتك بحاجه . انا بكرهك يا ملك سيبينى فحالى بقا
ملك بدأت تعيط زى الاطفال
÷ بتكرهنى يا شادى ؟! طيب انا عملتلك اى عشان تكرهنى . انا كان عندى امل انك تحبنى فيوم ... بس مش مشكله خلاص .. انا هسيبك فحالك
واخدت شنطتها ومشيت
كانت ماما واقفه عند باب الاوضه وسامعه كلامنا
لما ملك خرجت من اوضتى ماما حضنتها
£ اهدى بس يا ملك هو اصلا مش عارف بيقول اى صدقينى
÷ لا يا طنط الانسان لما بيكون متعصب بيقول الحقايق .. هو فعلا عمره محبنى ولا حتى هيحبنى .. ان مجرد واحده بتزعجه فحياته وخلاص ..
ومشيت بسرعه
ماما وقتها دخلت اوضتى
وضربتنى بالقلم
£ بقولك اى . انت فاكر نفسك مين عشان تجرحها كدا !! عمرك مهتلاقى حد يحبك كدا .. دى كانت معتبرانا عيلتها .. طيب تقدر تقولى كدا تعرف اى عن ملك ؟! انت اصلا مكنتش مهتم تعرف عنها اى حاجه ولا مهتم انك تقرب منها ولا تحاول تحبها حتى . كان كل همك انكم تتفسحو تهزرو وخلاص .. يعنى انت زيك زى حور . استغليت ملك عشان تبقا احسن وتخرج من ازمتك وخلاص .. مش انت ابنى شادى الى كنت دايما بفتخر بيه ... طيب تعرف ان ملك مامتها وباباها ماتو فالسنه الى انت سبتها فيها عشان حور ؟! كانت حالتها زى الزفت وملقتش اى حد يقف جمبها وانت ولا سألت عنها حتى من سعت مقابلت حور ومقدرتش تشوف الحزن الى ف عينها دايما !!! دا انا الى مش بشوفها كتير شفته ف عينها ... طيب تعرف انى ف مره سألتها ليه واقفه جمب شادى دايما ، عارف قالتلى اى ؟! قالتلى عشان بعتبركم انتو الاتنين عيلتى .. انت جرحتها جامد المره دى حرام عليك فوق بقا من الى انت فيه
وخرجت من اوضتى وقفلت الباب
انا فضلت تايه ف افكارى . طيب هى ليه مقالتليش حاجه . كنت دايما انا الى بحكى و دايما الى بشتكى لكن هى عمرها محكتلى حاجه . عمرها محكتلى عن وحدتها وهى عايشه وحدها ولا انها لما بترجع بيتها مش بيكون فيه حد مستنيها ... انا كنت فعلا مغفل
نمت وانا بفكر
صحيت اليوم الى بعدو كأنى انسان جديد
لبست و ركبت العربيه و رحت ناحيه بيت ملك
= ملك افتحى انا شادى ..
مكنتش راضيه تفتحلى الباب كانت بتكلمنى من ورا الباب
÷ عايز اى تانى يا شادى ؟! انا سبتك اهو فحالك زى مقولتلى
= افتحى بس ..
÷ ماما وبابا نايمين وطى صوتك يا شادى ...
ف سرى = ماما وبابا !!!
= طيب خلاص اهو هوطى صوتى . افتحى طيب هسلم على عمو وطنط و همشى
÷ قلتلك نايمين !!
= طيب افتحى انا هفسحك المره دى
÷ هتحكيلى عن حور زى كل مره ؟
= لء متقلقيش خلاص انا مسحتها من حياتى
÷ بجد ؟! لا انت بتضحك عليا عشان افتحلك بس
= اه والله خلص موضوعها
فتحت الباب و بصتلى بنظره طفوليه
÷ هتفسحنى فين
حاسس كأنى بشوف ملك تانيه معرفهاش . عينها العسلى و شعرها الاسود القصير وملامحها الطفوليه ... ازاى مأخدتش بالى من كل دا واحنا اصحاب بقالنا سنين
÷ اى غيرت رأيك ولا اى !!
