Ads by Google X

القائمة الرئيسية

الصفحات

رواية الملتزمة الصغيرة الحلقه الثلاثون


 


#البارت الثلاثون 

#الملتزمة الصغيرة 


في فيلا دكتور سليم 


جاك:- استيقظ ي يزيد تأخرت على والدك ينتظر منذ وقت 


يزيد:- قوله مش جاي معاه في حته أنا مش بتشرف بيه  ومش عايز اخرج معاه 


سليم دخل وهو متعصب:- لا والله طيب ايه رأيك مفيش خروج من اوضتك لمدة أسبوع جاك الولد دا يتحبس هنا ونور الاوضة يتفصل عنه ومحدش يدخل ولا يحكي معاه حتى أنت فاهم ولا لا


جاك:- أمرك سيدي 


يزيد:- لا ي جاك خليك أنا بخاف من الضلمة خليك معايا ي ماما أنتي فين ي ماما 


جاك:- الأمر ليس بيدي ي صغير أعتني بنفسك ولا تخف الله يحفظك هو معك لا تخاف  


يزيد فضل ضام نفس بخوف وفضل يبكي من الرعب خصوصاً أن هو عنده فوبيا من الضلمة وفضل ينادي على مامته 


يزيد:- ي رب خليك معايا أنا خايف ي رب ليه ماما تبعد عني أنا خايف ي رب خايف اوي ماما قالت أنت شايفني وحاسس بيا وعارف اللي الرجل دا بعمله فيا ي رب يموت وأرتاح منه

وبعدها نام بخوف ودموعه على خده 


،،،،،،،،،،،،،،،سمر إبراهيم إبتسامة عابرة 


سليم:- نفذت كلامي 


جاك:- نعم سيدي 


سليم:- لو عرفت أنك دخلت عنده حسابك الموت وأنت أكتر وأحد عارف أنا ممكن أعمل ايه ي جاك 


جاك نزل راسه بحزن وسكت 


سليم:- مش باقي كتير كام يوم والعملية تتم العملية دي غير كل عملية أنت اللي تشرف عليها اي غلطة فيها حياة عيلتك فاهم ي وحش 


جاك:- أجل سيدي كل شيء مخطط له جيداً 


سليم:- طبعاً هي مش معاهم دي تيجي على بيتي بعد العملية مش من ضمنهم والدكاترة يوصلوا وتشوفهم خليها تخاف شوية 


جاك:- كما تريد سيدي


،،،،،،،،،سمر إبراهيم إبتسامة عابرة 


في فيلا النديم فاضل تلت أيام على الفرح 


البنات كلهم متجمعين مع بعض في الصالون وممنوع اي حد من الشباب يدخل لأنهم كلهم من غير نقابات وبلبس بيتي وفساتين سهرة 


نفس كانت لابسة فستان أبيض وعليه كتشي أبيض رياضي وسابت وشعرها الأسود مفلوت كان شكلها يهبل خصوصاً بالميكاب البسيط اللي مش بتستخدمة كتير تفاؤل لابس وأحد أحمر قصير اوي والكل لابس فساتين راقية أما فرح فستانها اكترهم انحلال خبره بقى 


السهرة كانت عائلية يدوب نسوان العيلة وبنات خالت أويس اللي هما صحاب نفس وتفاؤل وسالي ونسرين وكام وحده من صاحبات البنات وصحبات مريم ومنال 


نفس:- هو ايه دا ساكتين ليه يالا ي بنات الكل يقول ورايا 


نفس:- أخضر ي صباع الموز لا حب الحمى ولا أخت الجوز 


الكل:- أخضر ي صباع الموز لا حب الحمى ولا أخت الجوز 


مريم:- بقى كدا ي تفاؤل مبسوطة بتضحكي يختي ماشي 


تفاؤل بتمثل الخوف:- لا طبعاً ي حماتي نفس كله إلا أهل جوزي مش كل الحموات بس أنا حماتي سكر أحلى من الشربات وأبيض من السكر 


