اسكربت بعد الصبر حتماً سيكون الجبر الفصل الثالث والأخير بقلم ذكري
اسكربت3 والأخير
قولت في نفسي أيه الغرور ده؟، وبعدين هو هو ه، أيه ده ثواني كدة ده صوت زين أيوة هو، أنا متأكدة أكيد مش بحلم أنا أكيد لأ، وهنا رفعت راسي علشان أتأكد إني مش بحلم ده ده بجد زين قلبي قعد يدق جامد، يدق أيه ده كان بيرقص من الفرح ده بجد ده ده زين، أيوة زين وأيه يعني زين؟ مش ده اللِ لسه مهزقني الصبح في الكلية.
طب مش هوافق يلا، لأ محدش يضغط عليا ياجماعة مستحيييل أوافق، أنا زعلانه جدًا منه ومش مسمحاه بسهولة،
رديت ببرود عكس فرقة حسب الله اللِ شغاله جوايا، والله حضرتك ده بيتنا، وأبص في المكان اللِ يريحني، وبعدين أيه جاب حضرتك هنا، فيه إهانة نسيت تهنهالي، ولا إتهام جديد نسيت تقوله الصبح في الكليه جاي تقولهولي هنا؟!
زين بهدوء /أولاً أنا أسف على طريقة الكلام بتاعتي معاكِ الصبح، ثانيًا حضرتك بردوا غلطانه إنك تقفي مع حد كدة في نص الكلية، يقف معاكِ بتاع أيه هو
أيه ده هو الشخص ده بيتحول ولا أيه؟، كان نسمه وهو بيعتذر، ولما جاب سيرة المعيد كان فيه نار بتطلع من ودانه، تماسكت ورديت عليه
لأ لما حد ينده عليا مش هعبرة علشان حضرتك تستريح، وبعدين هو نده عليا علشان ياخد رقم بابا علشان يجي يتقدملي، يعني لا كنت بعمل حاجة حرام أو عيب، وبعدين كنت منتظراه هو اللِ يجي النهار ده الصراحة مش حضرتك
ينهااااار أبيض هو زين بيتحول ولا أيه؟ هو ماله وشه إحمر كدة ليه! والله هعيط أنا عيلة، وبقول اي كلام هتاخد على خاطرك من عيلة 🥺
زين بهدوء مصطنع، أيوه والله مصطنع دا عينه شويه وهطلع نار من كتر الغضب/مبدئيًا كدة مينفعش يوقفك في الشارع كدة لأي سبب، لو عايز رقم والدك بجد يدور عليه، يروح يجيبه من الشؤن، مش يوقفك في الشارع،
ثانيًا متقلقيش مش هيجي
رديت عليه بإستغراب ومش هيجي ليه إن شاء الله
زين (فلاش باك لما حدث في الكلية)
زين بغضب/ ممكن أعرف حضرتك موقفها ليه؟
المعيد بتوتر/أن أنا بس كنت عايز رقم والدها علشان كنت حابب أطلب ايدها
زين بعصبيه أكتر/حضرتك لو عايز رقم والدها كنت ممكن تجيبه من الشؤن مش توقفها كدة في الشارع، ثانيًا بقى وده الأهم إزاي يا أستاذ جاي وعايز تخطب خطيبتي
المعيد بتوتر أكثر وإحراج كبير من هذا الموقف/أسف والله يا دكتور زين مكنتش أعرف إنها خطيبتك، على العموم ألف مبروك أنسه ذكرى محترمة جدًا جدًا وتستاهل كل خير
زين بغيرة شديدة حاول إخفاءها قدر المستطاع/أنا عارف كلام حضرتك ده كويس، والله يبارك فيك شكرًا، عقبالك
(انتهى الفلاش باك 😉😍)
أستاذ زين علفكرة بكلم حضرتك، مش هيجي ليه؟
زين بهدوء /هيخطبك إزاي وحضرتك مخطوبة
مخطوبة لأ بقى كدة كتير مخطوبة لمين وإزاي يعني؟! رديت عليه بإستغراب وانا مش فاهمة أي حاجة
أفندم مخطوبة لمين وإزاي؟
زين بهدوء شديد وبسمه جميلة/ مخطوبه لمين مخطوبة ليا، إزاي أنا طالب إيدك من والدك من أكتر من أسبوع في نفس اليوم اللِ كنتِ واقفه فيه مع عائشة على باب المدرج ، يومها طلبتك من والدك وهو رحب جدًا بالموضوع بس كان من رأيه أستني شوية على ما تفوقي من خطوبتك القديمة وتنسى الموضوع
ثواني بس هو وشه قلب ليه لما قال خطوبتي القديمة رديت عليه بهدوء مماثل
ومين قال لحضرتك إني هوافق أصلاً علشان تقول عليا خطيبتك؟!
