Ads by Google X

رواية حليمة الفصل الرابع4 بقلم ندي سليمان

 


 رواية حليمة الفصل الرابع 

#حليمة4_والأخير

الفرح كان جميل لحد ما حسيت الدنيا بتلف بيا ودماغي بتغلي لمّا لمحتها ، دي أول مرة أشوفها بجد مش في الصور ، معقولة عزم " ريم" ع الفرح؟؟!!! 
كانت داخلة وكإنها واحدة من أهل العروسين ، دورت على عادل بعينيا لقيته واقف مع مجموعة من أصحابه، رجعت أدور عليها واتلاقت عيونا ، ابتسمت بمكر وبعدين قربت من سما سلّمت عليها وعلى عمرو ، كنت عاوزه أطفي غضبي وقتها لقيتني بمسك إيد بابا فابتسملي وحاوط كتفي بدراعه ، حاولت أنشغل عن مراقبتها بس ماقدرتش ، كانت قاعدة على تربيزة أصحاب 
سما بعدين فضلت باصّه في اتجاه معين ومركزه ، تابعت الإتجاه لقيت عادل كمان بيبصلها خرجِت بره القاعة وهو خرج بعدها ، الغضب زاد جوّايا وقررت أروحلهم ولو لقيتها واقفة معاه هجيبها من شعرها وإللي يحصل يحصل ، قمت فجأة فبابا استغرب وسألني :
_ رايحة فين؟ 

_ رايحة لعادل يا بابا 

ابتسم بفرحة وغمزلي :
_ مااااشي يا بت أبوكِ روحي 

رسمت ابتسامة مزيفة عشان ملامحي ماتفضحنيش ، خرجت بره بدوّر عليهم زي المجنونة ، قابلت سارة فسألتها عن عادل وقالتلي إنها لسه شيفاه عند عربيته بره ، أول ما خرجت لمحته بيوقّف تاكسي ، ركبت فيه ريم ومشي ، عديت الشارع فلمّا شافني ارتبك :
_ حليمة! خير طالعة برة ليه؟ 

ضحكت بسخرية وقلت :
_ طالعة أشوفها ماهو مش معقولة هشوفها كل مرة في الصور بس! 

_ هي مين؟ 

_ أه إنت ناوي تستعبط يعني وكده؟ 

_ فيه إيه يا حليمة مش فاهم حاجة؟ 

_ فيه إنك بجح بتعزمها على فرح أخوك عادي كده من غير حتى ماتعملّي اعتبار؟ 

_ اهدي يا حليمة إنتِ فاهمة غلط أنا ماعزمتهاش هي صاحبة س

_ أه حجة جديدة وكدبة جديدة، أصلاً مش هاممني إذا كانت جاية بعزومة منك أو لا اولعوا انتوا الإتنين أنا خلاص أساساً قرفت منك أنا بكرهك وبحمد ربنا إن كلها 5 شهور ويخلص الإتفاق وارتاح منك للأبد 

ماستنتش أسمع رد ، رجعت للقاعة ، دخلت الحمّام وفضلت أعيط لحد ما هديت بعدين غسلت وشي وداريت أثار البكا وخرجت راسمة ابتسامتي ، من الواضح إن كلامي زعّل عادل جداً عشان كان باين عليه حتى بابا لاحظ وسألني فراوغت ، واحنا راجعين ركبت مع بابا في عربيته وكان نفسي أنام في حضنه عشان هيسافر بكرة بس طبعاً لو عملت كده كان هيشك فينا خصوصاً إنه لاحظ ضيق عادل في الفرح... 
دخلت الأوضه قبله، غيرت هدومي ولمّا سمعت خطوات رجليه اتمددت ع السرير وعملت نفسي نايمة ، غيّر هدومه ونام جمبي من غير كلام ، كل واحد مدّي ضهره للتاني بس الأرواح غير!

