رواية اسميتة جاسر الفصل الرابع
"حتي لو احنا بُعاد ومبنتكلمش فأنت عيد ميلادك النهاردة ، كل سنة وانت طيب كل سنة وانت الغايب الحاضر لقلبي "
بعت الرسالة بإيد بترتعش وقفلت الفون ، قفلته لاني مش عايزة اسمع صوت رسالة منه انا حاليا ف أضعف حالاتي ومش هتحمل رد ، قفلته وفضلت ابصله بتوهان وضعف ودموعي بتنزل بدون إرادتي كأنها رد فعل لألم بيعلن وجوده بأنه منتهاش .
وسؤال بيطرح نفسه : ليه الإنسان ميعرفش يُضم روحه وليه متخلقش ايد لقلوبنا نطبطب بيها ع الوجع ؟
قمت اتوضيت وصليت وانا لسه بعيط
" يا رب انت اللي عالم بيا وبحالي ، بعزتك وجلالك زرعت حبه ف قلبي وانا دلوقتي بتألم فشيله يا رب من قلبي أو اكتبه يبقي من نصيبي ، يا رب مش عايزة غير الخير والرحمة لقلب موجوع "
_________________
_ العيون الحلوة دي حزينة ليه ؟
اتنهدت " بعت الرسالة "
_ ما تيجي اجبلك ورد انتي بتحبيه
" تفتكري شايفني ازاي دلوقت ؟ "
مسكت ايدي _ مش مهم هو شايفك ازاي ، المهم انك تكوني كويسة .
" بحاول اتعافي من حبه "
_ يبقي ليه بعت الرسالة ف الأصل طالما بتحاولي ؟
" لحظة ضعف ؟ "
_ ويمكن لحظة حنين واعتراف منك ليكي بأن قلبك لسه متعلق بحبال حبه .
دمعت " انا مش وحشة صح ؟ "
حضنتي _ انتي احلي بنوتة ف الدنيا مينفعش تسألي سؤال زي دا .
" ندي " صاحبة عمري والدفا والأمان لقلبي هي النجمة الوحيدة ف سما ضلمة مليانة اسرار هي المنفذ الوحيد لقلب أهلكه الوجع والحب .
والجدير بالذكر والاعتراف بأنهم وجهان لعملة واحدة مفيش حب من غير وجع ومفيش وجع مكنش سببه الحب .
_________________
_ خلصتي سيناريو المسرحية ؟
" شغالة ع النهاية "
_ هتبقي حزينة ؟
" لسه حقيقي معرفش اقترحي عليا "
_ خليها سعيدة افضل .
" أعتقد مفيش حاجة بتبقي سعيدة غير البدايات "
_ احيانا بتبقي النهايات سعيدة لما الحب يكون اقوي من صعاب الحياة .
ابتسمت بحزن " لما يكون حب من طرفين "
_ الحب من طرف واحد هو الاصعب لكنه هو الاسمي والاقوي ، وف أحيان تانية ممكن الحب من طرف واحد يتحول لحب من طرفين لما الطرف التاني يكتشف اد اي اتحب .
" مش يمكن البطلة متتحبش ؟ "
_ مفيش بنت متتحبش وخصوصا لو كانت بطلة انتي خلقتيها بمشاعرك اكيد جميلة شبهك .
"المخرج عجبه السيناريو ؟ "
_ طبعا اومال وقالي كمان مين الكاتبة العظيمة دي عايزة اشوفها .
" عظيمة دي كلمة كبيرة أوي انا لا استحقها "
_ حبي نفسك يا الاء انتي تستاهلي الحب خلي عندك ثقة ف نفسك اكتر من كدا .
_______________
انا " الاء " بنت عادية جدا زي اي بنت ، ربنا رزقني بموهبة الكتابة واكتشفت اني بعرف اكتب بالصدفة لما هاجمتني موجة حزن فحاولت الاقي مهرب فكانت الكتابة طريق ومنفذ .
واجهت كتير ف حياتي ف سن صغير من فقدان ناس عزيزة اوي ع قلبي ومن ظروف مؤلمة كان لابد التصرف فيها ومن خسارة حلم و لحب تعيس مشوه ملامحه مبهمة .
فاتخلقت شخصية حزينة هشة بحساسية مفرطة ف المشاعر من جوا لكن من برا مبتسمة دايما وهيئة شخصية سعيدة ، هيئة بس مش اكتر .
فاكتشفت من هنا اني شخصية ازدواجية أو بمعني ادق ممثلة شاطرة جدا فيما يتعلق بحياتي .
_________________
_ ف تجارب اداء للتمثيل ما تجربي يا لول ؟
: لا كفاية عليا الكتابة افضل انه بلاش مسرح .
_ لكنك كنت بتحبي المسرح جدا واحنا ف المدرسة
: دا كان زمان يا عمري .
_ ابدا والله يلا بينا مش مسرحيتك والله لتجربي ومش هنقول لحد انك الكاتبة الا بعد التجارب .