زين ببسمه/ هتوافقي إن شاء الله، وبكرة كتب كتابنا.
رديت بغضب أفندم نعم مين سمحلك تاخد قرار عني طب أيه رأيك إني مش
زين /عمي تعالي ذكرى موافقة، وإن شاء الله بكرة كتب الكتاب
بابا بفرحة وهو بيحضن زين ألف مبروك يبني على بركة الله.
وماما قعدت تغرط وتهني، وأنا واقفة متنحة ببص لزين ببلاهة وهو بيضحك على شكلي
(طب بالله ضحكته قمر)
زين طب سلام دلوقتي ياعمي علشان ألحق أظبط الأمور وتجهيزات كتب الكتاب
زين ودعنا ومشي، وأنا لسه متنحه في مكاني بحاول أستوعب
§§§§§§§§§§§
لا حول ولا قوة إلا بالله
§§§§§§§§§§§
جه تاني يوم بسرعة البرق، والبيت امتلأ بالأهل والجيران وكله بيبارك ويهني، وانا لحد دلوقتي مش مستوعبة اللِ بيحصل معقول هبقي مرات زين؟ طب بالله الكلمة لوحدها ب تخليني طايرة من الفرحة، بجد مش مصدقه، نفسي أصرخ بأعلى صوتي وأقول أنا هبقى مرات زيييين بجد مش قادرة (أيوه شايفاكم يلي بتقولوا مش كنتِ مش موافقة من شويه وكنتِ بتقولي مستحيييييل وروحتي عامله بصوبعك كدة👀🤔
ياجماعة بتهزروا ما اوافقش أيه بس أنا بضحك معاكم، بالله إزاي ما اوافقش ده خطف قلبي من قبل ما أشوفه أصلاً، ولما سمعت صوتة خطفه أكتر، ولما شوفته خطفه أكتر وأكتر، والله أنا حاسه من كتر الخطف إن قلبي ده بتاع زين أصلاً وقاعد عندي تخليص حق 🥺🙂)
اليوم عدي جري وجه الوقت المنتظر كنت لابسه فستان أزرق جميل وشوز كافيه وحزام نفس لون الشوز، ونقاب وخمار أوفويت، كان جميل قوي من صغري وأنا كان نفسي في فستان اللون ده؛ لأني بعشق الأزرق تفاجئت ب عائشة جاية الصبح وجابتهولي وقالتلي إن زين باعتهولي علشان ألبسه في كتب الكتاب، بجد مكنتش مصدقه نفسي من الفرحة معقوله بيهتم بأدق تفاصيلي للدرجادي، طب دا أنا من سرعة الموقف نسيت، بس ياترى عرف المواصفات دي منين، بجد زين ده أجمل عوض بالله عايزة أصرخ بأعلى صوتي واقول بعشقك يازين
زين جه هو والمأذون لأن عائشة عندي من الصبح هي ومريم جمبي طول اليوم بيهدوني، ويساعدوني، وحماتي جت من شويه، وأخيرًا زين وصل هو والمأذون، كان لابس بدلة قمر قوي وهو قمرين أصلاً من غير حاجة ياربي كل البنات الموجودة عنيهم على زيني وأنا والعه هموت وأضربهم، عايزة أعيط من غيظي، هما بيبصوله كدة ليه
المأذون بدأ يكتب الكتاب وأنا لحد دلوقتي بحاول أقنع نفسي إني مش بحلم وإن اللِ أنا فيه ده بجد مفقوتش غير على