 روحي كانت بتبكي في حضن روحه، كل مرة نتخانق فيها عادل بيبادر ويحاول يصالحني بطرق غير مباشرة بس المرة دي هو فعلاً متضايق منّي ، حتى لمّا حاولت استفزه قابل استفزازي بهدوء ، كان بيوصلني للإمتحانات من غير كلام لحد ما أخرج يسأل سؤال واحد " عملتِ إيه؟" وبرد رد واحد مهما كان حال الإمتحان " الحمدلله تمام" ، فكرت كتير أعتذرله أقوله وحشتني ووحشتني خناقاتنا فكرت كتير أجرب أنام ع الأرض تاني يمكن يحن ويرجع ينيمني في حضنه بس كبريائي بيمنعني عشان خايفه يصُدّني لحد ما رجع من الشغل في يوم وأخيراً قالي :
_ إزيك؟ 

سيبت الموبايل وابتسمت وأنا بقول :
_ الحمدلله كويسه وإنت؟ 

رد من غير ما يبصلي :
_ الحمدلله ، استعدي عشان هوديكِ عند أهلك 

سألت بخوف :
_ ليه؟! 

_ مسافر تبع الشغل بره مصر 3 شهور وممكن المدة تطول 

قلبي وجعني فسألت بتردد :
_ ه هو مش هينفع يعني أسافر معاك؟؟ 

ابتسم بسخرية وقال :
_ لا مش هينفع ، وأعتقد دي فرصة كويسة أهه ترتاحي مني لحد ما المدة الباقية من الإتفاق تخلص 

رديت بحدة :
_ أحسن برده وبعدين مين قالك إني عاوزه أروح عند أهلي مايمكن مبسوطة هنا وإنت مالك أنا حرة 

سكت شويه وبعدين رد بهدوء :
_ معاكِ حق وأنا مالي! اعملي إللي يريحك 

قال جملته وقام طلّع شنطة السفر من الدولاب وبدأ يجهّز هدومه ، ده الموضوع طلع بجد!! حسيت إني مش قادرة أتنفّس من الخنقة ، خرجت من الأوضة لقيت عمّي تحت بيقولي :
_ ليه قلتِ لعادل لا ومش عاوزه تروحي معاه يا حبيبتي؟ أهه فرصة تقضوا شهر عسل تاني وتتفسحوا بعد تعب أعصابك في الإمتحانات

فهمت إن عادل قاله الرفض منّي فقلت :
_ مرة تانية إن شاء الله يا عمي كمان يعني بابا وماما وحشوني فهنتهز الفرصة وأسافرلهم شوية 

رد بحزن :
_ يعني عمرو وسما سافروا وعادل مسافر وإنتِ كمان اهه كلكم هتسيبوني في البيت لوحدي؟ 

_ لا أنا مش هسافر كل الأجازة ممكن حضرتك تبقى توديني نقضي أسبوع هناك أو أكتر ونرجع سوا 

_ خلاص إذا كان كده ماشي 

فضلت تحت لحد الليل وعادل مانزلش طول الوقت ده، عرفت من عمّي إن طيارته الساعة 9 الصبح ، طلعت الأوضه لقيته قافل النور ونايم ، اتمددت جمبه وغصب عني لقيتني بعيط ، معقوله هتحرم منه 3 شهور بحالهم وكمان ممكن يزيدوا ! حتى لحظات الصمت بينّا بحبها ، عارفه إن ليه حق يزعل من إللي قلته بس غصب عني قلت كده، الأنثى في الغيرة مفيش لوم عليها لا في قول ولا فعل! 
قربت منه بهدوء وكل ما أقرّب أحس الدفا بيغمرني أكتر ، رفعت راسي اتأكد إنه نايم ولمّا اتأكدت حضنته من ضهره عشان دي فرصة قلبي الوحيدة يحس بدفاه ، شوية وحسيت بيه بيتقلّب فضلت ثابته في مكاني عشان مايصحاش ، معرفش هو كان وقتها عامل نفسه نايم ولا نايم بالفعل بس هو شدّني لحضنه فاستخبيت فيه لحد ما النوم زار عيوني ، صحيت الصبح حاسه إني بردانه ، فتحت عيوني مالقيتش عادل جمبي ، قمت مفزوعة بدوّر عليه ، ملهوش أثر في الأوضه ولا الحمام ، معقوله خلاص مشي؟ بصيت في الساعة ولقيتها 9 يعني زمانه ع الطيارة دلوقتي لقيتني بعيط زي ماكنت بعمل وأنا صغيرة لمّا أصمم أروح مع بابا في مكان ويقولي طاب روحي البسي وأرجع مالقيهوش! 