: بلاش وحياتي عندك يا ندي .
_ ابدا ولو ، كلمتي مش هتنزل الأرض ابدا دا انا مساعدة المخرج يا بت .
ضحكت " ماشي ، يلا نجرب حظي مش هزعلك "
' ف المسرح بعد تجارب الاداء '
" شفتيني وانا بعيط ف المشهد "
_ عيوطة هانم دراما كوين
" يااه بقالي فترة ممثلتش ع خشبة مسرح "
_ كانوا مقتنعين جدا بتمثيلك علفكرا تخيلي تبقي البطلة والكاتبة اي الميكس دا
"متعددة المواهب انا ي.." وقفت فجأة
وبصيت لشخص عيني جت ف عينه للحظات وطلع من المسرح بخطوات سريعة كنت لسه هروح وراه
_ الاء مالك ف اي ؟
" تعالي ثانية كدا "
جريت من المسرح بسرعة لكني ملقتش حد مكنش فيه غير نسمة هوا باردة خبطت ف قلبي رجته
_ اي اللي حصل مش فاهمة جرينا ليه ؟
" كان فيه شخص بكاب هنا ف المسرح و فجأة لما اتقابلت عيننا جري " اخدت نفس " هو "
_ بجد ؟
" قلبي ميغلطش ف عينه "
_ مشي ليه ؟
" معرفش معرفش انا تعبت "
_ أهدي محصلش حاجة يمكن مش هو اصلا
" في حاجة ومش عارفة هي اي "
_ بطلي تفكير
" دا مش حب يوم او اتنين دا حب سنين كتيرة يا ندي احساسي ميغلطش هو فيه حاجة "
_ تعالي ندخل يا الاء نشوف النتيجة وفكك
مشيت وانا لسه ببص لورا طيفه هنا انا حساه بقلبي
المخرج : احنا اختارنا اتنين واحدة هتبقي البطلة والتانية هتبقي البديلة ، ***** البطلة والاء الممثلة البديلة .
ووجه كلامه ليا بابتسامة : كاتبة وممثلة فنانة صاعدة م الاخر
" شكرا لحضرتك جدا "
ميلت ع ندي : " انتي قولتيله امتي "
_ انا مقلتش حسبتك انتي اللي قولتي
بصدمه " اومال عرف منين "
_ معرفش ، يمكن عرف م الاسم
" يمكن "
حاولت اعدي الموقف لكن الابتسامة الغريبة ع وش المخرج بتقول غير كدا . لكني كدبت احساسي وعديت الموقف وروحت اخيرا للبيت .
فلقيت رسالة من ندا _ الاء
" اي يا ندي ملحقتش اوحشك "
_ اسكتي يا بت بقولك في إصرار غريب من المخرج انك تحضري جميع البروڤات معرفش ليه ؟
" ليه وانا م الأساس اللي كاتبة النص فحفظاه اكيد "
_ حاولت أقوله كدا لكنه مسمعش ليا .
" فيه حاجة غريبة ف المخرج دا "
_ فكك منه المهم البروفة بكرا بعد الضهر متتأخريش هعدي عليكي ننزل سوا تصبحي ع خير .
" وانتي من أهله يا ندي "
وقبل ما انام
دخلت ع البروفايل بتاعه كالعادة بيأس يمكن نزل حاجة جديدة ابتسمت بتلقائية لما لقيت بوست جديد لكنه عن الحب الحزين ، حسيت أن الابتسامة وقعت من وشي ، معقولة كمان حب ؟
_________________
من الطبيعي إن اي بنت تدور ع الحب الحقيقي ف حياتها بسجية انثي مش اكتر .
حوا اتخلقت من ضلع ادم عشان تبقي الاقرب لقلبه عشان تبقي ضلوعه هي الأمان والحماية ليها .
واحنا كبنات مهما اتظاهرنا بالقوة جوانا قلب بينبض نفسه يحب ويتحب .
واجمل حب هو اللي يتوج بالحلال ، خليكي عفيفة ف حبك مهما كان يا بنت حوا .
_________________
المخرج : لو سمحتي فيه حد حابب يضيف شعر ف المسرحية
" افندم ؟ مين الحد دا ؟ ومش المفروض اللي حضرتك تقرر م الأساس "
المخرج : تمام اعتبري دا طلبي والحد دا يبقي من محبي الشعر جدا وتحديدا شعرك .
قلبي دق " ممكن اعرفه ؟! "
المخرج بابتسامة : هتعرفي قريب متسبقيش الأحداث كل حاجة معياد .
- يا أبلة يا أبلة انتي اسمك الاء
كان طفل صغير باين عليه البراءة نزلت لطوله .
" ايوا يا حبيبي "
- فيه عمو اداني الورقة دي وقالي اديهالك
" عمو !! عمو مين " معرفش ليه بصيت للمخرج فجأة لقيته ابتسم اكتر ومشي .
- عمو طويل كدا بكاب .
