رواية تهاني
"تهاني"
قصة:- تانيا محسن. #كوميدي #رومانسي
10- حالة القلب . . .
بعدما خلصت 'تهاني' فطورها، مع اخوها ووالدتها، جهزت نفسها للخروج معاهم..
فخذوا تاكسي يوصلهم لمركز علاج القلب، وطول الطريق، و' تهاني' بتدعي ربنا، يشفي والدتها، ويطول في عمرها.. ماهو صعب عليها تعيش وحيده!! بين أخواتها الذئاب، لو حصل لوالدتها حاجة! لا قدر الله..
دخلوا المركز، وكشف الطبيب المختص على والدتهم، وطلب مقابلة ' عمر ' لوحده!!.
جلس 'عمر' وانتظر يسمع منه نتائج الفحوصات..
الطبيب : - اسف يا بني! من الفحوصات اللي قدامي، بعتذر اننا مش هنقدر نعمل حاجة لوالدتك!! القلب عندها ضعيف جداً، وما يستحملش عملية، او حتى نعمل له تركيب جهاز!!.
'عمر' - بصدمة - : - يعني ايه يا دكتور!! قول لي لو حالتها صعبة للدرجة دي!! انا ممكن أخذها لبلد ثاني!! أو!! انت تنصحني بأيه يا دكتور!!
نزل الطبيب راسه باسف! ورد عليه..
الطبيب :- للأسف حالة والدتك صعبة! وما فيش حل معاكم !! غير إنكم تدعوا ربنا.. وعمر الانسان هي بين ايدين الله وحده " عز شأنه "..
خرج 'عمر' من العيادة، وهو متلخبط من كلام الطبيب! فحاول يتحكم بنفسه!! ورسم على وشه ابتسامة! لما شاف نظرات التساؤل من عيون 'تهاني'، ووالدته!!.
طمنهم 'عمر' ان صحتها تمام، ومش محتاجة غير انها تستمر بأخذ ادويتها في انتظام! وفكر 'عمر' في طريقة يسعد والدته!! فاخذ 'تهاني' على جنب! بعيد من والدته، وطلب منها تسمح له يسافر تركيا مع والدتهم للعلاج!! و ده على حسب نصيحة الطبيب المعالج!!.
وشرح ل 'تهاني' علشان المصاريف ماتكثرش عليه!! فهو هسيبها لوحدها في مصر، مؤقتاَ!! وهو مطمئن عليها، انها مع جيران طيبين، لوقت ما يخلص علاج والدتهم، وهيرجع يأخذها، ويرجعوا لبلدهم بالسلامة!!.
على طوول وافقت 'تهاني' على عرضه! فالمهم عندها هو شفاء والدتها، وهي مطمنة على نفسها، لوجود شقة تسكن فيها، ووجود عائلة 'هناء' الطيبة، ساكنين جنبها!!.
# * # * # * # * #
بعد ايام قليله... وفي المطار... وقفت 'تهاني' مع 'هناء' واولادها، يودعوا طيارة اخوها ووالدتها..
مسحت 'تهاني' دمعة نزلت من عنيها!! وهي بتراقب طيارتهم، وهي بتبتعد عنها، وتختفي من انظارهم!!..
سافروا وتركوا 'تهاني' لوحدها!! في عهده 'هناء'!!..
التفتت 'تهاني' ناحية 'هناء'..
'تهاني' : - تعرفي يا 'هناء'! ان دي اول مره في حياتي، اعيش فيها لوحدي! غريبه! اني مش حاسة بالخوف! وكأني اعرفكم من زمان!! وجودكم جنبي، محاسيسني بالأمان!.
'هناء' : - اسمعي يا 'توتو'! احنا دلوقتي بقينا خوات! يعني مافيش فرق!! وأنتي عايشه هنا عندي!! او عايشه هناك وسط اهلك!! انا وولادي مش هنسيبك!!. وأنتي هتكو!!!..
وقبل ماتكمل 'هناء' كلامها، جريت الدموع من عين 'تهاني' غصب عنها! ماقدرتش تسمع باقي كلامها! من تأثرها بطيبة 'هناء' معاها..
- انتبهت 'هناء' لحرج 'تهاني'!! من نزول دموعها بدون انذار!! فحاولت تغير مجرى الكلام!! وتنسي 'تهاني' دموعها..