اتطمنت من عمي على وصوله ، للدرجة دي يا عادل؟ حتى مافكرتش تطمني عليك! 
سافرنا الصعيد أنا وعمّي وهناك تعبت وحرارتي ارتفعت وماكنتش باكل ، كل ما أغمض عيني أشوفه وأفتكر كل اللحظات إللي جمعتنا ، افتكرت رحلة الساحل لمّا تعبت وكنت كل ما أفتح عينيا ألاقيه ، فتحتهم على أمل إني ألاقيه بس كانت أختي بتعملّي كمّادات ، غمضت عينيا تاني عشان أفضل شيفاه، سمعت موبايلي بيرن وفجأة الدنيا بقت ربيع لمّا سمعت أختي بتقول " إزيك يا عادل؟" معقوله هو فعلاً ولّا دي هلاوس من التعب! ادتني الموبايل وخرجت ، همست " ألو" فقال :
_ إزيك يا حليمة؟ 

أول ما سمعت صوته بكيت، المكالمة كلها كان هو إللي بيتكلم ويوصيني على صحتي وأكلي مانطقتش فيها غير إني همست ب " حاضر" كنت عاوزه أسمعه وبس وكإن دوايا صوته من بعد المكالمة بدأت صحتي تتحسن ، كل يوم أروح عند مُهرة أحكيلها عنه وأضحك على المواقف إللي كانت وقتها خناقات ، لو عندي شك إني بحب عادل فالشك في الفترة دي أصبح يقين ، سافرت مع عمّي وهو ماشي عشان ماسيبهوش لوحده وعشان أوضتنا وحشتني ، عادل كان بيكلمني كل يوم يتطمن عليا ويقفل من غير مانفتح أي مواضيع مش مهم المهم إني بسمع صوته ولو لدقايق ، انتهزت فرصة نجاحي وطولنا المكالمة شوية وأنا بحكيله عن فرحتي فسألني سؤال أربكني ووجع قلبي قالي :
_ ناوية على إيه بقى في حياتك بعد ماننفصل إن شاء الله؟ 

ماقدرتش أرد ندهلي فقلت :
_ لسه معرفش 

بعدها اعتذرت ونهيت المكالمة عشان لو كنت كملت رجفة صوتي كانت هتفضح بكايا ، في الفترة دي أدمنت ريحة عطره ، كانت عندي طقوس قبل النوم ، ألبس قميص من قمصانه أرشه بعطره وأنام ، عشان أقدر أحس بوجوده وحضنه ، مرّوا 3 شهور بشق الأنفس كنت طايرة من الفرحة عشان عادل هيرجع وقررت وقتها اعتذرله واعترفله بحقيقة مشاعري بس صدمني إنه هيفضل شهرين كمان هناك كان بيوصلّي الخبر بجملة قاسية أوي " خلاص اهه افرحي يا ستي هقعد شهرين كمان يعني هترتاحي مني لحد آخر مدة العقد وبمجرد ما أرجع هترتاحي مني للأبد" يومها قفلت السكة في وشه و كنت عاوزه أصرخ ، تاني يوم عمّي كان رايح زيارة لعمرو وسما وقالي لو عاوزه أروح معاه بس ماكنتش عاوزاهم يشوفوني بالحالة دي، ده غير إني لو روحت هتحرم من طقوسي إللي بتحسسني بحضن عادل قبل النوم ، سافر عمّي وطلعت أوضتي ، كعادة كل ليلة لبست قميص عادل ورشيت عطره في كل الأوضه ونمت ، كنت بحلم بيه لمّا انتشلتني من حلمي هزّه خفيفة وقُبلة على جبيني ، فتحت عيوني بهدوء ولقيت عادل قدامي!!! 

