Ads by Google X

القائمة الرئيسية

الصفحات

رواية الاسطي حور الحلقه الثانيه

 




_ مشغله نسوان معايا  ولا رجاله ..
=يسطا  ده عفى اوى...  بس احنا علمنا عليه بردو
_هأو .. يا فرحتى.. علمتو عليه وهو علم عليكم  انتم الثلاثه ..    
بصت للاثنين اللى واقفين  وقالت:باين على وشكم انكم  ضربتوه جامد اوى ..  ولا يا سيد
₩نعم يا معلمه
  ادته فلوس وهى بتقول: روح للصيدليه خليهم  يشوفوا الكدمات اللى فى  وشهم .. روحوا معاه 
  نفخت  بضيق وهى   بتقول  بصوت عالى: رجاله ورق صحيح ... 
___________
  راح المستشفى .. ودخل علشان يخيط جرح ايده  ..    كان  كل همه انه يعرف مين  اللى بعتله العيال ديه ... الدكتور اداله البنج وخيط الجرح وهو مش حاسس بأى حاجه ... 
الدكتور: احم..   استاذ تامر.. انا خلصت .. 
مسك القلم وكتب ادويه  وادهاله .. وقاله:  لازم تلتزم  بالادويه ديه علشان الجرح يلم  .. 
اداله الروشته  وهو قام جاب الادويه وروح البيت .. 
  بص لايده المجروحه .. والادويه واتنهد   بالم لان اثر البنج راح وغير هدومه. ونام 
_______________
   الساعه ١٠ الصبح.   حور كانت نايمه والباب بيتطبل عليه: اصحى يا نايم  صحى النوم .. ديه الساعه  ١٠ ما يلا  قوم .. بت يا عطيه.. قومى  هنتطرد من المحاضره  
فتحتلها حور وهى بتدعك عينيها وبتقولها:  يخربيت زنك يا شيخه.. انا مشوفتش كدا فى حياتى
كارما: تؤتؤ تؤ.. الجميل  زعلان ليه .. يالا عندنا محاضره الساعه ١١  يا حلوه .. 
حور: حاضر هلبس واجى .
كارما: ايه البيجامه القمر ديه .. ما تديهانى 
حور: اتفضليها .. ممكن ادخل اغير بئا
  كارما:هو انا منعتك .. ما البيت بيتك 
حور بصتلها ودخلت غيرت هدومها 
كارما : صباح الفل يشبح..  نورت المنطقه 
حور ضحكت وهى بتقول: يخربيت هبلك بجد .. يالا يا بنتى هنتاخر 

راحوا الجامعه وحضروا اول محاضره 
كارما: انا تعبت.. وهو بيشرح بقاله ٣ساعات فى نفس المسأله 
حور:معلش 
كارما لاحظت ان حور. مش مركزه  فقالت: بتفكرى فى حاجه
حور انتبهت وقالت بتوتر ملحوظ: ها .. لا 
كارما بعدم تصديق: طيب ..  المحاضره الجايه عندنا  دكتور تامر  هتحضرى؟؟
حور: لا مش هحضرها .. احضريها انتى وانا هستناكى هنا
كارما:طيب 
  سبتها كارما وغابت  ٣ ساعات وبعدين جت وقالت:   الدكتور تامر غايب .. وادانا بداله دكتور  سامح
حور: غايب ..
  ابتسمت وهى بتقول: كويس .. طب يالا نمشي 
  مشيوا من الجامعه وكل واحد روح  بيته  بدون اى أحداث تذكر 
  اليوم اللى بعده  راحوا الجامعه   
كارما: اظن هتيجى معايا المحاضره .. دكتور سامح هو اللى هيدينا  النهارده  
حور بتفكير: طيب .. يالا ...
دخلت حور  وكارما واستنوا دكتور سامح... دخل دكتور سامح وشرح   وبعد ساعه استاذن من الطلاب .. ان دكتور تامر هيدخل يكمل معاهم  
حور  : اوف .. كان لازم يجى .  ايه الحظ النحس ده 
كارما:معلش  استحملى ساعتين وخلاص واهدى خالص 
حور: حاضر .. هنصبر 
دخل دكتور تامر  و ابتدى  يشرح الدرس.. والطلاب لاحظوا ايده 
  وبصوا لبعضهم بفهم .. وكارما بصت ل حور ..  اللى كانت بتحاول تدارى ابتسامتها خلصت المحاضره وخرج الدكتور.  
وحور وكارما خرجوا وقعدوا فى الكافتيريا 
كارما  بشك:حور .. انتى ليكى ايد فى اللى حصل لدكتور تامر 
حور بثقه:  وانا مالى .. هو اى حد يتعور فى الجامعه ابقى انا اللى عورته .
كارما بشك: مش مرتاحه لكلامك .. 
حور:لا ارتاحى .. انا مليش دعوه .. انا لو عايزه اضره ..  هيكون  الجرح فى بطنه  او رقبته مش ايده  
كارما: يا ستار يارب .. ايه يا بنتى .. ده طردك هو علقلك حبل المشنقه .. 
حور بصتلها ورفعت حاجبها وقالت: لو لسبب ماشي.. لكن ده بصلى وبعد كدا طردنى من غير سبب ...
كارما اتنهدت وقامت  هى وحور يمشوا  .. اعترض طريقهم ولدين 
_  اول مره اشوف. واد قمر .. 
=سيبك من ديه .. ديه مسترجله ..   اللى معاها ديه  ....
_   ديه عيونك ولا لينسيز 
  حور بصتلهم بعينها وهى بتقول بتهديد:   امشوا... 
_ لا يا شيخه
كارما  عرفت ان حور مش هتسكت  وقالتلهم برجا: امشوا انتوا الاتنين وانفدوا بجلدكم وحافظوا على الباقى  من حياتكم ..
= خاف  يالا ..  
جيه يحط ايده على وش حور وهو بيقول: حد يخاف من القمر ديه   






