رواية اعز اخت الفصل الثاني
أتصدمت أنا بشتغل عندهم من زمان وكنت معجبة بيه جدا بس كنت عارفة أنه مش هيجى ... أول مرة أحس إن ربنا عوضنى حتى لو بيكذب بس مجرد سماع الكلمة بيخلى جوايا شعور جميل أوى
_خودى وقتك كله أنا مستنيكى و لو وافقتى هكون أسعد واحد فى الدنيا
_مش خايف من أهلك ؟
_و أخاف ليه أنا مبعملش حاجة حرام أنا بحبك يا هند ومستعد أقف قدام المدفع عشانك
روحت البيت وأنا فى قمة سعادتى أول واحدة جات فى بالى أختى حنين لازم أحكيلها .
_عاوزة أحكيلك على حاجة حصلت النهاردة يا حنين
_أنا كمان عاوزة أحكيلك على حاجة كده
_تعالى نقولها فى وقت واحد
قولناها فى نفس الوقت : أنا بحب
سكت وقولت بإستغراب : معقول بتحبى يا حنين
_وفيها أى يا هند طبيعى أحب أقعدى عشان أحكيلك
فرحت وقولت : كبرتى يا حنين وبقيتى بتحبى فاكرة لما كنتى لسة عيلة وبوديكى الحضانة
_ياستى بقا المهم اللى بحبه ده بقا دكتور عندنا فى الجامعة وهو ولا متجوز ولا مرتبط وعاوزة أعترف بحبى ليه بس خايفه
أستغربت لأن عمر كمان معيد فى الجامعة وكنت بوصيه على حنين كتير
_ إنتى عارفة هو مين ... دكتور عمر اللى كنتى بتوصيه عليا
حسيت بصدمة شديدة مسمعتش هي بتقول أيه ، مش متوقعة إن حنين ممكن تحب واحد أنا كمان بحبه و هو بيحبنى ، يمكن يكون أصعب حدث مريت بيه.
_أسفة يا عمر مش موافقة
_نعم يا هند إنتى أكيد بتهزرى .. طب ليه أنا بحبك وعارف انك كمان بتحبينى
_يا عمر فيه واحدة تنفعك أحسن منى .. وبتحبك أكتر منى
_مين بقا يا هند اللى هتسيبينى عشانها
_حنين .. أختى بتحبك وأنا مقدرش أبنى سعادتى على سعادة أختى ... لو بتحبنى أتجوزها وأنسانى أنا هكون مبسوطة لما تنبسط
رغم إن عمر كان رافض رفض نهائى إلا إنى ألحيت عليه وفعلا مخيبش ثقتى فيه وجاه أتقدم و أتجوز حنين ، كنت حاسة بكسرة وأنا شايفة حبيبى بيتخطف منى ومن أقرب حد ليا بس للأسف كان بإرادتى و زى ما قال عمر أنا اللى ضيعته منى .
أتجوزت بعدها بفترة راجل كان بيجيب الطلبات للناس اللى بشتغل عندهم و اللى مكنتش أتوقعه أن حنين خافت تيجى الفرح أو حتى تباركلى .
_عاوز فلوس فيين الفلوس
_أنت أيه مش هتبطل الزفت اللى بتاخده أنا قرفت منك بقا .. أنت عندك عيال لو كبروا هيقولوا أيه أبونا راجل أستغفر الله العظيم
_بقولك أيه هاتى فلوس أحسنلك بدل ما أديكى علقة زى اللى فاتوا ومترجعيش تندمى
_أنا فعلا ندمت إنى قبلت بواحد زيك ميستاهلش يكون بنى أدم وعنده ولاد
ضربنى ومكنتش مستحملة الضرب بحاول أبعده لكن مكنش بيبعد بيضرب فيا بقوة زقيته وقع على الرخامة بتاعت المطبخ و ... مات
كنت مع حنين والظابط مكلبشنى ، عمر خرج : مفيش أمل إنتى قتلتيه يا هند .. على الأقل هتاخدى ... تأبيدة
_شوف حل يا عمر مش هسيب أختى تدخل السجن
بصيت لحنين أول مرة أشوف خوفها عليا قولتلها : خلى بالك من ولادى ..