تلقائي بصيت حواليا ف المسرح ورجعت بصيت للطفل لاقيته جري ، اي ربكة القلب دي .
فتحت الورقة
"السلام علي قلبك اولا ثم السلام علي عينيكي ثانيا وثالثا ورابعا .....واخيرا .
اعذريني عزيزتي لكن حزنهما يجذبي بشدة ،
عيناكِ كبحر لا ساحل له أو ربما كبئر غامض ملئ بأسرار لا قاع له .
عذرا لغزلي الصريح لكنكِ تبدين كالاميرة اليوم كعادة كل يوم .
اشتقت إليكِ "
قرأت الرسالة اكتر من مرة ، حسيت قلبي هينفجر من كتر الدق قلبي الصغير بيرتجف من النبض اتمنيت يكون هو ، قلبي اتخيله ، انا قرأت الرسالة بصوته .
جريت ع المسرح ومسكت الميكرفون حاولت الملم شتات نفسي وشجاعتي وقولت :
يا ابعد قريب
واقرب بعيد
كن لقلبي قريب
لتصبح غريب
كن لي السند
كن لي الحبيب
اكون لك شمس
وعمري ما اغيب
احييني بقربك
هعشقك من جديد
وحارب لأجلي
لأجل النصيب .
وهمست بضعف " لأجل النصيب "
انا عارفة أنه سمعني انا عارفة أنه هنا قلبي حاسس بيه .
_____________
انا حبيت واحد صغري من طفولتي وهو معايا كبرت ع وجوده جمبي وهزارنا سوا كبرت ع حبي ليه ونظرات الحب ف عينيه لكن عمره ما اعترف أو سرح ، لكن عينيه قالت لي كتير وفجأة وبدون مقدمات غاب هو موعدنيش بحاجة .
عمرنا ما اتكلمنا اصلا بس عينينا فضاحة .
لغة العيون ميفهمهاش الا نوعين من البشر : نوع داق من الحزن لحد ما القلب اكتفي
ونوع اتعذب ف الحب لحد ما القلب شاخ .
وانا الاتنين انا القلب الحزين اللي اكتفي وشاخ وهو لسه عشريني .
اعتذر للفترة العشرينية علي سوء الاستخدام والحياة ، اعتذر وبشدة .
__________________
واخيرا يوم العرض :
المخرج : الممثلة الرئيسية اعتذرت فجأة عن الحضور فين الممثلة البديلة ؟
_ يلا بسرعة دي فرصتك
" مقدرش ، انتي مش شايفة كل الناس دي "
المخرج : لأ تقدري اللي وصلت لهنا بعد تجارب الاداء واللي كتبت النص دا تقدر تعمل اي حاجة .
_ انا هنا انا جمبك ، وهو هنا
بلهفة " هو فين ؟ "
_ كل السنين اللي انتظرتي فيها هتخلص النهاردة كل وجعك هيتبدد وكل خوفك هيتولد مكانه امان .
اخدت نفس وطلعت ع المسرح ، أديت بكل مشاعري قمت بدور البطولة ، بطلة من وحي خيالي ، عشت مشاعر انا اللي خلقتها .
جينا لوقت المشهد الاخير وقت واخيرا ظهور البطل ظهور الحبيب اللي البطلة بتحكي عنه طول المسرحية .
" حارب لأجلي لأجل النصيب "
وفجأة ظهر ، دا مش بطل المسرحية ، رجعت ورا من الصدمة بصيت للجمهور والمخرج المبتسم كل حاجة بدأت تظهر ف ثواني بصيت لندي لقيتها بتعيط و بتقولي " كملي " واخيرا بصتله .
خرجنا عن النص والمسرحية ونسينا وكأن العالم مفيهوش غيري انا وهو وبس .
_ وعد أحارب العالم كله عشانك ، أحارب لأجل نظرة عينيكي ، لأجل سنين عمري معاكي .
عيطت " قلبي هلكه البعاد "
_ وانا حالي زيك تمام ، عينيكِ الحلوين كانوا ملازمين احلامي كان صبري ف غربة غيابك ، خفت تنسيني .
" والرسالة "
_ ردت ليا الروح ، روحي اللي سبتها معاكي من غبت ، الغياب اللي كان عشانك ولأجلك .
بصوت مبحوح " ليه ؟ "
_ عشان يوم ما اجي اطلب نجمة م السما ابقي قدها عشان اقف قدام العالم أجمع واقول دي حقي ونصيبي من الدنيا من غير خوف .
" قلبي مكانش عايز غيرك وبس "
_ وانا عمري ما اتمنيت م الدنيا غير عنيكي الحلوين .
وصوت حليم ف الخلفية
" اول مرة تحب يا قلبي واول يوم تتهني يا ما ع النار الحب قالولي ولقيتها من الجنة "
_________________
" أطلت النظر إليك فضللت بمحراب عينيك "
__________________
يتبع....
بدل ماتدور وتبحث علي الروايات خليها علي تليفونك وحمل تطبيقنا