لكن حور بصتله وقالت وهى بتمسك ايده: لازم تخاف
مسكت الواد من ايده  وبصت فى عينه  وهى بتقوله: مش قلتلك خاف
وفى ثانيه واحده كانت   ايده ورا ظهره .. 
حاول انه يستقوى ويضرب لكن هى همست فى ودنه وقالت:  تؤتؤ .. متحاولش. . وزقت الولد برجلها وقع  على الارض 
  كل ده والطلاب كلها  عامله دايره محاوطه بيها حور .. ومحدش بيقرب منها   
الولد التانى جى يشوف صاحبه   راحت برجلها ضربته   على  ايده وهى بتقول: علشان ايدك تتجرأ وتلمسنى تانى  يا حيوان  
  فجاءة سمعوا  صوت دكتور  تامر وهو بيقول: فيه ايه .. ايه اللمه ديه 
بص شاف حور واقفه. و ولدين واقعين على الارض .. 
  زعق وهو بيقول: مين عمل كدا 
مفيش رد 
قال تانى بصوت اعلى: مين عمل كدا؟
  حور ردت وهى بتقول: انا 
بصلها  بقرف وقال: ورايا على مكتب العميد  .. انتى والاتنين دول 
مشيت حور على المكتب وشوية طلاب سندوا الولدين  و ودوهم على مكتب العميد 
  حور وكارما  والولدين ودكتور تامر  وبعض الطلاب واقفين فى مكتب العميد 
دكتور تامر: الطلاب دول مش جايين يدرسوا .. جايين  يبلطجوا على بعض .. واولهم البت ديه اللى مش معروف هى بت ولا واد  من لبسها ده 
العميد  بصلهم وبعدين قال: حور ..  ديه  ما شاء الله عليها   بتطلع من الاوائل كل سنه 
دكتور تامر: حور مين يا دكتور .. انا بتكلم على البت ديه اللى اسمها عطيه 
العميد ضحك وقال: ههه..  هى اسمها حور وعطيه .. الاتنين .. هى بتحب  ينادوها عطيه .. لكن اسمها الحقيقى حور
  دكتور تامر فى نفسه: الاسم ده خسارة فيكى وبص للولدين وقال:ايه اللى حصلكم 
واحد اتكلم: مشيين يا دكتور فى امان الله .. لقيناها جايه بتكلمنا وبتطلب كشكول للمحاضرات .. ولما رفضنا زعقت.  وكانت عايزه تتخانق معانا 
حور  اتكلمت بصوت عالى وقالت:  كداب  .. والله كداب .. واسال اى حد من الجامعه  .. واسال كارما
  دكتور تامر بتريقه: صاحبتك 
وبعدين كمل:  من  ساعة ما شوفتها وهى عامله مشاكل .. 
حور بصتله بغيظ وعينها مليانه دموع وهى بتقول  بوجع : والله اللى مش هحلف بيه كدب .. هما اللى اعترضوا  طريقنا  واحنا خارجين   ونبهتم بس فضلوا واقفين .. 
ولد من اللى ضربوا:  هيا اللى بدات .. الظاهر ان ابوها معرفش يربيها 
  خلص جملته من هنا   وكانت حور نازله عليه بالبونيات 
  تامر شدها والعميد  معاه من على الولد     وهى قامت  بصعوبه من عليه وقالت:  انا ابويا ربانى كويس .. وعرفنى ازاى اتعامل مع الاشكال اللى زيك 
العميد بغضب: حور .. كفاية مش عايز كلام كتير علشان  متترفديش