يُتبع 💙

(8)

فتحت عيوني بهدوء ولقيت عادل قدامي، اتعدلت بسرعة وأنا بسأل :
_ هو إنت بجد؟؟! 

ضحك و باس باطن كفّي ، اترميت في حضنه والفرحة مش سيعاني ، شد ضمته عليّا ، معرفش فضلنا ع الحال ده قد إيه بس أنا ماكُنتش عاوزه أبعد عن حضنه ، دوبنا في سكرة الحب وفرحة اللقا بعد حُمّى الحنين و نار الإشتياق وشهرزاد كانت على وشك إنها تسكت عن الكلام المُباح لكن فجأة عادل بعد عنّي و كإنّه اتبدل لشخص تاني وهو بيقول بحدة :
_ آسف نسيت اتفاقنا ، ماتقلقيش الغلطة مش هتتكرر 

ابتسمت، مسكت إيديه بحنان وقلت :
_ عمرها ما كانت غلطة يا عادل يمكن وقتها خانّي التعبير عشان يومها ح

سحب إيديه وهو بيقاطعني :
_ مش عاوز أعرف السبب مش مهم ، صحيح فين إنعام وسميرة أنا جعان و مالقيتهمش تحت؟!! 

رغم إني مستغربة ردة فعله ابتسمت تاني وقلت :
_ هم أخدوا أجازة انهارده ، حالاً هحضرلك العشا 

_ لا لا مفيش داعي أنا خلاص هطلب دليفري 

_ ليه دليفري إنت مادوقتش أكلي قبل كده جرّب 

_ لا مُتشكر مش عاوز أجرب حاجة 

خرج من الأوضه وسابني في حيرة مش فاهمة تصرفاته، في الليلة دي استنيته كتير بس مارجعش خرجت أدور عليه لقيته نايم في أوضة عمرو ، فكرت أدخل أنام معاه بس كان نايم في نص السرير بطريقة ماتكفيش حد تاني جمبه ، رجعت على أوضتي محبطة وأنا حاسه بحزن واشتياق ليه.. 

لمّا صحيت الصبح مالقتهوش في البيت ، بس لقيت عمّي بيشرف ع الشغّالات وهم بيجهّزوا أوضة عمرو وسما ، سلمت عليه وفرحت لمّا عرفت إن عمرو وسما هيسكنوا معانا على الأقل وقت ما اتخنق أو أحس بالوحدة هلاقي سما اتكلم معاها.. 
عادل من يوم ما رجع من السفر وهو بيعاملني بجفاء رغم كل محاولاتي للفت انتباهه أو الكلام معاه ، تصرفاته غريبة ، بيغيب بره البيت كتير في غير مواعيد شغله بل وأحياناً بيبات بره ، لمّا يكون بيتكلم في الموبايل وأقرّب منه ينهي المكالمة ، حاسّه إنه مخبّي عليّا حاجة، عرفت من سما بطريقة غير مباشرة إن ريم زميلتها في الدفعة وإنها جت الفرح لإن سما عزمت الدفعة كلها ع الجروب وبناءً عليه حاولت أعتذرله على ظنّي كمان حاولت أحكيله عن الرسايل والصور إللي وصلتني من ريم بس هو مش بيدني فرصة وكإنه بيتعمد يعمل كده ، في مرة دخلت الأوضه وسمعته بيقول "وحشتيني أوي" و أول ما لمحني قال " طيب هكلمك وقت تاني" ماقدرتش أتعامل بهدوء أكتر من كده ، دخلت الأوضة بإندفاع وسألت بغضب :
_ كنت بتكلم مين؟؟ 

_ وبتسألي









 ليه؟؟ 

_ عشان حقّي 

_ لا مش من حقك هل أنا بتدخل في خصوصياتك؟ 

_ كنت بتقول لمين وحشتيني؟ وبتروح فين كل يوم؟ وبتبات بره فين؟ كنت بتكلم ريم مش كده؟!!! 