نفس:- سكر القصب سكري مش أبيض يميل للصفار اكتر 


منال:- مالك ي بت بطلي خوف كدا أجمدي أنتي بت عامر النديم 


نفس:- وتبدأ بقى الست منال تنصح بنتها وتشعللها على حماتها والفرح يتقلب خناق وأنا مغنية مشهورة وعندي أعمال تانية مش فاضية للدلع دا يلا كله يقول ورايا مش عايزة أسمع نفسك ي منال أنتي ومريم خلاص زمن الفوضة راح 


نورة دقت على الدف ونفس بتغني والكل بيقول وراها 


نفس:- هيصه 

الكل:- هيصه 

نفس:- هيصه ولمه 

الكل:- هيصه

نفس:-والخاله والعمه 

الكل:- هيصه 

نفس:- عند العاريس

الكل:- هيصه

نفس:- نأكل ونهيص 

الكل:- هيصه 

نفس:- عند العروسة 

الكل:- هيصه

نفس:- نأكل بسبوسه 

الكل:- هيصه 


تفاؤل:- أنتي همك على الأكل وأنا اللي فكرتك صحبتي وفرحانه ليا 


نفس:- آمال أشيل هم مين غير بطني لا أنتي ولا فهد بتاعك دا بستفيد منكم في حاجة  غير الأكل دا حتى اخويا عريس مش بخد منه حاجة 


نورة:- نفس يلا فقرة الرقص الهبلي الشهير 


نفس:- تدفعي كام وأرقص


نورة:- هههههههه دا أنا غلبانة وبجري على عيالي اليتامى


نفس:- جاتك القرف كلتي الرجل قبل ما يجي على حاجة بسيطة كدا بعدين أنا الاجر بتاعي كام مليون دولار مش اكتر أنا براعي ظروف البلد الاقتصادية برضو  


نورة:- بس كام مليون وبالدولار كمان 


نفس:- مش كفاية إني بغني ببلاش أرقص ببلاش كمان 


منال:- دا أنتي ولا أم كلثوم غني بصوتك ي نفس 


نفس كلنا نغني مع بعض طبعاً حافظين قولوا ماشاء الله 


الكل غناء «قولوا ماشاء الله ويرب تعيشوا أحلى سنين» "لماهر زين"  بعدها أغنية «يا ملح دارنا كتر صغارنا سيدنا محمد في الحلم زارنا» "لحمزة نمرة" وبعدها شغلوا أغاني إسلامية من غير موسيقى طبعاً وبدأوا يرقصوا عليها الرقص القديم والحديث والهبل والحلو والوحش كله بيجرب قدراته الضحك كان مسمع في الفيلا بنات الجران لما سمعوا  الزغاريت والديجي سالوا وعرفوا أنه فرح تفاؤل وفرح وجم يهيصوا معاهم تاني يوم 


يوم الحنة بالليل داخل الفيلا عند البنات 


نفس أول ما شافت الستات صحاب مريم جم فضلت ترحب بيهم:- اتفضلوا اتفضلوا ي ألف نهار أبيض الفيلا نورت 


مريم:- أتهدي ي نفس مفيش عرسان معاهم كلهم جوزوا عيالهم 


نفس:- أحبك وأنت فاهمني هههه اذيك ي أم أمير هو أمير دخل الجيش ولا لسه والبت منار مش ناوية تتجوز الموكوسه عنست 


أم أمير:- لسه ي حبيبتي منتظر يشوف بنت الحلال الاول والبت منار الواد محمد ابن عمها جه لبوها تاني بس أبوها رفض


نفس:- لا الواد دا مش وش جواز دا خرج سجون ابوها معاه حق 


سالي همست لنفس:- أنتي تعرفي الناس دي من امتى ومين أم أمير دي 


نفس بصوت عالي:- دي أم أمير يعني عشرة عمر صحبت مريم وساكنه هنا قدامنا أنتي اذاي متعرفيهاش 


سالي:- بيت أبوكي ي نفس فضحتيني أتهدي 


أم امير:- ولا يهمك ي قمر أنتي مرات مصطفى وربنا خسارة فيه دا الواد مصطفى كانت ناوية أجوزوا لبنتي منار 


