رواية ما بين الحب والحياة الفصل السادس
انت هتخطف شهد ، وبعد كدا هتحاول انك تغتصبها بس تكون مصور كل حاجة ، بعد كدا هننشر الفيديو على النت ، والناس كلها تعرف اني مظلوم وهي اللي وحشة وبكدا الفلوس هتجيلي انا لما البرامج كلها تبدأ تستضيفني
= دماغك سم يا عم خالد
المهم متنساش حاجة
= عيب يا عم خالد
يعني جاهز
= جاهز
اوعا البت تعرفك أو وشك يبان قدامها
= متقلقش هأمن نفسي كويس
جدع
" انا هوريها ازاي تخلعني انا ، دا انا كنت لاممها من الشارع ، بس ملحوقة ، هعرف ااخد حقي كويس
" ايه دا أنا ازاي نمت ، بصيت في الساعة لقيت الساعة 9 الصبح ، قومت بسرعة لبست عشان ورايا النهاردة هم كبير ، نزلت من البيت من غير حتى ما اقول ل يارا ، دعيت ان يكون الناس نسيت ولو شوية حتى ، أنا مش عايزة مشاكل ، عايزة اعرف اعيش حياتي حتى بعد لقبي الجديد ، مطلقة ، لقب هيسببلي متاعب كتير أوي ، مشيت وبدأت ادور في المحلات على شغل ، و دا كان اول محل
لو سمحت ، انتو مش محتاجين أي موظفين؟
= ايه دا ، مش أنتي شهد عادل بتاعت قضية الاغتصاب
لا مش انا
= ازاي دا أنتي شبهها جدا
انا مش جاية هنا عشان اعرف انا شبهها ولا لأ ، في شغل ليا ولا لأ
= احنا فعلا كنا محتاجين حد يمسك قسم المبيعات
و ايه الاوراق المطلوبة عشان استلم الشغل
= عايز بطاقتك الأول
هو لازم يعني
= اه طبعا لازم ، أنتي خايفة من حاجة ولا ايه
لا طبعا مش خايفة ، هخاف من ايه يعني
= طب هاتي البطاقة
" طلعتها من شنطتي ، وكنت مسكاها ب حرص شديد ، خايفة اديهاله
انا قلقان منك
= ليه كدا بس
مش عارف حاسك متوترة من ساعة ما قولت هاتي البطاقة
= لا مش متوترة ، و اتفضل اهي البطاقة
" اديتهاله وانا متأكدة ان الشغلانة كدا راحت
ايه دا ، دا أنتي طلعتي شهد عادل ، امال ليه بتكدبي بقا
= ابوس ايدك ، أنا بحاول اخفي نفسي عشان محدش يعرفني وعايزة اشتغل و اصرف على نفسي من غير ما حد يكون مركز معايا بالشكل دا
بس ازاي هتخفي نفسك والبلد كلها ملهاش سيرة غيرك ، دا أنتي بقيتي أشهر من مو صلاح
= طب هينفع اشتغل
للاسف مش هينفع ، صاحب المحل هيرفض وانا عارفه كويس ، لان طبعا أنتي بقيتي معروفة دا غير انك سوري مطلقة ، ف انا مش عايز اسببلك اي احراج
= مفيش مشكلة ، ربنا يعوضني خير
ان شاء الله تلاقي الأحسن
" المفروض يتم وضع تعريف المطلقة في القاموس هو لقب يسبب المتاعب ، بيتعامل معاه الناس كأنه حاجة عيب او حرام ، لكن محدش يعرف حصل ايه عشان اكون مطلقة سواء انا او اي واحدة مكاني ، الكل بيشوف اللي ظاهر وبس
قرأت على المحل انكو محتاجين ناس تشتغل
= اه فعلا احن... ، مين ، شهد عادل ، هات يا ابني كرسي بسرعة للنجمة
نجمة مين يا استاذ
= اتفضلي اقعدي استريحي الأول يا نجمتنا ، تحبي تشربي ايه
اشرب!
