رواية صراع مع الزمن الفصل الثاني 2 بقلم فاطمه الموجي
| part 2 |
وقفت سهيلة بصدمة تبص ع اللي واقف و اتحركت بسرعة ناحيته و هى بتمسك ايده و بتسنده .
سُهيلة بحنية و عتاب : بابا تعبت نفسك ليه يا حبيبي كنت هجيلك أنا .
عامر بتعب واضح على جسمه و صوته : جيت أشوف بنتي و هى أقوى من الحديد يا سُهيلة.
قعدته سهيلة ع الكنبة و قعدت جمبه و هى ماسكة ايده : حبيبي يا بابا إنت دايماً جمبي .
طبطب عامر على إيدها بحنيّة : أنا مش عاوزك تتهزي قبل ما تاخدي حقك يا سُهيلة و حقك مش هييجي بإنتقام ولا تردي فيه اللي هو عمله بالعكس يا بنتي حقك هييجي لما تخليه ييجي يترجاكي ترجعيله نفوذه ف البلد تاني عشان اللي زي هشام البحراوي مبيهمهوش حد غير الفلوس .
اتنهدت سُهيلة و هى باصة قدامها بوجع ظاهر على ملامحها : عارفة يا بابا و مجربة كمان عشان كدا مش هوجعه غير ف مركزه و فلوسه .
ابتسم عامر : و أنا معاكي و أخواتك معاكي و محدش يقدر يقربلك يا سُهيلة ، و بعدين قال بحنيّة: أنا لو مُت هبقى مطمن على شركاتي اللي فضلت أتعب و أبني فيها طول حياتي عشان هتبقى في إيدك إنتي و إلياس .
سُهيلة بدمُوع : متقولش كدا يا بابا إنت هتكون كويس و هتقوم أحسن من الأول ، و بعدين كملت بضحك عشان تخفف عنه : يا بابا أنت مش شايف نفسك ولا إيه ده أنت لسه شباب و قمر أهو .
ضحك عامر ضحكه خفيفة : ربنا يبارك فيكي إنتي و أخواتك يا سهيلة يا بنتي .
ابتسمت سُهيلة و طبطبت على إيده . . .
*عند عبد الله *
المدير بزعيق : إنت كُل يوم تفضل تديني حجج تافهه و أنا مش عيل عشان أصدق الهبل ده أنت المفروض راجل عندك شُغل تقوم قبله ب ساعة و لا أنا هعلمك إزاى تشتغل !!
عبد الله بندم : أنا آسف أوعد حضرتك إن دي آخر مرة و كما. .
المدير بمُقاطعة : مفيش آخر مرة إنت مطرود اتفضل برا .
لسه عبد الله هيتكلم ف قاطعه المدير تاني بعصبية : مش هعيد كلامي تاني .
، اتنهد عبد الله بقلة حيلة و خرج من المكتب و هموم الدنيا كلها فوق راسه .
نزل ركب تاكسي عشان يرجع البيت و سند راسه على شباك التاكسي بندم .
* عند مروان*
نزلت نجمة من عربية مروان و هى بتشاورله بإيدها : باى يا مرواني هستناك تيجي تاخدني .
بعتلها مروان بوسة ف الهوا : عيوني ليكي يا قلب مروانك خدي بالك من نفسك .
هزتله نجمة راسها بابتسامة طفولية و استناها تدخل الكلية و اتحرك ب عربيته .
جاسم من الكرسي اللي ورا : كدا معادش إلا أنا وصلني بقا و إتكل على شغلك .
بصله مروان ف المراية : أصل أنا سواق أهلك ده هى مرة ملهاش تاني.
بصله جاسم برفعة حاجب : يااض عاملني بحنية شوية يالا.
مروان و هو مركز ف الطريق : ليه أنت خطيبتي ؟
ضحك جاسم و غمزله : أيوة بقا يا عم ده يا بختها اللي هتبقى خطيبتك .
رجع مروان بصله ف المراية : طب اظبط بدل ما أقلبك هنا و أسيبك و أمشي يا عم العندليب .