سالي:- نعم ي حجة تجوزيه وبتقوليها في وشي كدا طيب جامليني راعي مشاعري وأحسيسي 


أم أمير:- ي بت بهزر معاكي دا أنتي وقعه بقى «بصت على نفس بخبث» بعدين منار بنتي من وهي صغيره حجزاها لأويس 


نفس:- جرى ايه ي أم أمير ما تجيبي جهاز كشف الحب معاكي أنتي جايه تهيصي ولا تجيبي معلومات استهدي بالله وغني غني ي أم أمير أجبلك عصير 


أم أمير:- وربنا ما حد فاهمني غيرك ي نفس يلا يختي غني خلينا نفرح شوية 


نفس:- اشطا قولوا ورايا 

واهو جالك اهو 

الكل:- واهو جالك اهو 

نفس:- ريح بالك اهو 

الكل:- ريح بالك اهو 

نفس:- واهو استك الأساتك والدهب يملا درعاتك ويعوض كل اللي فاتك واهو جالك اهو

الكل:- واهو جالك اهو 

نفس:- وادبحيلو الصبح بطة وادبحيلو الضهر بطة وكتري يا بت الشطة ماهو جالك اهو 


تفاؤل:- ليه يختي بطتين كل يوم 


فرح نزلت تقعد معاهم الكل سكت فجأة  


أم امير:- مبروك ي عروسة وانا قولت البت فرح عنست زي منار بنتي ألا صحيح هو عريس الغفلة من فين وعيلة ايه ي عني مش سمعنا أنك أتخطبتي 


نفس:- العريس أخويا مش مهم من عيلة ايه المهم انه يبقى أخو نفس محمود ذات نفسها😎😎


أم أمير:- هههه مبروك ي حبيبي صحبة العرايس وأخت العريس  


نفس:- أنا أعتبر حمات فرح دلوقتي وأطلع عينها تعالي ي بت ي فرح أغنيلك شوية  


فرح أبتسمت أن حد أتكلم معاها ونفس عملت كدا عشان الامور تظهر طبيعية:- ماشي غني ي حماتي 


نقس:- أخضر يا صباع الموز 


الكل:- أخضر يا صبع الموز 


نفس:- لا أحب الحمى ولا أخت الجوز 


الكل:-😂😂


تفاؤل:- أنا بقى بحب حماتي اوي 


نفس:- ايوه يختي اتمسكني بس مريم مش بتخيل عليها الحركات دي فهماكي 


مريم:- اخرجي منها انتي ي نفس وهي تعمر أنا ومرات ابني زي السمنه على العسل 





تلفون نفس رن وكان خالد مش سامعه حاجة لان الكل بيحكي وشغلوا الديجي على أغنية «الليلى أحلى فرحة فيها التقوا قلبين عروسة لابسه الطرحة وعاريس علاء الدين.... ألخ » وبيرقصوا عليها رقص فلسطني على الدبكه الفلسطينية 


نفس:- ايوه ي خالد متصل ليه دلوقتي 


خالد:- نفس أخرجي لمكان هادي في موضوع مهم لازم تعرفيه 


نفس:- بتقول ايه مش سامعة 


خالد:- بقولك أخرجي لمكان هادي عايزك 


نفس:- طيب في حد عند الجنينة الخلفية قابلني هناك 


خالد:- ماشي  


عند الرجالة كلهم قاعدين يضحكوا مع بعض ويتريقوا على النسوان وخالد كان قاعد معاهم قام يكلم نفس وأويس شافه وقام هو كمان 


خالد:- أنا وصلت ي نفس أنتي فين 


نفس:- لحظة اغير لبسي دا  


خالد:- ي شيخة أنجزي مش عايز حد يشوفنا وبعدين مفيش حد هنا 


نفس خرجت وكانت لابسه فستان أسود قصير وكتش ابيض وسايبه شعرها مع مكياج خفيف كان شهلها زي الاميرة  


