رواية يونس الفصل الاخير
دخل يونس الشركة ودخل علي مكتبه .. شاف ورقة بيضا محطوطة علي المكتب ومكتوب عليها ...
"" الحياة صعبة ومحتاجة محاولات .. الحب مفتاح من مفاتيح الحياة بس محتاج باب ، عشان تعدل حياتك لازم تبادر وتمشي خطوتين لقدام وتنوي انك تكون من أهل اليمين وتفتح الباب اللي ربنا هيحطه في طريقك بالمفتاح اللي في ايدك "الحب"
يونس : مفتاح .. ايدك .. خطوتين .. باب .. يمين .. الحب
فتح يونس درج مكتبه لقى ظرف أبيض فيه مفتاح
اخد المفتاح وقفل الدرج ، خرج من مكتبه وقفل الباب وراه ، مشي خطوتين لقى اوضتين واحدة يمين وواحدة شمال
اتوجه ناحية الباب اليمين ، طلع المفتاح اللي اخده من الظرف وفتح بيه الباب ودخل الاوضة
لاب توب مفتوح وفيه فيديو متثبت علي علامة start
داس علي العلامة وبدأ الفيديو
قاعدة جنة قدام الكاميرا بتتكلم وعيونها مدمعين
أنا متأكدة ان اللي بيشوف الفيديو دلوقتي انت يا يونس عشان انت ذكي واكيد فهمت اللغز وقدرت توصل للفيديو دا ، ومدام وصلتله ففي الوقت اللي انت قاعد تتفرج فيه انا هكون بين ايدين ربنا
سألتني كذا مرة عصام طلب مني ايه مقابل المعلومات اللي اداهالي ومقابل إنه يسيبني وانا دلوقتي بجاوبك .. طلب مني حاجات كتير اختصرتها كلها في اني قررت اضحي بنفسي عشان انقذك انت والناس اللي بحبها مدام هو شايف بالطريقة دي هيقدر يشفي غليله منك
وانت بتشوف الفيديو دلوقتي هكون انا اتنقلت للعالم التاني ، اللوكيشن هيجيلك علي الشاشة بعد ما الفيديو يخلص ، كل اللي طلباه منك تروح تاخد جثتي وتدفنها في مكان كويس مع ناس كويسة
شاف يونس اللوكيشن ومسك اللاب توب رزعه في الارض ، وشه احمر ، عروق جسمه كلها نفرت ، عيونه برقت وحواجبه اترفعت .. بدأ يكسر ويدغدغ في المكتب وفي كل حاجة وبعد ما الموظفين اتلموا وبدأوا يحاولوا يسيطروا عليه سابهم كلهم ونزل جري ركب عربيته وقبل ما يتحرك
يونس : هلحقك ياجنة ولو رجعتي تاني بطن أمك اللي ماتت ، مش هسيبك تضيعي مني لو آخر يوم في عمري ولا هدي فرصة لمخلوق يمس شعره منك
داس بنزين علي أعلى سرعة واتحرك بالعربية في إتجاه اللوكيشن اللي شافه في الفيديو
وصل مكان مهجور فاضي وسقفه عالي بدأ ينده على جنة وصوته يرن في المكان كله ويدور عليها يمين وشمال ويفتح في الأبواب ، لحد ما فتح باب منهم
٣ جثث مرمية ع الأرض مفتوحين ومسروق اعضاءهم
وقف يونس مصدوم ومذهول من المنظر ووشه جايب ألوان قرب منهم وحاول يتأكد إنهم ميتين فعلاً وللأسف في الوقت دا ايده اتملت دم ، وقبل ما يلحق يمسح الدم بيتلفت وراه
الحكومة جاية بقوة كبيرة جدا وداخلة المكان
الظابط : بقا انت بقا اللي الدنيا مقلوبة عليك بالمنظر دا ومحدش قادر يوقعك !!
يونس بصدمة : انا ايه ؟؟!!
الظابط : انت تاجر الأعضاء الكبير اللي قالب الدنيا بقالك سنين وياما حاولنا نمسك عليك حاجة معرفناش ، بس الحمدلله المرة دي اتمسكت متلبس وانت ناقل ٣ جثث بس الغريب ... حتى الدفن استخسرته فيهم !!