جاسم بغرور مصطنع : متقدرش عارف ليه ؟
مروان بتساؤل : ليه يااخويا !
جاسم بنفس الغرور : عشان مش هتعرف تكمل الطريق من غيري .
ضحك مروان ضحكة خفيفة و هو من جواه بيقول : مش هعرف أكمل طريقي من غيركوا ٱنت مكدبتش . . ربنا يحميكوا ليا .
_________________________
* في إحدى كليات الطب المشهورة بالقاهرة*
سيلين بضحك : مروان لو عرف هيعلقني ف لاء مش هخرج من غير ما أقوله .
شهد بتوهان : يارتني كُنت أنتي هييح
بصتلها سيلين بقرف : طب اتلمي و خلي يومك يعدي إنتي صحبتي و مش عاوزة أخسرك .
شهد بضحك: أعملك إيه ما إنتي اللي أخوكي قمر يخربيت كدا .
بصتلها سيلين و قربتلها مسكتها من بلوزتها : بقولك إيه يا بت إنتي متجيبيش سيرة أخويا أحسنلك .
برقت شهد بذعر : إيه يا سيلي بهزر يا حبيبتي إنتي مبتهزريش ولا إيه !
سابتها سيلين و هى بتبص قدامها : مفيش هزار ف أخويا
تمتمت شهد بينها و بين نفسها : ربنا يكون ف عون اللي هتتجوزه دي هتشوف سواد .
بصتلها سيلين : على فكرة سمعتك و لاء متقلقيش مش هتشوف سواد عشان هى هتكون مرات أخويا و لمي الدور بقا بدل ما ألمه أنا . .
بصتلها شهد بذعر و هى بتحط إيدها على شعرها و بتفتكر آخر مرة لما بنت جابت سيرة مروان الداغر و فضلت تعاكس فيه قدام سيلين راحت شادة شعرها و مسابتهوش الا لما الدكتور زعق ف نفضت الأفكار دي من دماغها و قالت بخوف : لاء ياختي الطيب أحسن .
____________________________
| إيــطـالــيــا |
إلياس في التليفون : تاخد بالك منها و ممنوع منعاً باتاً تغيب عن عينك و تحطها ف عينك عشان لو حصلها حاجة هأذيك تمام ؟
الجارد : تمام يا افندم أنسة سهيلة ف عنينا.
، اتنهد إلياس و قفل و هو بيسند راسه ع السرير و بيكلم نفسه بتحذير : والله لو حد أذاكي لأدفعه التمن غالي .
، باب الأوضة اتفتح و دخلت بنت ف العشرينات و جريت نطت على إلياس .
إلياس بوجع : يابنت العبيطة حد يصبح على حد كدا.
تاليا بضحك : صباح النور ياعم أهو مختلفناش .
بصلها إلياس برفعه حاجب : عم ؟
تاليا باستعطاف و هى بتمسك خدوده : أحلى عم ف الدنيا يخلاثي عليك قمر .
ضحك إلياس و قال بهزار : أنا لو حد شافني و أنا ممسوك من خدودي و بيتقالي يخلاثي بتاعتك دي هيبتي هتضيع .
وقفت تاليا على السرير و حطت إيدها ف وسطها : براحتي أعمل اللي أنا عاوزاه ها
ضحك إلياس و هو بيقوم و شالها ع كتفه : يلا يابت اطلعي برا خليني أجهز عشان الشغل.
تاليا بضحك : طب نزلني هقولك حاجة بقا
نزلها إلياس : ها قوليلي حاجة .
بصتله تاليا بدموع : هى سهيلة مش هتيجي تاني ؟
بص إلياس ل تاليا و مسحلها دموعها : إن شاء الله ياحبيبي هتبقى تيجي .
تاليا بدموع أكتر : مش بعرف أقعد من غيرها يا إلياسي
حضنها إلياس : هتيجي يا توتا ياحبيبي بس بطلي عياط.
: خااينييينن
اتنهد إلياس و هو بيغمض عينه بضحك عشان عارف صاحبة الصوت ف بصلها : أهلا ب اللاسعة بتاعتنا .
مايا بمرح : بتتحضنوا من غيري يا خونة إخص على الأخوات إخص أخوات آخر زمن .