فوقت من سرحانى لما الميكروباص وقف عند شقة صحبتى اللى ساعدتنى قالتلى لو أحتجتها أروحلها كانت حاسة إنى هكون منبوذة من المجتمع زيها رغم إنى إتظلمت.
_معلش يا ولاء هتقل عليكى هما يومين أشوف شغل بس
_تتقلى ده أيه يا هبلة ده البيت بيتك .. بس برضوا كان لازم تجيبى عيالك فى حد يسيب ضناه
_كده أحسن يا ولاء كده أحسن
عدى يومين ودورت على شغل كتير الكل كان بيرفض بعد ما بيشوف بطاقتى ، لحد ما لقيت شغل عمارة أمسحها و أنضفها !!
_ألو مين معايا؟!
صوت عمر متوتر : هند تعالى بسرعة حنين عملت حادثة ومش لاقى أى حد يتبرعلها
روحت لقيته خايف جدا وقال : عارف ان حقك ترفضى أنا لما عرفت اللى عملته حكتلها التضحية اللى قدميهالها ، قولتلها إن كان زمانك مراتى و مدخلتيش السجن
_انا مش عاوزة أتكلم فى الماضى .. فين الدكتور عشان أتبرعلها
_كنت عارف يا هند إنك هتوافقى اللى زيك ميقسوش أبدا
دخلت ونقلتلها الدم و كنت همشى من المستشفى بس لما لقيت عمر واقف ومعاع ولادى ، عيونى دمعت وبصيت بقلق من ردة فعلهم بس لقيتهم جريوا عليا .
_ماما ماما وحشتينا
حضنتهم جامد أوى حضن عشر سنين فاتوا مشوفتهومش .
بصيت لعمر : ليه يا عمر قولتلهم هيستعروا منى
عمر قال : كان لازم يعرفوا إنتى محدش يستعر منك يا هند
فضلنا مستنين حنين كتير والدكتور قالنا إنها دخلت فى غيبوبة كنت ببات معاها كل يوم ، كل يوم أبكى لربنا عشان يخليهالى ، دى كانت لسة حته لحمة حمرة وأنا اللى ربيتها بس يشاء الله إنها تموت ، ماتت حنين وكانت دى أكبر كسرة وألم وحسرة ، كان نفسى أحضنها أوى كانت وحشانى أكتر من ولادى .
_مش ناوية تتخطى يا هند
بصيتله : أنت عارف يا عمر لو كان ولد من ولادى مكنتش هزعل الزعل ده كله هو هخلف غيره لكن هى تتعوض فين .. أنا جوايا مكسور أوى .. حنين مكنتش أختى كانت بنتى كنت بحس كأنها أهم عضو فيا ودلوقتى لما راحت حاسة بالتعب
دموعه نزلت و عطالى ورقة كانت بخط أختى : هند شكرا لأنك ولتينى على نفسك أول مرة أحس إنى مكنتش بس عامية العين ومشوفتش كل تضحياتك أول مرة أحس إنى حجر مبحسش بكل اللى قدمتوهلى وفى الأخر أستعريت منك ، عارفة إنك هتسامحينى أنا مش لازم أعيش تانى لو شوفتى الورقة دى أعرفى إنى موت و بتحاسب على كل حاجة عملتها وخدتها منك .. ولأن تضحيتك كبيرة خلى بالك من عمر وأبنى أيهاب
وأتجوزت عمر و كان بيعامل ولادى كأنهم ولادى بالظبط .
فى المقابر ...
_جيت زى كل يوم إحكيلك اللى حصل معايا بس أحب أبتدى وأقولك وحشتينى أوى يا أعز أخت
تمت.
