رواية صراع مع الزمن الفصل الثالث 3 بقلم فاطمه الموجي
| part 3 |
*قصر الداغر*
مروان و هو بيعدل قميصه : يلا يا نجمة أنا جاهز
نِجمة بغيرة : لو سمحت يا أبيه غيّر القميص الزيتي ده بيبقى شكله حلو اوي عليك .
ضحك مروان بصوته كله : هو حد هيعرف يبصلي و انا واخدك إنتي و سيلين معايا ده إنتوا تضربوه بالنار
نجمة بنفس الغيرة : والله لو واحدة بصتلك ل هقوم أضربها و مش هيهمني حد
بصلها مروان بضحك : طب يلا يا شريرة يلا
نجمة بتكشيرة : أنا مش شريرة يا مارو
مروان بتنهيدة ضحك : إنتي قمر ياقلب مارو ، و بعدين بصلها : بس إيه القمر ده كل يوم هنحلو كدا ؟
نجمة و كأنها نسيت هما بيتكلموا في إيه و ابتسمت ابتسامة واسعه : بجد حلو يا مروان ؟
مروان ضحك عشان كل مرة بيسكتها بالطريقة دي : قمرر يا قلب مروان يلا عشان سيلين مستنيانا بقالها ساعه هى و جاسم .
____________________________
*ڤيلا سهيلة*
كانت قاعدة بتدرس عقد الشراكة و بتفكر تقبل و لا لاء بجانب إن ده عرض ميتعوضش و بكدا هتقدر تحقق انتقامها ب شركة كبيرة زي شركة الداغر ف حست إنها مشوشة ف اتصلت على إلياس .
____________
| إيــطـالــيـا |
إلياس كان قاعد بيشتغل ع اللابتوب بتاعه و فجأة موبايله رن ف بيبص يشوف مين لقاها سهيلة ف رد بسرعة
إلياس : وحشتينا كلنا أوي يا سهيلة
سهيلة بحزن : و إنتوا كمان والله يا إلياس نفسي أجيلكوا تاني مش مرتاحة من غيركوا.
إلياس ضحك عشان يخفف عنها : و لا يهمك يا ستي نجيلك إحنا من يوم يومنا و إحنا لازقينلك فرقت إيه يعني ؟
ضحكت سهيلة و بعدين قالتله بتركيز : بقولك عاوزة أخد رأيك في حاجة
إلياس بتركيز : سامعك
اتنهدت سُهيلة و اتكلمت : شركة الداغر عاوزين نبقى إحنا و هما واحد .
إلياس بعدم فهم : وضحي كدا
سهيلة : عاوزين نبقى إيد واحدة يعني نشترك مع بعض و تبقى شركة واحدة فاهم ؟
إلياس بحماس : ده حلو أوي يا سهيلة إنتوا الاتنين نفس المستوى و أظن هتحققوا نجاح كبير أوي سوا و بالمرة هتعرفي تاخدي حقك و هيكون ده دافع قوي كمان ليكي.
اتنهدت سهيلة بارتياح : طب على بركة الله أنا هتصل ع سكرتيرة مدير الشركة و أعرفها إن إحنا قبلنا و بكرة هيكون الاجتماع عشان مش عاوزة تأخير .
ابتسم إلياس : بالتوفيق يا أميرتي و خدي بالك من نفسك يا سهيلة و كل يوم كلميني .
سهيلة بامتنان : ربنا يخليك ليا يا إلياس .
________________
*عند سهيلة *
بعد ما قفلت مع إلياس اتصلت على رنا سكرتيرة مروان و بلغتها بالموافقة و إن الاجتماع هيكون بكرة ف شركة إدوارد و بعدين اتنهدت بارتياح و نامت عشان تستعد ل بكرة .
______________
* في إحدى المطاعم المشهورة بالقاهرة*
مروان : يلا شوفوا هتطلب إيه يا زفت يا جاسم إنت بقالك ساعة باصص في المنيو .
جاسم : ساعة إيه ده إحنا لسه واصلين عموما هطلب تيس مندي و رز .
مروان بنفاذ صبر : يا فرج الله أخيرا !
جاسم اتريق و سكت ف طلب مروان طلباتهم و قعدوا يتكلموا و يضحكوا لغاية ما الاوردر جه .
فون مروان رن ف رد و فتح الاسبيكر عشان كان بياكل ف بيظهر صوت أنثوي بيتدلع .
رنا بدلع : مستر مروان مديرة شركة إدوارد بتبلغ حضرتك إن الشراكة أتقبلت و الاجتماع بكرة ف شركتهم .
، بصوا سيلين و نجمة لبعض برفعة حاجب و مسكت نجمة الفون و ردت بقرف : إيه يا حلوة لسانك معووج أجي أعدلهولك ، ما تتكلمي عدل يا بت إنتي مالك عايشة دور الكيوت ليه كدا !؟
مروان برق هو و جاسم على شخصية نجمة اللي اتحولت فجأة ب مجرد ما البنت اتدلعت على مروان .
مروان و هو مازال مصدوم : اقفلي يا نجمة عيب كدا .
سيلين : لو سمحت يا مروان البت دي مشوفش وشها ف الشركة تاني دي باين عليها حرباية .
مروان بصدمة : هو ٱنتوا مرتاتي و أنا معرفش !؟
نجمة قفلت الفون و بصتله : و كمان ناوي تتجوز ؟
جاسم بصدمة : اومال هيقعد جمب أمه ؟
بصله مروان و خبطه بإيده ف كتفه : ما تتظبط يالا
اتنهد مروان : حاضر يا أنسة سيلين إنتي و نجمة أي طلبات تانية ؟
ابتسموا الاتنين بارتياح : لا ياحبيبي بالهنا و الشفا .