جايبهم مخزن مهجور في مكان محدوف عشان محدش يقدر يوصلهم لحد ما يتحللوا وتكسنهم وترميهم في الزبالة
يونس : ياباشا انت فاهم الموضوع غلط انا ...
الظابط : مش شغلتي اسمع منك تبريرات ، شغلتي اني مسكتك في الجرم المشهود .. وقول اللي في نفسك في النيابة بقا
خدوه ع البوكس
اتحطت الكلبشات في ايد يونس وخرج مع الشرطة علي برا وهو ماشي ساكت مصدوم وفجأة .. جنة جاية من بعيد ومعاها عصام ، وقف يونس مكانه حوالي دقيقتين بيبصلها من بعيد وساكت وبعدين
يونس : بقولك ايه يا باشا بعد اذنك آخر طلب .. هقف اتكلم مع جنة كلمتين بالظبط ونمشي
الظابط : بسرعة يابني عشان نخلص
راح يونس وقف قدام جنة
يونس : أول ما حسيت إنك في خطر جيت جري وانا الدموع مالية عيني عشان انقذك ، مكنتش اعرف إن كل دا كمين عملاهولي عشان تسلميني تسليم أهالي
عملتلك ايه ياجنة ؟ شوفتي مني ايه وحش ، اقولك علي حاجة كنت مانع نفسي اقولهالك من زمان عشان مأذيكيش
*انا حبيتك ياجنة * 
جنة : ايه !!
يونس : حبيتك من أول يوم شوفتك فيه لما كنتي سايحة في دمك علي باب بيتي وشيلتك جريت بيكي يومها كأن عيل من عيالي اللي تعب او كأن فيه صلة بتربطني بيكي وقعدت أيام مستنيكي تفوقي ومعرفش السبب مع ان دوري معاكي خلص لما جبتك المستشفي ، ويوم ما فوقتي وفتحتي عينيكي كان أول يوم قلبي يدق فيه لبنت .. اول ما عيني جت في عينيك عرفت إني غرقت في تفاصيلك ومش هنجى تاني ، مع كل يوم كان بيعدي مع كل مرة شوفتك فيها مع ضحكة بتضحكيها مع كل مرة قربتي مني وحسيت بنفسك فيها كان حبي ليكي بيزيد ويكبر
ومع كل يوم كان خوفي عليكي مني بيزيد عشان انا حياتي مش سهلة واللي يقرب منها بيتأذي فمكنتش عايزك تبادليني إحساس الحب ، مكنتش مستني منك تحبيني بس في نفس الوقت مكنتش مستني منك تكرهيني ياجنة
وبالنسبة ليوم خطوبتنا اللي كانت مزيفة انا مأذيتكيش انتي انا اذيت نفسي عشان كنت بتمنى إنها تكون حقيقة وتكوني ملكي بس كنت خايف عليكي والسبب قولتهولك قبل كدا "اني سكتي كلها ألغام "
جنة : وانا رديت قولتلك ايه ؟
"وانا الطريق اللي همشي فيه من غيرك هتحرق "
يونس : يعني ايه !!
جنة : يعني ايه دي هتعرفها دلوقتي حالاً
سابته ومشيت وراحت وقفت قدام الظابط
جنة : من ناحية الجريمة ففيه جريمة ، ومن ناحية مجيكوا هنا فأنا اللي بلغت وجيبت حضرتك هنا .. بس انت مسكت الشخص الغلط ياباشا
الظابط : يعني ايه ؟؟ وضحي كلامك
جنة : مش هوضح بكلام ، انا هسمع حضرتك تسجيلات هاتعرفك المفروض تمسك مين وتسيب مين بس قبل مااشغل التسجيلات حضرتك تتحفظ علي كل اللي في المكان وأولهم .. عصام اللي واقف هناك دا
لف الظابط للعساكر وخلاهم يتحفظوا علي كل اللي موجودين زي ماهما ورجع تاني لجنة وقالها شغلي التسجيلات .. شغلتها
*فلاش باك يوم ما جنة سابت يونس بعد ما عرفت ان الخطوبة مزيفة وراحت لعصام المخزن *
وهي داخلة المخزن عملت الفون علي وضع التسجيل ودخلت .. بدأ يتكلم ويحكيلها قصة كريم اللي ابوها خده وهو صغير وبعدين
جنة : ايه هي الحاجة اللي أقدر اقدمهالك؟
عصام : يونس
جنة : افندم !