(بارك الله لكما وبارك عليكما وجمع بينكما في خير)
صوت الزغاريط علي وكله قعد يبارك وبابا حضن زين وباركله وزين عينه عليا وسلم على الكل وعينه عليا المشمحترم 🥺وأنا هموت من التوتر والكسوف، ومريم بتهديني وأنا خلاص مش قادرة، زين خلص سلامات وجه عليا أيه ده هو جاي هنا ليه ده ولااا بقولك أيه أوعى تقرب أن هموت أصلاً من الكسوف، والتوتر وأنت بعيد جايلي كمان، لأ كدة كتير هو ماله عينه بتلمع كدة ليه شكله عسل قوووي أنا زوجي قمررر، زوجي! أيوه زوجي أنا خلاص بقيت مرات زين
الكلمة دي كفيله تسعدني بقيت عمر
بصيت الناحية التانيه وأنا بقول أي هبل وخلاص لمريم
مريم بضحك /يابنتي مش هتبطلي العادة دي أبدًا، طول عمرك لما بتتوتري بتقعدي تقولي أي كلام وخلاص
شاطرة، ما أنتِ عارفة أهو تبقى تسمعي وتهزي دماغك وأنتِ ساكتة؛ علشان أنا نفسي والله ما عارفة أنا بقول أيه، وأنا هموت من التوتر وزوجي المشمحترم ده مش بيشيل عيونه من عليا
مريم بضحك /ياعيني عليه كان جايلك اول ما المأذون خلص؛ بس العائلة قامت بالواجب معاه، وأحضان وسلامات مش عارف يتحرك ياعيني
ابتسمت لما أفتكرت شكله وهو جايلي لقى العائلة محاوطاه معرفش يجي ياعيني
مريم/طب عن أذنك أنا ياذكرى فيه حد بينده عليا
رديت بإستغراب حد حد مين! مفيش حد، البنت دي بتستهبل، لقيت حد بيخبط على كتفي ببص ورايا أشوف مين لقيتني في حضن زيني🙈(والله ما عارفه إزاي أنا كنت واقفه ببص لقيتني في حضنه) شالني وقعد يلف بيا، وأنا روحت في عالم تاني مكنتش شايفه ولا سامعة غير صوت دقات قلبنا، أيه كم الدفا والأمان ده انا أقدر أقول دلوقتي وبكل ثقة (وجدت ملجئي) اللِ كنت بدور عليه من زمان أخيرًا
بعد فترة زين نزلني وأنا وشي في الأرض من كتر الكسوف وقلبي فرحان قوووي، وكأنه طفل صغير ضاع من أمه وأخيرًا لقاها بعد غياب.
زين /أخيرًا، أخيرًا يامجنناني
رديت بإستغراب أخيرًا أيه، ومجنناك كمان؟
زين/طبعًا مجنناني، ومطلعه عيني من يوم ما شوفتك وأنتِ واقفه في البلكونه، وبتشاوري لوالدك أول يوم كنت طالع معاه من المسجد وأنا مش قادر أنساكِ، من يومها وأنا بحاول مفكرش فيكِ إحتليتي كل كياني، تعرفي إن دعيت ربنا في سجودي إنه يجعلك من نصيبي، علشان كدة لما جيتلك كان عندي يقين إنك هتوافقي، مكنش غرور أو تحكم أبدًا بالعكس كان يقين.