= هاه .. لا طبعا . البسى بس و هتشوفى هفسحك فين
÷ مفاجأه يعنى ؟
= اه
÷ بس انا الى دايما كنت بعملك مفاجآت وبفسحك ..
= انا الى هفسحك وهفاجأك النهارده يلا بقا البسى قبل م اغير رأيى
÷ لا خلاص اهو هلبس . بص وطى صوتك عشان ماما وبابا نايمين
بحزن = تمام
هى حالتها كدا من امتى ... هى لسا مصدومه من وفاه مامتها وباباها ؟! مش قادره تصدق انهم ماتو !! ماما قالت انهم ماتو فالفتره الى سبتها فيها يعنى من سنتين او سنه ونص ..
= مين القمر دى يا ناس
÷ بس بقا
= بتتكسفى !
÷ اى انا مش بنت ولا اى !! اكيد بتكسف
= لا انا كنت فاكرك جعفر 
÷ طيب امشى يا خفيف
واحنا بنتمشى قلت استغل الفرصه واسألها عالحوار يمكن بس هى مش عايزانى اعرف انهم ماتو ف بتمثل انهم عايشين
= انا مشفتش عمو وطنط من بدرى .. اى رأيك اعزمهم عالعشا النهارده
÷ ليه هتعزمهم مثلا
= عادى عشان اتعرف عليهم اكتر وكدا
بعدين غمزتلها
= مش يمكن نكون نسايب فالمستقبل 
فجأه ملك وشها حمر جامد
÷ انت بتقول اى !!
= مش بقول حاجه . ها هتقوليلهم ولا لا
بفرحه وحماس ÷ اه هقولهم اول لما اروح
لو كانت بتمثل انهم عايشين عشان مش عايزانى اعرف كانت هتخترع حجه وترفض .. مكنتش هتوافق ابدا ...
اتفسحنا واتمشينا و ضحكنا وهزرنا وكان يوم جميل
وصلتها لبيتها
= يلا بقا اشوفك بكرا فالعزومه . هبعتلك لوكيشن المطعم
ب ابتسامه ÷ مااشى مش هنتأخر
روحت البيت و انا مش مصدق ان ملك فعلا مريضه نفسيه . هى ازاى حالتها كدا ومع ذلك كانت بتواسينى دايما و بتخلينى اضحك
رحت لماما عشان اصالحها
= يلا يا ماما بقا سامحى ابنك اللطيف
بعدين ابتسمت ابتسامه طفوليه
= حد يزعل من القمر دا بردو ؟!
£ طيب خلاص سامحتك انا اصلا مش بعرف ازعل منك بس توعدنى انك تهتم بملك زى م هى كانت مهتمه بيك
= اوعدك انى هخطبها
£ نعم!!
= اى مش كنتى شايفاها مناسبه ؟انا كمان فكرت و لاحظت انى بدأت اتشدلها و قررت اخطبها
£ بجد !! امتى طيب نروح نخطبها
= لسا مش دلوقتى .. محتاج احل مشكله كدا الاول
وحكالها الى حصل
£يعنى هى لسا فاكره انهم عايشين ؟! طيب ازاى وهى ال حكتلى بنفسها انهم ماتو .. معنى انها حكتلى يعنى هى متقبله الوضع
= حقيقى مش عارف بس هنشوف بكرا فالعزومه
* اليوم الى بعدو*
= ها يا ملك جهزتو ؟! انا جاى اخدكم دلوقتى
بفرحه ÷ اه جهزنا بس متحيش انت تاخدنا . بابا هيوصلنا بعربيته . نتقابل فالمطعم
= هاه .. تمام
رحت المطعم بس طريقى اخد وقت اطول لان ملك بيتها اقرب للمطعم
اول لما وصلت رنيت عليها اقولها انى وصلت
÷ استنى انا هاجى اخدك للترابيزه
= تمام ...
فعلا اخدتنى
÷ طبعا يا شادى انت عارف ماما وبابا صح ؟! سلم عليهم متتكسفش هما بيحبوك على فكره
= هما فين ماما وبابا دول ؟!!!