= شكلك لسة مكلتيش ، يبقا نتغدا سوا
اهدى يا عم في ايه
= وسع يا ابني للنجمة عشان زهقت ، خليها تاخد راحتها
لو سمحت انا بس عايز اسأل على الشغل
= سيبي الشغل دلوقتي على جنب ، احكيلنا بقا ايه سبب الطلاق ، وهل جوزك فعلا اغتصبك ، هو كان مريض نفسي طب ، بس شكله في اليوم دا كان شارب حاجة ، شارب صح ، شارب ايه بقا ، اكيد الزفت اللي موجود اليومين دول اللي اسمه...
كفااية ، هاا كفاية ، أنا دلوقتي سألت سؤال وعايزة رد
= مالك متعصبة ليه بس يا نجمة
" حلفت اني مش هشتغل هنا و قومت مشيت ، لكن هو مسبنيش بالسهولة دي و جه ورايا
وسع الطريق للنجمة يا ابني ، براحة على الارض يا نجمتنا
" والله لو كان بيعمل إعلان ل شيفروليه الدبابة مكنش هيعمل كدا ، بدأت اتعب وخاصة بعد ما دخلت المحل دا
صباح الخير ، محتاجين حد يشتغل هنا؟
" كانو اتنين ستات بس اللي واقفين ، اول ما شافوني كل واحدة بصت للتانية وقالو بصوت واطي
مش دي البت بتاعت قضية الاغتصاب
= اه هي
" كانو مبتسمين ابتسامة صفرا باينة وواضحة جدا وساكتين
طب ايه ، في شغل ولا لأ
= لا يا حبيبتى
" قالتها واحدة منهم ، بس كانت بتقولها بطريقة غريبة
بجد ساعديني ، أنا محتاجة الشغل عشان..
= ماهو أنتي لو كنتي حافظتي على الراجل مكنتيش احتاجتي للشغل ، لكن هنقول ايه ، نسوان معندهاش دم ، مفيش شغل هنا ، ونصيحة مني بدل ما تشتغلي ، روحي صلحي بيتك احسن
" خرجت من المحل من غير ولا كلمة ، كنت ماسكة نفسي لاخر لحظة ، مش عايزة دموعي تنزل ، مفيش حد فاهم اللي جوايا ، أو على الأقل عارف اللي حصل ، كنت بفكر اني ارجع البيت ، لكن رجعت و فكرت اني مش هينفع اتعب من البداية ، المشوار لسة طويل وكملت ، بعد لف كتير أوي ، دورت في كل المحلات لحد ما لقيت محل ملابس صغير ، دخلته ، كان موجود راجل كبير
لو سمحت ، محتاج حد يشتغل هنا في المحل؟
= اه ، أنتي عايزة تشتغلي
اه دا أنا محتاجة الشغل جدا
= تعالي بكرا استلمي الشغل من الساعة 10
مش عايز البطاقة؟
= هعوزها ليه
عشان تبقا مطمن يعني
= انا مطمن و ربنا اللي بيحرص مش انا ، كمان انا بعرف البني ادم من الشكل ، وأنتي شكلك طيبة يا بنتي
ربنا يخليك يارب ويباركلك
= امين يارب
بس المرتب هيبقا كام
= تعالي بكرا الأول وبعدين هنتكلم في كل حاجة
حاضر
" مشيت من عنده وأنا في قمة السعادة ، اخيرا لقيت الشغل ، مش مصدقة نفسي ، اتصلت ب يارا ولسة هبدأ اتكلم الموبايل فصل ، كملت مشي عشان اروح ، مستنية أي مواصلة لكن مفيش اي اثر ل عربيات ، المكان فاضي تماما لان الوقت كان متأخر ، لحد ما لقيت عربية جاية ، شاورتلها ووقفت ، بس وقفت ونزل منها 3 مغطيين وشهم ، هجمو عليا ، وبدأو يسحبوني للعربية ، بحاول اقاومهم بكل قوتي ، بصرخ ب أعلى صوتي ، هدومي بتتقطع من الشد والمقاومة لحد ما سمعت
اثبت مكانك!
" الاغتصاب الزوجي دا موجود وبيحصل ولحد الآن السبب مجهول لفعل حاجة زي كدا ، بس الاكيد ان حكمها هو انه يروح مستشفى الأمراض العقلية "
يتبع....
