Ads by Google X

رواية قدري انت الفصل الرابع والاخير4بقلم ايه زين


  رواية قدري انت الفصل الرابع والاخير


ام يوسف:ها يا بنتي! ناوية ننزل نجيب بقية جهازك امتي! 

رقية:هنزل انا وماما إن شاء الله

ام يوسف:وانا منفعش يعني! يا ستي هنزل أنا وانت بكرة ان شاء الله

رقية بتوتر:ااا..هبقا انزل انا وم...

ام يوسف بتمسك ايدها:انا عارفة انت بتفكري فى اى..انا عارفة اننا كتبنا القايمة وفيه حاجات كتيرة ناقصاكي..بس انا أصريت نكتبها عشان حقك يا بنتي..فانت دلوقتي زى الشاطرة هتنامي عشان من بكرة انزل انا وانت ننقي كل اللى انت عايزاه..ومتشليش هم حاجة..انا هجهز بنتي لابني..يعني مفيش حاجة رايحة برة..ومن النهاردة انا ماما انا كمان انت سامعة؟! 

~~~~~

*يااختي ملقيتش غير المطلقة اللى تجوزها لابنها! 

"مش عارفة ياأختي ده البنات مفيش اكتر منهم..وقال ايه بيقولوا مطلقة عشان مشيها البطال..

*لا لا..حد الله اللى سمعته انها مبتخلفش..

رقية بدموع:بعد اذنك يا ماما يلا نروح

ام يوسف بتمسك ايدها:والله ما يحصل واللى بيقول عليكي كلمة هخليه يكتم دلوقتي..تعالى معايا

يروحوا عند الستات اللى بيتكلموا:سمعوني كده بتقولوا على ايه على بنتي! 




*اوام عملتيها بنتك! دى حيالله مرات ابنك..وبعدين ملقتيش غير دى! 

ام يوسف بردح:ومالها دى يااختي! وبعدين اه بنتي غصب عنك وعن اللى يتشددلك كمان.. وبعدين اتكسفي على دمك انت وهيا اختي..كل واحدة تروح تشوف مراتات عيالها وتصرفاتها..متجوش على بنتي عشان اللى هيجي عليها هاكله بسناني

*وليه ده كله يا ام يوسف..احنا عاملين عليكم انتو..مش كنتو خدتوا بنت بنوت يكون ابنك اول بختها

ام يوسف بتمسك ايد رقية بفخر:متعملوش علينا يااختي..احنا نقينا زينة البنات وزينة العرايس..وياريت كل واحدة تخلى بالها من بيتها احسن..وبعدين عملتوا اى انتو لما جوزتوا عيالكم اللى هما اول بختهم! اهم عايشين فى غم اهو..ابعدوا عن عيالي احسنلكم..عالم عرر صحيح




ام يوسف بعصبية لرقية:وانت كمان بتعيطي ليه دلوقتي! والله اروح اجيبهم من شعرهم

رقية:انا اسفة عشان حطيتك فى الموقف ده يا ماما

ام يوسف بتضمها:بس يا هبلة..فى واحدة تتأسف لامها؟! وبعدين انا بجد فخورة بيكي وفرحانة انك مرات ابني بجد

رقية بدموع:كنت خايفة اصل تزعلي مني عشان كلامهم ده

ام يوسف:والله اروح اضربهم اللى خلوكي تعيطي دول

رقية بتمسح دموعها:لا لا خلاص والله..ربنا يديمك 

ام يوسف:ويباركلي فيكم يا حبيبتي..يلا بقا نروح نكمل الحاجات عشان فرحك يا عروسة ابني..

~~~~~~

يوسف:يا ماما كده كتير..انا عايز اشوف رقية بقا

ام يوسف:عارف يا واد يا يوسف! 

يوسف بتنهيدة عرفيني يا ماما

ام يوسف:احلى حاجة عملتها فى حياتك انك اتجوزت رقية والله

يوسف: يعني انا فى سنين عمري ال 26 كلهم معملتش حاجة عجبتك غير جوازي من رقية! 