أويس:- خالد أنت رايح فين 


خالد:- ها مفيش أنا كنت بشرب سجارة بعيد عنكم 


أويس:- امممم طيب أشربها هنا مش ضروري تروح عند النسوان يعني  


خالد:- امم هما اصلا قافلين الباب يلا مش مهم عن اذنك 


خالد مشي وأويس وقف مكانه وفجأة سمع صوت نفس مسكته من كتفه والدنيا كانت ضلمة ضوء خفيف بس مش قدرت تعرفه 


نفس:- ها ي خالد في ايه ضروري تخرجني كدا 


أويس لف ليها وكانت الصدمة من شكلها أول مرة يشوف شعرها فضل دقيقة يتاملها في النور الخفيف ونفس عقلها مش بيشتغل في الأوقات دي فضلت وقفة مصدومة أنه أويس


أويس بهيام وهو سرحان:- أنتي حلوه اوي ي نفس 


نفس فاقت جات تجري أويس مسك إيدها وشدها ليه وعينونه أتحولت أحمر من العصبية وعروق أيده ظهرت 


نفس رفعت ايدها تضربه هو مسكها بغضب 


أويس:- انتي مجنونة اذاي تخرجي كدا أفرض حد غيري شافك نفس جرى لعقلك حاجة فين نقابك.


نفس:- لو سمحت أبعد وسيب ايدي حرام كدا. 


أويس ساب ايدها بعصبية:- الموضع دا حسابك عليه بعدين مش دلوقتي ي هانم 


نفس جريت على اوضتها وحبست نفسها وفضلت تبكي في تساهلها هي سمعت كلام خالد هي خلت راجل يشوفها كدا باي حق يلمسها وباي حق يبص ليها هي ليه رخصت في نظره كدا من أول ما رفضته وهو بيقلل منها ومش بيحافظ عليها زي الاول قررت تقول لجده بس الفرح يخلص بسلام ولا خلاص هي كدا كدا مسافرة مش هتشوفه تاني وهنا فضلت تعيط بصوت عالي 

تلفونها رن تاني وكان خالد 


نفس:- أنت وأحد ندل ليه كدا حرام عليك دا أنا أختك ي خالد ليه تعمل فيا كدا أنت مش قولت مفيش حد وكلهم قاعدين جمبك ليه ي خالد  


خالد:- حصل ايه لكل دا بعدين غصب عني أويس شافني وخاف أكون جاي عند النسوان مشاني أعمل ايه يعني أنا غلطان أني كنت جايب ليكي بعثة لروسيا ببلاش وكل التكاليف كلها عليهم 


نفس برقت بعيونها:- نعم بلاش وروسيا ليا أنا طيب اذاي يعني 


خالد:- البعثة دي للي طالعين الأول على الجمهورية وأنتي أسمك أتقبل منهم ومعاكي سبعة تانين من الاوائل 


نفس:- بس أنا مش قدمت عليها ولا عملت حاجة 


خالد:- أنا قدمتلك ايه رأيك بس محتاج منك بعض الاوراق أعمل بيها جواز السفر وكدا عشان السفر قرب قبل الدراسة 


نفس:- اشطا شكرا ي خالد أنا بحبك اوي 


خالد:- أنتي سامحتني ي نفس  


نفس أفتكرت:- لا طبعاً أنت واحد ندل مستحيل أسامحك حرم عليك ليه عملت في فرح كدا دي مكسورة وسطنا حرمتها من الفرحة في أهم يوم ليه ي خالد كسبت ايه 


خالد:- كسبت كتير وبلاش طيبه كدا هي اصلا جات تاخد مني حاجة تدمرك بيها وتخليكي تمشي من البيت وانا استغليت كرهها ليكي صح 


نفس:- أنا مسامحها أنت مالك تأذيها ليه ههه صح فين الصح أنت بجد فخور بنفسك مش مكسوف من عملتك ترضى حد يعمل فيا كدا المفروض تمشي راسك في الارض أنت أذاي ماشي كدا وسط الناس مش قرفان من نفسك ضميرك دا مش مانبك على اللي عملته 


خالد:- دا أنا اقتل اللي يبص ليكي بعيونه بطلي تقولي على نفسك كدا انتي متربية ومش بتخرجي من بيتك في وقت ذي دا لحد غريب 