رغم غضبي ضحك بعدين رد بحدة :
_ مفيش فايدة! واضح إنها ماكانتش مدة كافية عشان تتعلمي، عموماً وإن كان ده مش من حقك فأنا بكلم سارة وحتى وإن كنت بكلم ريم فأعتقد ملكيش دخل خلاص كلها أقل من شهر وكل واحد هيروح لحاله ويعمل إللي عاوزه 

خرج وسابني باصّه للفراغ إللي كان ماليه بحزن ، الأمور بتزيد تعقيد ومابقتش عارفه أتصرف ، معقوله إحساس قلبي غلط؟، معقولة كان بيتهيألي إنه حبّني! 
الوقت بيمر ونفسيتي بتتعب أكتر وعادل لسه بيعاملني بجفاء ورغم كده بقيت أتمنى لو الزمن يقف شوية عشان أفضل معاه وقت أطول ، حاسه إني بتصرفاتي ضيعته من إيديا ، خلاص باقي يوم واحد بس وتنتهي المدة ، لو كنت حليمة إللي بدأت الاتفاق كنت هبقى فرحانة بحريتي إللي قربت بس دلوقتي لا أنا حليمة إللي كانت ولا هو عادل السجّان إللي كنت خايفه منُّه ، اكتشفت إن كل لحظة عيشتها معاه كانت حرية ، كل لحظة في قُربه حياة ، كنت قاعدة مستنياه في البلكونة، كعادته متأخر بره ، رغم إنه لمّا بيوصل بعمل نفسي نايمه بس مابقدرش أنام قبل ما اتطمن على رجوعه بخير ، حتى الكنبة إللي كان مطلعها بره رجعها تاني ، بس ماكنتش بنام عليها ، كنت عاوزه أعيش كل لحظه باقيه في قربه ، لمحت عربيته فجريت عشان ألحق أعمل نفسي نايمه ، دخل الأوضه ، كنت مغمضه عيوني بس حاسه بيه وهو بيغير وتوقعت الخطوة الجاية هينام جمبي لكن اتفاجئت بيه سحب كرسي جمب السرير وقال :
_ أنا عارف إنك صاحية ، حابه تقومي نتكلم ولّا أقول الكلمتين إللي عندي و أسيبك تكملي تمثيلية النوم؟ 

فتحت عيوني وقمت ، قعدت قدامه ع السرير وقلت بصوت مهزوز :
_ ممكن تسمعني الأول؟ 

_ وأسمعك ليه؟ إنتِ امته سمعتيني أو ادتيني فرصة اتكلم؟! إنتِ وبس القاضي ، قاضي ظالم بتصدري أحكامك من غير ماتسمعي فليه عوزاني أسمعك 

ماقدرتش أمسك دموعي فقال :
_ مش عاوز دموع لو سمحتِ هم كلمتين هقولهم واتفضلي كمّلي نومك ، دلوقتي خلاص بكره آخر يوم أنا كل

قاطعته بصوت مهزوز من البكا :
_ اسمعني الأول ، أنا بجد آسفة عارفه إني غلطت في حقك وفي كل مرّة بتكبر ع الاعتراف بغلطي بس أرجوك اسمعني 