ام يوسف:يااخويا اتوكس..واد يا يوسف..اوعى فى يوم تزعل رقية ولا تيجي عليها..دى غلبانة ياابني وانا اللى مربياها..عوضها عن قسوة ابوها عليها ياابني..وانا ربنا يقدرني واعوضها عن كل حاجة شافتها

يوسف:انا حاسس انها هيا اللى بنتك..انا ابنك والله فى اى

ام يوسف:انتو الاتنين عيالي يااهبل..بس انا مش عايزة اشيل ذنبها..البت يا حبيبي واحنا بنشتري الحاجة اللى ناقصاها كانت بتحاول تشوف اقل الاسعار عشان فلوسها تكفي..بس عيب عليك..انا اتفقت مع صاحب المول يقولها ان فيه خصومات كتيرة بحيث ان فلوسها تكفي وانا كملت الباقي..مكنتش عايزاها تحس نفسها قليلة 

يوسف بيبوس ايدها:ربنا يباركلنا فيكي يا حبيبتي..قوليلي بقا الفلوس اللى دفعتيها اد اى وانا هجيبهوملك..رقية ملزومة مني انا

ام يوسف بتمسكه من ودنه:انا جيبت لبنتي مش ليك فملكش دعوة انت..وعلى الله ياابن بطني انك تجيب السيرة قدامها والله اخاصمك ليوم الدين




يوسف بسرعة:طب مش هتخليني اشوفها بقا؟! 

ام يوسف بتضرب ايده وتقوم:لا..وبعدين الفرح بكرة خلاص..هروحلها انا بقا الحنة بتاعتها النهاردة

~~~~

ام يوسف:قمر يا حبيبتي ربنا يحفظك يارب

رقية بتبوس ايدها:ويديمك لينا يا ماما..انا بشكرك انك قبلتي انى ادخل عيلتكم

ام يوسف بتضمها:ده انت اللى هتهوني علينا الايام يا بنتي..ربنا يسعدك يارب ويكتبلك الخير يارب

ام رقية:يلا يا بنتي عريسك وصل..

ام يوسف بضحك:هطلع انا بقا عشان لو شافني معاكي هنا مش بعيد يطردني..مبروك يا قمر"بغمزة"

يوسف بيضمها بفرحة:اخيرا اليوم اللى اتمنيته جه..انا مش مصدق انك هتيجي معايا على البيت عادى كده..بحبك يا رقية..بحبك يا ضي عيني

رقية بكسوف:وانا كمان بحبك يا يوسف

يوسف بيبعد عنها بسرعة: قولتي اى! بتحبيني بجد! 

رقية بتدفن وشها فى حضنه بكسوف:مين يشوف حنيتك وميحبكش يا يوسف..كفاية انك بتعاملني زى بنتك..وكفاية مامتك وحبها ليا والله

يوسف بيضمها ليه اكتر:ده اسعد يوم فى حياتي جدا والله..ربنا يقدرني واسعدك يا نور عيني..

~~~~~



بعد 3 شهور

ام يوسف بصدمة:مالك يا بنتي بتعيطي ليه! عملتلها ايه ياللي تنشك فى بطنك

يوسف:والله مااعرف هو فيه اى..بتقولي عايزة اخرج شوية قولتلها اروح معاها قالت عايزة تروح لوحدها لما قولت اني خايف عليها بدأت تعيط وقالت انى بطلت احبها..وصممت تنزلك..عقليها بقا عشان انا مش عارف اتصرف ازاى..

ام يوسف بهمس لرقية:انت عملتي كده فعلا! 

رقية بدموع:ابنك مبقاش يحبني..خلاص مبقاش طايقني

ام رقية بزعيق ليوسف:اطلع برة يالا عشان طول ما اهي شايفاك مش هتبطل عياك وتهمسله..روح هاتلها شيكولاتة وكيكة شيكولاتة..هيا بتحبهم..متتأخرش

يوسف بعصبية:يا ماما هيا اللى غلطا.. 

ام يوسف بتزقه:غور من وشي يالا واعمل اللى قولتلك عليه

ام يوسف بتقعد قدام رقية:خلاص يااختي بطلي عياط وقوليلي الحقيقة يلا..اى اللى حصل! 

