 |
رواية يلا بينا نعرف نبينا الفصل الثاني بقلم اسماء2 #يللا_بينا_نعرف_نبينا يلا صلوا على النبى .. قبل ما ندخل بقى جوا السيرة هحكيلكم قصة حقيقية صغيرة عشان تعرفوا إحنا أزاى فكرنا فى موضوع السيرة وكده - القصة دى عن بنت كندية كانت نصرانيه وأسلمت .. ابوها قسيس كبير فى كنيسة وهى بتشتغل خادمة فى الكنيسة ( وخادمة دى مش يعنى خادمة بالمعنى بتاعنا ، خادمة يعنى بتعمل حاجات تطوعية فى الكنيسة فى كندا ) والبنت دى أسلمت فجأة ومنعرفش إيه السبب . فواحد مرة بيكلمها فقالتله : أنا أسلمت وانا مقتنعه جداااا بدينى . فسألها سؤال : إيه رأيك فى نبى الإسلام قبل ما تدخلى الإسلام وبعد ما دخلتى الإسلام ؟! قالتله : قبل الإسلام كنت أعلم أنه رجلا مجنون ، عنيف ، ويقتل كل من لا يؤمن بدينه ، شاهر سيفه متعطش للدماء . الراجل استغرب و قالها طيب وبعد الإسلام ؟ قالتله : بعد الإسلام عرفت إن هو أعظم إنسان مشى على وجه الأرض . قالها : طيب أيه أكتر أمنية نفسك فيها ؟ م قالتله : نفسى فى حاجة واحده بس .. نفسى أموت .. قالها : ليه طيب ده الإسلام دين التفاؤل وحب الحياة ، دين جميل مفهوش كآبة .. ليه عايزه تموتى ؟ قالتله : عشان دى الطريقة الوحيدة اللى هشوفه بيها عليه الصلاة والسلام وأقف قدامه واكلمه ! أنا بقيت بحب الموت عشان أقابله عليه الصلاة والسلام . قام الراجل سألها سؤال : طيب توجهى رسالة إيه للعرب المسلمين اللى بيعرفوا لغة القرآن ؟ قالتله إجابة صعبة اوووى : هقولهم حاجة واحده بس ، سامحكم الله يا مسلمين إذ لم تعرفونا من هو محمد !! الله بيننا وبينكم يوم القيامه .. صعبه أوى .. لما تقول أنا هقف قدام ربنا يوم القيامة وأقوله هم المسلمين دول السبب .. ولا عرفونا بي رسول الله ولا بيمثلوا أخلاقه .. إحنا مش بنشوف فيهم اللى المفروض نشوفه .. فدى كانت أهم حاجة خليتنا نقول لأ .. طيب هنقف قدام ربنا نقوله إيه ؟؟ وحنبص فى وش النبي عليه الصلاة والسلام ازاي ؟ كانت فكرة الصفحة أننا نوصل سيرته بأسهل طريقة ممكنه للناس اللى مش بتقدر تقرا كتب عنه أو تنزل تروح مكان تسمع عنه . مهو مش معقول أكتر إنسان بيحبك وأكتر إنسان هيبقى شايل همك يوم القيامة متعرفش عنه غير حاجات بسيطة . هنبدأ إن شاء الله فى " البوست " اللى بعد كده نحكى مواقف لحب الصحابة رضى الله عنهم للرسول صلى الله عليه وسلم ، ومواقف رحمته وحبه صلى الله عليه وسلم لأصحابه وزوجاته ولينا إحنا ولكل أمته .. فالله سبحانه وتعالى ، وملائكته ، ورسله ، وسيدنا جبريل ، وكل الناس والكائنات ، يحبون رسولنا وحبيبنا صلى الله عليه وسلم . نكمل بكرة ان شاء الله #السيرة_النبوية_بالعامية هذة الحلقات نقلا عن استاذة نورهان الشيخ |
بدل ماتدور وتبحث علي الروايات خليها علي تليفونك وحمل تطبيقنا
