رواية حب مستحيل الفصل الثاني والعشرون
حب مستحيل 22
قولتي ايه يا بسمه تقبلي تتجوزيني ولا لا ؟؟
استغفر الله العظيم بيقول ايه المجنون دا ؟
يا محمد انت فرحك بعد عشر ايام وانت عارف اني انا قاعده هنا أصلا عشان تحضيرات فرحك ، يبقى ايه لازمة الجنان اللي انت بتعمله دا ؟؟
- يا بسمه افهميني فرح ايه وهباب ايه بس دلوقتي انا قولتلك مش بحبها ومش عاوزها خلاص لاني لو اتجوزتها هابقى بخدعها وبخدع نفسي لاني من كتر ما انا حبيتك حاسس نفسي هبقي شايفك فيها وحرام أظلم بنت الناس لأنه قلبي هيفضل دايما معاكي ، ودي اسمها نداله وانا عمري ما كنت ندل يا بسمه افهميني 💔
طيب وايه الحل يعني ؟؟!
- قولتلك الحل اني اسيبها ما دام احنا لسه على البر وبعدين اتقدملك يا بسمتي
وطيت راسي بإرتباك ومكنتش عارفه اجاوبه ولا أقوله ايه ، اخر ما اتغلبت قولتله مش عارفه اقولك ايه يا محمد اعمل اللي يريحك "
طلعت وسيبته هناك يجي ساعتين بعدها طلع وباين في عيونه ملامح الغضب
- نادي على امه وقالها تعالي عاوز اتكلم معاكي شويه على انفراد ، راحتله امه وهي مرتبكه لانه شكله مكانش يطمن .
اما انا فـ فضلت في الاوضه اللي جنبهم وعارفه انه خلاص اتجنن ، يا ترى هيهبب ايه دلوقتي ؟ يارب استر يارب هات العواقب سليمه يارب
والمشكله الأكبر فيه ودي كانت اكتر حاجه مخوفاني انه من لما كان صغير محدش كان يقدر يغير رأيهه عن قرار هو قرره عن قناعه مهما كانت صِلته بيه ، دماغه زي الحجر من يوم يومه
- امي انا عايز اقولك على حاجه بس اسمعيني كويس وحاولي تفهميني ارجوكي.
- خير اللهم اجعله خير ؟ خضيتني يابني مالك !!
- انا البنت دي مش هاقدر اتجوزها ، عاوزك تروحي لناسها وتقوليلهم خلاص مفيش نصيب احنا مش عاوزينها الجوازه دي
- مش اييييه ؟؟! عيد كلامك تاني كده ما سمعتكش كويس !!! بطلنا ازاي هو لعب عيال ؟
دا جواز يا واد وحقوق وعقود وكتب كتاب ومؤخر ومقدم وبلاوي زرقه انت واعي لنفسك بتقول ايه ؟
- ياما قولتلك ما بحبهاش ليه عاوزين تغصبوها على ، انتي اللي شوفتيها وانتي اللي اخترتيها حد فيكم شاورني ولا خد رأيي قبل ما تروحي انتي وابويا تكتبو الكتاب ؟
- ما احنا سألناك وانت اللي قولت اعملو اللي يريحكم ! ايه اللي اتغير يا ابني ؟ ليه عايز تفضحنا وسط الخلق دا ابوك مش حمل بهدله وجرجره فـ المحاكم ، هي مش خطوبه عشان تفسخها يا محمد دا جواز مثبت بعقد رسمي ، اعقل يا بني ما تحطناش في الموقف دا الله يرضى عليك احنا ما صدقنا انك حطيت عقلك فـ راسك ووافقت هيقولو علينا ايه الناس ؟!
- ياما انا عمري ما كنت مجنون عشان اعقل واللي اتغير اني مش عايز اظلمها معايا دي حياتي انا ومن حقي اعيشها مع اللي يختارها قلبي انا مش انتم ، انا اللي فيا مكفيني مليش دعوه بكلام بالناس يقولو ايه ، يقولو اللي هما عاوزين يقولوه ان شاء الله يخبطو دماغهم فـ الحيط حتى ما يهمنيش كلامهم !
- لاااا دا انت اتجننت رسمي !! شكلك عاوز تفضحنا في البلد كلها وتخلي كل من هب ودب يجيب سيرتنا انا احسن حاجه هعملها اني اطلع منه الموضوع دا وانت وابوك تتصرفو مع بعض تتفلقم منك ليه انا مش حمل تعب القلب دا !!
سابته أمه وطلعت مقهوره وهو كان جايب اخره صوته كان واصل لآخر الشارع انا كنت خايفه على طنط نفيسه قوي خصوصا انها عندها الضغط وممكن اي صدمه تأثر عليها ؟
" يا فضيحتك يا بسمه بكره سيرتك هتبقى علي كل لسان ؟ مسيرهم يعرفو أنه عاوز يطلقها بسببك انتي يا غبية ! اودي وشي فين منهم بعد كده 😥؟كنت طول الوقت بـ سمع كلامهم وانا قلبي بيتقطع عليه ودموعي نازله زي الشلال ، كان صعبان عليا لان صوته كان فيه وجع الدنيا كلها ومبين من كلامه أنه شويه وهينهار !
فضلت قافله على نفسي في الاوضه مستنيه اشوف هيحصل ايه ، هو يعني بعد اللي حصل دا هيكون ليا عين اواجه أمه ؟ وطبعا هو فضل في اوضته وباين عليه من حدة كلامه انه جاب آخره
- بعدها بشويه ابوه دخل عنده !
- ايه الكلام الفاضي دا اللي حكتهولي امك من شويه ؟
جواز ايه دا اللي انت مش عاوزه هي بنات الناس لعبه معاك ؟
- يابويا انا خدت قراري خلاص وما اسمحش لحد يتدخل فيه انا الجوازه دي مش عاوزها ولو مش هتقدر تروحلهم انت هـ روح انا واقولهم مستعد لـ اي شروط بس بنتكم تفضل عندكم خلاص مش لازمانا !
- مش لازمانا ازاي يا ابن ال..... عايز توطي راسي قدام الخلق يقولو ابني مش راجل ولا قد مسؤوليه ؟
- يابويا يقولو اللي يقولوه مش فارقه معايا المهم اشوف مصلحتي فين وبعد إذنك رايح البحر اهدي اعصابي شويه لاني خلاص مش قادر اتحكم في اعصابي اكتر من كده !
- روح ان شاء الله تغور في ستين داهيه اهو ارتاح منك ومن دماغك اللي انشف من الحجر دي !
- وطبعا عمي حسن كمان مريض سكر واي انفعال مش كويس على صحته ، طلع محمد من اوضته وساب ابوه هناك وشغال يدعي عليه
والمهم سمعت صوت العربيه والباب اتخبط جامد ! فتحت الباب عايزه اتأكد أنه مشي ، يادوب بافتح الباب لقيته في وشي 😲 ..
بدل ماتدور وتبحث علي الروايات خليها علي تليفونك وحمل تطبيقنا