حكيتله عن الرسايل ، وريتله الصور وسمّعته الصوت فقال بهدوء :
_ لو كنتِ وقتها قولتيلي كنت هوريكِ نفس الصور دي بتواريخها الأصلية وهسمّعك المقطع إللي اتقصت منه الجملة دي ، ومش هلوم عليها اهه مُبررها واحدة حبت وحاربت عشان حبها حتى ولو بطرق غير مشروعة لكن إنتِ 

_ أنا بحبَّك 

سكت أوّل ما سمعها مني ولاحظت ارتجافة إيديه ولمعان عينيه ، اتخيلت إنه هياخدني في حضنه وينتهي الوجع بقى لكن ماتخيلتش إنه بالقسوة إللي تخليه يزوّد الوجع بردُّه :

_ ياريت تستعدي عشان هنتحرك ع الصعيد في الفجر مش عاوزين نتأخر ع المأذون 

رمى جملته و خرج من الأوضه ، فضلت أعيط بحرقة ، سحبت المخدة وكتمت أنفاسي عشان صوت نحيبي مايطلعش ، حاولت أهدى وقمت ألم هدومي وحاجتي ، كل ما أمسح دموعي تجود عليا عيوني بفيضان .... 
لبست نفس الفستان إللي جيت بيه ، صليت الفجر وفضلت أدعي يخف وجع قلبي وينتهي الكابوس ده ، قعدت مستنياه زي إللي مستني ياخدوه لأوضة الإعدام ، دخل ومن غير كلام شال الشنط وبعدين همس " يلا " ، ودعت كل ركن في أوضتي و نزلت وراه بهدوء ، ركبت العربية واتحركنا ، عينيا كانت وجعاني من كتر البكا فغمّضتها، روحت في النوم وحلمت إني ببكي في حضنه ، فقت لمّا حسيت بوقوف العربية ، فتحت عيوني لقيته بيقولي :
_ انزلي يلا عشان وصلنا 

ماكنتش فاهمة حاجة ، واقفين في مكان غريب ، قدام بيت أول مرة أشوفه ، نزلت من العربية لقيته بيفتح البوابة بمفتاح معاه فاستغربت أكتر ، دخلت وراه وأنا بسأل :
_ إحنا فين؟! هو ده بيت مين؟! 

وقف والتفتلي وهو بيبصلي بغضب ، قرّب مني وقال :
_ عاوزه تعرفي ده بيت مين؟! 

خفت من بصته وماقدرتش أرد فابتسم ، للحظة حسيت نفسي بتخيل لكن لقيته بيقول :
_ مش قادر أمثل أكتر من كده صراحة  

_ أ أنا مش فاهمة حاجة!! إنت 

_ أنا بحبِّك 












جسمي ارتجف، حاسة إني لسه بحلم! شدني لحضنه فبكيت بس المره دي بفرحة ، ضمني لحضنه أكتر وهو بيقول :

_ أنا آسف على كل لحظة بكيتِ فيها وآسف إني خليتك تتعذبي الفترة إللي فاتت وقسيت عليكِ بس كان لازم تتعلمي من أخطاءك ، قولتلك قبل كده ريم كنت حاسس إن في حاجة ناقصة وأنا معاها عشان كده نهيت كل حاجة وقطعت علاقتي بيها من قبل فرح عمرو ويوم ماشوفتينا أنا كنت بطردها عشان ماتشوفيهاش وتضايقي ، أنا معاكِ حاسس إن النقص إللي كنت حاسس بيه في الحب اكتمل ، حاسس إني مش عاوز حاجة تانية من الدنيا غير وجودك ، اللحظة في قربك حياة ، تبقي مجنونة لو فاكرة إني ممكن أفرط فيكِ أو أسمح إنك تبعدي عني لحظة تانية، كنت بغيب عنك الفترة إللي فاتت عشان أجهّز البيت ده ، "بيتنا " إللي هنملا كل ركن فيه بذكرياتنا

رفع راسي من حضنه وحضن وشي بكفه وهو بيقول :
_ تقبلي تتجوزيني بجد وتكوني شريكة حياتي؟ 