نفس:- مين قال كدا ما أنت سبتني مع الغريب في نص الليل في مكان مهجور الغريب حافظ عليا بس أنت ندل خسيس ي خالد  


خالد:- أقفلي ي نفس مش ناقص وجع دماغ مش كفاية أني جبت ليكي سفرية كنتي بتحلمي بيها وبسببك محبوس هنا مش عارف أخرج غير لما اتجوزها 


نفس:- تستاهل وبعد كدا مش عايزة أعرفك أو أشوف وشك ربنا يرحمني منك ومن أشكالك 


نفس قفلت وفضلت تفكر شوية تفرح وشوية تزعل شوية تبكي وشوية تلوم نفسها وفجأة صورة أويس جات قدامها وهو قريب منها حست بحزن وكسوف معقول شافها كدا كان مزهول من جمالها بس دا حرام رجعت تبكي تاني وبعدها نامت لان بكرة الفرح ولازم ترتاح 


،،،،،،،،سمر ابراهيم #إبتسامةعابرة 


بعد ساعتين 

تفاؤل:- نفس أصحي بسرعة 


نفس قامت مفزوعة:- في ايه مين مات


تفاؤل وهي بتبكي:- أنا خايفة مش عايزة اتجوز 


نفس:- طيب لحظة أتصل على فهد أقوله يلغي الفرح وكل حاجة من البداية 


تفاؤل:- لا لا بلاش تقولي ليه 


نفس:- انتي مجنونة ي بت جايه الساعة اتنين تصحيني تقولي مش عايزه اتجوز ما عنك ما اتجوزتي أنا مال أمي تصحيني من النوم ليه 


تفاؤل:- تصدقي أنا غلطانه جيت أحكيلك مشاعري وخوفي


نفس:- طيب أمشي من قدامي دلوقتي ممكن أصور قتيل 


تفاؤل مشيت ونفس رجعت تنام بس حست أنها زعلت قامت تصالحها مشيت بس شافت نور أوضة فرح مفتوح وصوت عياطها مسموع 


نفس دخلت لان الباب كان مفتوح:- ايه دا ي مجنونة بتعملي ايه 😲 


فرح كانت على الارض قدامها شفرت حلاقة مكسورة وبتبكي 


نفس جريت عليها :- ايه دا ي فرح عايزه تقتلي نفسك وتموتي كافره عايزه تدخلي النار 


فرح:- مش قادرة حاولت أموت نفس بس خايفة ليه عمل فيا كدا ليه ي نفس انا عملت ايه لكل دا لأني كنت بدافع عن اللي بحبه منك أنا من وأنا صغيرة بحب أويس ليه يحصل فيا كل دا طيب خلاص مش عايزكي تمشي ومش عايزه أتجوز أويس مش عايزه العيلة تحبني ولا عايزه حاجة بس بلاش أتجوزه خايفة ي نفس أذاي اكون معاه في مكان لوحدي خليكي معايا بلاش تسبيني أنا خايفة اوي ليه يحصل فيا كدا أنا عايزه أموت ممكن أرتح بس برضو خايفة أموت كافرة  


نفس حضنها وهي بتبكي:- بصي ي فرح ربنا كتب لينا كل حاجة ممكن تحصل معانا من قبل ما أحنا نتخلق ممكن يكون اللي حصل دا سبب يفوقك ويعرفك قيمة حجات كتير ونعم كنتي مش شيفاها شفتي العيلة حاجة جميلة اذاي عرفتي قيمتها لما الكل بعد عنك ربنا قربه أحلى بكتير في راحه رهيبة هو الوحيد اللي يقدر يهون عليكي صلي وقولي ليه همك هو الوحيد اللي يقدر يساعدك 


فرح:- بس أنا مش بعرف أصلي ي نفس ولا حافظة قرآن أعمل ايه الفجر قرب يأذن 


نفس:- تعالي أقولك أنتي تدخلي تغتسلي من أول وجديد وبعدها تصلي صلاة توبة ركعتين زي السنة بس نيتك تكون التوبة 