ايه معقولة! ، معقولة حد يحبني كدة لدرجة إنه يطلبني من ربنا، معقوله الشخص اللِ غضيت بصري عنه ربنا يجعله من نصيبي،
يا الله بجد معقولة وأنا بجاهد علشان مغضبش ربنا، ربنا يدبري إني الشخص اللِ بجاهد نفسي علشان أغض بصري عنه ربنا يرزقني حبه ويجعله زوجي قد أيه تدبير ربنا جميل قوووي
، أنا لما مصطفى جه وطلب نفسخ الخطوبة كنت واثقة في ربنا خير والحمد لله ربنا عوضني بخير مكنتش أتخيله وقتها تذكرت وأيقنت ف (من ترك شيئًا لله عوضه خيرًا منه) الحمد لله دائمًا وأبدًا
زين /هاي ذكرى روحتي فين
لأ بقى كدة كتير، هو أنا هفضل كل مايقول اسمي قلبي يعمل فرح كدة، فيه أيه ياماما مش كدة
رديت بهدوء وبسمة رضا بقضاء ربنا وعوضة/هنا يازيني هروح فين يعني
زين /أه ماهو
أيه ده أنتِ قولتي أيه؟
رديت بكسوف/قولت هنا
زين /مش دي اللِ بعدها
هروح فين
زين /ذكرى متستهبليش اللِ في النص
رديت برفزة ووش أحمر من الشخص اللِ مصمم يكسفني ده
زييين بطل غلاسة، بطل تكسفني أحسن والله أعيط، أنا أصلاً بقنع نفسي إني مش في حلم بالعافيه
زين بضحكة خطفت قلبي/خلاص خلاص بطلي تقلبي طمطمايه كدة بس علشان أنتِ قمرايه ولما بتتكسفي كدة بتبقى عسولايه
رديت بنرفز زييين أنت مصمم طب والله همشي
زين بضحك/خلاص خلاص تعالي وبعدين مش بقول الحقيقة أنا
أستغفر الله أيه الشخص اللِ مصمم يخليني أحبه بزيادة ده، بالله يابني كفايه بالله قلبي دقاتة مسمعه في العمارة اللِ قصادنا وأنا سرحانه في أفكاري، إفتكرت حاجة كلمت زين بإستغراب
زين أنت عرفت منين مواصفات الفستان اللِ كان نفسي فيه؟ دا أنا نفسي نسيت مع إن ده كان حلمي من زمان
زين /عرفت منين؟ عائشة في مرة وهي بتكلم ماما عنك قالت مواصفات الفستان اللِ نفسك فيه، يومها كتبت المواصفات دي وصممت أعملهولك زي ما بتحلمي، وبالفعل تاني يوم نزلت جهزته وحضرتة علشان أقدمه لأجمل ملكة
زين أنتِ ليه مش قادر تقتنع إنِ ممكن أعيط فعلاً، وبعدين دا أنت ماتبع بقى، لأ وواثق كمان
زين/وأنا لو مكنتش أتابعك وأحققلك كل اللِ نفسك فيه هحققه لمين!
وبعدين طلبتك من ربنا وأنا ظني في رب العباد دائمًا خير كنت واثق إنه هيجبرني ويجعلك من نصيبي
رديت بدموع، معرفش فرحة حب رضا بعوض ربنا/زين تعرف إني بحبك قوووي
مسمعتش رد من زين، ولكن لقيت نفسي طايرة في الهواء أيه ده زين حاضني وبيلف بيا، أيه الشخص اللِ كل شويه يحضن ده لأ كدة كتير وأنا حبيت كدة الصراحة 🙈👀
زين /وأنا بعشقك ياقلب زين
بجد أنت أجمل عوض من ربنا يازيني
أيوه زيني متبصليش كدة أنت زيني أنا بس
زين /وأنا مش عايز غير إني أكون زينك لوحدك
بحبك يا مجنناني
وأنا بعشقك يازيني
يا الله قد أيه ربنا عوضة جميل فعلاً (الله إذا أعطى أدهش)
اصبروا أكيد ربنا هيرزقكم وهيعوضكم خير وتذكروا قوله تعالى {فَإِنَّ مَعَ الْعُسْرِ يُسْرًا إِنَّ مَعَ الْعُسْرِ يُسْرًا } بشارة عظيمة، أنه كلما وجد عسر وصعوبة، فإن اليسر يقارنه ويصاحبه، حتى لو دخل العسر جحر ضب لدخل عليه اليسر، فأخرجه كما قال تعالى: {سَيَجْعَلُ اللَّهُ بَعْدَ عُسْرٍ يُسْرًا }وكما قال النبي صلى الله عليه وسلم: " «وإن الفرج مع الكرب، وإن مع العسر يسرا» " .
الفرج قريب بس أنت اصبر لأنه
#بعد_الصبر_حتمًا_سيكون_الجبر
وبكدة انتهت قصتي اللِ بدايتها ألم وكسرة ونهايتها جبر وأعظم جبر لكن كان فية حاجة مهمه جدًا في المنتصف وهي اليقين والرضاء بقضاء الله وقدره رب الخير لا يأتي إلا بالخير
رأيكم يهمني وأسفه على التأخير
فضلاً إذا أتممتم القراءة صلوا على النبي صلى الله عليه وسلم