ماكنتش مصدقة كل إللي سمعته ، وإن في لحظه كده كل دموع الحزن اتحولت لدموع فرحة ، جاوبت بإيماءة عشان ماكنتش قادره أنطق من المفاجأة، رجع حضنّي وقال :
_ يلا عشان نتفرج على بيتنا 

دخلنا البيت وأنا حاضنه دراعه كإني خايفه يهرب! 
وأول ما الباب اتفتح لقيت مفاجأة ماتوقعتهاش ، زغاريد اخواتي وأمي صدحت في المكان ، قربت أمي وحضنتني، 
ماكنتش مصدقة ولا فاهمة حاجة ، مسكت ايدي وقالت :
_ يلا يا عروسة مفيش وقت 

طلعت مع أمي بسألها عن إللي بيحصل فقالت إن عادل حب يحتفل بعيد جوازنا بإنه يعملّي فرح عشان ما قدرناش نعمل من سنة ، طبعاً ده السبب إللي قاله للكل بس أنا وهو بس إللي عارفين السبب الحقيقي ، عادل اتصل فخرجت البلكونة أرد عليه واتفاجئت بشكل الجنينة ، متجهزه للفرح بشكل مُبهر ، رديت :
_ إنت لحقت تعمل كل ده امته؟! 

_ مش مهم امته المهم إني لحقت ، عارف إنك ماخترتيش تفاصيل البيت ولا الفستان بس كنت عاوز كل حاجة تبقى مفاجأة وبعدين أنا خلاص حفظت ذوقك 

ضحكت بفرحة :
_ البيت تحفه وماتقلقش واثقه في ذوقك 

_ يلّا عشان ماعطلكيش أنا عملت الفرح بالنهار عشان نلحق نرتاح قبل ميعاد الطيارة 

_ طيارة إيه؟؟ 










_ شهر العسل ، هو هينفع نعمل فرح من غير شهر عسل يعني يا عروستي ! 
أنا كنت عروسة بجد! حلم ماكنتش بفكر فيه ويوم مافتحوا الوصية كنت فاكرة إني عمري ماهلبس الفستان الأبيض ولا هعيش اليوم ده! 
الفستان كان حلو أوي عليّا ، بابا مسك إيديا وسلّمني لعريسي 
فرحانه إنه عاش لحظة كان بيحلم بيها ، عادل مانسيش ولا تفصيلة في اليوم ده ، وكإن السنة إللي فاتت من عمري دي اتمحت في لحظة ، خلص الفرح وبقينا لوحدنا في بيتنا ، ولمّا دخلنا أوضتنا عادل طلب مني حاجة غريبة :
_ ممكن تلبسي قميصي إللي كنتِ لبساه يوم ما رجعت من السفر 

ضحكت وأنا مستغربة :
_ اشمعنه يعني؟! 

_ عشان في اليوم ده ماكنتش قادر أقاوم شكلك وأنا بمثل عليكِ وكنت عاوز أقول كلام كتيييير فنعيد اليوم بقى عشان أقول إللي كنت عاوز أقوله 

قفل الباب وسكتت شهرزاد عن الكلام المباح..... ~
عادل كان عنده حق يوم ما قالي إن أحياناً الأشخاص السيئين 
في حياتنا محتاجين نشيل الغشاوة إلا على عينينا عشان نشوف حقيقتهم يمكن نكون غلطانين ! 
شيلوا الغشاوة من على عيونكم يمكن يكون فيه واحد من السيئين إللي شايفينهم في حياتكم بيحبكم بجد ويتحول بين يوم وليلة لأقرب حد ليكم ، كتبت حكايتنا عشان أحكيها لابننا إللي هينور دنيتنا بعد أيام ...... 


بدل ماتدور وتبحث علي الروايات خليها علي تليفونك وحمل تطبيقنا

تحميل تطبيق سكيرهوم
تعليقات



حجم الخط
+
16
-
تباعد السطور
+
2
-