حور بصت للعميد ولدكتور تامر. وهى بتحاول تتظاهر بالقوه
كارما بصتلها وعرفت ان حور جابت اخرها  وممكن تعيط فقالت :  جم عاكسونا   وقولتلهم امشوا مرضوش .. وحضرتك ممكن  تسال باقى الجامعه 
تامر : ها .. هيعكسوا ديه!!
حور بصتله وحاولت تستقوى وهى بتقول: ومالها ديه يا دكتور .. بطل تقل من الناس...  لان الدنيا  دواره
العميد سال بعض الطلاب اللى واقفين واللى اكدوا على كلام كارما وحور 
العميد:  رفد شهر ليكم .. علشان  تتعلموا بعد كدا لما تيجوا الجامعه  انها مكان للعلم  مش لقلة الادب بتاعتكم
تامر فضل ساكت  والطلاب كلهم مشيوا ما عدا  كارما وحور
العميد: معلش يا حور على اللى حصل ..   اوعدك مش هيتكرر تانى ..  وبعتذر عن كلامى  ارجو  انه ده ميتكررش تانى  وبص لتامر وقال: واسف على كلام دكتور تامر  عارف انه كلامه جرحك .. 
حور بصتله وقالت:  ولا يهمك يا دكتور  .. وشكرا ليك .. يالا يا كارما
خرجت كارما مع حور
العميد: مينفعش الطريقه اللى اتكلمت بيها مع الطالبة يا دكتور  .. ديه مهما كان انسانه 
تامر:وانا قولتلها حاجه   انت مش شايف شكلها وطريقتها  فى الكلام عامله ازاى
العميد:احنا مش بناخد بالشكل يا دكتور .. ياريت تعامل الطالبه احسن من كدا ... علشان متضرش اخد منك موقف قانونى 
الدكتور بص للعميد بغضب  وخرج من المكتب  .... 
   _________________
حور وصلت  وقبل ما تطلع بيتها  فكرت تطمن على الورشة  .. واول ما دخلت لقت  الرجاله قاعدين بيشربوا شاى .. زعقت وهى بتقول:   جايباكم علشان كلكوا تشربوا شاى  وتسيبوا الشغل يا نطع منك ليه 
_كنا بناخد استراحه يسطا ..
حور:استراحة لما تلهفك  انت وهو .. الشغل كتير .. قوموا هبدا فيه معاكم
=اطلع ارتاح يسطا..  ده انت حتى تعبان 
حور بغضب: ملكش دعوه منك ليه .. يالا كل واحد على شغله..
الكل بدأ يشتغل  وحور بتساعدهم وترتاح شويه .. 
_________
تامر  خرج وركب عربيته وهو مروح على البيت .... 
العربيه بتاعته  فجاءة حصلها حاجه 
  نزل وفتح العربيه ولقى دخان كتير طالع منها
خبط رجله فى كوتش العربيه ...  وقعد يدور على تاكسي  لكن للاسف ملقاش 
تامر:هو يوم اسود من اوله
  شاف واحد ماشي فى الشارع فساله: لو سمحت فيه ميكانيكى قريب هنا 
_ ايوا يباشا الاسطى جمال..
تامر:طب اروحله منين؟؟
_   حضرتك هتاخد الطريق ده  وتحود يمين هتلاقى  ورشة الاسطى جمال  ..
تامر شكر الرجال   و ساب العربيه ومشي لحد الورشه ..  
بص للرجاله  الشغاله   وقال: لو سمحت  عربيتى كانت عطلانه  على الطريق وعايز حد معايا يصلحها 
= يسطا فيه واحد  عايز حد معاه   يشوف عربيته على الطريق 
  خرجت من تحت العربيه وهى بتزعق وبتقول:  مش شيفنى شغال يالا ..  ما تشوف حد معاه .. بصت لملامح اللى واقف مع الواد   وقامت وقفت 

 #الاسطى_حور 

                        الحلقه الثالثه من هنا. 

تعليقات