فرح:- بس أنا مش متاكدة يعني من الغسل ممكن تشرحي ليا الطريقة تاني بدقه 





نفس:- طبعاً أنتي أول حاجة النية ودي ناس كتير مش فاهمة المعني بتاعها صح النية محلها القلب يعني مش أقول كدا نويت أن أغتسل لا كفاية أنك تكوني عارفة جوه نفسك أنك بتغتسلي وبتغتسلي ليه يعني حيض ولا غسل طهر كدا يعني أما نيه الصلاة تكوني عارفة بتصلي ايه ظهر عصر مغرب ولازم تنوي وتحددي الأول قبل ما تعملي الفرض تاتي حاجة تقولي بسم الله الرحمن الرحيم ناس كتير بتنسى البسملة واي عمل لازم يبدأ بالبسملة سوء وضوء أو غسل أو أكل أو شرر  وبعد كدا تالت حاجة الوضواء ودا نفس وضوء الصلاة ويجوز تاخري غسيل رجليكي لبعد الغسل عادي كدا أو كدا رابع حاجة لازم المية تصل لكل جزء منك حتى ضافرك الصغير لازم المية توصل ليه تبدأي الجنب الأيمن الميه توصله كله وتخليها توصل بين شعرك يعني تخللي شعر راسك بعد كدا الجنب الأيسر نفس الكلام وتخللي شعرك وبعدها تعممي الماء على جسمك كله وجنبك الأيمن والأيسر ولو في الأول مش غسلتي رجليكي في الوضوء أغسليهم تاني بس كدا دا الغسل على السنة


فرح:- طيب أعمل كدا وأخرج أصلي الفجر معاكي لاني مش حافظة قرآن وكدا ولما أتعلم أصلي لوحدي 


نفس:- ماشي خمس دقايق بس أشوف تفاؤل جات صحتني وكانت خايفة بالمرة اجيبها تصلي معانا 


فرح:- هي زعلانه لأني أتجوزت معاها مش عارفة اللي بيحصل فيا مفكره أني مبسوطة 


نفس:- بالعكس لازم تكوني مبسوطة كل حاجة بتحصل لينا فيها الخير حتى لو الظاهر شر بس أمر المسلم كله خير لو كان أبتلاء وصبر عليه يكسب ولو خير وشكر وحمد عليه يكسب وربنا هو اللي خلقنا وعارف الصالح لينا اكتر من نفسنا سيبي الامور تمشي بتدبيره وأصبري ممكن يكون الشر دا فيه خير كبير ليكي 


فرح:- شكراً ي نفس أنا كنت متدمرة وجودك جمبي خلاني أحس براحة كبيرة بس خالد دا شخص مش منه رجاء ومستحيل ربنا يهديه بعد اللي عمله فيا أنا مش ممكن أسامحه يوم على عملته دي حتى لو حبيته مستحيل أسامحه  


نفس:- تعرفي من فترة تفاؤل قالت نفس الكلمة عنك مستحيل ربنا يهديها بس دا اكبر حرام أننا نتذكى على الله ونقول يهدي مين وميهديش مين لان دا ممكن يدخلنا النار كام واحد أرتكب اكبر المعاصي ولما تاب ربنا قبل توبته فاكرة قصة الراجل اللي قتل تسعة وتسعين شخص وبعدها حب يتوب سأل الناس من أعلم أهل الارض الناس قالوا ليه على أسم راهب راح للراهب دا الناس قلوله دا قتل تسع وتسعين نفس هل له توبه؟ الراهب قال: لا  الرجل أتعصب وكملهم ميه وقتل الراهب راح لواحد غيره ونفس اللي حصل مع الاول بس الراهب دا قال: نعم تقبل توبته سألوه ايه اللي يحول بينه وبين التوبة قالهم يذهب لأرض كذا وكذا فيها ناس بتعبد ربنا يعبد ربنا معاهم  وتبعد عن بلادك لانها بلاد بتساعدك على المعصية مشي الرجل وفي نيته التوبه ومات في الطريق ولما الشخصة يموت أما تقبض روحه ملائكة الرحمة أو ملائكة العذاب هما الاتنين نزلوا ومحتارين مين يقبض روحه ملائكة الرحمة تقول: "جاء تائبًا مقبلًا بقلبه إلي الله تعالى" وملائكة العذاب تقول: "إنه لم يعمل خيرًا قط" في الأخر نزل ملك في صورة راجل وحكم بينهم قالهم قيسوا المسافة بين الارضين أرض المعصية اللي مشي منها وأرض الطاعة اللي رايح ليها لقيوا المسافة لارض الطاعة أقرب فقبضت روحة ملائكة الرحمة  