حرك مروان راسه يمين و شمال و قال بهمس : لا حول ولا قوه الا بالله .
ضحكت سيلين و نجمة بهمس و جاسم كان بيبصلهم : اه منكم إنتوا اااه صنف غريب .
_________________
* ڤيلا البحراوي*
كان ريان بيجهز شنطته و بيجهز نفسه ف دخل هشام الاوضة و شافه ف سأل بسخرية : رايح فين هتهاجر ولا إيه ؟
ريان بعد اهتمام : مسافر إيطاليا شُغل .
هشام باستغراب : شغل إيه اللي في إيطاليا !!
ريان بصله ببرود : شغل ليه علاقة بشركتي أنا يا هشام شركتك إنت ملهاش علاقة ب حاجة .
هشام بضيق : إولع إنت و شركتك ، و سابه و مشي ف بص ريان على طيفه بقلة حيلة و رجع يكمل لبس .
____________
*صباح تاني يوم ڤيلا سهيلة *
كانت واقفة قدام المراية بتحط اللمسات الأخيرة و بتستعد لاجتماع انهاردة و كانت رابطة شعرها لفوق و لابسة بنطلون لونه بيبي بلو و چاكت بنفس اللون و تحته توب أبيض و لبست الهيلز بتاعها و اتجهت ف طريقها ل الشركة.
_____________
* شركة الداغر*
مروان كان بيجهز ملفاته و معاه شاهين بيساعده و نزلوا ركبوا عربياتهم و اتجهوا لشركة إدوارد
، بعد نص ساعة وصلوا و نزلوا بهيبة و دخلوا الشركة و الموظفين بيتهامسوا بينهم وبين بعضهم على هيبة و جمال مروان و كذلك شاهين في اللي كانوا مستغربين إن إزاى ده أبوه نظراً لإن مش باين عليه السن الكبير و في اللي كان مركز مع مروان و مش واخد باله من شاهين أصلا .
، جاتلهم نانسي سكرتيرة سهيلة و قادتهم لغرفة الاجتماعات .
__
*عند سهيلة*
الباب خبط ف قالت سهيلة : ادخل
دخلت نانسي و قالت بابتسامة : شاهين بيه وصل يا أنسة سهيلة .
هزت سهيلة راسها : خمس دقايق و جاية.
، خرجت نانسي و قامت سهيلة تلم ملفاتها اللي هتعرضها ع الشركة التانية و هى بتدعي ربنا إنه يكون بداية خير .
، قامت و خرجت باتجاه أوضة الإجتماعات بثبات و برود عكس اللي جواها .
فتحت نانسي باب الأوضة ل سهيلة ف دخلت سهيلة بثبات و كلهم قاموا وقفوا ف ابتسمت سهيلة و قالت برسمية : اتفضلوا ارتاحوا.
، مروان بانبهار : إحنا يسعدنا جدا إننا نكون ش. .
قاطعه شاهين و بصله و قال بهمس : إنت بتقول إيه يا مروان إنت رايح تتقدم لواحدة ولا إيه ؟ اتعدل كدا هتخيب ولا إيه ؟
حمحمت سهيلة : طب نبدء الاجتماع ولا إيه ؟
بدءوا الاجتماع و كل شركة عرضت انجازاتها و أعمالها و بيفكروا ف إيه و هكذا و بعد ٣ ساعات كان الاجتماع مُنتهي و سهيلة و مروان و شاهين بيوقعوا عقد الشراكة
مدّ شاهين كف إيده ل سهيلة : سعيد جداً بشراكتنا سوا يا أنسة سهيلة و أتمنى تكون بداية حلوة للشركتين .
مدت سهيلة ايدها و كذلك لمروان وقالت برسمية : أتمنى ده مسيو شاهين و مروان .
بصلها مروان و ابتسم : هيكون نجاح كبير بإذن الله .
شاهين بابتسامة : بالمناسبة السعيدة دي لازم يكون في عشاء بليل سوا.
ابتسمت سهيلة : إن شاء الله بس ملوش داعي نتعب حضرتك.
شاهين بحنية : و لا تعب ولا حاجة يابنتي إنتي هتيجي تتعشي عندنا و كمان أعرفك على العيلة لو ده مش هيزعجك.
ابتسم مروان ف اتوترت سهيلة و قالت بكسوف : أصل أنا مش هينفع ...
شاهين بمقاطعة : هنستناكي يا سهيلة الساعة 8 بليل .
ابتسم مروان و هو قايم و بيفتكر نجمة وسيلين و من جواه بيدعي الليلة تعدي على خير .
قام شاهين و هو بيقول : بالتوفيق يا بنتي .
ابتسمت سهيلة و خرجت معاهم و اتجهت لمكتبها و هما اتجهو لشركتهم من جديد .
________________
| إيــطـالــيــا |
دخل ريان شركة كبيرة من تاني أكبر الشركات في إيطاليا بعد شركة إدوارد و خبط ع باب مكتب و دخل من غير ما يستنى رد .
و هو باصص ف الملفات قال بعصبية : انا مش قولت محدش يخبط عليا انهااردة .
ريان بمرح : يا حلاوتك و إنت متعصب يا أبو القواسم
رفع قاسم عينه ف شاف ريان و ابتسم ابتسامه واسعه و هو بيقوم ياخده بالحضن : رياان حبيب قلبي وحشتني يا جدع
ريان و هو بيحضنه و بيضحك: من شوية محدش يدخل عليا
قاسم بضحك : لا ماهو إنت مش أي حد بردوا
....
#صراع_مع_الزمن
#فاطمة_الموجي
لمتابعة باقي الرواية زوروا قناتنا على التليجرام من هنا