'هناء' - بمرح - : - يلا هنروح البيت!! وعايزاكم تفكروا معايا! نطبخ ايه على الغداء! نفسي اكل حاجة ما أكلتهاش من زمان!!..
الكل سمع كلامها، وابتداء كل واحد يفكر، ويقترح! ويقول الاكل اللي بيحبه!! ونفسه يأكله على الغداء!!
# * # * # * # * #
شغلت 'هناء' عربيتها، وشغلت الراديو على قناة موسيقية، يسمعوا اغاني، يتسلوا فيها وهم في الطريق..
سمعت 'تهاني' موسيقى غربية بتعجبها..
'تهاني' : - أيوااا، انا بحب اسمع الاغاني الأجنبية!! أرجوكي 'هناء'!! خليكي على القناة دي!!.
صفق 'احمد' - بحماس - : - يا سلام يا 'تهاني'، انا وانت هنكون فريق واحد!.
'هناء' - بانزعاج - : - انا مش عارفه ايه بيعجبكم في الدوشة دي!!.
قربت 'ايمي' نفسها من 'هناء'، وبتشجعها..
'ايمي' : - ماما، ماما! خليكي قوية! وشوفي قناة ثانية! فيها اغنية ل 'محمد حماقي'، ولا اقول لك على حاجة!! افتحي البلوتوث يا ماما، وانا هشغل الاغاني اللي بحبها من موبايلي..
- قاطعها - 'احمد' : - حاسبي يا 'تهاني'! ماتخليهمش يقلبوا مزاجنا! خليكي على القناة دي!!
'تهاني' - بمرح - : - مزاج 'احمد' مهم عندي! خلاص ماحدش يغير القناة!!.
'ايمي' : - لو خالي 'محمود' كان موجود معانا! كان نزلكم وسط الطريق!!.
'احمد' - بخوف - : - لا ! خلاص بس! خلونا نسمع اغنية! وأنتوا اغنية! وكده هيكون العدل!!.
'هناء' : - هههه، اخويا بيخوفكم! وحتى هو مش موجود!!.
'تهاني' : - ماتخافش يا 'احمد' ! ! . . . مافيش حد يقدر يمنعنا نسمع اغاني على ذوقنا!!..
'احمد' : - خلاص يا 'تهاني'!! خلينا نكون احسن منهم! ونسيبهم يسمعوا اللي يعجبهم!!.
'تهاني' - باستغراب - : - لدرجة دي انت بتخاف منه!!.
'احمد' - بارتباك - : - وانا هخاف ليه!! انا بس اقصد ان دي مش عربيتي! فما ينفعش اتحكم واختار الاغاني!!
ولا اقول لكم! مش عايز حاجة! انا هحط السماعة في ودني، وهسمع الاغاني من موبايلي ! ! ! . . .
'هناء' - بحنان - : - خلاص ماتخافش يا حبيبي! هنسمع قناتك! انت و'تهاني' غاليين على قلبي..
سكتت 'تهاني' وبتفكر - ل نفسها " هه!! بقى خالهم قاسي كده!! يبقى اكيد هو متربي، من صغره عند 'بدرية'!! " ...
# * # * # * # * #
وصلوا لموقف عربيات العمارة، وطلعوا الاسانسير لدور الثالث، لقوا 'بدرية' واقفة قدام باب شقة 'هناء'!!..
'هناء' - باستغراب - : - ماشية فين يا عمتي!!.
'بدرية' - وعيونها على 'تهاني' - : - وانا همشي فين! انا قاعده هنا، مستنياكم من بدري!!
خافت 'تهاني' من نظرات 'بدرية' القاسية! وفهمت انها مش مرحب بيها!!..
'تهاني' : - 'هناء'! بحب اشكركم قوي، تعبتكم معايا! واعذريني انا هسيبكم دلوقتي! عايزه انام لي شويه!! وإ ن شاء الله هرجع ازوركم في وقت ثاني!!.
'هناء' - باستغراب - : - تنامي!! مش اتفقنا هنتغداء سوا!!.
'تهاني' : - لا شكراً!! انا جهزت غدايا من بدري، ومحتاج تسخين بس! يلا سلام عليكم!!.
ومشيت 'تهاني' في اتجاه شقتها.. لكن صوت 'بدرية' العالي وقفها!!..