فرح:- يااااه ربنا رحيم اوي ممكن يرحمني أنا وخالد ويقبل توبتنا لو رجعنا مع بعض 


نفس استغربت أن فرح نفسها خالد يتوب هي مش بتكرهه ليه تتمنى يتوب معها:- اه طبعاً يقبل بس أنتي توبي وكل ما تعصي أرجعي وتوبي لحد ما الشيطان ييأس منكم وأوعي تيأسي أنتي من التوبة والرجوع للربنا 


فرح:- طيب هو يعني عندي سؤالين قبل ما أدخل أغتسل الاول هو أنتي ليه بتقولي انه راح لراهب مش شيخ وكمان ازاي عرفتي القصة دي ما هو مات يعني أذاي عرفتي أتعذب ولا لا 


نفس:- بصي ليه راهب لان القصة دي بتحكي عن ناس قبل ما يجي النبي صلى الله عليه وسلم في الأمم اللي قبلنا وأذاي عرفتها دي النبي حكاها لاصحابه في حديث شريف يعني دا كلام النبي مش كلامي والحجات دي والقصص سواء في القرآن أو السنة لازم نتعلم منها لانها فيها العبر لينا وبناخد منها دروس في حياتنا 


فرح:- اممم يعني النبي هو اللي حكاها أكيد جاته من الوحي طيب السؤال التاني مش الاغاني حرام ليه كنتي بتغني تحت 


نفس:- مين قال الاغاني حرام الاغاني زيها زي الكلام لو كلام وحش فيه حاجة غلط أو يساعد على معصية يقول مثلا أشرب حشيش  ومن الكلام دا يبقى حرام أما مش فيها كلام غلط تبقى حلال آمال ايه الحرام بقى هي الموسيقى اللي في معظم الاغاني وبقت حاجة عادية الايام دي بس دي النبي حرمها وقال هيجي قوم يحللوها معا أنها حرام بس الدف حلال مش حرام النبي قال أنه حلال 


فرح:- يعني أغني كلامها محترم عادي لكن بموسيقى لا 


نفس:- لا تغني قدام بنات بس المعلومة دي لسه عرفاها من قريب ربنا حرم أن الست تخضع بالقول يعني ترقق صوتها قدام الرجالة والغناء لازم ترققي صوتك آمال هتغني اذاي من غير محن والرجالة بقى ترسم حجات في عقلها بقى وتنتشر المعصة في المجتمع ونترك بقى العبادة والعمل ونفكر في صوت البنات مين أحلى ومين ارق وتوسع مننا 


فرح:- عندي أسئلة كتير بس في وقت تاني 


نفس:- وأنا تحت أمرك ي فرح هانم 


فرح أغتسلت وصلت ركعتين توبة زي ما نفس فهمتها جات تفاؤل وصلوا الفجر جماعة وناموا مع بعض 


فرح:- تفاؤل أنتي زعلانه مني 


تفاؤل:- لا عادي المهم نخلص منك ي عانس عقبال البت نفس 


نفس:- بعد الشر عليا أنا لسه صغيرة على الهم


تفاؤل:- ليك يوم ي ظالم هههههه 


فرح:- نفس هو مش حرام الأهل يفرقوا بين أولادهم ولازم يحسسوهم بحبهم زي بعض من غير تفريق 