عصام : زي ما سمعتي كدا ، تقدميلي يونس
جنة بغضب : انت أكيد اتجننت
عصام : بصي يا جوجو ، في حالة إنك وافقتي علي العرض دا هتساعديني وتجيبي يونس لحد هنا بالطريقة اللي هقولك عليها وفي الحالة دي كريم اخوكي او اللي كان اخوكي واللي متأكد كويس إنك بتخافي عليه زي روحك مش هيتأذي منه شعره
أما في حالة إنك رفضتي بقا ..
جنة : هتعمل ايه وقتها ؟!
عصام : هتبقي انتي الخسرانة ، لأني هوقع يونس يعني هوقعه بس في حالة انك رفضتي كريم هيتاخد في الرجلين معاه وهتبقي بدل ما خسرتي واحد ، خسرتي الاتنين ياقطة
جنة : وعايزني اجيبلك يونس ازاي بقا ؟؟
عصام : تجيبيه ازاي دي بتاعتك انتي هتجيبيه بطريقتك أما هوقعه ازاي دي بتاعتي
جنة : هتعمل ايه يعني مش فاهمة
عصام : فيه جثث كتير فاضيين معايا كنت عايز استغلهم قبل ما ادفنهم ولقيت ان أحسن استغلال ، جثتين في كل مطرح في مخزن ترمي الابرة فيه ترن ، هيدخل يونس بمنتهي البساطة علي ما يلحق يستوعب الموقف هتكوني بلغتي الحكومة هتيجي تاخد يونس متلبس وأبقى انا كدا خلصت منه وخلصت في نفس الوقت من الجثث اللي معايا
*نرجع تاني قدام الظابط بعد ما خلص سماع التسجيلات *
فتحت جنة الواتس اب وفتحت الريكوردات اللي بينها وبين عصام واللي بيقولها فيها ع الخطة اللي هيمشوا عليها
اتصدم عصام وبرق وبدأ يجيب عرق من كل حتة واول ما فكر يجري من قدامهم العساكر لفوا حواليه وفكوا الكلبشات من ايد يونس وحطوها في ايد عصام
الظابط : انا آسف جداً يا أستاذ يونس انا مسكت الشخص الغلط والشخص الصح قدامي
يونس : ولا يهمك يا باشا المهم ان الحق هيرجع لصحابه
عصام وهو طالع البوكس : لو عملت ايه يا يونس مش هتخلص مني ، أما انتي ياجنة حسابك تقل معايا اوي وهاتشوفي مني اللي عمرك ماشوفتيه
الظابط : اطلع يالا ع البوكس بلاش هري كتير
مشيت عربية الحكومة بالعساكر وبعصام واتبقى في المكان يونس وجنة ..