'بدرية' - بحقد - : - استني عندك!!!.
وقفت 'تهاني'، والتفتت ل 'بدرية'، تعرف منها، هي عايزه ايه!!..
قربت 'بدرية' من 'تهاني'... ودارت حول 'تهاني'!! وهي بتبص لها من تحت لفوق!!..
'بدرية' : - اسمعيني!! يا ست الحسن و الجمال!! أنتي دلوقتي عايشه لوحدك، وبدون رقابة، فأنتي تقولي أية العمل!!.
'تهاني' - باستغراب - : - عمل أية! اسفة مش فاهمة، انتي بقصدي أية!!..
'بدرية' - بغل - : - اقصد هنحتاج نراقبك!! او هتلمي نفسك بادب!! وتقفلي بابك!! وتقعدي باحترام داخل شقتك!!..
انصدمت 'تهاني' من كلام 'بدرية'!! وخافت تضعف، وتبكي قدامهم، فحاولت تسيطر على مشاعرها، وترد عليها بادب، لأجل خاطر 'هناء'، واولادها..
'تهاني' - ب هدوء - : - حاضر!! انا مش هخرج من الباب ده نهائياً!! ولما هعوز حاجة!! هشوف حد يشتريها لي!! ويجبها لحد عندي!! وأنتي خليكي مرتاحة ف!!!
'بدرية' - بستفزاز - : - آاااه!! ما احنا مش عاوزين شوشرة بين الناس!! وخصوصاً لما تكون واحدة ست عايشه لوحدها!! وبدون اهل!! فاكيد سمعتها هتكون على كل لسان!! و ده هيأثر علينا!! لأن احنا ساكنين قريبين منك!!..
'تهاني' - وقلبها بيحترق - : - ومين قال لك اني بدون اهل!! أنتي اللي ساكنه هنا!! كانه مافيش معاكي اهل يسالوا عنك!!..
'بدرية' - بعنف - : - شوفي نفسك يا حلوة!! وانا عايشه هنا وسط عيلتي وغصباً عنك!! واعرفي!! لو سمعت عنك حاجة!! انا بنفسي هخرجك من الشقة!! ونخلي مسؤوليتنا منك!! ومن قرفك!!..
# * # * # * # * #
ودخلت 'بدرية' شقة 'هناء'!! وهي فرحانة قوي، انها قدرت تهين من قدر 'تهاني' قدامهم!!..
بعد دخول 'بدرية'!! الكل فضل ساكت! محرج من هجوم 'بدرية' على 'تهاني'!!..
بص 'احمد' و 'ايمي' لبعض، حزنانين عليها!! و'هناء' ندمت لأنها ما وقفتش عمتها قبل ما تجرح 'تهاني'!!..
وحاولت تهون على 'تهاني' الموقف!! وتجبر بخاطرها!!.
'هناء' : - أرجوكي يا 'تهاني' ماتزعليش منها! هي عمتي كده! لسانها ما بيرحمش حد!! انا هدخل دلوقتي، وهفهمها انها ماتقربش منك ثاني!!..
حست 'تهاني' بحرج قدامهم!! لأنها وحيده بدون اهل يسندها!! علشان يعمل لها الناس الف حساب! ويخافوا من رد فعل اهلها لو احد غلط عليها!! فما قدرتش تتحمل! وانفجرت الدموع من عنيها، وجريت ناحية باب شقتها، تخبي ضعفها!!..
جريت 'هناء' وراها، تحاول تراضيها، وما تزعلش منهم!!
خرجت 'تهاني' مفتاح شقتها من الشنطة، وفتحت الباب، وهي بترجف، وقبل ماتدخل!! التفتت ل 'هناء' تودعها!! وعيونها مليان دموع!!..
'تهاني' - بتبكي - : - اطمني 'هناء'! انا مش زعلانة منكم!! عارفة ان عمتك عايزه بس تغيظني، وتقهرني بأي طريقة!! ما انا بقى عندي خبرة بناس زيها!!..
انا بس مشتاقة لأمي!!ارجوكي سيبيني دلوقتي!! عايزه ارتاح!!
سكتت 'هناء' لأنها مش عارفة ترد عليها بأية!! وتركت 'تهاني' تدخل شقتها!! وترتاح!!..
# * # * # * # * #
#يتبع