رقية بتمسح دموعها بسرعة:انا شاكة انى حامل يا ماما..ومش عايزة افرحه ومطلعش حامل..فكنت عايزة اروح اكشف وهو مصر يجي معايا

ام يوسف بضحك:لا بعياطك ده انا اتأكدت انك حامل خلاص..وبتضمها:ربنا يكرمكم يا عيوني وافرح بيكم واشوف عيالكم يارب

~~~~~

يوسف داخل وشايل الحاجة اللى امه قالتله عليها:ها يا ماما..عرفتي اى اللى مزعلها ك..اى ده! هيا بتضحك كده ليه! 

ام يوسف بضحك:عشان انا فرفوشة يااخويا مش نكد زيك..واه..اعمل حسابك هخرج مع رقية بكرة نفرفش شوية كده

يوسف بتريقة:وهيا كده مش مفرفشة! دى ناقص تلبس بلياتشو..وبعدين مااجي معاكم

ام يوسف بتمسك ايد رقية:خد مراتك واطلع صالحها..وبكرة هنخرج احنا الاتنين خروجة بنات كده عشان زهقنا من الملل ده"وتغمزلهم"

يوسف بيمسك ايد رقية:اهم حاجة تكونوا فرحانين..ويبوس ايدها

رقية بتحدفلها بوسة:تصبحي على خير يا قمر



~~~~~

يوسف:ممكن اعرف كان مالك بقا؟! 

رقية بتفتح ايده وتدخل فى حضنه:هرموناتي كانت هابة شوية.. أنا اسفة عشان زعلتك

يوسف بيرفع راسها:انا كل زعلي كان عشان انت عيطي والله..ممكن متعيطيش تاني! وانا اسف عشان مش بخرجك..بس مشغول الفترة دى بجد..وبعدين انا معتمد انك بتروحي الشغل فمفكرتش انك تكوني حسيتي بالملل يعني

رقية بتدفن راسها فى حضنه:بحبك يا أغلى ما ليا..

~~~~~

بعد 3 شهور

يوسف بصوت عالي: قولت لا يا رقية يعني لا..مش هخاطر بيكي انا..

رقية:عشان خاطري يا چو..انا بتوحم ولو مكلتش اللى نفسي فيه البيبي هيطلعله وحمة يرضيك كده! 

يوسف:اه يرضيني..لما سيادتك تتوحمي على فراولة وانت عندك حساسية يبقا يطلع وحمة عادي بس متتعبيش

رقية بزعل:انا هروح لماما وهيا اللى هتجيبلي 


ام يوسف بهدوء مزيف:يعني حضرتك بتتوحمي على فراولة وانت عارفة انك بتتعبي منها..انا فهمت صح! 

رقية ببراءة:صح..وابنك مش عايز يجيبلي

ام يوسف بتحدفها بالشبشب:امشي من قدامي يا حيوانة..مش عارفة تتوحميلي غير على فراولة! 

رقية بزعل ووجع:اه..وانا مالي! مش حفيدك اللى عايز! وبعدين انا خايفة يطلعله وحمة..تخيلي يطلعله وحمه فى وشه عشان مكلتش فراولة..والله ازعل

ام يوسف بنفاذ صبر:يوووووسف..شيل البت دى من قدامي عشان متعصبش عليها

رقية بتتحامى فى ضهر يوسف: يا ماما ده انا قولت انك هتجيبيلي.. كده تشمتي فينا الأعادي! 

يوسف:انا من الاعادي! روحي يا اختي لماما عشان تجيبلك روحي..

ام يوسف بتمسك ايد رقية وتضمها:يا حبيبتي انا خايفة عليكي.. وان شاء الله خير متقلقيش

~~~~~~

ام يوسف بفرحة:حمدلله على سلامتك يا حبيبتي..تتربى فى عزكم يارب

رقية:شوفتيها يا ماما! حلوة؟! 

ام يوسف بتبوس راسها:قمر لامها..ها قررتي تسميها اى! 

يوسف: الست عايزة تسميها ليلى زيك..شكلها كده عايزة تضمها لفريقها

ام يوسف:هيا دى بنتي حبيبتي..خدي يا بنتي شيلي بنتك وسمي..وتهمس ليوسف:هتتهبل لما تشوف الوحمة

يوسف بهمس:ربنا يستر

رقية بتشيل بنتها وتشوف وشها وجاية تبوس ايدها:يووووسف

يوسف بضحك:ايوة يا عيوني مالك! 

رقية بزعل:ليلي طالعالها فراولاية فى ايدها

يوسف بيبوس راسها ويضحك:عشان تحلى حياتك يا حياتي


بدل ماتدور وتبحث علي الروايات خليها علي تليفونك وحمل تطبيقنا

تحميل تطبيق سكيرهوم
تعليقات



حجم الخط
+
16
-
تباعد السطور
+
2
-