نفس:- طبعاً حرام ربنا هيحاسبهم وكمان النبي قال أن لو الأب قدم لابنه هديا لازم يجيب لاخوه وأخته زيها من غير تفريق الولد قد البنت لا يقل ولا يزيد عنها لأن دا بيسبب كره بين الاخوات وحقد في قلوبهم على بعض ولو حد شايف أن أبوه بيفرق بينه وبين أخواته وبيفضله عنهم بلاش يقبل الحاجة اللي بيديها ليه ويراعي شعور أخواته بس في ناس مش بتعرف تعبر عن مشاعر الحب ي فرح أهلك بيحبوكي اوي بس تصرفتك لبسك بعدك عن ربنا مش عاجبهم وللسبب دا هما بيستخدموا الشدة وأحياناً يبعدوا عنك قبل ما تحكمي عليهم بالتقصير شوفي السبب اللي مخليهم بعد عنك وبعدين السعادة مش في حب الناس أو بعدهم عنك السعادة في حب ربنا ليك يحبب الناس فيك قربي من ربنا الكل يحبك ويحترمك ويقدرك وتكبري في نظر الكل 





تفاؤل:- كل دا ي شيخة نفس نامي أنا عروسة وعايزة أرتح 


نفس:- بس ي بت أنتي وبصت لعيون تفاؤل وهي نايمة وفكرت أنها فاضل يوم وتبعد عنهم وممكن تسافر مش تشوفها تاني وفضلت تبكي أول ما عيونهم تلاقت  


تفاؤل ببكاء:- بطلي عياط بقى أنا ماسكة نفسي من ساعة وجيت أنام معاكي لأخر مرة 


فرح:- أنا كمان خايفة مش عايزة أتجوز 


بعد وصلت بكاء أستمرت لساعة كاملة البنات نامو للظهر وقاموا عشان يجهزوا للفرح فهد وصلهم للبيوتي سنتر ومشي 


نفس فضلت تغني وترقص وتهيص ليهم وتفاؤل حبه تعيط وحبه ترقص وتضحك أما فرح كانت طول الوقت ساكته بتفكر في الكلام اللي خالد قاله ليها في التلفون الصبح 


نفس:- يلا ي بنات كل دا تشطيب وطبقات ما تخلصوا أنا زهقت 


تفاؤل:- أنا خلصت أتبقى الفستان والنقاب بس 


فرح:- يلا بقى فين الفستان بتاعي أنا كما 


فرح وتفاؤل غيروا وكانت الصدمة لنفس من فستان فرح أنها بشعرها من غير حجاب وكمان الفستان من غير بدي وأيدها كلها مكشوفه  وقصير من قدام واصل للركبة ومن ورى طرحة طويلة اوي 


نفس:- ايه القرف دا انتي اذاي تلبسي كدا عمو لو شافك كدا يقتلك وأخواتك يقولوا ايه عليكي رقاصة 


تفاؤل مسكت مفرش ومدته لفرح:- خدي ي حجة استري نفسك بدا 


نفس ضحكت:- بس ي تفاؤل عيب ي فرح كدا حرام 


فرح:- محدش له عندي حاجة انا حرة وماما شافته ووفقت 


نفس:-  مريم ماشي ي شيخة مريم حسابك معايا لما أرجع آمال فرح اللي عايزة تتوب وترجع للربنا فين بقى 


تفاؤل:- سبيها براحتها ي نفس لما يجي فهد يحكم عليها ويربيها من أول وجديد 


نفس:- ما شاء الله عليكي ي توتو ربنا يحرسك ويحفظك من العين الجمال مش في التعري الجمال في العفة ربنا يزيدك اكتر واكتر 


فرح:- يلا ممكن تتصلي بحد يجي يخدنا قالوا خلاص كدا نقدر نمشي 


نفس:- ماشي فين التلفون بتاعي


فهد وخالد وصلوا عندهم وكانت الصدمة من نصيب خالد بلبس فرح الفاضح 


خالد:- ايه القرف دا قدامك عشر دقايق تكوني قلعتي القرف دا مفيش شعره تظهر منك قدام حد فاهمة 


فرح:- .......


سمر إبراهيم إبتسامة عابرة


              الحلقه الواحد والثلاثون من هنا

لمتابعة باقي الرواية زوروا قناتنا على التليجرام من هنا

تعليقات