إلياس بتريقة : و أنتي يا شاطرة مروحتيش الكلية ليه .
مايا بتغيير الموضوع : إلا قولي يا قمر إنت جعان ولا أنزل أكل لوحدي .
إلياس : أفهم من كدا إنك مروحتيش إنهادرة .
ردت تاليا بضحك : لأ قالت هتاخد انهاردة اجازة
مايا بصدمة : إنتي يابت إنتي مبيتبلش ف بوقك فولة ليه يابت إنتي مش قولتي مش هقول لحد .
إلياس بصوت واضح : ماايا متتكررش تااني و جامعتك تلتزمي بيهاا مفهوم ؟
مايا بطاعة : مفهوم يا حبيبي مفهوم .
إلياس بضحك : يلا يابت إنتي و هى إطلعوا برا عشان أجهز نفسي .
مايا بضحك : طب والله قمر مش محتاج تجهيز يا واد يا حلو إنت .
إلياس بصدمة : يابت إنتي طالعة لمين إنتي ؟
مايا و هى طالعة من الاوضة هى و تاليا : لأ أنا طالعة لوحدي كدا عشان التمييز بس يا ليسو .
ضحك إلياس و هو داخل الحمام : والله هبلة و عقلها طاقق .
__________________
| مــصــر |
* شركة البحراوي*
كان قاعد ف وضع مُخّل مع السكرتيرة إذا بفاجأة دخل أخوه متعصب : إنت مش هتبطل بقا يا هشام !!
هشام بعصبية : إنت إزاى تدخل بالطريقة دي هو مش في زفت باب تخبط عليه !!؟
بص ريّان بقرف للسكرتيرة و زعق فيها : إنتي مطرودة إتفضلي إطلعي براا
، قامت السكرتيرة بسرعة و خرجت و هى خايفة من عصبية ريّان اللي معروف إنه عكس أخوه تماماً و عصبيته تحرق أي حد قدامه . .
بص ريان ل هشام بعصبية : إنت مش مكسوف من نفسك يا أخي ده أنت المفروض الكبير مش أنا .
هشام بعصبية أكبر : لاااا ماهو مش عشان سكتلك هتسووق فيها إلزم حدودك معايا يا ريّان .
بصله ريان بخنقة : ياعم مش كفااية حتى اللي عملته ف البت زمان إيه متوبتش ؟! مقولتش حرام بقا هرجع ل ربنا و استخدم مهنتي ف الخير مش في أذية الناس !!
بصله هشام بغضب : ملكش دعوة أنا أعمل اللي أنا عاوزه و محدش يقولي إنت بتعمل إيه فاهم ؟؟!
بصله ريّان بعتاب ممزوج بالضيق و رزع رجله جامد ف المكتب و مشي و هو متدايق و على أخره .
، قعد هشام على كرسي المكتب تاني و هو بيخبط ايده جامد ف المكتب و قال بعصبية : أبو أم دي شغلانه .
______________________
*شركة الداغر*
مروان كان قاعد ماسك عقد شراكة في إيده و قدامه أبوه .
مروان برفض : يا بابا إحنا مش محتاجين شراكة مع حد إحنا شركتنا ليها وضعها مش محتاجة شركة تانية تعليها .
شاهين بإلحاح : يابني هو أنا قولت إن شركتنا قليلة بس بردوا كل ناجح بيخطط لنجاح أكبر ، إحنا لو العقد ده مع الشركة دي هنبقى إحنا و هما ف السما و هنقدر نحقق نجاح كبير يا مروان .
مروان بنفاذ صبر : طيب هدرس الأول الموضوع و أشوف .
اتنهد شاهين بارتياح : إن شاء الله هيبقى نجاح كبير و كمان أنا بعت مندوب للشركة التانية عشان يعرض عليهم الشراكة و لو اتقبل هيبقى في اجتماع بين الشركتين .
مروان بتساؤل : قولتلي الشركة اسمها إيه ؟
شاهين بابتسامة أمل : إدوارد
#يتبع
#صراع_مع_الزمن
#فاطمة_الموجي