وبدون أي مقدمات جريت جنة وحضنت يونس ودفنت دماغها في رقابته وبدأت تعيط .. وقف يونس مصدوم كذا ثانية وبعدين رفع ايده وحضنها بلهفة فظيييعة
جنة : ظنيت فيا ظن سوء وفكرتني هبيعك
يونس : حطي نفسك مكاني وشوفي هتفكري ازاي ، تعالي ننسى كل اللي فات بقا ، انا مش عايز أفكر في اي حاجة غير انك بقيتي معايا
جنة : انت بتحبني بجد يا يونس ؟؟
يونس : لا مبحبكيش .. انا بعشق التراب اللي بتمشي عليه
المهم ، هتلحقي النهاردة تجهزي فستان كتب الكتاب 
جنة : كتب كتاب مين
يونس : كتب كتابي عليكي ياجنتي 
جنة : انت بتتكلم بجد 
يونس : اومال ههزر في حاجة زي كدا ، مبدأيا هو انا مش هسألك عن رأيك زي الأفلام عشان انا قررت انك بتاعتي خلاص
عيونها دمعت من الفرحة وخدته بالحضن تاني وهي بتقول بعلو صوتها انا بحبببببك اوووووووي ياأحلى حاجة في حياتي
*بعد مرور شهرين *
داخل يونس القسم يقابل عصام .. خرج عصام وشه شاحب وباهت وساكت تماماً
عصام : استريحت لما سجنت أخوك يا يونس ؟
يونس : لو انا واحد جاهل كنت بررتلك موقفك بانك اتولدت لقيت نفسك في الوضع دا وفي الحياة دي واضطريت تكون الشخص البايظ دا .. بس للأسف انا مؤمن جداً بمقولة مهمة
* حتى وإن كان الشر يحاوطك فرائحة الخير فواحة *
انا وانت اتولدنا في نفس الحقيقة بس الفرق الوحيد بيننا إني رفضت أكون زيه ، انت رحبت بالموضوع واستسهلت انك تطلع السلم كله بدرجة واحدة .. ودي كانت نهايتك ياعصام
بالمناسبة : انا قومتلك محامي كبير هيحاول بكل الطرق إنك متاخدش إعدام ، لو رسيت على مؤبد هنقول الحمدلله .. وهتخرج من السجن هتلاقي أخوك مستنيك وفاتحلك دراعاته
عصام : واشمعنا هيفتحلي دراعاته لما اخرج من السجن ؟؟
يونس : وقتها هتكون قضيت عقوبتك ودفعت التمن من حياتك اكتر من ٢٠ سنة ، ولو كنت انت شيطان ففي الآخر
انا أخوك الكبير والدم اللي بيجري جوانا واحد يا عصام
عصام : انا عارف انك هتستغربني بس ممكن أطلب منك طلب ..
يونس : اتفضل
عصام : ممكن تاخدني في حضنك ولو لحظة أحس إن ليا أخ قبل ما يتحكم عليا النهاردة
بصله يونس لكام دقيقة ومن غير تردد قام خده في حضنه وحط ايده علي دماغه وقاله : باب التوبة مفتوح ، أوعدك لو خبطت عليه وفتحلك الكتف اللي حاطط دماغك عليه دا هيحميك لآخر يوم في حياتك
خلص كلام يونس وسابه وخرج رجع علي البيت لبس بدلته لمع جزمته حط البرفيوم بتاعه ، أخد بوكيه الورد اللي سايبه علي ترابيزة الانتريه
نزل ركب العربية اللي متزوقة بالورد في كل حتة وطلع على الاوتيل
دخل ببوكيه الورد ، كانت جنة واقفة بفستان الفرح قدام المراية بضهرها .. حط بوكيه الورد جنبه لف جنة ومسك وشها اللي منور من الفرحة وقالها
يونس :و بقيتي ملكي ياجنتي
جنة : أوعدك من الليلة دي كل حاجة فيا تنتمي ليك
باس دماغها وباس ايديها الاتنين ومسك ايديها ونزل على سلم القاعة بدأت أصوات الأغاني تعلى وفرقعة صواريخ البهجة تزيد
صفوة واقفة عيونها مش مبطلة دموع من فرحتها
كريم مش قادر يسيطر علي سعادته بفرح أخوه واخته في وقت واحد
مصطفى عمال ينظم كل حاجة في الحفلة ببهجة وفرحة فظيعة
ولما طلع يونس وجنة ع الاستيدچ مسك يونس الميكروفون وبص لجنة
يونس : قدام كل الناس دي انا حابب أقولك وبمنتهى الفخر .. انتي الوحيدة اللي نجحتي تغيري البني آدم اللي قدامك دا وتخليه بني آدم بقلب وإحساس بجد
وحابب اقول ليكم كلكم
" البني ادمة دي عرفتني يعني ايه حياة ، يعني ايه جنة على الأرض .. بدل مانا كان نفسي أعيش حياة غير دي عشان أبقى زي بقيت الناس
أيقنت ان ربنا حطني في الظروف دي عشان ليه حكمة يهاديني بأجمل هدية في الدنيا ... اختاروا صح "
ودي كانت آخر صورة اخدها الفوتوجرافر ليونس وجنة وهما باصين لبعض وماسكين ايدين بعض
بدل ماتدور وتبحث علي الروايات خليها علي تليفونك وحمل تطبيقنا
